Tutu do Adong Api Narokko? Aha do Didok Bibel taringot Api Narokko?

Marragam Bibel bahasa Inggris na leleng songon Bibel King James Version mamakke hata “narokko” di piga-piga ayat. (Psalmen 16:10; Ulaon ni Apostel 2:27a) Songon na dipatudu gambar na adong di artikel on, godang do halak na porsea molo narokko i inganan lao manghukum akka halak na jahat di bagasan api na marsigorgor saleleng ni lelengna. Alai memang songon i do na diajarhon Bibel tu hita?

Na lao dibahas di artikel on

• Tutu do narokko i inganan lao manghukum halak na jahat saleleng ni lelengna?

• Aha do lapatan ni perumpamaan ni Jesus taringot bawa na mora dohot si Lasarus?

• Tutu do narokko i manggombarhon keadaan ni halak na terpisah sian Debata?

• Adong do halak naung hea kaluar sian narokko?

• Akka ayat ni Bibel taringot narokko, manang Kuburan

• Bahasa asli ni hata narokko

• Ajaran taringot api narokko sepanjang sejarah

Daong. Hata asli ni “narokko” di piga-piga terjemahan ni Bibel na leleng (Heber “Syeol”; Junani “Hades”) sebenarna mangartihon “Kuburan” manang kuburan secara umum. Jala dipaboa do di Bibel molo akka halak na adong di “Kuburan” i dang diboto be agia aha.

• Akka halak naung mate dang diboto be agia aha jala dang dihilala be na haccit. “Dang adong be ulaon, dang adong rencana, dang adong parbinotoan, dang adong bisuk di bagasan narokko.” (Parjamita 9:10, Douay-Rheims Version) Dang dihilala halak naung mate be na haccit manang marsurak alani haccitna. Alana didok do di Bibel, “Paloas ma halak na jahat dipaila jala bahen ma nasida sip di bagasan kuburan [narokko, Douay-Rheims].”—Psalmen 31:17; King James Version (30:18, Douay-Rheims); Psalmen 115:17.

• Didok Debata upa ni dosa, i ma hamatean dang disiksa di bagasan api narokko. Didok Debata do tu jolma na parjolo, i ma si Adam, molo dang dioloi ibana paretta ni Debata ikkon mate do ibana. (1 Musa 2:17) Dang adong dipaboa Debata na lao dihukum si Adam di bagasan api narokko. Alana dung mardosa si Adam, dipaboa Debata ma hukuman aha na lao dijalo si Adam. Didokkon Debata ma songon on, “Ai sian tano do ho jala mulak tu tano do ho sogot.” (1 Musa 3:19) Jadi dung mate si Adam, dang adong be ibana. Alana molo tutu do dibahen Debata si Adam tu bagasan api narokko, pasti dipaboa Debata hian do i tu si Adam. Sian on taboto, dang diubah Debata hukumanna tu akka halak na mangalo parettana. Marribu taon dukkon mardosa si Adam, dipaboa Debata do tu sahalak panurat ni Bibel, “Ai upa ni dosa do hamatean.” (Rom 6:23) Jadi dung mate sasahalak, dang porlu be adong hukuman na asing, alana “molo nungnga mate sasahalak, nungnga malua be ibana sian dosana.”—Rom 6:7.

• Dang hea tubu di roha ni Debata lao manghukum halak na jahat di api narokko. (Jeremia 32:35) Ajaran api narokko maralo do tu ajaran ni Bibel, alana Bibel mandok “holong do Debata”. (1 Johannes 4:8) Lomo do roha ni Debata asa hita manomba Ibana ala holong rohatta tu Ibana, dang alani mabiar disiksa di bagasan api narokko.—Mateus 22:36-38.

• Akka halak na burju pe tu narokko do. Akka halak na burju na dipaboa di Bibel pe tu “narokko” do, misalna si Jakkob dohot si Job. (1 Musa 37:35; Job 14:13) Gari Jesus Kristus pe didok do ibana tu narokko dung mate ibana. (Ulaon ni Apostel 2:31, 32) Alai hata “narokko” na dipakke di akka terjemahan ni Bibel, sebenarna mangartihon Kuburan.b

Perumpamaan ni Jesus on disurat di Lukas 16:19-31. Perumpamaan i ma sada carita manang tudosan na mangajarhon tu hita songon dia marpangalaho na denggan jala songon dia cara marpikkir ni Debata. Alai perumpamaan taringot bawa na mora dohot si Lasarus on dang kisah nyata. (Mateus 13:34) Molo lomo rohamuna mamboto godang hatorangan taringot on, jaha ma artikel “Ise do Bawa na Mora dohot si Lasarus i?”

Daong. Didok di Bibel molo halak naung mate i dang diboto be agia aha. Jadi ajaran na mandok diboto halak naung mate do molo nasida terpisah sian Debata, dang sesuai tu ajaran ni Bibel.—Psalmen 146:3, 4; Parjamita 9:5.

Adong. Dipaboa di Bibel, adong sia halak naung mate jala nungnga dipamasuk tu Kuburan (diterjemahon gabe “narokko” di piga-piga Bibel) jala dibahen do nasida sude mulak mangolu muse.c Molo tutu do dihilala na mate i na disiksa nasida di bagasan narokko, pasti boi do dipaboa nasida aha na masa disi. Alai dang adong nanggo sada pe sian nasida paboahon na disiksa nasida manang paboahon aha na dihilala tikki mate nasida. Boasa songon i? Alana didok do di Bibel, akka halak naung mate i dang diboto be agia aha, jala sarupa do nasida songon halak na renges “modom”.—Johannes 11:11-14; 1 Korint 15:3-6.