Panguhum

15 Dung manang na sadia leleng, lao ma si Simson manjuppangi istrina i. Tikki i, musim panen gandum do. Diboan ibana do sada anak ni hambing, jala didok ma, “Naeng pajuppang jo au dohot istrikku di kamarna.” Alai diorai simatuana doli do ibana masuk. 2 Didok simatuana i ma, “Hurippu do sogo roham tu ibana.+ Alani i, nungnga hupamuli ibana tu sahalak doli-doli na gabe pandonganim+ tikki na marpesta i hamu. Umbagak do adekna sian ibana. I ma buat di ho.” 3 Alai didok si Simson ma, “Sahali on, dang boi salahonon ni halak Palistim au molo hubahen na jahat* tu nasida.”

4 Lao ma si Simson jala ditakkup ibana ma 300 anjing hutan.* Dibuat ibana ma dua-dua anjing hutan i, dipadomu ma ihurna jala diikkat ma sada obor tu ihurna i. 5 Dipagalak si Simson ma akka obor i jala dipalua ma akka anjing hutan i tu ladang gandum ni halak Palistim. Gabe tartutung ma gandum naung hona ikat, dohot na di ladang dope. Jala tartutung do muse ladang anggur dohot ladang hau jetun ni nasida.

6 Disukkun halak Palistim i ma, “Ise do na mambahen on?” Didok akka halak ma tu nasida, “Si Simson hela ni halak Timna i. Ai dipamuli simatuana doli do istri ni si Simson tu doli-doli pandonganina i.”+ Dung i ditutung halak Palistim ma istri dohot simatua doli ni si Simson.+ 7 Alani i, didok si Simson ma tu nasida, “Molo songon i do dibahen hamu tu au, dang pasombuonku hamu. Balosokku do na binahenmuna i.”+ 8 Dipamate si Simson ma nasida sada-sada* jala godang ma na mate. Dung i lao ma ibana jala tinggal di liang* batu na di Etam.

9 Di pudian ni ari, ro ma halak Palistim tu Juda jala markemah ma nasida disi. Dung i dikalilingi nasida ma huta Lehi.+ 10 Disukkun halak Juda ma tu nasida, “Boasa ro hamu mangalo hami?” Didok nasida ma, “Na lao manakkup si Simson do hami, asa dibahen hami tu ibana songon na binahenna tu hami.” 11 Lao ma 3.000 halak Juda tu liang batu na di Etam. Didok nasida ma tu si Simson, “Dang diboto ho na dirajai halak Palistim hita?+ Boasa songon i dibahen ho tu hami?” Didok si Simson ma, “Songon dia dibahen nasida tu au, songon i do hubahen tu nasida.” 12 Alai didok nasida ma, “Na lao manakkup ho do hami, asa pasahatonnami ho tu halak Palistim.” Didok si Simson ma, “Marsumpa ma hamu, dang na lao pamateonmuna au.” 13 Didok nasida ma, “Holan ikkatonnami do ho, jala pasahatonnami ma ho tu nasida. Dang na lao pamateonnami ho.”

Dung i diikkat nasida ma ibana mamakke dua tali na baru jala diboan ma ibana kaluar sian liang* batu i. 14 Dung sahat si Simson di Lehi, marsurak ma halak Palistim mangida ibana. Dibahen tondi parbadia ni Jahowa ma ibana lam gogo.+ Gabe malua ma tali i sian tanganna. Ai nungnga songon bonang na tartutung tali na mangikkat tanganna i.+ 15 Dapot ni si Simson ma osang-osang ni halode jantan na baru mate. Dibuat ibana ma i jala dipakke ma i pamatehon 1.000 halak.+ 16 Didok si Simson ma,

“Osang-osang ni halode do hupakke pamatehon akka musu jala hupapungu do bakke ni nasida!

Osang-osang ni halode do hupakke pamatehon 1.000 halak.”+

17 Dung didok si Simson songon i, dibolokkon ibana ma osang-osang ni halode i. Dibahen ibana ma goar ni inganan i Ramat-lehi.*+ 18 Dung i, mauas situtu ma ibana jala ninna ma tu Jahowa, “Ho do na mangurupi naposomon asa monang. Alani i, unang ma pasombu au mate mauas saonari. Jala unang ma pasombu au dipamate halak na so marsunat.” 19 Dibola Debata ma sada lubang na di Lehi jala kaluar ma aek sian i.+ Dung diinum si Simson aek i, mulak ma gogona jala las ma rohana. Digoari ibana ma inganan i En-hakore* jala adong dope i sahat tu saonari di Lehi.

20 Saleleng 20 taon ma si Simson gabe panguhum ni halak Israel. Tikki i, dirajai halak Palistim do huta i.+