Diargai Hamu do Hangoluan?

1, 2. Aha do dilehon Debata tu hita jala boasa ringkot tapangke on?

DILEHON Jahowa do tu hita hangoluan dohot haboion laho maniru parangeNa. (1 Musa 1:27) Alani silehonlehon on, taantusi ma na marlaba do prinsip ni Bibel tu hita. Molo taulahon on, boi ma hita toras di partondion, mangkaholongi Jahowa jala ”malo mambolati na denggan sian na roa.”​—Heber 5:14.

² Haboionta laho mangihuthon prinsip ni Bibel mansai ringkot saonari on, ala portibi on digohi parange na so denggan. Alani i, sadia godang pe uhum na adong, ndang boi mangurupi jolma mangadopi hasusaan. Patar ma on tingki hita mangadopi angka dokter, umpamana taringot mamangke mudar di parubatan. Ringkot do on antusan ni naposo ni Jahowa. Molo taantusi prinsip ni Bibel taringot mudar, boi ma tabahen haputusan na denggan, na mambahen ias panggora ni rohanta. Jala tongtong ma hita di bagasan holong ni roha ni Debata. (Poda 2:6-11) Taulas ma prinsip taringot on.

3, 4. Nandigan do dipaboa Debata na badia hangoluan dohot mudar jala aha do prinsip na patangkashon on?

³ Ndang leleng dung dibunu si Abel, dipatangkas Jahowa ma na badia do hangoluan dohot mudar. Jahowa mandok tu si Kain, ”Joujou do mudar ni anggim i sian tano i, sahat tu Ahu.” (1 Musa 4:10, Bibel siganup ari) Di adopan ni Jahowa, mudar ni si Abel manggombarhon hangoluan. Alani i ma, boi didok mudar ni si Abel ”joujou” tu Debata laho mangido pambalosan.​—Heber 12:24.

⁴ Dung masa aek na sumar, dipaloas Debata ma jolma mangallang jagal alai ndang dohot mudarna. Jahowa mandok, ”Unang pangan hamu juhut [jagal], molo di bagasan dope hosana mandok mudarna i. Tongon do, sai luluhononku do mudarmuna marguru tu hosamuna.” (1 Musa 9:4, 5) Parenta on ingkon ulahonon ni sude pinompar ni si Noak sahat tu saonari. Parenta on patangkashon hata ni Debata na tu si Kain, molo mudar manggombarhon hangoluan manang jiwa ni na mangolu. Hata on pe patangkashon uhumon ni Jahowa do jolma na so mangargai hangoluan dohot mudar.​—Psalmen 36:10.

5, 6. Songon dia patik ni si Musa patuduhon na badia do hangoluan dohot mudar? (Ida ma kotak ”Argai ma Hangoluan ni Binatang”.)

⁵ Dipatangkas do on di patik ni si Musa. Di 3 Musa 17:10, 11 didok, ”Manang ise . . . mangan mudar . . . ingkon Bohingku sandiri mangalo jolma na manganhon mudar i, jala ingkon Ahu maniaphon ibana sian tongatonga ni bangsona. Ai hosa ni sibuk i di bagasan mudar do i, jala nunga pola Ahu mangalehoni di hamu di atas langgatan, asa bahen pardengganan di tondimuna, ai mudar i do mambahen pardengganan marhite sian tondi na di bagasan i.”a—Ida ma kotak ”Huaso ni Mudar gabe Pardengganan tu Debata”.

⁶ Molo mudar ni binatang na diseat ndang dipelehon tu joro ni Debata, ingkon diusehon ma mudar i tu tano. On patangkashon molo hangoluan i dipaulak tu Debata. (5 Musa 12:16; Hesekiel 18:4) Alai, ndang porlu halak Israel palobihu pasidingkon mudar sian binatang na diseat i. Na porlu, mudar ni binatang i ingkon diusehon tu tano. Dung i, boi ma halak Israel mangallang jagalna. Panggora ni rohana pe boi ias, ala nunga patuduhon pangargaion tu Jahowa.

 7. Songon dia do si Daud patuduhon na diargai Ibana do mudar?

⁷ Si Daud, ”anak ni si Isai, halomoan [ni Debata]”. (Ulaon ni Apostel 13:22) Di sada tingki, mauas hian ma si Daud. Laho ma tolu halak tentarana mambuat aek siinumon mamolus parkemahan ni halak Palistim. Songon dia do pangkilalaan ni si Daud? Ibana mandok, ”Nda mudar ni angka baoa do i, angka na laho maneahon hosanasida?” Dipatudos si Daud do aek siinumon i songon mudar ni tolu halak tentarana. Nang pe mauas ibana, ”ndang olo ibana manginumsa, laos diusehon do i tahe bahen pelean tu Jahowa”.​—2 Samuel 23:15-17.

8, 9. Naung muba do pingkiran ni Debata taringot hangoluan dohot mudar dung adong huria Kristen di abad na parjolo? Patorang ma.

⁸ Hirahira 2.400 taon, dung dilehon Debata parenta taringot mudar tu si Noak jala 1.500 taon dung dilehon patik tu si Musa, Jahowa manogunogu pingkiran ni punguan na mangaradoti huria Kristen di abad na parjolo, laho manurathon on, ”Denggan do di roha ni Tondi Parbadia nang di rohanami: Unang be niampehon tu hamu na dokdok, dungkon ni na ringkot on: Parsubangkon hamu ma pelean na tu begu dohot mudar dohot na mate so sineat, angkup ni i parmainanon.”​—Ulaon ni Apostel 15:28, 29.

⁹ Diantusi punguan na mangaradoti huria Kristen i do na badia mudar i. Molo disalagunahon mudar, dipatudos ma songon na mangalehon pelean tu begu dohot tu ulaon parmainanon. Halak Kristen saonari on dos do pangantusionna. Ala mamparsiajari jala mangihuthon prinsip ni Bibel, nasida boi mambahen las roha ni Jahowa, tingki mambahen haputusan taringot mudar.

10, 11. (a) Songon dia do pandapot ni Sitindangi Ni Jahowa taringot transfusi darah dohot komponen utama darah? (b) Tingki andigan do boi marimbar pandapot ni halak Kristen taringot mudar?

¹⁰ Diparhatutu Sitindangi Ni Jahowa do molo ”parsubangkon . . . mudar” lapatanna, ndang manjalo jala ndang mangalehon manang manimpan mudarna sandiri laho ditransfusi. Nasida pe ndang olo manjalo opat komponen utama darah: sel darah merah, sel darah putih, keping darah dohot plasma.

¹¹ Saonari, sude komponen on nunga dibahen gabe fraksi na dipangke tu parubatan. Boi do sahalak Kristen manjalo angka fraksi on? Boi do tadokkon fraksi on ”mudar”? Hita sandiri ma na mambahen haputusan taringot on. Umpamana, tingki mamillit parubatan, songon hemodialisis, hemodilusi dohot penyelamatan sel na mamangke mudarna sandiri, asal ma ndang disimpan dope mudarna i.​—Ida ma Lampiran, ”Fraksi Darah dohot Prosedur Tingki Operasi”.

12. Songon dia do hita mamangke panggora ni roha tingki mambahen haputusan?

¹² Boasa dipaloas Jahowa hita mambahen haputusan sandiri taringot on, na so diparrohahon Debata do hita? Ndang songon i. Diparrohahon Ibana do aha na tapingkiri jala na mambahen hita mamillit haputusan i. (Jaha Poda 17:3; 24:12.) Alani i, dung martangiang jala taparsiajari songon dia parubatan na tapillit, taihuthon ma panggora ni roha na mangihuthon prinsip ni Bibel. (Rom 14:2, 22, 23) Taboto do, ndang boi halak na asing mamaksahon panggora ni rohana tu hita. Unang ma tadok, ”Aha do ulahononmu molo diadopi ho songon na masa tu ahu on?” Molo masa on, hita ingkon mangalusi ”Debata taringot tu dirinta be”.b—Galatia 6:5; Rom 14:12; ida ma kotak ”Badia do Mudar i di Ahu?”.

13. Aha do na pinatudu ni uhum dohot prinsip taringot hadirion ni Jahowa? Patorang ma.

¹³ Uhum dohot prinsip na adong di Bibel, patuduhon molo Jahowa, Silehon uhum na marbisuk jala Ama parholong na mamparrohahon hangoluan ni ianakhonna. (Psalmen 19:7-11) Nang pe parenta laho ”parsubangkon . . . mudar” ndang dibahen gabe aturan di kesehatan, alai parenta on mangondingi hita sian parsoalan alani transfusi. (Ulaon ni Apostel 15:20) Godang do halak sian kedokteran mandok molo operasi ndang mamangke mudar, sada hamajuon na dumenggan saonari. Hamajuon on patangkashon molo Jahowa mansai marbisuk jala mangkaholongi jolma.​—Jaha Jesaya 55:9; Johannes 14:21, 23.

14, 15. (a) Uhum na dia do na patuduhon holong ni Debata tu naposoNa? (b) Songon dia do hita mangulahon prinsip taringot manjaga hangoluan?

¹⁴ Tarida do sian uhum na dilehon Jahowa tu bangso Israel molo Debata mamparrohahon hangoluan nasida. Umpamana, halak Israel ingkon mambahen pagar di tarup ni jabuna, asa unang adong na madabu. (5 Musa 22:8; 1 Samuel 9:25, 26; Nehemia 8:16; Ulaon ni Apostel 10:9) Diparentahon Debata do asa dijaga nasida lombu na olo mananduk jolma. (2 Musa 21:28, 29) Halak na so mangulahon parenta on, patuduhon molo nasida ndang mangargai hangoluan ni donganna jala marutang mudar tu nasida.

¹⁵ Songon dia do hita boi mangulahon angka prinsip on? Parrohahon ma sungkunsungkun on: Denggan do motor dohot kareta na tapangke? Manat do hita mamangke i? Songon dia do pahanpahanan, jabu, ingananta karejo dohot rekreasi na tapillit? Di pigapiga negara, godang do na poso mate alani na marlanggar. Alai, na poso na naeng tongtong di bagasan holong ni Debata, ingkon mangargai hangoluanna. Unang ma parsidohot tu ulaon na parohon jea holan asa dipuji halak. Unang ma didok molo nasida ndang boi hona jea. Alai, marlas ni roha ma di tingki haposoonna marhite pasidingkon ulaon na parohon jea.​—Parjamita 11:9, 10.

16. Songon dia do prinsip ni Bibel taringot aborsi? (Ida ma surat na di toru.)

¹⁶ Mansai diargai Jahowa do hangoluan na adong di bortian. Di Israel najolo, molo adong sasahalak na mambahen jea tu sahalak ina na mardenggan pamatang jala mate ina i manang posoposo na di bortianna, di adopan ni Debata dos ma i songon pamunu. Ibana ingkon diuhum ”hosa [ganti] ni hosa”.c (Jaha 2 Musa 21:22, 23.) Pingkirhon ma songon dia pangkilalaan ni Jahowa tingki mangida godang halak manggugurhon posoposona manang aborsi ganup taon, na holan mamingkirhon dirina sandiri.

17. Aha do pangapulion na boi dilehon tu halak na hea mangulahon aborsi andorang so mananda hasintongan?

¹⁷ Songon dia do molo sahalak ina hea mangulahon aborsi, andorang so ditanda dope hasintongan? Boi do ibana mandapot asi ni roha ni Debata? Boi! Halak na marsitutu laho muba boi marpos ni roha molo Jahowa rade manalpuhon hasalaan ni nasida marhite mudar ni Jesus. (Psalmen 103:8-14; Epesus 1:7) Jesus mandok, ”Ndang na ro Ahu manjou angka partigor, asa dipauba rohana, angka pardosa, i do!”​—Lukas 5:32.

18. Songon na dipaboa Bibel, aha do na jotjot mambahen halak mambunu?

¹⁸ Ndang holan ulaon na parohon jea tu na asing na ingkon tapasiding. Lomo do roha ni Jahowa asa tapasiding hosom ni roha, na jotjot mambahen halak mambunu. Apostel Johannes mandok, ”Sibunu jolma do ganup na hosom roha di donganna.” (1 Johannes 3:15) Halak sisongon on, ndang holan mangkosomi donganna, alai hirim do rohana asa mate donganna i. Hosom ni roha, boi do diulahon marhite mandok hata na so tutu taringot donganna. Umpamana, didok ma molo donganna i mangulahon ulaon na sala di adopan ni Debata. (3 Musa 19:16; 5 Musa 19:18-21; Mateus 5:22) Alani i, ringkot do marsitutu pasidingkon angka sangkap na so denggan sian rohanta!​—Jakobus 1:14, 15; 4:1-3.

19. Songon dia do halak Kristen mangulahon prinsip di Psalmen 11:5 dohot Pilippi 4:8, 9?

¹⁹ Halak na mangargai hangoluan jala na tongtong di bagasan holong ni roha ni Debata, ingkon pasidingkon ulaon hajahaton. Psalmen 11:5 mandok, ”Dihosom [Jahowa] do parjahat i dohot na mangkaholongi hajahaton.” Ayat on ndang holan patuduhon hadirion ni Debata, alai adong prinsip na ingkon taulahon. On manjujui halak na mangkaholongi Debata, pasidingkon sude hiburan na mambahen nasida marlomo ni roha tu hajahaton. Jahowa ”Debata Sipardame” lapatanna, dijujui do naposoNa mangisi pingkiran dohot roha marhite ulaon na patuduhon holong, pujipujian dohot parange na dame.​—Jaha Pilippi 4:8, 9.

20-22. Songon dia do halak Kristen mangadopi portibi on jala boasa?

²⁰ Di adopan ni Debata, sude portibi na nirajaan ni Sibolis nunga marutang hosa. Sistem politik digombarhon di Bibel songon binatang na mambunu marjuta halak dohot ma i angka naposo ni Debata. (Daniel 8:3, 4, 20-22; Pangungkapon 13:1, 2, 7, 8) Ulaon bisnis dohot ilmu pengetahuan masiurupan dohot politik, na digombarhon songon binatang na mambahen sinjata. Nasida mandapot godang hepeng sian on. Tutu ma, ”di bagasan hajahaton do nasa portibi on”!​—1 Johannes 5:19.

²¹ Angka siihuthon Jesus ”ndang sian portibi on” jala nasida ndang parsidohot tu politik manang parporangan, ala ndang olo nasida marutang hosa tu angka donganna.d (Johannes 15:19; 17:16) Ditiru nasida do Jesus. Ndang olo nasida mambalos nang pe dipaburuburu. Dipatudu do holong tu musuna marhite manangiangkon nasida.​—Mateus 5:44; Rom 12:17-21.

²² Na rumingkot, halak Kristen ndang parsidohot tu ulaon ni ”Babel na balga”, punguan ni sude agama na so sintong dohot punguan na umbalga marutang hosa. Bibel paboahon, ”Na jumpang do di bagasan huta i mudar ni angka panurirang dohot angka na badia, ro di mudar ni saluhut naung tarseat di tano on.” Alani i, didok Debata ma, ”Laho ma hamu, ale bangsongku, ruar sian i.”​—Pangungkapon 17:6; 18:2, 4, 24.

23. Aha do lapatanna ruar sian Babel na balga?

²³ Ruar sian Babel na balga lapatanna, ndang holan manesa goar asa unang gabe ruas ni nasida. Alai, ingkon dihasogohon do ulaon na jahat na tangkas diulahon agama na so sintong, songon parmainanon, politik dohot holongan di arta. (Jaha Psalmen 97:10; Pangungkapon 18:7, 9, 11-17) Jotjot do angka ulaon sisongon on mambahen halak mate!

24, 25. (a) Marhite aha do dipatudu Debata asi ni rohaNa tu halak na marutang hosa naung marhamubaon? (b) Songon dia do on digombarhon di Bibel?

²⁴ Andorang so mangihuthon panombaon na sintong, ra hea do hita parsidohot tu ulaon portibi on, na boi mambahen hita marutang hosa. Alai, marhite tobusan, tapatudu ma hamubaon jala talehon ma dirinta tu Debata. Tadapot ma asi ni roha dohot parlinggoman sian Debata di partondion. (Ulaon ni Apostel 3:19) Parlinggoman on manggombarhon huta haporusan na hea masa najolo.​—4 Musa 35:11-15; 5 Musa 21:1-9.

²⁵ Songon dia do on diulahon? Molo halak Israel mambunu sasahalak alai ndang sian sangkapna, ibana ingkon maporus tu huta haporusan. Dung dibahen panguhum haputusan taringot parsoalan i, halak na maporus i ingkon tongtong tading di huta haporusan sahat tu na mate sintua ni malim. Dung i, boi ma ibana ruar jala maringanan manang didia pe. Tudosan on manggombarhon asi ni roha ni Debata. Tangkas ma, diargai Debata do hangoluan ni jolma! Saonari, ”huta haporusan”, i ma angka na pinarade ni Debata marhite tobusan ni Jesus. On mangondingi hita sian hamatean ala mangulahon na sala taringot hangoluan dohot mudar, na so sian sangkap ni rohanta. Diargai hamu do on? Songon dia do hamu patuduhon pangargaion tu Debata? Marhite manggokkon halak asa parsidohot tu ”huta haporusan” sisaonari, tarlumobi ala nunga jonok ”haporsuhon” bolon.​—Mateus 24:21; 2 Korint 6:1, 2.

26-28. Songon dia do na masa di tingkinta saonari dos tu na masa di tingki ni panurirang Hesekiel? Songon dia do hita asa boi tongtong di bagasan holong ni roha ni Debata?

²⁶ Angka na masa tu naposo ni Debata saonari on, paingothon hita tu panurirang Hesekiel na disuru Jahowa gabe sahalak parjaga, na pasahathon sipasingot tu pinompar ni halak Israel. Debata mandok, ”Ia adong hata nanggo sada dibege ho sian pamanganku, ingkon sipasingothononmu do i tu nasida sian ahu.” Molo ndang diulahon si Hesekiel on, marutang hosa ma ibana tu halak na mate tingki diripashon Jerusalem. (Hesekiel 33:7-9) Alai, dioloi si Hesekiel do parenta on, gabe ndang marutang hosa ibana.

²⁷ Saonari, hita mangadopi ujung ni portibi on. Alani i, Sitindangi Ni Jahowa pasahathon ”ari partubolan [panguhuman] ni Debatanta” tingki marbarita. (Jesaya 61:2; Mateus 24:14) Hiras do rohamuna mangulahon ulaon on? Mansai ringkot do ulaon marbarita di apostel Paulus. Ibana mandok, ”Naung [ias] do ahu sian sapata ni mudar ni saluhut hamu.” (Ulaon ni Apostel 20:26, 27) Sitiruon na denggan do on tu hita!

²⁸ Asa boi hita tongtong di bagasan holong ni Jahowa, ndang sae holan pahombarhon pingkiranta tu pingkiran ni Debata taringot hangoluan dohot mudar. Porlu ma hita tongtong ias manang badia di adopanNa, songon na laho taulas di pasal na mangihut.