Cara asa Lam Denggan Tangiangta

 1. Aha do na dipangido Jahowa asa diulahon naposona? (Ida gambar.)

TIKKI porlu hita diapuli manang mangido petunjuk, tu ise do tapangido i? Takkas do taboto alusna. Boi do hita martangiang tu Debata Jahowa jala i do na dipangido Jahowa asa taulahon. Lomo do rohana asa ‘torus hita martangiang’ tu Ibana. (1 Tes. 5:17) Boi do hita martangiang tu Ibana manang sadihari pe mangido petunjukna di sude parngoluotta. (Poda 3:5, 6) Debata na burju do Jahowa, dang dibatasi Ibana sadia jotjot hita boi martangiang tu Ibana.

 2. Aha do na lao tabahas di artikel on?

² Mandok mauliate do hita tu Jahowa ala boi hita martangiang tu Ibana. Alai alani godang ni ulaonta, olo do maol hita mambahen tikki asa boi martangiang. Asing ni i, olo do hita merasa porlu tapadenggan tangiangta. Di artikel on tabahas ma sian Bibel songon dia hita boi maniru Jesus na mangatur tikkina lao martangiang. Jala tabahas ma muse adong lima na penting na porlu tatangiakkon asa lam denggan tangiangta.

 3. Aha do na takkas diboto Jesus taringot tangiang?

³ Takkas do diboto Jesus na massai arga do tangiangta di Jahowa. Sebelum ro ibana tu portibi on, diida Jesus do songon dia Bapakna mangalusi tangiang ni bawa dohot borua na setia. Misalna di labbung ni Bapakna do Jesus tikki dialusi Jahowa tangiang ni si Hanna, si Daud, si Elia, dohot akka tangiang ni naposona na setia. (1 Sam. 1:10, 11, 20; 1 Raj. 19:4-6; Ps. 32:5) Jadi dang heran be hita boasa diajari Jesus akka siseanna asa jotjot martangiang!​—Mat. 7:7-11.

 4. Aha do na boi taparsiajari sian Jesus?

⁴ Dibahen Jesus do sitiruon tu akka siseanna tikki martangiang. Saleleng di tano on, jotjot do Jesus martangiang tu Jahowa. Diatur ibana do tikkina lao martangiang nang pe sibuk ibana jala sering dikalilingi godang halak. (Mrk. 6:31, 45, 46) Tibu do ibana dungo manogot asa boi sahalakna martangiang. (Mrk. 1:35) Hea do muse Jesus martangiang saborngin manipat sebelum mambahen keputusan na penting. (Luk. 6:12, 13) Jala marulak-ulak do Jesus martangiang di borngin andorang so mate ibana, sebelum dipasae ibana tugasna na massai maol di portibi on.​—Mat. 26:39, 42, 44.

 5. Songon dia do hita maniru Jesus tikki martangiang?

⁵ Sian teladan ni Jesus marsiajar do hita, dang soal sadia sibuk hita porlu do taparade tikki lao martangiang. Misalna boi do hita hatop dungo lao martangiang, manang martangiang di bornginna i. Molo taulahon i, on patuduhon na mandok mauliate do hita tu silehon-lehon ni Jahowa na massai arga on. Mandok mauliate do sahalak donganta borua na margoar si Lynne tikki parjolo sahali mamboto sada hasangapon do tangiang i. Didok ibana, “Tikki huboto na boi au makkatai tu Jahowa manang sadihari pe, on mangurupi au mangida Jahowa i songon Ale-alekku jala gabe tergerak ma au mambahen lam denggan tangiakku.” Pasti godang do sian hita na songon i perasaanna. Saonari tabahas ma jo lima na penting na porlu tatangiakkon.

 6. Sesuai tu Pangungkapon 4:10, 11, boasa Jahowa layak dipuji?

⁶ Puji ma Jahowa. Di parnidaanna, diida Apostel Johannes ma 24 sintua marsomba tu Jahowa. Dipuji nasida do Jahowa, ala tama do Ibana manjalo “hasangapon, hamuliaon, dohot huaso”. (Jaha Pangungkapon 4:10, 11.) Akka suru-suruan pe dipuji nasida do Jahowa. Di surgo do nasida rap dohot Debata, jala takkas do ditanda nasida Debata. Tikki diida nasida sifat ni Jahowa na tarida sian akka toppaanna, gabe tergerak ma nasida mamuji Ibana.​—Job 38:4-7.

 7. Boasa taronjar rohatta lao mamuji Jahowa?

⁷ Hita pe tapuji ma Jahowa tikki martangiang. Paboa ma na massai holong do rohatta jala tapasangap Ibana. Tikki dijaha jala diparsiajari hamu Bibel, lului ma sifat ni Jahowa na menarik di hamu. (Job 37:23; Rom 11:33) Dung i tikki martangiang, paboa ma tu Jahowa songon dia perasaanmuna taringot sifatna i. Tapuji ma Jahowa ala diurupi Ibana do hita dohot sude dongan sahaporseaon. Diparrohahon Jahowa do hita jala torus do hita dijaga.​—1 Sam. 1:27; 2:1, 2.

 8. Aha do alasanna mandok mauliate hita tu Jahowa? (1 Tessalonik 5:18)

⁸ Mandok mauliate ma tu Jahowa. Godang do alasanta lao mandok mauliate tu Jahowa di tangiangta. (Jaha 1 Tessalonik 5:18.) Boi do hita mandok mauliate tu Ibana alani akka na denggan na dilehon Ibana tu hita. (Jak. 1:17) Misalna, boi do hita mandok mauliate alani uli ni tano on dohot akka toppaanna na luar biasa. Boi do muse hita mandok mauliate ala dilehon do hangoluan, keluarga, ale-ale, dohot harapan tu hita. Jala lomo do rohatta mandokkon mauliate tu Jahowa ala boi hita marale-ale tu Ibana.

 9. Boasa porlu torus tapikkirhon alasanta mandok mauliate tu Jahowa?

⁹ Berupaya ma hita mamikkirhon alasanta mandok mauliate tu Jahowa. Godang do halak saonari dang diboto mandok mauliate. Jadi nasida holan mamikkirhon aha na boi didapot nasida daripada mamikkirhon songon dia carana mandok mauliate tu na adong di nasida. Molo songon i tong cara marpikkirta, boi do gabe songon daftar permintaan tangiangta i. Asa unang masa i, porlu do hita torus mamikkirhon alasanta mandok mauliate jala taargai ma sude na dibahen Jahowa tu hita.​—Luk. 6:45.

10. Aha do na mangurupi sahalak donganta borua boi martahan nang pe masa sitaonon na borat tu ibana? (Ida gambar.)

¹⁰ Molo mandok mauliate hita tu Jahowa, boi do hita diurupi asa toktong martahan di situasi na maol. Parrohahon ma pengalaman ni donganta borua na margoar si Kyung-sook, na marsahit kanker paru-paru.b Didok ibana, “Sahitton mambahen au kecil hati. Alani i gabe merasa kesepian ma au jala mabiar.” Aha do na mangurupi si Kyung-sook? Didok ibana ganup borngin sebelum modom, lao do ibana tu balkon ni jabuna jala marsoara ma ibana martangiang paboahon lima hal na dihamauliatehon ibana di bagasan sadari i. Gabe dipapos ma rohana jala tergerak ma rohana paboahon na holong do rohana tu Jahowa. Boi ma dihilala ibana ma songon dia Jahowa mangurupi naposona na setia nang pe masa sitaonon tu nasida. Jala gabe diboto ibana ma, unggodang do pasu-pasu na tahilala di ngolutta sian sitaonon na taadopi. Songon si Kyung-sook, godang do alasanta mandok mauliate tu Jahowa, bahkan nang pe masa sitaonon tu hita. Mandok mauliate ma hita di tangiangta asa diurupi hita toktong martahan jala marlas ni roha.

11. Aha do na dihaporluhon akka sisean ni Jesus dung nakkok Jesus tu surgo, jala boasa?

¹¹ Pangido ma tu Jahowa asa dilehon habaranion tikki marbarita. Sebelum nakkok Jesus tu surgo, dilehon ibana do tugas tu akka siseanna lao marbarita taringot ibana “di Jerusalem, di sude luat na di Judea, di Samaria, sahat tu ujung ni tano on”. (Ul. 1:8; Luk. 24:46-48) Dang leleng dukkon i, ditakkup pamimpin ni agama Jahudi ma Apostel Petrus dohot Apostel Johannes jala diboan ma nasida tu Sanhedrin. Diparettahon do nasida asa unang marbarita be, bahkan diancam do nasida. (Ul. 4:18, 21) Alai songon dia do reaksi ni si Petrus dohot si Johannes?

12. Sesuai tu Ulaon ni Apostel 4:29, 31, aha do na diulahon akka apostel?

¹² Lao mangalusi ancaman ni akka pamimpin ni agama Jahudi i, didok si Petrus dohot si Johannes ma, “Hamu sandiri ma na manottuhon, dia do na sittong di jolo ni Debata, manangihon hamu do manang manangihon Debata? Alai dang tarbahen hami mangulahon hatamuna i. Ikkon dipaboa hami do aha naung diida hami dohot na dibege hami.” (Ul. 4:19, 20) Dung dipalua si Petrus dohot si Johannes, martangiang do akka sisean ni Jesus tu Jahowa songon dia nasida asa boi mangulahon lomo ni rohana. Di tangiangna didok ma, “Parrohahon ma ancaman ni nasida jala bahen ma akka naposomon boi toktong barani paboahon hatami.” Dialusi Jahowa do tangiang ni nasida i.​—Jaha Ulaon ni Apostel 4:29, 31.

13. Aha do na boi taparsiajari sian pengalaman ni si Jin-hyuk?

¹³ Tatiru ma akka apostel molo toktong hita marbarita nang pe diorai pamaretta. Taparrohahon ma pengalaman ni si Jin-hyuk, sahalak donganta bawa na dipenjara ala menolak dinas militer. Tikki dipenjara, ditugasson do ibana mambagihon sipanganon dohot kebutuhan ni akka tahanan na adong di sel isolasi. Alai dang diloas ibana makkatai tu nasida molo so adong hubunganna tu karejona i, termasuk ma i makkata-hatai taringot Bibel. Jadi martangiang ma donganta on asa barani jala marbisuk marbarita molo adong kesempatan. (Ul. 5:29) Didok ibana, “Dialusi Jahowa do tangiakku. Dilehon Ibana do tu au habaranion dohot bisuk asa boi mamulai parsiajaran Bibel saleleng lima menit di jolo ni pintu sel. Dung i tikki borngin, hubahen ma surat na lao hulehon tu tahanan na asing marsogotna i.” Songon si Jin-hyuk, boi do tapangido habaranion dohot bisuk. Pos ma rohatta urupan ni Jahowa do hita asa boi marhasil di ulaon marbarita.

14. Aha do na boi mangurupi hita tikki masa sitaonon tu hita? (Psalmen 37:3, 5)

¹⁴ Pangido ma tu Jahowa asa boi hamu martahan nang pe masa sitaonon. Godang do sian hita na marsitaonon alani sahit, marsitaonon ala terkuras secara emosi, mate halak na dihaholongi, adong masalah keluarga, penganiayaan, manang masalah na asing. Tamba do muse borat ni masalah i ala terjadi pandemi dohot porang. Tikki martangiang, paboa ma songon dia perasaan dohot situasimuna tu Jahowa, songon tikki makkata-hatai hamu dohot ale-alemuna. Porsea ma hamu tu Ibana, pasti ‘urupanna do hamu’.​—Jaha Psalmen 37:3, 5.

15. Songon dia tangiang boi mangurupi hita asa toktong ‘sabar jala togu tikki masa sitaonon’? Paboa ma contohna.

¹⁵ Molo torus hita martangiang tu Jahowa, boi do i mangurupi hita asa toktong ‘sabar jala togu tikki masa sitaonon’. (Rom 12:12) Diboto Jahowa do hasusaan na diadopi akka naposona, jala “ditangihon Ibana do angguk-angguk ni nasida na mangido asa diurupi”. (Ps. 145:18, 19) On ma na dihilala donganta perintis na margoar si Kristie na marumur 29 taon. Toppu do ibana marsahit na parah, gabe depresi ma ibana. Di pudian ni ari, diboto ibana ma muse marsahit na parah do omakna, jala sahitna i boi do mambahen omakna mate. Didok si Kristie, “Torus do au martangiang tu Jahowa mangido gogo asa boi martahan ganup ari. Torus do au marpungu dohot belajar pribadi.” Didok ibana muse, “Martangiang mambahen au martahan di situasi na maol. Pos do rohakku, sai didongani Jahowa do au, jala on ma na mangurupi au asa toktong tenang. Nang pe marsahit dope au, alai dialusi Jahowa do tangiakku. Boi ma au tetap tenang jala makkilala dame ni roha.” Alani i pos ma rohatta, diboto Jahowa do “songon dia paluahon halak na marsitutu manomba Ibana sian akka hasusaan”.​—2 Ptr. 2:9.

16. Boasa porlu bantuan ni Jahowa lao menolak godaan?

¹⁶ Pangido ma bantuan ni Jahowa asa boi menolak godaan. Ala jolma na mardosa hita, ikkon torus do taalo godaan lao mangulahon na sala. Sai berupaya do Sibolis mambahen nasa tolapna asa tergoda hita. Misalna dipakke Sibolis do hiburan na so denggan na mambahen sega cara marpikkirta. Hiburan sisongon i boi mambahen pikkiranta dang ias, dang badia di jolo ni Jahowa, jala boi mambahen hita mangulahon dosa na balga.​—Mrk. 7:21-23; Jak. 1:14, 15.

17. Dung martangiang hita mangido asa boi menolak godaan, aha do na ikkon taulahon? (Ida gambar.)

¹⁷ Porlu do hita diurupi Jahowa asa boi menolak godaan lao mangulahon na sala. Tikki mambahen contoh tangiang didok Jesus do, “Urupi ma hami asa unang tergoda jala palua ma hami sian Sibolis.” (Mat. 6:13) Lomo do roha ni Jahowa mangurupi hita, alai ikkon tapangido do bantuanna. Asing ni i, ikkon sadalan do tindakanta tu tangiangta. Berupaya ma hita asa unang maniru cara marpikkir ni akka halak di portibi on sian akka na tabege dohot na tajaha. (Ps. 97:10) Taisi ma pikkiranta dohot akka na denggan, misalna tajaha ma Bibel jala taparsiajari ma i. Ro ma hita tu parpunguan jala sibuk ma hita di ulaon marbarita asa terlindung cara marpikkirta. Jala marjanji do Jahowa urupanna do hita asa boi menolak godaan aha pe.​—1 Kor. 10:12, 13.

18. Aha do na porlu gabe tekadta?

¹⁸ Sude hita ikkon berupaya do asa lam ringgas martangiang sian na sebelumna asa boi setia tu Jahowa saleleng ari parpudi na maol on. Atur ma tikkimuna asa boi hamu ganup ari martangiang tu Ibana. Lomo do roha ni Jahowa asa ‘tapaboa sude na di bagasan rohatta tu Ibana’. (Ps. 62:8) Puji ma Jahowa jala dok ma mauliate tu sude na dibahen Ibana. Pangido ma bantuan ni Jahowa asa barani hamu marbarita. Jala pangido ma muse bantuanna tikki masa hasusaan tu hamu, jala asa boi menolak godaan. Unang ma paloas aha pe manang ise pe mambahen hamu dang taratur martangiang tu Jahowa. Alai boha do cara ni Jahowa mangalusi tangiangta? Tabahas ma sukkun-sukkun na penting on di artikel na mangihut.