Sian dia Boi Huboto na Adong Harapan di Masa Depan?

Na didok Bibel

Didok di Bibel, na lao bahenon ni Debata do ‘denggan ngolutta di ari na naeng ro’.a (Jeremia 29:11) I do alana boasa dilehon Debata Bibel tu hita, asa “diurupi na tarsurat i do hita . . . togu manaon sitaonon”. (Rom 15:4) Di Bibel, adong do dipaboa nasehat na boi mangurupi hita tikki adong masalah. Asing ni i muse, adong do dipaboa di Bibel janji ni Debata na luar biasa taringot masa depan.

Di topik on lao dibahas ma

Songon dia do Bibel mangurupi hita mamboto na adong do masa depan?

Dipaboa Bibel do tu hita aha na boi taulahon asa boi denggan ngolutta jala dang putus asa. Parrohahon ma akka contoh on.

Lului ma petunjuk sian Bibel. Psalmen 119:105 mandok, “Dos songon lampu do hatam na manogu-nogu pattu, jala na mambahen tiur dalanku.” Sada senter natorang, boi do mambahen torang dalanta. Suang songon i ma, Bibel dos do songon senter na torang i. Nasehat na adong di Bibel, boi do mangurupi hita tikki adong masalahta. Gabe boi ma hita marpikkiran positif. Nang pe loja tahilala alani godang ni sitaononta, alai nasehat sian Bibel boi do paulakkon gogotta “boi mambahen las roha”. (Psalmen 19:7, 8) Asing ni i, Bibel boi do mangurupi hita mamboto akka aha do janji ni Debata di masa depan tu jolma dohot tu tano on. Akka janji i mambahen hita marlas ni roha.
Jalo ma bantuan sian halak na asing. Tikki marsak hita manang putus asa, olo do didok rohatta tumagon ma mandao sian keluarga manang sian akka donganta. Alai didok di Bibel, dang denggan songon i. Alana, boi do gabe tabahen keputusan na sala, manang boi do gabe taulahon akka ulaon na so denggan. (Poda 18:1) Keluarga dohot akka donganta boi do mangurupi hita asa masuk akkal cara marpikkirta. Jala, olo do ra adong saran akka na denggan sian nasida. (Poda 11:14) Manang, boi do nasida menghibur hita jala mambahen hita asa semangat muse jala boi hita tetap bertahan.—Poda 12:25.
Martangiang ma tu Debata. Didok di Bibel, “Pasahat ma holso ni roham tu Jahowa, sai urupanna do ho. Dang pasombuonna madabu halak na tigor marroha.”b (Psalmen 55:22) Didok do, Jahowa i ma “Debata na manjanjihon na denggan tu hamu”. (Rom 15:13) Boi do dipaboa hamu sude “holso ni rohamuna” tu Jahowa. Jala pos ma rohamuna diparrohahon do hamu. (1 Petrus 5:7) Didok do muse di Bibel, “Patoguonna, pargogoanna, jala pahotonna ma hamu.”—1 Petrus 5:10.
Sitaonon na masa tu hamu boi do lam patoguhon hamu. Didok di Bibel, “Alai na lao dame do ngolu ni halak na manangihon [Debata] jala dang mabiar nasida molo ro jea.” (Poda 1:33) Contohna, sahalak borua na margoar si Margaret di Australia. Tikki ro badai, sega do jabuna jala mago akka artana. Nang pe songon i, dang putus asa ibana. Alai sian na masa i gabe marsiajar do ibana, molo arta boi do mago manang sadihari pe. Jadi mulai sian i, gabe bertekad do ibana asa fokus ibana tu akka na uppetting, i ma keluarga, akka donganna, hubunganna tu Debata, dohot tu harapanna di masa depan na dipaboa di Bibel.—Psalmen 37:34; Jakobus 4:8.

Aha do harapan na dipaboa Bibel tu sude jolma?

Dipaboa do di Bibel na adong masa depan na denggan tu sude jolma. Jala satokkin nai lao saut do i. Godang ni sitaonon na masa tu hita saonari patuduhon, naung mangolu hita “di ari parpudi”. (2 Timoteus 3:1-5) Satokkin nai, lao mamaretta nama pamarettaon ni Debata sian surgo tu portibi on. Di pamarettaonna i, dang adong be hasusaan jala dang adong be na so adil. (Daniel 2:44; Pangungkapon 11:15) Pamarettaon na didok dison, i ma pamarettaon na didok Jesus di tangiang hatopan “Sai ro ma Harajaonmu. Sai saut ma lomo ni roham di tano on.”—Mateus 6:9, 10.

Takkas do dipaboa di Bibel aha tujuan ni Debata lao manoppa jolma. Haduan dung mamaretta Debata tu portibi on, dang adong be:

Kelaparan. “Lehonon ni tano on ma hasilna.”—Psalmen 67:6.
Sahit. “Dang adong nanggo sahalak pe na maringanan disi na mandok, ‘Marsahit do au.’”—Jesaya 33:24.
Hamatean. “Apusan ni Debata ma nasa ilu-ilu sian mata ni [sude jolma]. Dang adong be hamatean nang arsak ni roha, nang angguk-angguk, nang na haccit, dang disi be. Ai nungnga salpu na parjolo i.”—Pangungkapon 21:3, 4.

a Na adong do na taharappon, jala pos do rohatta lao dapotta do i. Harapan, i ma na tapaima-ima lao saut.

b Jahowa, i ma goar ni Debata na disurat di Bibel.—Psalmen 83:18.

Akka ayat ni Bibel na paboahon taringot harapan

Job 5:16: “Adong ma na dipaima-ima ni halak na lea.”

Maksudna: Akka halak na dihasogohon akka na di portibi on, boi do pos rohana jala berharap tu Debata na lao diparrohahon Debata Jahowa do nasida.

Psalmen 27:14: “Marpos ni roha ma tu Jahowa. Barani ma ho jala patogu ma roham. Pos ma roham tu Jahowa.”

Maksudna: Molo pos do rohatta tu Debata Jahowa, boi do hita barani jala margogo. Dang na lao tinggalhononna akka halak na porsea tu Ibana.

Psalmen 62:5: “Sabar do au paimahon Debata, ai sian Ibana do ro na hupaima-ima.”

Maksudna: Akka halak na pos rohana tu Debata, boi do sabar tikki manaon sitaonon. Jala pos do rohana, na urupan ni Debata do ibana pas di tikkina.

Poda 20:22: “Unang ma dok, ‘Ikkon balosokku do pambahenanna na jahat i!’ Alai marpos ni roha ma ho tu Jahowa, urupanna do ho.”

Maksudna: Molo adong sasahalak na mambahen haccit rohatta, molo pos do rohatta tu Jahowa boi do gabe dang olo hita balas dendam. Jala lomo do roha ni Debata lao mangurupi hita. Boi do bahenon ni Debata denggan situasitta jala lomo do rohana lao mangulahon i.

Heber 6:19: “Songon jangkar ni kapal do janji i di ngolutta na mambahen hita togu, marpos ni roha.”

Maksudna: Songon jangkar boi do mambahen kapal hot tikki ro badai. Suang songon i ma, alani harapan na sian Debata boi ma gabe tenang roha dohot pikkiranta jala gabe lam togu haporseaonta. Jala harapan, boi do mambahen hita tetap bertahan di tikki susa.