PELAJARAN 23

Godang do Manfaatna Molo Tardidi

Edisi Tercetak

Jesus mandok, ikkon jolo tardidi do sasahalak asa boi gabe halak Kristen. (Jaha Mateus 28:19, 20.) Alai aha do lapatan ni hata “tardidi”? Boasa ikkon tardidi sasahalak? Jala aha do na ikkon diulahon asa boi tardidi?

1. Aha do lapatan ni hata “tardidi”?

Hata “tardidi” dibuat sian bahasa Junani na lapatanna “dibonompon” manang dibenamkan tu aek. Tikki tardidi Jesus di Sunge Jordan, dibenamkan do ibana disi, dung i ‘kaluar ma Jesus sian aek i’. (Markus 1:9, 10) Songon i ma tong na ikkon diulahon halak Kristen na sittong. Ikkon dibenamkan do nasida tu aek tikki tardidi.

2. Boasa ikkon tardidi sasahalak?

Molo tardidi sasahalak, on patuduhon naung dilehon ibana do ngoluna tu Debata Jahowa. Sebelum tardidi sasahalak, ikkon martangiang do ibana tu Jahowa. Ikkon paboaonna do na olo ibana mangulahon lomo ni roha ni Jahowa saleleng ni lelengna. Marjanji do ibana di tangiangna i, holan Jahowa do na lao sombaonna jala mangulahon lomo ni roha ni Debata do na uppetting di ngoluna. Bibel mandok, ‘Ikkon disoadahon do dirina . . . jala toktong mangihutton Jesus.’ Lapatanna, olo do ibana mangihutton ajaran dohot teladan ni Jesus. (Mateus 16:24) Molo dilehon sasahalak ngoluna tu Jahowa jala tardidi, gabe jonok ma hubunganna tu Jahowa dohot tu akka dongan na asing na manomba Ibana.

3. Aha do na ikkon diulahon asa boi tardidi?

Sebelum tardidi sasahalak, ikkon ditanda ibana do Jahowa jala ikkon pos do rohana tu Ibana. (Jaha Heber 11:6.) Lam godang na diboto sasahalak taringot Jahowa, gabe lam pos ma rohana tu Ibana. Jala gabe lam holong ma rohana tu Jahowa. Dung i, gabe lomo ma rohana paboahon taringot Jahowa tu na asing jala mangulahon parettana. (2 Timoteus 4:2; 1 Johannes 5:3) Jala molo nungnga “marpangalaho hombar tu lomo ni roha ni Jahowa” sasahalak, boi ma ibana mangalehon dirina tu Jahowa jala tardidi.—Kolosse 1:9, 10.a

ASA LAM TAATTUSI

Taida ma aha na boi taparsiajari sian pandidion ni Jesus, jala aha do na ikkon diulahon sasahalak asa boi tardidi.

4. Aha do na boi taparsiajari sian pandidion ni Jesus?

Jaha Mateus 3:13-17 lao mamboto taringot pandidion ni Jesus, dung i bahas ma sukkun-sukkun on:

Toho do tikki poso-poso Jesus tardidi?
Boha do carana Jesus dididi? Toho do holan dipispisson aek tu ibana?

Dung tardidi do Jesus baru pe diulahon ibana tugas istimewa na dilehon Debata. Jaha Lukas 3:21-23 dohot Johannes 6:38, dung i bahas ma sukkun-sukkun on:

Dung tardidi Jesus, ulaon aha do na uppetting di ngoluna?

5. Boi do hamu tardidi

Di mulana, adong do ra na mabiar mangalehon ngoluna tu Jahowa jala tardidi. Alai adong do na boi diulahon nasida asa pos rohana mangulahon i. Ida ma pengalaman ni piga-piga halak na mangulahon i. Putar ma VIDEO.

VIDEO: Patogu ma Hubunganmuna tu Jahowa (1:11)

Jaha Johannes 17:3 dohot Jakobus 1:5, dung i bahas ma sukkun-sukkun on:

Aha do na ikkon diulahon sasahalak asa pos rohana lao tardidi?

A. Sahalak borua marjanji tu Debata di tangiangna.

B. Dung i dibenamkan do ibana tu aek tikki tardidi.

Martangiang lao marjanji mangulahon lomo ni roha ni Jahowa saleleng ni lelengna
Tikki tardidi, on patuduhon naung talehon do ngolutta tu Debata

6. Gabe bagian sian keluarga ni Jahowa do hita molo nungnga tardidi

Marsada do sude Saksi Jahowa di liat portibi on. Songon sada keluarga do nasida, alana sarupa do na dihaporseai nasida jala sarupa do aturan na diihutton nasida. Jadi molo nungnga tardidi hita, gabe bagian sian keluarga i ma hita. Jaha Psalmen 25:14 dohot 1 Petrus 2:17, dung i bahas ma sukkun-sukkun on:

Aha do manfaatna molo nungnga tardidi hita?

Gambar: Sahalak borua naung tardidi mambayakkon akka dongan di huria. 1. Dipatogu donganta naung matua do ibana. 2. Manogu-nogu donganta naung matua do ibana. 3. Rap mangan do ibana dohot akka dongan na marragam umurna. 4. Rap marbarita tu sahalak bawa. 5. Marpoto dohot akka dongan sian marragam bangso tikki kebaktian.

ADONG DO NA MANDOK: “Dang barani dope au tardidi bah.”

Nang pe songon i perasaanmuna, alai adong do rencanamuna lao tardidi?

KESIMPULAN

Jesus mandok ikkon tardidi do sasahalak asa boi gabe halak Kristen. Asa boi tardidi, ikkon pos do rohana tu Jahowa, mangulahon parettana, jala mangalehon ngoluna tu Debata.

Tinjauan

Aha do lapatan ni hata “tardidi”?
Boasa ikkon dilehon sasahalak ngoluna tu Debata jala tardidi?
Aha do na ikkon diulahon sasahalak sebelum dilehon ibana ngoluna tu Debata jala tardidi?

Sae diparsiajari tanggal:

Coba ma jo on

Di ujung ni Bagian 4, adong daftar ceklis “Nungnga Rade Be Au Marbarita na Uli?” dohot “Nungnga Rade Be Au Tardidi?”. Boi do on dipakke hamu lao mangida kemajuanmuna.

Manang:

Your other goal

LULUI MA

Jaha ma pandapot na sittong dohot na so sittong taringot pandidion.

“Aha do Lapatanna Tardidi?” (Artikel web)

Aha do na boi diulahon sasahalak asa boi tardidi?

“Holong dohot Pangargaion tu Jahowa Mangonjar Rohatta asa Tardidi” (Joujou Paboahon, Maret 2020)

Jaha ma taringot sahalak bawa na mambandingkon ajaran ni Bibel tu ajaran ni agamana najolo sebelum tardidi ibana.

“Ikkon Hupastihon do dia na Sittong” (Joujou Paboahon, 1 Februari 2013)

Aha do manfaatna molo tardidi hita jala aha do na ikkon taulahon asa boi tardidi?

“Apakah Aku Mesti Dibaptis?” (Pertanyaan Kaum Muda —Jawaban yang Praktis, Jilid 2, pasal 37)

a Molo nungnga tardidi sebelumna sasahalak di agamana, ikkon tardidi do muse ibana. Boasa? Alana dang ajaran sian Bibel na diajarhon di agamana i.—Ida Ulaon ni Apostel 19:1-5 dohot Pelajaran 13.