Heber

11 Haporseaon, i ma pos ni roha na togu na ingkon saut do na tahirim i. Haporseaon i do na patuduhon* na tutu do na tahaporseai i nang pe ndang tarida. 2 Alani haporseaon ni angka ompunta najolo do, umbahen na dipatuduhon Debata na lomo rohana tu nasida.

3 Alani haporseaon do umbahen na taantusi, marhite hata ni Debata do ditompa nasa na adong di langit dohot di tano on.* Jala nasa na tarida i dibahen sian angka na so tarida.

4 Alani haporseaon do umbahen dipelehon si Abel pelean na dumenggan tu Debata sian pelean ni si Kain. Marhite haporseaonna i, dipatuduhon Debata do naung diulahon ibana na sintong, ai dijalo Debata do silehon-lehonna i. Nang pe naung mate si Abel, alai mangkatai dope ibana marhite haporseaonna.

5 Alani haporseaon do umbahen dipapinda Debata si Henok. Gabe ndang dihilala ibana be na hansit tingki naeng mate. Jala ndang adong be ibana manang na didia pe. Alai andorang so dipapinda dope ibana, dipatuduhon Debata do na lomo rohana tu ibana. 6 Molo ndang porsea sasahalak tu Debata, ndang boi bahenonna las roha ni Debata. Ai manang ise na naeng manomba Debata, ingkon porsea do ibana na adong Debata, jala na lehononna do upa tu halak na marsitutu mangalului Ibana.

7 Alani haporseaon do umbahen ditangihon si Noak sipasingot ni Debata, taringot tu na naeng masa na so niidana dope. Dioloi ibana do Debata jala dibahen ibana ma parau asa malua keluargana. Marhite haporseaonna, dipatuduhon ibana ma na patut do portibi on diuhum. Jala marhite haporseaonna didok do ibana mangulahon na sintong.

8 Alani haporseaon do umbahen na mangoloi si Abraham, tingki disuru Debata ibana borhat tu inganan na laho silehonon ni Debata tu ibana. Ditadingkon ibana do hutana nang pe ndang diboto dope manang tu dia ibana laho. 9 Alani haporseaonna i, gabe halak panompang do ibana di luat na dijanjihon ni Debata tu ibana. Di kemah do ibana maringanan, rap dohot si Isak nang si Jakkob na dohot manjalo janji i. 10 Ai dipaima-ima si Abraham do kota na marfondasi na hot, i ma kota na binahen jala na pinajongjong ni Debata.

11 Alani haporseaon do umbahen na boi si Sara mardenggan daging,* nang pe nunga matua ibana. Ai pos do rohana, haposan do Debata na mangalehon janji i. 12 Alani i nang pe nunga matua situtu* si Abraham, tubu do godang pinompar sian ibana, songon godang ni bintang na di langit jala songon godang ni pasir na di topi ni laut na so habilangan.

13 Tongtong do nasida marhaporseaon sahat tu na mate. Nang pe ndang dipasaut Debata dope janjina di ngolu ni nasida, alai ditatap nasida do i sian na dao. Las do roha ni nasida manjalo i, dipaboa nasida do tu angka halak, na panompang do nasida jala holan satongkin do nasida maringanan di luat i. 14 Molo didok halak do songon i, tangkas ma patuduhon na marsitutu do nasida mangalului inganan na hot di nasida. 15 Molo sai diingot nasida do inganan na tinadingkon ni nasida i, sasintongna boi dope nasida mulak tusi. 16 Alai marsitutu do nasida mangalului inganan na dumenggan na hombar tu na di banua ginjang i. Alani i ndang maila Debata didok Debata ni nasida, ai nunga diparade Ibana sada kota di nasida.

17 Alani haporseaon ni si Abraham, pola do naeng dipelehon ibana si Isak, tingki diuji Debata ibana. Tutu, las do roha ni si Abraham manjalo angka janji i, jala rade do ibana mamelehon anakna na sasada i, 18 nang pe nunga didok Debata hian tu ibana, “Sian si Isak do ro pinomparmu na hujanjihon i.” 19 Pos do roha ni si Abraham na boi Debata pahehehon anakna i sian hamatean, jala dijalo ibana do muse anakna i mulak tu ibana. Laos gabe gombaran do i tu na naeng masa di ari na naeng ro.

20 Alani haporseaon do si Isak mamasu-masu si Jakkob dohot si Esau, jala dipaboa ibana do tu nasida angka na laho masa di ari na naeng ro.

21 Alani haporseaon do si Jakkob mamasu-masu anak ni si Josep na dua i di na laho mate ibana. Jala tungkotna nama ditiop ibana laho marsinggang manomba Debata.

22 Alani haporseaon do umbahen na dipaboa si Josep taringot tu hamumulak ni halak Israel sian Mesir tingki laho mate ibana. Jala diparentahon ibana do asa boanon ni nasida holi-holina* sian i.

23 Alani haporseaon do umbahen na ditabunihon natua-tuana si Musa sahat tu na marumur tolu bulan ibana. Ai bagak do diida nasida poso-poso i jala ndang mabiar nasida tu parenta ni raja. 24 Alani haporseaon do umbahen na so olo si Musa dung magodang digoari anak ni boru ni si Firaun. 25 Tumagon do didok rohana marsitaonon rap dohot bangso ni Debata sian apala marhasonangan satongkin di bagasan dosa. 26 Ai didok rohana, ummarga do gabe Halak na Pinillit* ni Debata sian sude arta na di Mesir nang pe gabe marlea ibana. Ai ditatap ibana do upa na laho dilehon tu ibana di ari na naeng ro. 27 Alani haporseaon do umbahen na ditadingkon si Musa tano Mesir, ndang ala mabiar ibana tu rimas ni raja i. Tongtong do ibana togu, ai songon na diida ibana do Debata na so boi idaon i. 28 Alani haporseaon do umbahen na diulahon ibana Paska jala dipispishon mudar tu tiang ni pintu, asa unang dibunu* suru-suruan ni Debata anak siangkangan ni nasida.

29 Alani haporseaon do umbahen na didalani halak Israel Laut Rara, songon na mandalani tano na mahiang. Hape tingki naeng lewat halak Mesir sian i maup do nasida.

30 Alani haporseaon do umbahen na marumpak tembok ni kota Jeriko dung dihaliangi bangso Israel kota i saleleng pitu ari. 31 Alani haporseaon do umbahen na so mate si Rahab boru-boru na so hasea i rap dohot angka halak naung mangalo Debata, ai denggan do dijalo ibana mata-mata ni halak Israel.

32 Taringot tu ise dope na naeng paboaonku? Ndang adong be tingkingku molo ingkon paboaonku dope taringot tu si Gidion, si Barak, si Simson, si Jepta, si Daud, si Samuel dohot angka panurirang na asing. 33 Alani haporseaon do nasida boi manaluhon angka harajaon, mangulahon na sintong, mandapot angka janji i, manutup baba ni singa, 34 mangintopi api na marjimbur-jimbur jala malua sian podang. Gale do nasida alai gabe dapotan gogo, marhamonangan do nasida di parporangan jala dilele nasida do tentara ni bangso na asing. 35 Dijalo angka borua do sisolhotna na hehe sian hamatean. Na deba ndang olo manadingkon haporseaonna laho mandapot haluaon. Disiksa do nasida sahat tu na mate asa hehe tu hangoluan na dumenggan. 36 Na deba nai diuji, dileai, dilinsingi, jala pola do dirante, dung i dipenjarahon. 37 Didangguri do nasida dohot batu, diela-ela, digergaji,* dibunu dohot podang, marabithon kulit ni biru-biru dohot kulit ni hambing, marhahurangan, marsitaonon, jala dibahen do na hansit tu nasida. 38 Ndang tama portibi on di nasida. Maringanan do nasida di padang pasir, di angka dolok, di angka goa, dohot di angka lubang di toru ni tano.

39 Nang pe dipatuduhon Debata na lomo rohana tu nasida alani haporseaon ni nasida, alai ndang diida nasida dipasaut Debata sude janjina. 40 Ai sian najolo nunga marsangkap Debata laho mangalehon na dumenggan tu hita. Alani i, ndang boi sun denggan nasida molo ndang rap dohot hita.