Nungnga Huida be Haporseaon ni Naposo ni Jahowa

Gabe mekkel ma au mambege hatana i. Hurippu dang lomo rohana mambahas taringot agama. Jadi husukkun ma ibana, “Aha ma haroa na diboto ho sian Bibel?” Dang pittor dialusi ibana sukkun-sukkunki. Alai ujungna didok ibana ma molo omakna Saksi Jahowa. Jadi sian omakna i do diboto ibana taringot Bibel. Ala penasaran au, gabe godang ma sukkun-sukkunku.

Di borngin i, leleng do hami makkata-hatai. Didok donganki menurut Bibel Sibolis do na mangarajai portibi on. (Joh. 14:30) Mungkin nungnga leleng diboto hamu i, alai hal na baru do on di au. Nungnga jotjot hubege Debata do na mangarajai portibi on. Alai dang masuk akkal huhilala i, dang sesuai i tu akka na masa na huida di portibi on. Nang pe 26 taon dope umurhu tikki i, alai godang do huida masalah na mambahen au khawatir.

Pilot ni Angkatan Udara Amerika Serikat do bapakku. Jadi sian na gelleng huboto do boi masa perang nuklir, alana boi do diluncurhon bom nuklir manang sadihari pe. Tikki kuliah au di Kalifornia, godang do tentara Amerika na marporang di Vietnam. Alani i sering do au demonstrasi dohot mahasiswa na asing. Dikejar polisi do hami jala ditembakkon nasida ma gas air mata, gabe maol ma hami marhosa dohot mamereng. Kacau hian ma tikki i. Dibunu do akka pamimpin politik, jala jotjot do masa demonstrasi dohot kerusuhan. Marasing-asing do pandapot ni halak di tikki i taringot aha na ikkon diulahon pamaretta, gabe bingung ma au.

Di taon 1970, karejo ma au di bagian utara Alaska, gabe godang ma hepengku. Dung i lao ma au tu London, hutuhor ma motor, jala hupakke ma i mardalani tu arah selatan. Sebenarna dang adong tujuanku. Alai gabe sahat do au tu Afrika piga-piga bulan dukkon i. Saleleng di pardalanan, pajuppang ma au dohot akka halak na sarupa songon au, na berharap boi malua sian masalah.

Ala mangida i sude, gabe masuk akkal ma huhilala ajaran ni Bibel na mandok Sibolis do na mangarajai portibi on. Alai gabe sukkun-sukkun ma rohakku, “Molo dang Debata na mangarajai portibi on, attong aha ma na diulahon Ibana?”

Piga-piga bulan dukkon i, dapottu ma alusna. Di pudian ni ari, marsitandaan ma au jala makkaholongi akka halak na toktong setia tu Debata dang soal songon dia situasina.

Tikki mulak au tu London, huhubungi ma omak ni donganku, jala dilehon ibana ma tu au Bibel. Dung i, tikki lao au tu Amsterdam, Belanda, adong ma sahalak Saksi Jahowa na mangida au manjaha Bibel di toru ni lampu jalan. Diurupi ibana ma au mamboto lam godang taringot Bibel. Dung i, tikki lao au tu Dublin, Irlandia, juppangku ma kantor cabang ni Saksi Jahowa disi. Hutuktuki ma pintu ni kantor i jala pajuppang ma au dohot si Arthur Matthews, sahalak donganta na berpengalaman. Hupangido do tu ibana asa diajari au marsiajar Bibel jala setuju do ibana.

Semangat do au marsiajar Bibel jala lomo do rohakku manjaha publikasi na diterbitton Saksi Jahowa. Alai manjaha Bibel pe lomo do rohakku. Di parpunguan, huida ma akka dakdanak boi mamboto alus ni sukkun-sukkun na so diboto akka parsikkola na timbo saleleng marratus taon. Misalna ‘Boasa godang hajahaton? Ise do Debata? Aha do na masa tikki mate jolma?’ Ala di negara i holan Saksi Jahowa na hutanda, gabe holan nasida ma donganku. Diurupi do au makkaholongi Jahowa jala mangulahon lomo ni rohana.

Di taon 1972, tardidi ma au. Sataon dukkon i mulai ma au merintis jala pinda tu sada huria na gelleng di Newry, Irlandia Utara. Husewa ma sada jabu na mardinding batu di jonok ni dolok. Adong ma akka lombu di ladang di jonok ni jabukki, jala di jolo ni akka lombu i do au marlatik pasahatton jamita. Hira na ditangihon akka lombu na makkusapi i do au makkatai. Memang dang adong dilean akka lombu i saran tu au. Alai sian i, gabe marlatik ma au asa manjaga kontak mata dohot hadirin. Di taon 1974, dilantik ma au gabe perintis istimewa. Si Nigell Pitt ma donganku, jala mulai sian i gabe dongan kompak ma hami.

Di tikki i jotjot do masa kerusuhan di Irlandia Utara. Alani i piga-piga halak mandokkon Irlandia Utara i “negeri bom dohot sinjata”. Jotjot do akka halak marbadai di dalan, ditembaki, jala godang do mobil na dibom. On masa alani masalah politik dohot agama. Alai diboto halak Protestan dohot Katolik do dang terlibat Saksi Jahowa di urusan politik. Alani i bebas do hami jala toktong aman tikki marbarita. Diboto parjabu do tikki sadihari jala didia biasana masa kerusuhan. Alani i, jotjot do dipaingot halak i hami asa hati-hati.

Alai sai adong do situasi na berbahaya. Hea do au marbarita dohot sahalak perintis na margoar si Denis Carrigan tu sada kota. Dang adong dope Saksi disi, jala i ma na paduahalihon hami lao tusi. Di sada kafe, adong ma sahalak borua na manuduh hami tentara ni Inggris na menyamar, alana logatnami dang logat Irlandia. Gabe mabiar do hami. Di tikki i, molo ramah hita tu sahalak tentara, boi do dipamate hita manang ditembak lututta! Jongjong ma hami di luar ni kafe paima ro bus. Tikki i ngali hian do cuaca jala holan hami do na di luar ni kafe i. Dung i, adong ma sada mobil na so di jolo ni kafe i. Kaluar ma borua na manuduh hami nakkin, jala makkatai ma ibana dohot dua bawa na di mobil i, huhut ditudu ibana tanganna tu hami. Dung i, didapotton akka bawa i ma hami jala disukkun ma tu hami taringot jadwal bus. Dung sahat bus i, makkatai ma halak i tu supirna. Dang boi hubege hami aha na dihatai halak i. Dang adong be penumpang di bus i, jadi yakin do hami hira na merencanahon lao mencelakai hami do halak i di luar kota. Alai dang songon i hape na masa. Tikki naeng kaluar au sian bus i husukkun ma supirna, “Na curiga do akka bawa i tu hami?” Didok ibana ma mangalusi, “Unang pola mabiar hamu, aman do hamu. Huboto do ise hamu, jala nga hupaboa tu nasida taringot hamu.”

Di taon 1976 dibahen ma kebaktian distrika di Dublin. Disi pajuppang ma au dohot donganta borua na margoar si Pauline Lomax, sahalak perintis istimewa na berkunjung sian Inggris. Togu do parale-aleonna tu Jahowa, serep marroha, jala parholong. Nungnga ditanda ibana dohot si Ray itona hasittongan sian na gelleng. Di taon berikutna, menikah ma au dohot si Pauline jala rap melayani ma hami sebagai perintis istimewa di Ballymena, Irlandia Utara.

Hea do hami melayani sebagai pengawas wilayah di Belfast, Londonderry, dohot akka daerah na asing na berbahaya. Dipatogu do rohanami mangida haporseaon ni akka dongan na olo maninggalhon hasomalan ni agama naung leleng dihaporseai nasida. Jala dang olo be nasida marsogo ni roha dohot paimbar-imbarhon halak. Pasti sai dijaga jala dipasu-pasu Jahowa do nasida!

Nungnga sappulu taon au tinggal di Irlandia. Dung i di taon 1981 diundang ma hami tu sikkola Gilead kelas ke-72. Dung wisuda, ditugasson ma hami tu Sierra Leone, Afrika Barat.

Sajabu do hami dohot 11 dongan missionaris na asing. Di jabu i holan sada do dapur, tolu toilet, dua kamar mandi, sada telepon, sada mesin cuci, dohot sada mesin pengering. Jotjot do toppu mate listrik. Asing ni i, godang do bagudung di atap jala ular kobra masuk tu ruang bawah tanah.

Nang pe dang sai mura situasinami, alai las hian do rohanami marbarita disi. Diargai akka halak do Bibel, jala ditangihon nasida do baritanami. Godang do na marsiajar Bibel jala ujungna gabe Saksi. Dijou akka halak na disi do au “Pak Robert”, molo si Pauline “Bu Robert”. Alai di pudian ni ari, ala unggodang tikkikku karejo di kantor cabang sian di lapangan, gabe dijou akka halak ma si Pauline “Bu Pauline”, molo au “Pak Pauline”. Las do roha ni si Pauline mambege i!

Disi godang do akka donganta na pogos, alai sai diparade Jahowa do kebutuhan ni nasida. Sipata dang terduga cara ni Jahowa paradehon i. (Mat. 6:33) Misalna huingot ma adong sada donganta borua na pogos. Otik do hepengna jala holan boi manuhor sipanganonna dohot gellengna sadari i. Alai nang pe songon i dilehon ibana do sude hepengna i tu donganta na marsahit malaria, ala dang sanggup donganta i manuhor obat. Di na so panagaman adong ma sahalak borua na naeng marpangkas rambut tu ibana, gabe adong ma hepengna. Jotjot do masa songon on.

Nungnga sia taon hami di Sierra Leone. Dung i ditugasson ma hami tu Betel Nigeria. Balga do kantor cabang dison. Sarupa do tugashu di kantor cabang on songon tikki di Sierra Leone. Alai molo di si Pauline, perubahan tugas na balga do on jala maol do ibana mambahen penyesuaian. Sebelumna marbarita do ibana 130 jom tiap bulan, jala godang do parsiajar Bibelna na maju. Alai saonari ditugasson do ibana di ruang menjahit lao padenggatton baju. Porlu do tikki di si Pauline lao menyesuaihon diri. Alai ujungna disadari ibana ma diargai akka dongan na di Betel do karejona i, jala berupaya do ibana lao patoguhon akka dongan di Betel.

Hal na baru do di hami budaya ni halak Nigeria, jadi ikkon marsiajar do hami. Di sada tikki, ro ma sahalak donganta bawa tu kantorhu lao patandahon sahalak donganta borua na baru masuk Betel. Tikki naeng hujalang ibana, pittor marsinggang ma ibana di pattu. Tarsonggot ma au, pittor huingot ma dua ayat ni Bibel, i ma Ulaon ni Apostel 10:25, 26 dohot Pangungkapon 19:10. Gabe sukkun-sukkun ma rohakku, ‘Porlu do hupasingot ibana?’ Alai di tikki na sarupa, husadari ma molo nungnga dijalo ibana di Betel, berarti nungnga diboto ibana ajaran ni Bibel.

Dang tabo huhilala saleleng na makkata-hatai i hami. Dung i hubahen ma riset. Ujungna gabe huboto ma na dibahen donganta borua nakkin, budaya ni halak di piga-piga inganan di Nigeria do i. Dang holan akka borua na mangulahon i, akka donganta bawa pe tong do songon i carana lao patuduhon hormat tu na asing, dang panombaon i. Jala adong do halak na mangulahon songon i disurat di Bibel. (1 Sam. 24:8) Las do rohakku ala dang gabe maila hubahen donganta borua i.

Godang do akka donganta di Nigeria na patuduhon haporseaon na luar biasa. Contohna si Isaiah Adagbona.b Ibana mananda hasittongan tikki poso dope, alai belakangan hona kusta ma ibana. Dipamasuk ma ibana tu panti rumah sakit kusta, jala holan sahalakna do Saksi Jahowa disi. Nang pe adong tantangan, marhasil do ibana mangurupi 30 halak na marsahit kusta mananda hasittongan jala dibahen ma sada huria di panti i.

Di taon 1996, ditugasson ma hami tu kantor cabang Kenya. On ma parjolo sahali au mulak muse tu Kenya dukkon na huceritahon i. Tinggal di Betel do hami. Di lokasi i, godang do bodat, jala olo do akka bodat i manakko buah na diboan akka donganta borua. Sada tikki adong ma sahalak donganta borua na so manutup jandela ni kamarna. Tikki mulak ibana, diida ibana ma sakelompok bodat mangallangi sipanganonna di kamarna i. Tarsonggot ma ibana berteriak lari sian pintu, akka bodat i pe tarsonggot ma jala mangakkati sian jandela.

Margabung do hami tu huria na marbahasa Swahili. Dang leleng dukkon i, ditugasson ma au memandu Parsiajaran Bukku Huria (saonari digoari Parsiajaran Bibel Huria). Alai saotik dope bahasa Swahili na huattusi. Alani i, ikkon leleng do au mambahen persiapan asa boi hujaha sukkun-sukkunna. Alai molo otik pe berbeda komentar ni akka dongan sian na tarsurat, gabe dang huattusi be. Lungun do rohakku alana dang boi godang hubahen tu akka dongan. Alai terkesan do au tu akka dongan di huria ala sabar jala serep do roha ni nasida mangihutton pengaturan on.

Dang gok sataon hami tinggal di Kenya. Dung i di taon 1997 diundang ma hami tu Betel di Brooklyn, New York. Saonari tinggal di negara na makmur do hami. Alai nang pe tinggal di negara na makmur, boi do on gabe sada tantangan tu akka dongan. (Poda 30:8, 9) Nang pe songon i togu do haporseaon ni akka dongan. Dipakke nasida do tikki dohot arta ni nasida lao mendukung organisasi ni Jahowa, dang lao pamorahon diri ni nasida.

Saleleng martaon-taon, nungnga huida haporseaon ni akka dongan di marragam situasi. Di Irlandia, dipatudu akka donganta do haporseaon nang pe masa perang sipil. Di Afrika, dipatudu akka donganta do haporseaon nang pe pogos nasida jala tinggal di inganan na so adong Saksi. Di Amerika Serikat, godang do akka donganta na togu haporseaonna jala dang berfokus tu hamoraon. Pasti marlas ni roha do Jahowa mangida naposona patuduhon holong tu Ibana di sude situasi.

Hatop do salpu tikki, “ukkatop do sian pardalan ni alat partonun”. (Job 7:6) Saonari di kantor pusat di Warwick, New York do hami melayani, jala las do rohanami marhobas dison dohot akka dongan na marsihaholongan. Las do rohanami jala puas ala boi mendukung Rajatta, Jesus Kristus. Satokkin nai lehononna ma godang pasu-pasu tu akka halak na setia.​—Mat. 25:34.