Epesus
6 Hamu angka dakdanak, oloi hamu ma natua-tuamuna hombar tu lomo ni roha ni Tuhan,* ai sintong do i. 2 “Pasangap ma amangmu dohot inangmu”, on do parenta na parjolo mardongan janji: 3 “Asa denggan ngolum jala ganjang umurmu di tano on.” 4 Jala hamu angka ama, unang ma bahen jut roha ni ianakhonmuna. Alai pagodang-godang ma nasida marhite mangajar-ajari jala mamodai nasida hombar tu lomo ni roha ni Jahowa.
5 Hamu angka hatoban, oloi hamu ma tuanmuna na di tano on mardongan biar dohot sangap na sian roha, songon tu Kristus i. 6 Ndang holan tingki adong na mangida asa pasonangkon roha ni jolma. Alai songon hatoban ni Kristus ma hamu na mangulahon lomo ni roha ni Debata sian nasa roha. 7 Gabe hatoban na burju ma hamu, songon hatoban ni Jahowa ndang hatoban ni jolma. 8 Ai diboto hamu do, sude jolma nang hatoban nang halak na merdeka, mandapot upa na niula ni nasida sian Jahowa. 9 Songon i ma nang angka tuan, denggan ma bahen hamu tu hatobanmuna. Unang ma ancam nasida. Ai diboto ho do, sada Tuan do ho dohot hatobanmi, i ma Debata na di surgo. Jala ndang paimbar-imbarhon jolma Ibana.
10 Anggiat ma dilehon Tuhan* gogo tu hamu, ai balga do hagogoonna. 11 Pangke hamu ma perlengkapan porang na sian Debata asa togu hamu mangalo jorat ni Sibolis. 12 Ai ndang na mangalo jolma parporanganta, alai mangalo pamarenta, parhuaso, pamimpin ni haholomon on, dohot suru-suruan na jahat na di surgo. 13 Alani i, pangke hamu ma sude perlengkapan porang na sian Debata, asa tolap hamu mangalo paraloan na sian musunta. Jala boi ma hamu togu dung monang mangalo saluhutna i.
14 Alani i togu ma hamu jongjong huhut mamangke ikat pinggang, i ma hasintongan. Mamangke baju partahanan, i ma mangulahon na sintong. 15 Jala pangke ma sipatumuna, i ma rade paboahon barita na uli taringot tu hadameon. 16 Asing ni i, pangke hamu ma perisai, i ma haporseaon, asa boi hamu pamatehon api na sian panah ni Sibolis.* 17 Jalo hamu ma muse tangkuluk bosi, i ma pangkirimon taringot tu haluaon i. Jala jalo hamu ma podang na sian tondi parbadia, i ma hata ni Debata, 18 huhut pasahathon marragam tangiang dohot pangidoan ganup tingki marhite panogu-noguon ni tondi parbadia. Jala sai jaga ma hamu, sai tangiangkon ma angka na badia. 19 Tangiangkon hamu ma nang ahu, asa barani ahu paboahon hata na dipasahat tu ahu, i ma rahasia na badia taringot tu barita na uli. 20 Ai alani i do ahu gabe suruan jala tarrante. Tangiangkon hamu ma asa barani ahu paboahon barita na uli.
21 Si Tikikus, dongan na tahaholongi jala na tongtong marhobas tu Tuan i, ibana ma na paboahon tu hamu taringot tu ahu dohot na huulahon. 22 Hupangido do ibana ro tu hamu laho paboahon taringot tu hami jala asa boi diapuli ibana rohamuna.
23 Sai dilehon Debata Ama i dohot Tuan Jesus Kristus ma tu hamu hadameon, holong, dohot haporseaon. 24 Anggiat ma sude na mangkaholongi Tuan Jesus Kristus saleleng ni lelengna manjalo asi ni roha na mansai balga i.