Heber

12 Ala songon ombun do godang ni saksi* na mangkaliangi hita, tabolongkon ma boban dohot dosa na boi mangambati hita di parlumbaanta. Alani i, tongtong ma hita marlojong di parlumbaan naung ditontuhon tu hita. 2 Huhut marlojong, manat ma taparrohahon Jesus Pamimpin ni haporseaonta, jala na mambahen sun denggan haporseaonta. Alani las ni roha naung diparade di jolona, sabar do ibana manaon na hansit di hau partinaonan* i, jala ndang maila ibana alani i. Saonari, nunga hundul ibana di siamun ni habangsa ni Debata. 3 Sabar do ibana manaon angka hata ni jolma na mardosa na mangalo ibana. Nang pe sasintongna parohon jea do i tu diri ni nasida sandiri. Alani i ingot hamu ma ibana, asa unang loja jala asa unang mandele hamu.

4 Ndang hea dope hamu naeng mate* alani mangalo dosa i. 5 Nunga lupa hamu tu poda ni Debata naung manjou hamu gabe anakna. Ai ninna do, “Ale anakku, unang ma leas roham tu sipasingot* na sian Jahowa, jala unang ma mandele ho tingki dipinsang. 6 Ai dipinsang* Jahowa do sude halak na hinaholonganna, jala dilinsingi* Ibana do ganup halak naung dijou gabe anakna.”

7 Sabar ma hamu tingki dipinsang, ai dalan laho mangajari* hamu do i. Dibahen Debata do hamu songon anakna. Ai dia ma adong anak na so dipinsang amangna? 8 Molo ndang sude hamu manjalo pinsang-pinsangna i,* ndang anakna hamu, anak ni na asing do hamu. 9 Asing ni i, tapasangap do amangta na di tano on nang pe dipasingot hita. Alani i, nda tama do pasangaponta Amangta na di banua ginjang i, na mamillit hita marhite tondi parbadiana asa boi hita tongtong mangolu? 10 Holan satongkin do amangta na di tano on pasingothon hita, mangihuthon na sintong di roha ni nasida. Alai anggo Amangta na di banua ginjang i, dipasingot do hita laho mambahen na denggan tu hita jala asa boi hita badia songon Ibana. 11 Tutu, parohon hansit* ni roha do pinsang-pinsang i tingki dilehon, ndang las ni roha. Alai dung salpu i, parohon hadameon do i tu angka halak naung mandapot pangajarion ala mangulahon lomo ni roha ni Debata.

12 Alani i, patogu hamu ma tangan na hitir-hitir dohot dugul-dugul na gale. 13 Patigor hamu ma sidalanan ni patmuna, asa unang lam hansit patmuna na gale i, alai asa malum. 14 Marsitutu ma asa mardame hamu tu sude halak, jala badia ma parngoluonmuna. Ai molo ndang songon i, ndang adong na boi mangida Tuan* i. 15 Manat ma, asa unang adong sian hamu na so manjalo asi ni roha ni Debata na mansai balga i, asa unang tubu urat na marasun na mambahen parsoalan jala na mambahen ramun godang halak. 16 Unang ma adong sian hamu na mangulahon seks na so patut,* manang na so mangargai angka na badia songon si Esau. Ai digadis ibana do hak ni siangkangan alani samangkuk sipanganon. 17 Ai diboto hamu do ujungna, tingki naeng manjalo pasu-pasu i si Esau, ndang dapotna pasu-pasu i. Nang pe tumatangis ibana jala marsitutu asa muba roha ni bapakna, alai tongtong do ndang dapotna pasu-pasu i.

18 Ai ndang tu Dolok Sinai na so tarjama i hamu disuru asa ro, i ma dolok na marjimbur-jimbur dohot api, na dihaliangi ombun na golap jala na mansai holom dohot haba-haba. 19 Disi, tarbege do soara ni tarompet na gogo dohot soara ni na mangkatai. Dung dibege bangso i soara i, mangelek-elek ma nasida asa unang mangkatai be soara i tu nasida. 20 Ai mabiar situtu do nasida tu parenta na mandok, “Sada binatang pe dais tu dolok on, ingkon dangguran do i sampe mate.” 21 Ai parohon biar do na masa i, pola do didok si Musa, “Mansai mabiar do ahu jala hitir-hitir.” 22 Alai ro do hamu tu Dolok Sion, kota ni Debata na mangolu i, i ma Jerusalem na di banua ginjang. Adong do disi marpulu ribu* suru-suruan 23 na marpungu, punguan ni angka anak buha baju naung tarsurat goarna di banua ginjang, Debata Sipanguhum ni saluhutna, dohot hangoluan ni angka na mangulahon na sintong na pinillit ni Debata marhite tondi parbadiana naung dibahen sun denggan. 24 Jala adong do muse disi Jesus parhitean ni parjanjian na imbaru, dohot mudar na dipispishon na dumenggan sian mudar ni si Abel.

25 Manat ma hamu asa unang adong sian hamu na so manangihon* na mangkatai i. Ndang boi malua sian panguhuman halak na so manangihon sipasingot ni Debata na dipaboa tu tano on. Songon i ma nang hita, ndang boi hita malua molo ndang tatangihon soara ni na mangkatai na sian banua ginjang i! 26 Di tingki i, dihutur soarana i do portibi on, alai saonari dijanjihon Ibana do, “Huturonku ma sahali nai portibi on, alai ndang holan i dohot do langit i.” 27 Hata “sahali nai” patuduhon na laho pasidingon ni Debata do angka na tarhutur i, i ma angka na so na binahenna, asa hot angka na so tarhutur i. 28 Ala jaloonta do Harajaon na so tarhutur i, tongtong ma tajalo asi ni roha ni Debata na mansai balga i, na mambahen hita boi manomba Ibana hombar tu lomo ni rohana, mardongan biar ni roha dohot sangap tu Ibana. 29 Ai songon api na pasudahon do Debatanta i.