Markus

3 Masuk ma muse Jesus tu sada sinagoga,* jala adong ma disi sahalak baoa na mate sambariba tanganna.* 2 Ala naeng mangalului sala ni Jesus, diparrohahon halak Parise ma manang na pamalumonna do baoa i di ari Sabbat. 3 Didok Jesus ma tu baoa i, “Hehe ma ho, ro ma tu tonga-tonga on.” 4 Dung i, disungkun ibana ma tu nasida, “Mangihuthon patik, dia do na boi bahenon di ari Sabbat, mambahen na denggan do manang mambahen na jahat, mangalehon haluaon manang pamatehon?” Alai, hohom do nasida. 5 Gabe muruk ma ibana mangida nasida jala marsak alani tangkang ni roha ni nasida. Dung i, didok ma tu baoa i, “Patigor ma tanganmi.” Dipatigor ma tanganna laos malum ma tanganna. 6 Dung i, kaluar ma halak Parise. Marsangkap ma nasida dohot angka halak sian partai ni si Herodes laho mambunu ibana.

7 Alai laho ma Jesus dohot angka siseanna tu topi ni laut, jala torop ma halak mangihuthon ibana sian Galilea dohot sian Judea. 8 Ro do nang sian Jerusalem, sian Idumea, sian bariba ni Jordan, sian humaliang ni Tirus dohot Sidon mandapothon Jesus, ala naung dibege nasida angka pambahenanna. 9 Disuru Jesus ma siseanna paradehon parau, asa unang disosak natorop i ibana. 10 Ala godang naung dipamalum ibana, masisosahan ma angka na marsahit na posi laho manjama ibana. 11 Gariada, halak na sinonggopan ni suru-suruan na jahat pe, martinggangan do di jolona huhut jou-jou, “Anak ni Debata do ho.” 12 Alai, sai diorai Jesus do asa unang dipaboa-boa nasida taringot tu ibana.

13 Dung i, nangkok ma Jesus tu sada dolok, dijou ma halak na hinalomohon ni rohana jala ro ma nasida mandapothon ibana. 14 Dipillit ibana ma 12 halak jala digoari ma nasida angka apostel. Nasida ma na mandongani ibana jala na naeng suruonna marbarita. 15 Dilehon do huaso tu nasida palaohon suru-suruan na jahat.

16 Sisampulu dua halak na pinillitna i, i ma si Simon na digoari si Petrus, 17 si Jakobus dohot si Johannes angka anak ni si Sebedeus (digoari Jesus do nasida Boanerges, lapatanna “Angka Anak ni Ronggur”), 18 si Andreas, si Pilippus, si Bartolomeus, si Mateus, si Tomas, si Jakobus anak ni si Alpeus, si Tadeus, si Simon halak Kana,* 19 dohot si Judas Iskariot, na manjehehon Jesus di pudian ni ari.

Dung i, masuk ma Jesus tu sada jabu, 20 marroan ma muse torop halak tusi, alani i gabe ndang sanga be nasida mangan. 21 Alai tingki dibege keluargana taringot i, ro ma nasida mangalap ibana, ai didok nasida do, “Nunga rintik be ibana.” 22 Songon i nang angka siboto surat na ro sian Jerusalem mandok, “Na sinonggopan ni Beelsebul* do ibana, jala huaso ni pangulu ni suru-suruan na jahat i do dipangke ibana palaohon suru-suruan na jahat.” 23 Dijou Jesus ma nasida jala mangkatai marhite tudosan, ninna ma, “Songon dia ma Sibolis boi palaohon Sibolis? 24 Molo tarbagi sada harajaon, ndang boi hot harajaon i, 25 jala molo marbadai sada keluarga, ndang boi hot keluarga i. 26 Songon i ma molo Sibolis mangalo dirina, ndang na boi martahan ibana, alai gabe tarbagi jala na laho marujung ma ibana. 27 Ndang tarbahen ni sasahalak masuk tu jabu ni sahalak baoa na gogo laho mambuat artana, molo ndang jolo ditali baoa i. Dung i pe asa boi buatonna arta ni parjabu i. 28 Tutu do na hudok on tu hamu, tarsesa do sude dosa ni jolma dohot sude insak-insak ni nasida. 29 Alai, manang ise na mangaleai tondi parbadia, ndang tarsesa dosana saleleng ni lelengna.” 30 Didok Jesus pe songon i, ala didok nasida do na sinonggopan ni suru-suruan na jahat ibana.

31 Dung i, ro ma ina ni Jesus dohot angka anggina. Jongjong do nasida di luar, disuru ma halak manjou ibana. 32 Didok natorop na hundul mangkaliangi Jesus ma, “Di luar do inangmu dohot angka anggim mangalului ho.” 33 Alai dialusi ibana ma nasida, “Ai ise do inangku dohot angka anggingku?” 34 Dung i, diida ibana ma tu natorop na hundul mangkaliangi ibana, ninna ma, “Nasida do inangku dohot angka anggingku! 35 Ai manang ise na mangulahon lomo ni roha ni Debata, nasida do anggingku, ibotongku, dohot inangku.”