Ulaon ni Apostel

21 Nang pe borat rohanami manadingkon nasida, alai borhat do hami jala markapal tu Kos. Marsogotna i sahat ma hami di Rodos jala sian i torus ma hami tu Patara. 2 Dung dapotnami kapal na laho borhat tu Penisia, nangkok ma hami tu kapal i jala borhat ma hami. 3 Diida hami do pulo Siprus di sabola hambirang, alai torus do hami markapal tu Siria. Dung i so ma kapal i di Tirus laho paturunhon angka barang. 4 Hulului hami ma angka sisean na disi. Dung jumpang, tading ma hami disi rap dohot nasida saleleng pitu ari. Marhite panogu-noguon ni tondi parbadia, mulak-ulak do dipaboa tu si Paulus asa unang laho ibana tu Jerusalem. 5 Dung dapot tingkina, hutadingkon hami ma nasida jala hutorushon hami ma pardalanannami. Sude do nasida paborhathon hami sahat tu luar ni kota, dohot ma i angka borua nang angka dakdanak. Dung sahat hami di topi ni laut, marsinggang ma hami sude jala martangiang. 6 Dung masijalangan, nangkok ma hami tu kapal jala mulak ma nasida tu jabu ni nasida be.

7 Dung markapal hami sian Tirus sahat ma hami di Ptolemais. Dijumpangi hami ma angka dongan na disi jala sadari ma hami tading disi rap dohot nasida. 8 Marsogotna i borhat ma hami jala sahat ma di Kaesarea. Disi, masuk ma hami tu jabu ni si Pilippus jala rap tading dohot ibana. Ibana sahalak parbarita na uli jala sahalak sian pitu baoa na pinillit ni angka apostel na di Jerusalem. 9 Adong do opat boru ni si Pilippus na so marhasohotan dope jala manurirangi do nasida. 10 Dung manang na piga ari hami disi, ro ma sahalak panurirang na margoar si Agabus sian Judea. 11 Ro ma ibana mandapothon hami. Dibuat ibana ma ikat pinggang ni si Paulus jala ditalihon ma i tu pat dohot tu tanganna. Ninna ma, “On ma hata na didok marhite tondi parbadia, ‘Songon on ma talion ni halak Jahudi na di Jerusalem nampuna ikat pinggang on, jala pasahaton ni nasida ma ibana tu bangso na asing.’” 12 Dung hubege hami hata i, rap ma hami dohot angka dongan na disi mangelek-elek si Paulus asa unang laho ibana tu Jerusalem. 13 Dung i didok si Paulus ma, “Boasa tumatangis hamu jala boasa naeng bahenonmu gale rohangku? Ai ndang holan tartali, mate pe di Jerusalem nunga rade ahu ala ni Tuan Jesus.” 14 Ala ndang tarbahen hami be manang aha laho mangorai, ndang hupaksa hami be ibana. Alai hudok hami ma, “Sai lomo ni roha ni Jahowa ma na saut.”

15 Dung manang na piga ari hami disi, huparade hami ma na porlu di pardalanan jala borhat tu Jerusalem. 16 Dohot do manang na piga sisean sian Kaesarea rap dohot hami. Ditaruhon do hami tu jabu ni si Manason na sian Siprus naung leleng gabe sisean, asa disi hami marborngin. 17 Dung sahat hami di Jerusalem, las do roha ni angka dongan na disi manjalo hami. 18 Marsogotna i, laho ma hami rap dohot si Paulus manjumpangi si Jakobus jala disi do sude sintua. 19 Dijalang si Paulus ma nasida. Dung i, dipatorang ibana ma tu nasida angka naung binahen ni Debata di tonga-tonga ni bangso na asing marhite ulaonna marbarita.

20 Dung dibege nasida hatoranganna i, dipuji nasida ma Debata. Dung i didok nasida ma tu si Paulus, “Ale Paulus, dongannami, nunga diida ho marribu halak Jahudi na gabe porsea jala marsihohot do nasida mangihuthon Patik i. 21 Alai dibege nasida do barita taringot tu na niajarhonmu tu sude halak Jahudi asa ditadingkon* nasida patik ni si Musa. Didok ho do asa unang disunat anakkon ni nasida jala asa unang diihuthon nasida adat naung diulahon sian najolo. 22 Tontu begeon nasida ma naung ro ho tuson. Jadi songon dia ma bahenonta? 23 Alani i bahen ma songon na hudok hami on: Adong do dison opat halak baoa naung marjanji tu Debata. 24 Laho ma ho rap dohot nasida, bahen hamu ma ulaon paiashon diri jala garar ma na porlu tusi, asa digusting nasida obuk ni nasida. Dung i botoon ni sude halak ma na so toho barita na binege ni nasida taringot tu ho, ai diihuthon ho do Patik i. 25 Jala taringot tu angka bangso na asing naung gabe porsea i, nunga hutongos hami surat laho paboahon tu nasida naung huputushon hami, asa dipadao nasida dirina sian naung dipelehon tu angka gana-ganaan, sian mudar, sian binatang na mate so sineat,* dohot sian seks na so patut.”*

26 Marsogotna i, ditogihon si Paulus ma siopat halak i asa dibahen nasida ulaon paiashon diri. Dung i masuk ma ibana tu bagas joro jala dipaboa ma manang na andigan sae ulaon i, asa boi malim mamelehon pelean ni ganup nasida.

27 Dung naeng sae pitu ari ulaon paiashon diri i, diida angka halak Jahudi na sian Provinsi Asia ma si Paulus di bagas joro. Dijujui nasida ma natorop i asa ditangkup si Paulus. 28 Marsurak ma nasida mandok, “Hamu halak Israel, urupi hamu ma hami! Ai on do halak na laho tu sude inganan mangajari sude halak asa mangalo bangsonta, mangalo Patik i dohot mangalo bagas joro on. Ndang holan i, diboan ibana do halak Junani tu bagas joro on gabe ramun ma dibahen ibana inganan na badia on.” 29 Ai dirimpu nasida do diboan si Paulus si Tropimus halak Epesus i tu bagas joro, ala nunga diida nasida hian si Paulus rap dohot ibana di kota i. 30 Gabe gaor ma sude kota i, rap marlojong ma angka jolma i manangkup si Paulus. Disarat nasida ma ibana kaluar sian bagas joro. Dung i pintor ditutup nasida ma angka pintu ni bagas joro i. 31 Tingki naeng dipamate nasida si Paulus, nunga sahat barita tu komandan ni tentara naung gaor saluhut Jerusalem. 32 Pintor diboan ibana ma angka tentarana dohot angka perwira. Marlojong ma nasida mandapothon natorop i. Tingki diida natorop i ro komandan i dohot angka tentarana, ndang ditorushon nasida be mamungkuli si Paulus.

33 Ro ma komandan ni tentara i tu lambung ni si Paulus, ditangkup ma ibana jala disuru ma asa ditali si Paulus dohot dua rante. Dung i disungkun komandan i ma ise ibana jala aha dibahen ibana. 34 Alai marsurak ma natorop i, adong na mandok songon on jala na deba mandok songon an. Alani gaorna, gabe so diboto komandan i be manang aha sasintongna na masa. Gabe disuru ibana ma asa diboan si Paulus tu markas ni tentara i. 35 Dung sahat si Paulus di tangga, diangkat angka tentara i ma ibana ala nunga lam mangamuk natorop i. 36 Diihuthon natorop i do nasida huhut marsurak mandok, “Pamate ibana!”

37 Tingki naeng diboan nasida si Paulus masuk tu markas ni tentara i, didok ibana ma tu komandan ni tentara i, “Boi do hita mangkatai?” Dialusi komandan i ma, “Diboto ho do hape bahasa Junani? 38 Ai ndang na ho halak Mesir na hea manjujui halak asa mambarontak jala na manogihon 4.000 halak na marsenjata* kaluar tu padang pasir?”* 39 Dung i didok si Paulus ma, “Halak Jahudi do ahu na tubu di Tarsus, sada kota na tarbarita di Kilikia. Paloas ma jolo ahu mangkatai tu natorop i.” 40 Dung dipaloas komandan i si Paulus mangkatai, jongjong ma ibana di tangga, dibahen ibana ma tanda dohot tanganna asa hohom natorop i. Dung hohom natorop i, mangkatai ma ibana di bahasa Heber, ninna ma,