“Mandapot Parnidaan ma Au sian Debata”

1-3. (a) Ceritahon ma aha na diida si Hesekiel dohot na dibege ibana. (Ida gambar di mula ni parsiajaran.) (b) Huaso ni ise do na dihilala si Hesekiel jala aha do pengaruhna tu ibana?

JONGJONG ma si Hesekiel manatap-natap di padang pasir. Tarsonggot ma ibana mangida adong badai na gogo ro tu arah ni ibana. Alani gogo ni alogo i, sappe habang-habang do obukna dohot pakkeanna. Diida ma muse ombun na hapal, na hatop bergerak tu arah ni ibana. Adong do kilat na songon api di ombun i, warnana songon mas na dicampur dohot perak. Dibege ibana do muse adong soara na massai gogo songon soara ni pasukan tentara na mardalan.​—Hes. 1:4, 24.

² On ma parnidaan na parjolo sahali dijalo si Hesekiel. Dang mungkin boi lupa ibana tu parnidaan i. Tikki i, hira-hira marumur 30 taon ma ibana. Dihilala ibana ma “huaso ni Jahowa”, i ma tondi parbadia ni Jahowa na massai hebat i. Tondi parbadia i do na mambahen ibana gabe boi mangida jala mambege akka na luar biasa. Parnidaan i dao unjago sian sude film na dibahen jolma saonari on. Dung mandapot parnidaan i, marsinggang ma ibana alani longang ni rohana.​—Hes. 1:3, 28.

³ Dang holan asa longang roha ni si Hesekiel umbahen na dilehon Jahowa parnidaan i. Alai marhite parnidaan on dohot parnidaan na asing, godang do na diajarhon Jahowa tu si Hesekiel dohot tu akka naposona saonari on. Jadi taparsiajari ma aha na diida dohot aha na dibege si Hesekiel.

4, 5. Songon dia do situasina tikki mandapot parnidaan si Hesekiel parjolo sahali?

⁴ Jaha Hesekiel 1:1-3. Bayakkon ma songon dia situasina. Taon 613 SM ma di tikki i. Songon na tabahas di Pasal 2, nungnga di Babel si Hesekiel. Ibana tinggal rap dohot tawanan na asing di labbung ni Sunge Hebar. Sunge na binahen ni jolma do on jala boi do mardalan kapal sian i. Aekna masuk sian Sunge Euprat jala kaluar muse tusi.

⁵ Hira-hira 800 kilometer do dao ni kota Jerusalem sian Babel.a Dang badia be bagas joro alani ibadat na so sittong dohot alani akka patung. Hape disi hian do bapak ni si Hesekiel gabe malim. Tahta harajaon na di Jerusalem inganan ni Raja Daud dohot si Salomo pe dang sangap be, dang adong be argana. Dohot do muse si Jehoyakin raja na so manomba Debata ditakkup jala diboan tu Babel. Raja Sedekia na manggattihon ibana pe torus do mangulahon na jahat jala dikendalihon raja ni Babel do ibana.​—2 Raj. 24:8-12, 17, 19.

6, 7. Boasa massai susa situasi di tikki i di si Hesekiel?

⁶ Massai susa do situasina di tikki i di si Hesekiel, halak na setia i. Alana, olo do adong sian halak na ditakkup i mandok, ‘Naung ditinggalhon Jahowa do hita salelengna? Naung marhasil do Babel na jahat dohot debatana i manghancurhon ibadat na sittong? Naung marhasil do Babel i manggattihon pamarettaon ni Jahowa di tano on?’

⁷ Huhut tabayakkon situasina, jaha ma hatorangan na disurat si Hesekiel taringot parnidaan na parjolo i. Bahen ma i gabe bahan pelajaran pribadimuna. (Hes. 1:4-28) Tikki dijaha hamu i, bayakkon ma hamu gabe si Hesekiel na mangida jala na mambege parnidaan i.

8. Aha do na diida si Hesekiel di parnidaan i jala manggombarhon aha do i?

⁸ Aha do na diida si Hesekiel? Adong diida ibana na songon kareta na balga. Di toru ni kareta i, adong opat roda na balga dohot opat suru-suruan na istimewa, na digoari kerubim. (Hes. 10:1) Di atas ni kerubim i adong na songon lante na sian es. Jala di atas ni lante i, adong tahta ni Debata na mulia. Hundul do Jahowa di atas ni tahta i. Aha do na digombarhon kareta i? Holan sada do na boi pas digombarhon kareta i, i ma bagian organisasi ni Jahowa na mulia na di surgo. Boasa boi tadok songon i? Taparrohahon ma tolu alasanna.

9. Boasa cocok kareta na balga i manggombarhon hubungan ni Jahowa dohot akka toppaanna na di surgo?

⁹ Hubungan ni Jahowa dohot akka toppaan na di surgo. Di parnidaan i, dipaboa do molo tahta ni Jahowa adong di atas ni kerubim. Molo di akka ayat na asing, tahta ni Jahowa digombarhon di atas manang di tonga-tonga ni akka kerubim. (Jaha 2 Raja-Raja 19:15; 2 Mus. 25:22; Ps. 80:1) Pasti on dang patuduhon na langsung Jahowa hundul di atas ni kerubim i. Ai dang porlu Ibana diangkat akka suru-suruan na gogo. Dang porlu di Debata kareta lao mamboan Ibana manang tudia pe. Attong aha do lapatanna? Diakkui akka kerubim i do Jahowa Parhuaso Natumimbul, jadi boi do Jahowa manuru nasida manang na tudia pe di alam semesta on lao mangulahon lomo ni rohana. Sarupa do nasida songon suru-suruan na asing, na mandapot tugas mangulahon paretta ni Jahowa manang gabe wakilna. (Ps. 104:4) Jahowa do na mangatur nasida sude, jadi cocok do molo digambarhon nasida songon sada kareta na balga na dikendalihon Jahowa.

10. Aha do muse na digombarhon opat kerubim na di kareta i?

¹⁰ Kareta i dang holan manggombarhon opat kerubim. Adong opat kerubim na diida si Hesekiel. Angka opat jotjot do dipakke di Bibel lao patuduhon na lengkap sude. Jadi cocok do kerubim na opat i manggombarhon sude anak ni Debata na setia na di surgo. Molo taparrohahon muse, gok do mata di akka roda i, dohot di akka kerubim i. On patuduhon sude anak ni Debata na di surgo boi do mangida jala mamparrohahon sude na masa. Dipatudu si Hesekiel do muse na massai balga kareta i. Ai molo dibandingkon tu kareta i, gabe gelleng do diida ibana akka kerubim i. (Hes. 1:18, 22; 10:12) Dos songon i ma organisasi ni Jahowa na di surgo, massai balga do i dang holan opat kerubim na adong disi.

11. Aha do na sarupa sian parnidaan ni si Daniel tu parnidaan ni si Hesekiel, jala aha do na boi taboto sian i?

¹¹ Si Daniel mandapot parnidaan na sarupa taringot surgo. Saleleng na ditakkup i halak Jahudi, tinggal di kota Babel do Panurirang Daniel. Tikki i, mandapot parnidaan do ibana taringot surgo. Diida ibana do tahta ni Jahowa jala adong rodana. Alai na uppetting dipaboa di parnidaanna, i ma sadia godang na dohot tu keluarga ni Jahowa na di surgo i do. Diida si Daniel do adong ‘marribu jala marjuta’ suru-suruan na jongjong di jolo ni Jahowa. Ro do nasida sude tu Pengadilan na di surgo. Adong be do ingananna jala adong be do tugasna. (Dan. 7:9, 10, 13-18) Sian on boi ma taboto, kareta na diida si Hesekiel i dohot do manggombarhon sude suru-suruan na sangap i.

12. Boasa boi hita gabe aman molo taparsiajari hatorangan na di parnidaan ni si Hesekiel i?

¹² Diboto Jahowa do molo toktong taparrohahon akka “na so tarida i”, aman ma hita. Songon i do tong na dipaboa si Paulus. Boasa? Ai ummura do jolma mamparrohahon “akka na tarida”, hape holan parsatokkinan do i. (Jaha 2 Korint 4:18.) Jotjot do dipakke Sibolis hahurangatta on lao mambahen hita mamikkirhon akka na tarida. Alai holong do roha ni Jahowa tu hita. Marhite parnidaan ni si Hesekiel, diurupi Ibana do hita asa unang terpengaruh tu Sibolis. Sian parnidaan i, gabe taboto ma taringot keluarga ni Jahowa na di surgo na luar biasa i.

13, 14. (a) Aha do na didok si Hesekiel taringot akka roda na niidana i? (b) Boasa cocok didok kareta ni Jahowa i marroda?

¹³ Mulana, opat kerubim i do na diparrohahon si Hesekiel. Sian Pasal 4, taparsiajari ma taringot Jahowa sian akka kerubim on dohot bohi ni nasida. Saonari, tabahas ma jo opat roda na diida si Hesekiel i. Opat roda i adong di sapping ni akka kerubim i. Mungkin nasida adong di opat sudut, jadi gabe bentuk persegi do kareta i. (Jaha Hesekiel 1:16-18 dohot surat na di toru.) Akka roda i hira na dibahen sian batu krisolit na arga do, mungkin batu na marwarna kuning manang warna ijo campur kuning. Marhillong do batu i jala massai bagak.

¹⁴ Godang do hatorangan na disurat si Hesekiel taringot roda na opat i. Asing do tahta i sian tahta na biasa taida. Alana, adong rodana. Dang hea tabayakkon sada tahta boi marpinda sian sada inganan tu inganan na asing. Biasana, sada tahta i hot do di sada inganan. Ai holan di inganan na ditottuhon i do boi sahalak raja mamaretta. Alai, pamarettaon ni Jahowa asing do sian jolma. Songon na lao diida si Hesekiel, dang adong batas ni huaso ni Jahowa i. (Neh. 9:6) Debata Parhuaso Natumimbul do Ibana, na marhak mamaretta manang na didia pe.

15. Aha do na dipaboa si Hesekiel taringot akka roda i?

¹⁵ Tarhatotong do si Hesekiel mangida balga ni akka roda i. Songon on do disurat ibana, “Massai timbo do akka roda i. Gabe longang roha mangida.” Boi ma tabayakkon, mungkin sappe naeng balik do ibana tu pudi mangida tu ginjang akka roda na balga na massai timbo i. Didok ibana, “Gok do akka mata di pinggir ni roda na opat i.” Alai sian sudena i, na mambahen asing roda on sian na asing, i ma cara ni akka roda i dirancang. Ibana mandok, “Roda na sada dipamasuk tu roda na sada nai.” Aha do lapatan ni i?

16, 17. (a) Aha do lapatanna roda dipasang marsilang? (b) Aha do na boi taboto sian cara ni kareta i mardalan?

¹⁶ Setiap roda ni kareta i dipasang sian dua roda. Marsilang do i dipasang jala tegak lurus. Alani i ma didok si Hesekiel, “Molo mardalan akka roda i boi do nasida mardalan manang tu arah na dia pe, dang pola porlu diubah arahna.” Jadi sian hatorangan on, aha do na boi taboto taringot kareta i?

¹⁷ Alani timbo ni roda i, sahali marputar dao do na boi didalani. Didok do muse di parnidaan i, songon sillam do hatop ni roda i mardalan! (Hes. 1:14) Dang adong dope tukkang ni masin na boi mambahen roda na songon i dengganna, na boi mardalan tu arah na dia pe jala na so porlu dipalambat tikki lao marbelok! Alai dang na gabe asal-asalan arah ni kareta i tikki mardalan. Gok do mata di pinggir ni akka roda i. Jadi boi do diida kareta i tu sude arah, jala takkas do diboto aha na adong di sakalilingna.

18. Aha do na boi taparsiajari sian akka roda na balga dohot akka mata na di roda i?

¹⁸ Aha do na naeng diajarhon Jahowa tu si Hesekiel dohot tu naposona taringot organisasina na di surgo i? Nungnga tabahas nakkin, mulia jala palongang roha do organisasi ni Jahowa na di surgo i. Dos ma i songon akka roda na balga jala na marhillong i. Dung i diida organisasina i do sude na masa, dos songon roda na digohi mata i. Langsung do mata ni Jahowa mangida sude na masa. (Poda 15:3; Jer. 23:24) Asing ni i, adong do marratus juta suru-suruan na boi disuru Jahowa tudia pe di alam semesta on. Sude do boi manat diparrohahon nasida, jala paboaonna ma i tu Natumimbul i.​—Jaha Heber 1:13, 14.

19. Sian hatop ni kareta i mardalan, aha do na boi taparsiajari taringot Jahowa dohot organisasina na di surgo?

¹⁹ Nungnga taida nakkin, na massai hatop kareta i mardalan jala boi mardalan manang tu arah na dia pe. Sian on, takkas ma taida massai asing do organisasi ni Jahowa na di surgo i tu pamarettaon dohot organisasi ni jolma! Jotjot do dang diboto songon dia pasaehon parsoalan, jala dang boi nasida hatop mambahen penyesuaian tu situasi naung muba. Alani i, dang hea nasida marhasil jala gabe hancur. Alai anggo kareta ni Debata, Jahowa do na mangendalihon. Debata na masuk akkal do Ibana jala hatop mambahen penyesuaian tu situasi na muba. Sesuai tu lapatan ni goarna, boi do Ibana gabe manang aha pe lao pasautton lomo ni rohana. (2 Mus. 3:13, 14) Umpamana, boi do Debata gabe songon sahalak Tentara na jago lao mambela naposona. Jala di situasi na sarupa, boi do muse Ibana hatop gabe songon sahalak Ama parasi roha na rade manalpuhon hasalaan, jala na olo manjalo halak na mardosa naung marsitutu mambahen hamubaon.​—Ps. 30:5; Jes. 66:13.

20. Boasa porlu tarimangi taringot kareta ni Jahowa?

²⁰ Dung taboto parnidaan ni si Hesekiel i, olo do ra gabe ro tu pikkiranta, ‘Tutu do longang rohakku mangida kareta ni Jahowa i?’ Porlu do taingot, mardalan dope kareta i saonari. Unang ma hea ro tu pikkiranta na so diida Jahowa, Anakna, dohot akka suru-suruan hasusaan na mambahen hita marmetmet ni roha. Pos ma rohatta, lehonon ni Debata do di tikkina sude na tahaporluhon. Nang pe godang tantangan na ro, jala torus situasi ni portibi on muba, pasti boi do organisasi ni Debata mangadopi i sude. Taingot ma, torus do maju organisasi ni Jahowa on. Di parnidaan i, dibege si Hesekiel do soara sian surgo na mandok, “Hamu akka roda na marputar, mardalan ma hamu!” (Hes. 10:13) Pasti longang do rohatta tikki tarimangi songon dia organisasi on dibahen mardalan. Alai dao do ullongang rohatta tikki taboto muse na Jahowa sandiri mangendalihon i sude.

21, 22. Boasa boi rap karejo sude bagian ni kareta i tikki mardalan?

²¹ Diparrohahon si Hesekiel ma muse aha na adong di ginjang ni akka roda i. Diida ibana ma adong ‘na songon lante na sian es jala marhillong’. (Hes. 1:22) Herbang do lante i di atas ni ulu ni akka kerubim i. Molo adong tukkang na paturehon masin manjaha on, olo do ra heran ibana jala ro tu pikkiranna, ‘Aha do na mambahen marsada lante i tu akka rodana? Ai boasa boi sude roda na opat i denggan mardalan, hape so adong tiang na pasadahon?’ Taingot ma, kareta on manggombarhon akka na adong di surgo do. Jadi dang marlakku hukum na di alam on lao mambatasi cara kerja ni kareta i. Parrohahon ma muse hata na penting on, “Tondi parbadia na mangarahon akka suru-suruan i pe, adong do di bagasan ni akka roda i.” (Hes. 1:20, 21) Songon dia do tondi parbadia mambahen akka kerubim i boi mardalan?

²² Tondi parbadia ni Jahowa do huaso na unggogo di alam semesta on. Tondi parbadiana i boi mambahen marsada, mambahen bergerak, jala mangarahon sude bagian ni kareta i dohot denggan. Huhut taingot i, taida ma muse hatorangan ni si Hesekiel taringot ise na mangendalihon kareta i.

23. Hata na songon dia do dipakke si Hesekiel lao manggombarhon Jahowa, jala boasa didok ibana songon i?

²³ Jaha Hesekiel 1:26-28. Tikki dipaboa si Hesekiel parnidaan on, jotjot do dipakke ibana hata, ‘adong do na songon’, ‘bentukna songon’, jala ‘idaon songon’. Alai tarlumobi ma di ayat na tolu on, godang do dipakke ibana hata sisongon i. On patuduhon, olo do maol si Hesekiel patorakkon na niidana i. Didok ibana do, “Adong ma na songon batu safir, bentukna songon tahta.” Jadi bayakkon ma, adong diida ibana sada tahta harajaon na dibahen sian sada batu safir na massai balga. Warna ni tahta i na balau jala di atasna hundul do “sasahalak na songon jolma”.

24, 25. (a) Aha do na dipaingot tu hita tikki dipaboa pelangi na di sakaliling ni tahta ni Jahowa? (b) Aha do na diulahon akka panurirang tikki mandapot parnidaan nasida?

²⁴ Dang boi takkas diida sude hamuliaon ni Jahowa i. Ai marsinondang do Ibana mulai sian pinggangna sahat tu ginjang, jala sian pinggangna tu toru. Marsinondang do Ibana songon api. Mungkin tikki diida si Hesekiel Jahowa, huhut do ditutupi ibana matana alani silona. Adong do muse di parnidaan i na mambahen longang rohana. Didok, “Di sakalilingna massai tiur, songon pelangi di atas ni ombun di tikki ro udan.” Boha do pakkilalaanmuna mangida pelangi? Pasti las rohamuna kan! Pelangi i, paingotton hita tu hamuliaon ni Debata Sitoppa saluhutna. Pelangi i, paingotton hita muse tu parjanjian dame na dibahen Jahowa dukkon Aek na Sumar. (1 Mus. 9:11-16) Nang pe Ibana massai gogo, alai Debata Hadameon do Ibana. (Heb. 13:20) Alani i, sude na setia manomba Ibana makkilala hadameon.

²⁵ Aha do na diulahon si Hesekiel dung diida ibana hamuliaon ni Jahowa? Songon on ma disurat ibana, “Tikki huida i, marsomba ma au.” Jadi longang ni rohana dohot biarna tu Debata mangonjar rohana lao marsomba. Songon i do na diulahon akka panurirang na asing tikki mandapot parnidaan nasida. Takkas do diboto, na so tama nasida manjalo i ala massai mulia do Jahowa. (Jes. 6:1-5; Dan. 10:8, 9; Pgk. 1:12-17) Nang pe songon i, dung mandapot parnidaan nasida lam dipatogu do rohana, jala songon i do na dihilala si Hesekiel. Hita pe, ikkon longang do nian rohatta tikki manjaha ayat ni Bibel na marisi parnidaan sisongon i.

26. Songon dia do parnidaanna i patoguhon roha ni si Hesekiel?

²⁶ Pasti parnidaan on patoguhon roha ni si Hesekiel. Ai olo do ra marmetmet ni roha manang marsak ibana mangida naposo ni Debata na di Babel i. Pos do rohana manang didia pe naposo ni Debata, di Jerusalem, di Babel, manang di inganan na asing, boi do sahat kareta ni Jahowa i tu nasida. Ai Debata do na mangendalihon organisasina na mulia i. Jadi, dang adong sian pamarettaon ni Sibolis on na tolap mangalo Debata. (Jaha Psalmen 118:6.) Diida si Hesekiel do muse na so dao sian jolma kareta ni Debata i. Ai hona do roda ni kareta i tu tano on! (Hes. 1:19) Pasti diparrohahon Jahowa do akka naposona na hona tawan i. Toktong do jagaon ni Ama parholong i nasida!

27. Aha do pengaruh ni parnidaan ni si Hesekiel i tu hita?

²⁷ Aha do pengaruh ni parnidaan i tu hita? Saonari, lam marsitutu do Sibolis menyerang halak na mangulahon ibadat na sittong. Lomo do rohana asa porsea hita na so adong na parduli tu hita, na dipasombu sahalakta, jala na dao hita sian Jahowa dohot organisasina. Alai unang ma pasombu marurat gabus sisongon i di roha nang di pikkiranta! (Ps. 139:7-12) Songon si Hesekiel, godang do na mambahen longang rohatta mangida organisasi ni Jahowa. Mungkin dang pola sappe marsomba hita songon ibana. Alai nungnga taida be na massai sangap organisasina i, gogo, hatop, boi mardalan tu arah na dia pe, jala mura mambahen penyesuaian tikki adong situasi na muba. Pasti longang do hita mamboto on.

28, 29. Aha do buktina na mardalan kareta ni Jahowa i saleleng saratus taon na parpudi on?

²⁸ Asing ni organisasina na di surgo, adong do organisasi ni Jahowa di tano on. Memang akka halak na so sempurna do na dohot tu organisasina na di tano on. Alai godang do na boi diulahon organisasi on, ala diurupi Jahowa nasida. Jadi sude naposo ni Debata di liat portibi on, boi do mangulahon akka na so sanggup diulahon nasida ala mangandalhon Jahowa. (Joh. 14:12) Molo tajaha piga-piga halaman sian bukku Harajaon ni Debata Mamarenta! taida ma naung massai bidang ulaon marbarita diulahon saleleng 100 taon na parpudi on. Dipaingot do hita songon dia organisasi ni Jahowa torus paradehon sikkola tu halak Kristen, songon dia organisasi i monang di pengadilan, bahkan songon dia organisasi i mamakke teknologi lao mangulahon lomo ni roha ni Debata!

²⁹ Nungnga godang na diulahon lao paulakkon ibadat na sittong i di ari parpudi on. Molo taparrohahon i sude, boi ma pos rohatta na mardalan do torus kareta ni Jahowa i saonari! Tottu sada hasangapon do ala boi gabe bagian ni organisasi ni Jahowa jala boi mangulahon tugas sian Debata Natumimbul i!​—Ps. 84:10.

30. Aha do na lao tabahas di pasal na mangihut?

³⁰ Adong dope na boi taparsiajari sian parnidaan ni si Hesekiel i. Di pasal na mangihut, tabahas ma taringot opat kerubim i. Aha do na boi taparsiajari sian nasida taringot Jahowa, Debata Parhuaso na mulia i?