Johannes

19 Dung i, disuru si Latus ma asa diboan Jesus jala disuru asa dilinsingi. 2 Didandan angka tentara i ma suga-suga gabe songon mahkota, dibahen ma i tu uluna, jala dibahen ma pangkeonna abit na piolet. 3 Mulak-ulak ma nasida ro tu jolo ni Jesus huhut mandok, “Horas,* Raja ni Jahudi!” Jala dipastapi nasida ma bohina. 4 Kaluar ma muse si Latus jala didok ma tu natorop i, “Ida hamu ma! Huboan do ibana tuson, asa diboto hamu ndang adong dapothu diulahon ibana na sala.” 5 Kaluar ma Jesus mamangke mahkota na sian suga-suga jala mamangke jubah na piolet. Didok si Latus ma tu nasida, “Ida hamu ma baoa on!” 6 Dung diida angka malim kepala* dohot angka petugas i ibana, marsurak ma nasida mandok, “Uhum mate ibana tu hau! Uhum mate ibana tu hau!” Didok si Latus ma tu nasida, “Hamu ma na mamboan ibana jala na manguhum mate ibana, ai ndang adong dapothu diulahon ibana na sala.” 7 Dialusi halak Jahudi i ma ibana, “Adong do patiknami. Jala mangihuthon patiknami, ingkon mate do ibana. Ai didok ibana do dirina anak ni Debata.”

8 Dung dibege si Latus na nidok ni nasida i, gabe lam mabiar ma ibana. 9 Masuk ma ibana muse tu jabu ni gubernur i, jala disungkun ma Jesus, “Sian dia do haroroanmu?” Alai ndang dialusi Jesus ibana. 10 Didok si Latus ma tu ibana, “Ndang alusanmu ahu? Ndang diboto ho na marhuaso ahu paluahon ho dohot manguhum mate ho?” 11 Dialusi Jesus ma ibana, “Ndang marhuaso ho tu ahu, molo so Debata na mangalehon huaso i tu ho. Alani i, umbalga do dosa ni halak na pasahathon ahu tu ho.”

12 Dung i, dilului si Latus ma dalan laho paluahon Jesus. Alai marsurak ma halak Jahudi mandok, “Molo dipalua ho ibana, ndang dongan ni Kesar ho. Manang ise na mambahen dirina raja, na mangalo Kesar do i.” 13 Dung dibege si Latus angka hata i, diboan ibana ma Jesus tu luar. Hundul ma si Latus di kursi panguhuman di inganan na marlante batu, di bahasa Heber goarna Gabbata. 14 Hira-hira jam 12 arian* do di tingki i jala marsogotna i ma ari Paska.* Didok si Latus ma tu angka halak Jahudi i, “Ida hamu ma! On do rajamuna!” 15 Alai marsurak ma nasida muse mandok, “Pamate ma ibana! Pamate ma ibana! Uhum mate ma ibana tu hau!” Didok si Latus ma tu nasida, “Pamateonku ma rajamuna on?” Dialusi angka malim kepala* ma, “Holan Kesar i do rajanami.” 16 Gabe dipasahat si Latus ma Jesus tu nasida asa diuhum mate tu hau.

Dung i diboan nasida ma ibana. 17 Huhut dituhuk Jesus hau partinaonan* i, mardalan ma ibana tu inganan na digoari Golgata di bahasa Heber, lapatanna Inganan ni Tangkurak. 18 Disi, dipakkuhon nasida ma ibana tu hau rap dohot dua halak na asing, sada di siamunna jala sada nai di hambirangna. 19 Disurat si Latus ma di sada papan, “Jesus halak Nasaret Raja ni Halak Jahudi.” Dung i dibahen ma i tu hau partinaonan* i. 20 Godang do halak Jahudi na manjaha i, ai jonok do Jerusalem tu inganan ni Jesus na dipakkuhon tu hau i. Jala tarsurat do i di bahasa Heber, Latin, dohot Junani. 21 Alai didok angka malim kepala* ni halak Jahudi i ma tu si Latus, “Unang ma surat, ‘Raja ni Halak Jahudi’, alai surat ma, ‘Didok ibana do dirina Raja ni Halak Jahudi.’” 22 Didok si Latus ma mangalusi, “Naung husurathon i, hot ma i songon i.”

23 Dung dipakkuhon angka tentara i Jesus tu hau, dibuat nasida ma abit luarna, dibagi opat ma i, sabagian be ma ganup tentara i. Dibuat nasida ma muse abitna na asing na pinangkena, i ma abit na tinonun sian ginjang sahat tu toru, ndang marpanjaruman. 24 Dung i didok tentara i ma sama nasida, “Unang ma taribaki abit on. Tabahen ma undi laho manontuhon manang di ise abit on.” Masa pe i asa saut do na tarsurat i, “Dibagi-bagi nasida do abit luarhu jala dibahen nasida do undi tu abithu na asing.” Sasintongna, songon i ma na binahen ni angka tentara i.

25 Jongjong do ina ni Jesus di lambung ni hau partinaonan* i rap dohot angka anggi ni inana, i ma si Maria tunggane boru ni si Kleopas dohot si Maria Magdalena. 26 Tingki diida Jesus jongjong inana dohot sisean na hinaholonganna disi, didok ibana ma, “Inang, i ma anakmu!” 27 Dung i didok Jesus ma tu sisean i, “I ma inangmu!” Mulai sian i, diboan sisean i ma ina ni Jesus tu jabuna.

28 Dung diboto Jesus naung marujung sude ulaonna laho manggohi na tarsurat i, didok ibana ma, “Mauas ahu.” 29 Adong ma disi gunsi marisi gok anggur na asom. Dung i, disornophon nasida ma bunga karang tusi jala dibahen ma tu hau-hau* laho dilehon inumonna. 30 Dung didai Jesus anggur na asom i, didok ibana ma, “Nunga marujung!” Dung i, unduk ma uluna jala mate ma ibana.

31 Ari Sabbat do marsogotna i. Alani i, ndang olo halak Jahudi molo tongtong targantung bangke di hau partinaonan i saleleng ari Sabbat (ai ari Sabbat na balga do on). Dipangido halak Jahudi ma tu si Latus asa diponggol pat ni angka na targantung i jala dipaturun bangke ni nasida. 32 Dung i, laho ma angka tentara i mamonggolhon pat ni sidua halak na targantung rap dohot Jesus. 33 Alai dung sahat nasida tu Jesus, diida nasida ma nunga mate ibana, gabe ndang diponggol nasida be patna. 34 Ditullangkon sahalak sian angka tentara i ma hujurna tu rusuk ni Jesus, pintor kaluar ma mudar dohot aek. 35 Halak na marnida na masa i do na paboahon i jala sintong do na pinaboana i. Diboto halak na paboahon i do na sintong na nidokna i asa dohot nang hamu gabe porsea. 36 Masa pe i asa saut do songon na tarsurat i, “Ndang adong na ponggol* nanggo sada pe holi-holina.” 37 Jala adong do muse ayat na asing na mandok, “Idaon ni nasida ma ibana naung tinullang ni nasida i.”

38 Dung salpu angka i, dipangido si Josep na sian Arimatea ma tu si Latus asa paturunonna bangke ni Jesus. Dioloi si Latus ma i, dung i laho ma ibana mambuat bangke ni Jesus. Sisean ni Jesus do ibana alai ndang dipaboa ibana tu halak na asing, ala mabiar do ibana tu halak Jahudi. 39 Dohot do si Nikodemus ro tusi. Ibana do na hea manjumpangi Jesus borngin-borngin. Diboan ibana do hira-hira 30 kilogram miak mir na dicampur dohot gaharu. 40 Dibuat nasida ma bangke ni Jesus i, dibungkus nasida ma dohot abit linen dohot rempah-rempah mangihuthon hasomalan ni halak Jahudi laho mangkubur sasahalak. 41 Jonok tu inganan ni Jesus diuhum mate adong do sada porlak. Di porlak i, adong sada kuburan na baru na so hea dope dipeakkon bangke ni manang ise tusi. 42 Ala ari Sabbat ni halak Jahudi do marsogotna i jala jonok do kuburan i, dipeakkon nasida ma bangke ni Jesus tu kuburan i.