Hesekiel
9 Dung i gogo ma soarana mandok tu pinggolhu, “Jou ma akka halak na lao manghukum kota on. Ganup sian nasida ikkon mamboan sinjatana lao manghancurhon kota on!”
2 Dung i huida ma adong onom bawa na ro sian gerbang parginjang+ na menghadap tu utara, ganup sian nasida mamboan attuk-attuk. Adong do muse sada bawa mamakke baju linen. Di pinggangna adong inganan ni alat tulis ni sahalak sekretaris.* Masuk ma nasida jala jongjong ma di labbung ni langgatan na sian tombaga.+
3 Dung i tarangkat ma hamuliaon ni Debata ni Israel+ sian ingananna, i ma na di atas ni akka kerubim.* Pinda ma hamuliaon ni Debata tu pintu ni bagas joro i.+ Dung i makkatai ma Ibana tu bawa na mamakke baju linen i, jala na mambahen inganan ni alat tulis ni sekretaris di pinggangna. 4 Dung i didok Jahowa ma tu ibana, “Dalani ma sude kota Jerusalem, jala lehon ma tanda tu dahi ni akka halak na sai holsoan. Ai marsak situtu+ do nasida alani ulaon na huhagigihon na diulahon di kota i.”+
5 Jala tu akka na asing didok Ibana ma, “Ihutton hamu ma ibana mandalani sude kota i. Jala bunu hamu ma jolma na disi. Dang boi asi rohamuna mangida nasida. Jala dang boi burju hamu tu nasida.+ 6 Pamate ma sude bawa na matua, doli-doli, anak boru, dakdanak, dohot borua.+ Pamate ma nasida sude. Alai unang bahen manang aha pe tu akka halak na adong tandana.+ Ulahon ma i mulai sian inganakku na badia i.”+ Dung i diulahon nasida ma i. Dipamate nasida ma parjolo akka bawa na matua na adong di jolo ni bagas joro i.+ 7 Didok Ibana ma muse tu nasida, “Bahen hamu ma ramun* bagas joro i, jala gohi ma alamanna dohot bakke ni halak naung hona bunu i.+ Lao ma hamu!” Jadi lao ma nasida jala dibunu nasida ma akka halak na di kota i.
8 Tikki dibunu nasida akka halak na di kota i, holan au do na dipasombu mangolu. Gabe marsomba ma au jala hudok ma, “Amang Jahowa Tuan Natumimbul, na naeng pamateonmu do sude halak Israel na mangolu di kota on tikki diusehon Ho rimasmi tu Jerusalem?”+
9 Dung i didok Ibana ma tu au, “Nungnga tung massai balga situtu hasalaan ni halak Israel i, dohot hasalaan ni halak Juda i.+ Nungnga tung gok mudar ni halak na use di luat i.+ Jala gok hajahaton do kota i.+ Ai didok nasida do, ‘Nungnga ditadikkon Jahowa luat on, jala dang diida Jahowa i.’+ 10 Alani i dang asi rohakku mangida nasida. Jala dang patuduokku burju ni rohakku tu nasida.+ Ikkon bahenokku do hilalaon ni nasida akibat ni pangalaho ni nasida.”
11 Dung i huida ma mulak bawa na marbaju linen i, na mambahen inganan ni alat tulis ni sekretaris di pinggangna. Didok ibana ma, “Nungnga huulahon be sude dos songon na diparettahon Ho tu au.”