Perayaan Tabernakel di Jerusalem

Piga-piga taon dung tardidi Jesus, godang do tanda halongangan manang mukjizat dibahen ibana. Marribu do halak na mangida i jala dicaritahon nasida ma i tu sude halak di luat i. Alani i, gabe tarsar ma barita taringot tu Jesus. Tingki masa Perayaan Tabernakel (Parlape-lapean) di Jerusalem, godang ma halak na mangalului ibana.

Dung mulai perayaan i, marhusipi ma angka halak taringot tu Jesus. Marsalisi ma nasida, adong na mandok, “Halak na burju do ibana.” Na deba nai mandok, “Daong, dililuhon ibana do torop halak.” (Johannes 7:12) Alai ndang adong sian nasida na barani mandok i di jolo ni angka halak, ala mabiar do nasida tu angka pamimpin ni halak Jahudi.

Dung satonga dalan perayaan i, masuk ma Jesus tu bagas joro mangajari. Longang do roha ni angka halak i mangida ibana mangajari. Ai diboto nasida do ndang hea ibana marsingkola di singkola ni guru ni halak Jahudi. Didok nasida ma, “Sian dia do godang ni parbinotoan ni halak on taringot tu Surat na Badia, hape so hea ibana marsiajar di singkola agama?”​—Johannes 7:15.

Dung i dialusi Jesus ma, “Ndang sian ahu na huajarhon i, alai sian na marsuru ahu i do i. Manang ise na olo mangulahon lomo ni roha ni Debata, botoonna do manang na sian Debata na huajarhon i manang na sian diringku sandiri.” (Johannes 7:16, 17) Patik ni Debata do na diajarhon Jesus. Tangkas ma, Debata do na dipasangap ibana, ndang dirina sandiri.

Dung i didok Jesus ma muse, “Nda dilehon si Musa do Patik i tu hamu? Alai ndang adong sian hamu na mangoloi Patik i. Boasa naeng bunuonmuna ahu?” Adong do sian angka halak i na so mangantusi boasa didok Jesus songon i. Ai sian huta na dao do nasida jala ndang diboto aha na masa tu Jesus. Didok roha ni nasida, boasa naeng pamateon guru na malo mangajari. Alani i, dirimpu nasida ma naung diulahon Jesus na sala. Gabe didok ma, “Na sinonggopan ni suru-suruan na jahat do ho. Ise ma naeng mambunu ho?”​—Johannes 7:19, 20.

Sasintongna naeng pamateon ni pamimpin ni halak Jahudi do Jesus sada satonga taon naung salpu, ala dipamalum ibana na marsahit tingki ari Sabbat. Alani i, dipatorang Jesus ma taringot tu sada patik na patuduhon ndang adong na sala diulahon ibana. Dipaboa Jesus ma patik na mandok ingkon disunat do poso-poso baoa na baru tubu di ari paualuhon, nang pe ari Sabbat tingki i. Jala didok ma muse, “Molo boi do disunat baoa di ari Sabbat asa unang dilanggar Patik ni si Musa, boasa ma gabe muruk hamu ala hupamalum na marsahit di ari Sabbat? Unang ma uhumi hamu halak mangihuthon na tarida, alai tigor ma hamu manguhumi.”​—Johannes 7:23, 24.

Adong do disi halak Jerusalem na mamboto na laho dipamate Jesus. Didok nasida ma, “Nda halak on do na naeng bunuon ni nasida i? Alai ida ma! Mangkatai do ibana di jolo ni natorop jala ndang adong didok nasida manang aha tu ibana. Atik naung tangkas do diboto nasida na ibana do Kristus i?” Alai nasida pe ndang porsea na Kristus do Jesus. Didok ma, “Alai tahe, taboto do sian dia harorona. Hape molo ro Kristus i, ndang adong na mamboto sian dia harorona.”​—Johannes 7:25-27.

Laos di tingki i didok Jesus ma, “Ditanda hamu do ahu jala diboto hamu do sian dia ahu ro. Ahu ro ndang mangihuthon sangkaphu sandiri, jala na marsuru ahu i, tutu do Ibana adong alai ndang ditanda hamu Ibana. Alai hutanda do Ibana, ai sian Ibana do ahu ro jala Ibana do marsuru ahu.” (Johannes 7:28, 29) Gabe naeng tangkupon ni nasida ma ibana, adong na naeng mamenjarahon ibana manang naeng mambunu ibana. Alai ndang marhasil nasida ala ndang tingkina dope Jesus mate.

Nang pe songon i, godang do na porsea tu Jesus. Ai mardalan do ibana di ginjang ni aek, dipaso do alogo na balga, dilehon mangan marribu halak marhite piga-piga roti dohot dengke, dipamalum na marsahit, na pangpang, na mapitung, na marsahit kusta, jala dipahehe ibana do na mate. Alani i ma didok nasida, “Molo ro Kristus i godang do bahenonna tanda halongangan. Nda i do nuaeng na binahenna on?”​—Johannes 7:31.

Mambege i, disuru halak Parise dohot malim kepala ma angka petugas manangkup Jesus.