Ulaon ni Apostel

13 Adong do piga-piga panurirang* dohot guru di huria na di Antiokia,+ i ma si Barnabas, si Simeon na digoari si Niger, si Lucius na sian Kirene, si Menahem dongan sasikkola ni Raja Herodes, dohot si Saulus. 2 Tikki manomba Jahowa* nasida jala marpuasa, marhite tondi parbadia didok ma tu nasida, “Papulik hamu ma si Barnabas dohot si Saulus+ di Au lao mangulahon ulaon naung hutottuhon tu nasida.”+ 3 Dung marpuasa jala martangiang nasida, dibahen nasida ma tanganna tu atas ulu ni si Barnabas dohot tu si Saulus. Dung i, dipaborhat ma nasida na dua.

4 Borhat ma nasida na dua tu Seloikia. Marhite tondi parbadia do nasida disuru tusi. Sian i markapal ma nasida tu Siprus. 5 Dung sahat nasida di Salamis, dibaritahon nasida ma hata ni Debata di akka sinagoga* ni halak Jahudi. Ditogihon nasida do si Johannes asa adong mangurupi nasida.+

6 Dung didalani nasida sude pulo i sahat tu Papos, pajuppang ma nasida dohot sahalak bawa Jahudi na margoar si Bar Jesus. Ibana sahalak datu jala panurirang na makkatahon na so tutu. 7 Karejo do ibana tu gubernur* Sergius Paulus na massai pistar i. Dijou gubernur i ma si Barnabas dohot si Saulus, ai lomo do rohana mambege hata ni Debata. 8 Alai dialo si Bar Jesus na digoari si Elimas i ma nasida (Elimas lapatanna “datu”). Diabbati ibana do gubernur i asa unang porsea tu Tuan. 9 Alai digohi tondi parbadia ma si Saulus na laos digoari si Paulus. Dipanotnoti ibana ma datu i. 10 Jala didok ma, “E ho anak ni Sibolis!+ Panipu do ho, parjahat. Dialo ho do sude na sittong. Boasa sai dipapeol ho dalan ni Jahowa* na tigor i? 11 Ida ma! Hukumon ni Jahowa* ma ho. Mapitung ma ho jala dang idaonmu be mataniari piga-piga leleng on.” Satokkin i gabe kabur ma matana jala holom ma diida ibana. Dung i, dadap-dadap ma ibana mangalului sasahalak lao manogu-nogu ibana. 12 Dung diida gubernur i na masa i, gabe porsea ma ibana. Ai longang do rohana tu akka na diparsiajari ibana taringot tu Jahowa.*

13 Sian Papos, markapal ma si Paulus dohot akka donganna jala sahat ma nasida di Perge di Pampilia. Alai ditinggalhon si Johannes+ ma nasida jala mulak tu Jerusalem.+ 14 Nang pe songon i, ditorusson nasida do pardalananna sian Perge tu Antiokia na di Pisidia. Di tikki ari Sabat lao ma nasida tu sinagoga,+ hundul ma nasida disi. 15 Dung sae dijahahon Patik+ dohot na Sinurat ni Akka Panurirang tu akka jolma, disuru pamimpin ni sinagoga i ma sasahalak mandok tu nasida, “Hamu akka dongan, molo adong na naeng didok hamu lao patoguhon akka jolma on, dokkon hamu ma.” 16 Dung i jongjong ma si Paulus, dibahen ma tanda marhite tanganna, ninna ma,

“Hamu akka dongan, halak Israel dohot akka na makkabiari Debata, tangihon hamu ma jo hatakkon. 17 Najolo, dipillit Debata ni bangso Israel do akka omputta, jala dibahen Debata do nasida gabe sada bangso na balga tikki manoppang dope nasida di Mesir. Diboan do nasida kaluar sian i marhite huasona na balga.+ 18 Sabar do Ibana maradoppon nasida hira-hira 40 taon di padang gurun.+ 19 Dung diripasson Ibana pitu bangso di tano Kanaan, dilehon Ibana ma luat i gabe appuna ni nasida.+ 20 Hira-hira 450 taon ma sudena i masa.

“Dung i dilehon ma tu nasida akka hakim sahat tu tikki ni Panurirang Samuel.+ 21 Alai dukkon i, dipangido nasida ma raja.+ Gabe dilehon Debata ma tu nasida si Saul anak ni si Kis, sian marga Benjamin+ jala mamaretta ma ibana saleleng 40 taon. 22 Dung dibolokkon Debata si Saul, dipillit Ibana ma si Daud gabe raja ni nasida.+ Songon on do didok Debata taringot tu si Daud, ‘Nungnga juppangku be si Daud anak ni si Isai,+ halak na boi mambahen las rohakku.+ Ulahononna do sude lomo ni rohakku.’ 23 Sesuai tu janji ni Debata, sian pinoppar ni si Daud do ro sipalua ni Israel, i ma Jesus i.+ 24 Andorang so ro sipalua i, nungnga dibaritahon si Johannes tu sude halak Israel asa tardidi nasida lao patuduhon naung muba nasida.+ 25 Alai tikki naeng sae ulaon ni si Johannes, didok ibana ma, ‘Dang au halak na pinaimamuna i. Alai na lao adong do sasahalak na ro dukkon au. Gari mambukka sipatuna dang tama au.’+

26 “Alani i hamu akka dongan, pinoppar ni si Abraham dohot akka na makkabiari Debata, nungnga dipaboa tu hita barita taringot tu haluaon i.+ 27 Alai dang ditanda penduduk ni Jerusalem dohot pamaretta ni nasida sipalua i. Alani i, tikki diadili nasida ibana, gabe diulahon nasida do akka na adong di na Sinurat ni Akka Panurirang,+ na dijahahon ganup ari Sabat i. 28 Nang pe dang adong dapot ni nasida alasan lao mambahen ibana dihukum mate,+ alai dipangido nasida do tu si Latus asa dihukum mate ibana.+ 29 Dung dipasaut nasida sude na tarsurat taringot tu ibana, dipaturun nasida ma ibana sian hau i jala dipeakkon tu kuburan.+ 30 Alai dipahehe Debata do ibana sian na mate.+ 31 Jala saleleng piga-piga ari, dipatuduhon ibana do dirina tu akka halak na hea mangihutton ibana sian Galilea sahat tu Jerusalem. Saonari, nasida ma na paboahon taringot ibana tu akka halak.+

32 “Alani i, hupaboa hami ma tu hamu barita na uli taringot tu janji na dibahen Debata tu akka omputta. 33 Nungnga dipasaut Debata janjina i tu hita akka pinoppar ni nasida, marhite pahehehon Jesus.+ Songon na tarsurat di psalmen na paduahon, ‘Anakku do ho; mulai sadari on Bapakmu ma au.’+ 34 Nungnga dipahehe Debata ibana sian na mate. Jala dang na lao mulak be ibana mardaging jolma na boi mate manang na boi busuk i. Ai didok Debata do, ‘Lehonokku ma tu hamu pasu-pasu naung hujanjihon tu si Daud alani holong ni rohakku* tu ibana. Boi do dihaporseai janji na hubahen on.’+ 35 Jala didok do muse di psalmen na asing, ‘Dang pasombuonmu busuk+ naposom na setia.’ 36 Disomba si Daud do Debata saleleng ni ngoluna. Dung mate, dikuburhon do ibana di labbung ni akka ompuna jala busuk do dagingna.+ 37 Alai anggo Jesus na dipahehe Debata sian na mate, dang busuk ibana.+

38 “Hupaboa ma on tu hamu akka dongan, marhite ibana do disesa Debata dosamuna,+ 39 jala marhite ibana ma dohonon ni Debata dang marsala ganup halak na porsea tu ibana. Alai anggo Patik ni si Musa,+ dang boi manesa hasalaanmuna.+ 40 Alani i manat ma hamu, asa unang masa tu hamu songon na Sinurat ni Akka Panurirang. Didok do, 41 ‘Parrohahon hamu ma, hamu akka pangaleai. Tarsonggot ma hamu jala mate. Ai huulahon do sada ulaon di tikkimuna on, alai dang porsea hamu disi nang pe adong na patorakkon i sude tu hamu.’”+

42 Tikki naeng kaluar si Paulus dohot si Barnabas sian i, dipangido halak na disi ma asa dipatorang nasida muse taringot tusi di ari Sabat na mangihut. 43 Dung sae parpunguan di sinagoga i, godang ma halak Jahudi dohot halak na mangihutton agama Jahudi* na manomba Debata mandapotton si Paulus dohot si Barnabas. Dijujui si Paulus dohot si Barnabas ma nasida asa toktong di bagasan asi ni roha ni Debata na massai balga i.+

44 Di ari Sabat na mangihut, hampir sude ma halak na di kota i marpungu lao manangihon hata ni Jahowa.* 45 Dung diida halak Jahudi akka jolma i, gabe muruk* ma nasida. Gabe dileai nasida do Debata ala dialo nasida do hata ni si Paulus i.+ 46 Alani i do dang mabiar si Paulus dohot si Barnabas mandok tu nasida, “Tu hamu do nian porlu parjolo pasahaton hata ni Debata.+ Alai dang dijalo hamu i jala dibahen hamu do dirimuna dang tama manjalo hangoluan saleleng ni lelengna. Saonari, lao nama hami marbarita tu bangso na asing.+ 47 Ai songon on do paretta ni Jahowa* tu hami, ‘Nungnga hupillit ho gabe sinondang tu akka bangso, asa dibaritahon ho haluaon i sahat tu akka ujung ni tano on.’”+

48 Dung dibege halak na sian bangso na asing hata i, las ma roha ni nasida. Gabe dipuji nasida ma hata ni Jahowa.* Jala gabe porsea ma sude halak na marpangalaho na denggan na mambahen nasida tama mandapot hangoluan saleleng ni lelengna. 49 Ujungna, gabe rarat ma hata ni Jahowa* tu sude luat i. 50 Alai dijujui halak Jahudi ma akka borua na sangap na manomba Debata dohot akka bawa na sangap di kota i asa dialo nasida+ si Paulus dohot si Barnabas. Gabe dibalbali ma si Paulus dohot si Barnabas jala dipalao ma nasida sahat tu luar ni parbatasan ni kota i. 51 Dipaspasson si Paulus dohot si Barnabas ma orbuk ni pat ni nasida tu halak na disi. Dung i lao ma nasida tu Ikonium.+ 52 Alai toktong ma marlas ni roha akka sisean i+ jala digohi tondi parbadia do nasida.