1 Samuel
16 Ujungna, didok Jahowa ma tu si Samuel, “Sadia leleng nai ho marsak mamikkiri si Saul?+ Dang olo be Au mambahen ibana toktong gabe raja ni halak Israel.+ Isi ma miak tu tanduk+ jala lao ma ho. Dapotton ma si Isai+ halak Betlehem i. Ai nungnga hupillit sahalak sian anakna gabe raja.”+ 2 Alai didok si Samuel ma, “Boha ma bahenokku mangulahon i? Ai molo dibege si Saul i, pamateonna ma au.”+ Didok Jahowa ma, “Boan ma sada anak ni lombu, jala dok ma, ‘Na lao mangalehon pelean do au tu Jahowa.’ 3 Suru ma si Isai ro tikki mangalehon pelean ho. Dung i, paboaokku ma tu ho aha na ikkon sibahenonmu. Manang ise halak na hupaboa tu ho, ikkon pillitonmu* do ibana di Au.”+
4 Diulahon si Samuel ma na nidok ni Jahowa. Dung sahat ibana di Betlehem,+ gabe mabiar ma akka pangituai* ni kota i. Disukkun nasida ma si Samuel, “Mamboan barita na denggan do ho ro?” 5 Didok si Samuel ma, “Ido. Na lao mangalehon pelean do au tu Jahowa. Pabadia hamu ma dirimuna asa rap lao hita tu ulaon mangalehon pelean i.” Dung i, dipabadia si Samuel ma si Isai dohot akka anakna, jala ditogihon ma nasida ro tu ulaon i. 6 Tikki ro nasida, diida si Samuel ma ro si Eliab.+ Didok ibana ma, “On do ra halak na pinillit ni* Jahowa i.” 7 Alai didok Jahowa do tu si Samuel, “Unang ma ida rupana dohot timbona,+ ai dang hupillit ibana. Dang songon cara ni jolma cara ni Debata mangida jolma. Ai rupa do na niida ni jolma, alai anggo Jahowa roha do na niidana.”+ 8 Dung i dijou si Isai ma si Abinadab+ jala diboan ma ibana tu jolo ni si Samuel. Alai didok si Samuel ma, “Ibana pe dang halak na pinillit ni Jahowa.” 9 Diboan si Isai ma muse si Samma.+ Alai didok si Samuel ma, “Ibana pe dang halak na pinillit ni* Jahowa.” 10 Dung diboan si Isai anakna na pitu i tu jolo ni si Samuel, didok si Samuel ma, “Dang adong sian nasida na pinillit ni Jahowa.”
11 Ujungna, didok si Samuel ma tu si Isai, “On do sude anakmu?” Didok si Isai ma, “Adong dope anakku siappudan.+ Na so mulak dope ibana marmahan biru-biru.”+ Didok si Samuel ma tu si Isai, “Jou ma ibana, ai dang mangan hita molo so ro dope ibana.” 12 Dung i, dijou si Isai ma ibana jala diboan masuk. Poso dope ibana, bagak do matana, jala ganteng do rupana.+ Didok Jahowa ma, “Jongjong ma ho, pillit* ma ibana. Ai ibana do halak na hupillit!”+ 13 Dibuat si Samuel ma tanduk na marisi miak,+ jala diusehon ibana ma i tu ulu ni si Daud* di jolo ni akka abangna. Mulai sian i, songgop ma tondi parbadia ni Jahowa tu si Daud.+ Dung i, mulak ma si Samuel tu Rama.+
14 Tikki i, dang dilehon Jahowa be tondi parbadiana tu si Saul.+ Dipasombu Jahowa do susa roha ni si Saul, gabe busisaon ma ibana.+ 15 Didok akka parkarejo ni si Saul ma tu ibana, “Ale rajanami, nungnga dipasombu Debata be susa roham, alani i do busisaon ho. 16 Molo denggan di roha ni tuan, suru ma dilului akka naposomon halak na malo marharpa.+ Tikki dipasombu Debata susa roham jala busisaon ho, suru ma ibana marharpa asa dame pakkilalaanmu.” 17 Dung i, didok si Saul ma tu akka parkarejona, “Lului ma halak na malo marharpa jala boan ma tuson.”
18 Sahalak sian parkarejona mandok, “Adong do huida sahalak sian anak ni si Isai halak Betlehem na malo marharpa. Halak na gogo do ibana jala na barani.+ Bijak do ibana,* ganteng,+ jala didongani Jahowa do ibana.”+ 19 Dung i disuru si Saul ma halak mandok tu si Isai, “Suru ma ro si Daud anakmu na marmahan biru-biru i mandapotton au.”+ 20 Dibuat si Isai ma roti, anak ni hambing, dohot anggur naung dibahen tu inganan ni anggur na sian kulit. Dibahen ma i sude tu ginjang ni halode jala disuru ma si Daud mamboan i tu si Saul. 21 Dung i dijuppangi si Daud ma si Saul jala dibahen ma si Daud gabe parkarejona.+ Massai holong do roha ni si Saul tu si Daud, gabe dibahen ma ibana mamboan sinjatana. 22 Disuru si Saul ma halak mandok tu si Isai, “Paloas ma si Daud toktong gabe parkarejokku, ai holong do rohakku tu ibana.” 23 Tikki dipasombu Debata susa roha ni si Saul jala busisaon ibana, dibuat si Daud ma harpana jala marharpa ma ibana. Gabe dame ma pakkilalaan ni si Saul jala dang busisaon be ibana.+