Ulaon ni Apostel
1 Teopilus na hinaholongan, di surattu na parjolo nungnga hupaboa sude na diulahon Jesus dohot na diajarhon ibana.+ Mulai sian na dimulai ibana ulaonna 2 sahat tu na tarangkat ibana tu surgo.+ Andorang so diangkat ibana tu surgo, dilehon ibana do tudu-tudu marhite tondi parbadia tu akka apostel na pinillitna.+ 3 Dung marsitaonon ibana, dipatuduhon ibana do tu nasida naung mulak mangolu ibana.+ Dibahen ibana do godang tanda lao paposson roha ni nasida. Saleleng 40 ari, diida nasida do ibana jala dipaboa ibana do taringot tu Harajaon ni Debata.+ 4 Tikki pajuppang Jesus dohot nasida, didok ibana ma, “Unang ma kaluar hamu sian Jerusalem.+ Toktong ma paima hamu janji ni Damang i,+ naung dibege hamu sian au. 5 Aek do dibahen si Johannes mandidi hamu, alai dang sadia leleng nai didihononna ma tondi parbadia tu hamu.”+
6 Alani i tikki marpungu nasida, disukkun ma tu Jesus, “Ale Tuan, na lao padengganonmu do saonari pamarettaon ni Debata tu halak Israel?”+ 7 Didok ibana ma tu nasida, “Holan Damang i do na marhak manottuhon andigan tikki dohot arina.+ Dang porlu botoonmuna i. 8 Alai molo dung ro tondi parbadia i tu hamu gabe margogo ma hamu.+ Paboaonmuna+ ma taringot tu au di Jerusalem,+ di sude luat na di Judea, di Samaria,+ sahat tu ujung ni* tano on.”+ 9 Dung didok ibana songon i, diida nasida ma ibana tarangkat tu surgo. Dung i ditutupi ombun ma ibana jala dang diida nasida be ibana.+ 10 Tikki ditatap nasida tu langit na tarangkat i ibana, toppu ma jongjong di labbung ni nasida dua halak na marpakkean na bottar.+ 11 Ninna ma, “Hamu halak Galilea, boasa jongjong hamu huhut mangida tu langit? Ai anggo Jesus i, nang pe naung tarangkat ibana sian labbungmuna tu langit, na lao ro do ibana muse dos songon tikki diida hamu ibana nakkok tu langit.”
12 Dung i mulak ma nasida tu Jerusalem+ sian Dolok Jetun, hira-hira sakilometer* ma daona sian Jerusalem. 13 Dung sahat, nakkok ma nasida tu kamar parginjang inganan ni nasida marborngin. Disi do si Petrus, si Johannes, si Jakobus dohot si Andreas, si Pilippus dohot si Tomas, si Bartolomeus dohot si Mateus, si Jakobus anak ni si Alpeus dohot si Simon halak na marhiras ni roha i, dohot si Judas anak ni si Jakobus.+ 14 Dos ma roha ni nasida sude asa toktong nasida marpungu lao martangiang rap dohot piga-piga borua,+ si Maria omak ni Jesus, dohot akka anggi ni Jesus.+
15 Di tikki i, jongjong ma si Petrus di tonga-tonga ni akka donganna. (Hira-hira 120 halak ma godang ni halak na marpungu i.) Ninna ma, 16 “Hamu akka dongan, ikkon saut do ayat na didok si Daud marhite tondi parbadia i. Dipaboa ibana do taringot tu si Judas+ na mamimpin akka halak manakkup Jesus.+ 17 Ai sahalak sian hita hian do ibana jala dohot do ibana dipillit mangulahon ulaon ni Tuan i rap dohot hita.+ 18 (Manuhor ladang do dibahen si Judas hepeng upa ni hajahatonna i.+ Tikki na madabu i ibana, tu toru ma uluna dung i mapultak ma butuhana jala kaluar ma sude isi ni butuhana i.+ 19 Sude do halak di Jerusalem mamboto taringot na masa i. Alani i digoari nasida ma ladang i Akeldama lapatanna, “Tano Mudar”). 20 Ai tarsurat do di bukku ni akka Psalmen, ‘Tarulang ma ingananna jala dang adong na mangingani,’+ jala ‘Lok ma dibuat halak na asing jabatan ni nasida, lok ma na asing na gabe pengawas.’+ 21 Alani i, ikkon pillitotta do sahalak bawa lao gabe gattina. Ikkon sahalak sian hita do ibana na dohot mangihutton Tuan Jesus tikki mangulahon ulaonna, 22 mulai sian tikki tardidi Jesus dibahen si Johannes+ sahat tu ari na nakkok ibana tu surgo.+ Ikkon dohot do ibana sahalak sian hita na mangida Jesus mulak mangolu.”+
23 Dipajongjong nasida ma dua halak, i ma si Josep na digoari si Barsabas manang si Justus, jala sahalak nai i ma si Matias. 24 Dung i martangiang ma nasida, “Ale Jahowa,* Ho do na mamboto roha ni sude jolma.+ Patudu ma ise do na dipillit Ho sian nasida na dua 25 lao marhobas tu Ho jala na lao gabe apostel gatti ni si Judas. Ai nungnga ditinggalhon si Judas ulaonna i jala lao manuttun dalanna sandiri.”+ 26 Dung i, dibahen nasida ma undi lao mamillit sada sian na dua i jala tarpillit ma si Matias.+ Gabe dohot* ma ibana dongan ni apostel na 11 i.