Pasti Saut do Janji ni Debata na Dipaima-ima Hamu

 1. Boasa boi tadok na toktong pos roha ni si Abraham na lao adong do anakna?

MARJANJI do Jahowa tu ale-alena si Abraham na lao mandapot pasu-pasu sude bangso di tano on alani ibana. (1 Mus. 15:5; 22:18) Ala togu do haporseaon ni si Abraham tu Debata, pos ma rohana na lao saut do janji ni Debata. Alai dung 100 taon umur ni si Abraham jala 90 taon umur ni istrina, dang marna adong gelleng ni nasida. (1 Mus. 21:​1-7) Nang pe songon i didok Bibel, “Porsea jala pos do roha ni si Abraham na boi ibana gabe ama ni godang bangso.” (Rom 4:18) Taboto do, saut do na dipaima-ima si Abraham i. Dung leleng ibana paima-imahon, tubu ma anakna si Isak. Aha do na mambahen toktong pos roha ni si Abraham tu janji ni Debata i?

 2. Aha do na mambahen pos roha ni si Abraham na lao saut janji ni Debata?

² Ala massai jonok do hubungan ni si Abraham tu Jahowa, “pos situtu do rohana pasauton ni Debata do sude janjina i”. (Rom 4:21) Lomo do roha ni Jahowa mangida si Abraham. Didok ma ibana halak na mangulahon na sittong alani haporseaonna. (Jak. 2:23) Songon na disurat di Rom 4:​18, halak na porsea do si Abraham jala pos do rohana tu janji ni Debata. Saonari taida ma aha na dipaboa Apostel Paulus taringot pos ni roha tu janji ni Debata, songon na disurat di Rom bindu 5.

 3. Aha do na dipaboa si Paulus taringot pos ni roha i?

³ Dipaboa si Paulus do boasa ‘pos situtu rohatta tu akka na tapaima-ima i’. (Rom 5:5) Jala di Rom 5:​1-5 dipaboa ibana do muse tu hita boi do sebenarna lam martamba pos ni rohatta i. Molo diingot hamu sian pengalaman pribadimuna, parrohahon ma toho do hata ni si Paulus i. Saonari, pasti nungnga tamba be pos ni rohamuna tu janji ni Debata. Jala boi do ditambai hamu muse pos ni rohamuna i. Na parjolo tabahas ma jo hata ni si Paulus na paboahon janji ni Debata na dia do na tapaima-ima.

 4. Aha do na dibahas di Rom 5:​1, 2?

⁴ Jaha Rom 5:​1, 2. Disurat si Paulus do on tu akka dongan na di huria Rom. Akka dongan na disi nungnga mamboto taringot Jahowa dohot Jesus, nungnga marhaporseaon, jala nungnga gabe halak Kristen. Alani haporseaon ni nasida, ‘didok Debata ma nasida halak na mangulahon na sittong’. Asing ni i, dimiahi Debata ma nasida marhite tondi parbadiana. Jala pos situtu do roha ni nasida, na lao saut do janji ni Debata i.

 5. Janji ni Debata na dia do na dipaima-ima halak Kristen na miniahan?

⁵ Dipaboa si Paulus do muse tu halak Kristen na miniahan di Epesus taringot janji ni Debata na dilehon tu nasida. Lao dijalo nasida ma ‘hasangapon na dilehon Debata tu akka na badia’. (Eps. 1:18) Dipaboa si Paulus do muse tu akka dongan na di Kolosse didia do annon nasida mandapot upa i. Didok ibana, hadiah na dipaima-ima nasida i, i ma hangoluan salelengna di surgo. (Kol. 1:​4, 5) Jadi lao dipahehe ma sude halak Kristen na miniahan asa boi mangolu saleleng ni lelengna di surgo jala rap mamaretta dohot Kristus.—1 Tes. 4:​13-17; Pgk. 20:6.

 6. Aha do na didok sahalak donganta na miniahan taringot janji ni Debata tu nasida?

⁶ Massai arga do janji ni Debata i tu halak Kristen na miniahan. Songon on ma na didok sahalak donganta na miniahan na margoar si Frederick Franz di taon 1991, “Pos do rohanami na lao jaloonnami do janji ni Debata i. Jala dang adong sian hami si 144.000 i na so manjalo janji i. Dang adong be na ummarga sian i.” Dung melayani Jahowa ibana saleleng marpulu taon, didok ibana ma muse, “Tetap do arga di hami janji ni Debata i. . . . Lam leleng i dipaima hami, lam arga do i di hami. Nang pe ikkon marjuta taon dipaima hami i, dang masalah i di hami. Olo do hami paimahon i. Molo di au, lam leleng au paimahon, lam arga do janji ni Debata i di au.”

7-8. Janji ni Debata na dia do na dipaima-ima godangan naposo ni Jahowa? (Rom 8:​20, 21)

⁷ Godangan naposo ni Jahowa saonari dang lao mangolu di surgo. Songon si Abraham do nasida. Dung mamaretta Harajaon ni Debata, lao mangolu salelengna di tano on do nasida. (Heb. 11:​8-10, 13) Didok si Paulus massai arga do janji ni Debata on di nasida. (Jaha Rom 8:​20, 21.) Tikki parjolo sahali hamu mamboto janji ni Debata di ari na naeng ro, janji na dia do na paling menarik di hamu? Tarpaima do hamu annon gabe sempurna jala dang be gabe hatoban ni dosa? Manang, tarpaima do hamu lao pajuppang dohot akka halak na dihaholongi hamu di Paradeiso? Sasittongna, godang nai dope janji ni Debata na tapaima-ima di ari na naeng ro.

⁸ Pos do rohatta na lao mangolu salelengna do hita, dang soal naeng mangolu salelengna di surgo manang di tano on. Ala adong janji ni Debata na tapaima-ima, on ma na mambahen hita marlas ni roha. Jala boi do lam tamba pos ni rohatta tu janji ni Debata sian tikki tu tikki. Dipaboa si Paulus do boasa boi songon i. Molo tabahas i, gabe lam pos ma rohatta pasti saut do janji ni Debata i.

9-10. Songon na dihilala si Paulus, aha do na boi masa tu hita? (Rom 5:3) (Ida gambar.)

⁹ Jaha Rom 5:3. Didok si Paulus, tikki susa hita boi do lam tamba pos ni rohatta tu janji ni Debata. Hira na so masuk akkal do on tahilala. Alai taboto do sude halak Kristen adong do sitaononna. Contohna si Paulus. Didok ibana do tu halak Tessalonik, “Tikki rap dope hami dohot hamu, nungnga dipaboa hami tu hamu na lao masa akka hasusaan tu hita. Jala tutu do i masa songon na diboto hamu.” (1 Tes. 3:4) Jala didok ibana do tu halak Korint, “Ale akka dongan, didok rohanami naeng do diboto hamu sitaonon na masa tu hami . . . Dang hurippu hami be boi hami mangolu.”—2 Kor. 1:8; 11:​23-27.

¹⁰ Halak Kristen saonari pe tong do mangadopi sitaonon. (2 Tim. 3:12) Boha molo hamu? Hea do hamu dianiaya ala porsea tu Jesus jala gabe siseanna? Olo do ra dongan manang keluargamuna mangarehei manang mambahen na jahat tu hamu. Manang olo do gabe susa hamu dibahen bos manang dongan sakarejomuna ala berupaya hamu jujur. (Heb. 13:18) Asing ni i, olo do ra dianiaya pamaretta hamu ala marbarita na uli. Manang aha pe tantangan na taadopi saonari, didok si Paulus boi do hita marlas ni roha. Boasa?

11. Nang pe adong sitaononta, boasa ikkon bertekad hita asa toktong martahan?

¹¹ Didok si Paulus tikki masa sitaonon tu hita, boi do hita tetap marlas ni roha. Boasa? Alana Rom 5:3 mandok, “Sitaonon i mambahen hita gabe togu jala lam marpos ni roha tu janji ni Debata.” Sude do hita adong sitaononna. Jadi ikkon bertekad do hita sude asa boi martahan nang pe adong sitaonon. Alana molo dang martahan hita, dang boi hita mangida saut janji ni Debata i. Dang olo hita gabe songon akka halak na dipatudos Jesus songon boni na madabu di tano na marbatu-batu. Di mulana las do roha ni nasida manjalo Hata ni Debata. Alai ‘tikki masa hasusaan manang sitaonon, gabe tartuktuk do nasida’. (Mat. 13:​5, 6, 20, 21) Memang gabe susa do hita jala lungun rohatta tikki masa sitaonon. Alai godang do manfaatna molo martahan hita tikki masa situasi sisongon i. Aha ma i?

12. Aha do manfaatna molo toktong hita martahan mangadopi sitaonon?

¹² Dipaboa si Jakobus do aha manfaatna molo toktong hita martahan mangadopi sitaononta. Didok ibana, “Molo toktong hamu togu, gabe sun denggan ma hamu di saluhutna jala dang hahurangan manang aha pe.” (Jak. 1:​2-4) Jadi molo toktong hita martahan mangadopi sitaonon, boi ma hita lam sabar, lam togu haporseaotta, jala lam taandalhon Jahowa. Aha do muse manfaat na asing molo toktong hita martahan?

13-14. Songon na disurat di Rom 5:​4, aha do muse manfaatna molo toktong hita martahan mangadopi sitaonon?

¹³ Jaha Rom 5:4. Didok si Paulus molo togu hita jala pos rohatta tu janji ni Debata, gabe “lomo ma roha ni Debata mangida hita”. Jadi molo toktong hamu martahan nang pe marsitaonon, gabe las ma roha ni Jahowa tu hamu. Dang na berarti gabe las roha ni Jahowa molo susa hamu. Alai las do rohana ala toktong hamu martahan jala setia tu Ibana nang pe marsitaonon. Gabe dipatogu do rohatta mamboto on!—Ps. 5:12.

¹⁴ Taingot ma si Abraham na toktong martahan mangadopi sitaononna. Las do roha ni Jahowa mangida ibana. Didok Jahowa ma ibana ale-alena jala didok do muse ibana halak na mangulahon na sittong. (1 Mus. 15:6; Rom 4:​13, 22) Hita pe boi do songon si Abraham. Molo toktong hita martahan mangadopi sitaononta jala setia tu Debata, gabe lomo ma rohana mangida hita. Jadi dang tugas manang tanggung jawabta di organisasina na mambahen lomo roha ni Debata tu hita. Dang soal sadia umurta, aha bakatta, jala songon dia situasitta, boi do hita sude toktong martahan. Molo adong sitaononmuna saonari jala toktong hamu martahan mangadopi i, pos ma rohamuna las do roha ni Debata mangida hamu. Jala molo diboto hamu na las roha ni Debata mangida hamu, pasti lam pos ma rohamuna tu janji ni Debata.

15. Taringot aha do na dipaboa si Paulus di Rom 5:​4, 5, jala boasa piga-piga halak gabe bingung tikki manjaha ayat on?

¹⁵ Songon na dipaboa si Paulus, las do roha ni Debata tu hita molo toktong hita setia tu Ibana jala martahan mangadopi sitaonon. Alai didok si Paulus do muse, “Molo lomo rohana tu hita, pos ma rohatta na lao jalootta do pasu-pasu na lao lehononna tu hita. Pos situtu do rohatta tu akka na tapaima-ima i.” (Rom 5:​4, 5) Adong piga-piga halak na bingung dung manjaha ayat on. Alana di Rom 5:​2, nungnga dipaboa si Paulus hian, pos do roha ni halak Kristen na di Rom ‘jaloon ni nasida do hasangapon sian Debata’. Attong molo songon i, boasa ma pola dipaboa si Paulus muse taringot pos ni roha tu janji ni Debata di ayat 4 dohot 5?

16. Aha do na boi mambahen lam pos roha ni sasahalak tu janji ni Debata? (Ida gambar.)

¹⁶ Boi do taattusi lapatan ni hata ni si Paulus di ayat on, molo taingot boi do lam tamba pos ni rohatta tu janji ni Debata sian tikki tu tikki. Pikkirhon ma: Tikki parjolo sahali hamu mambege janji ni Debata, olo do ra didok rohamuna hira na so mungkin i terjadi. Alai dung lam godang na diparsiajari hamu taringot Jahowa dohot akka janjina, gabe lam pos ma rohamuna tu janji ni Debata i.

17. Songon dia do pos ni rohamuna boi lam martamba nang pe nungnga tardidi hamu?

¹⁷ Dung tardidi pe hamu, boi do lam tamba pos ni rohamuna tu janji ni Debata. Alana sian tikki tu tikki, pasti lam godang ma na diboto hamu taringot Jahowa jala lam holong ma rohamuna tu Ibana. (Heb. 5:13–6:1) Gariada olo do ra nungnga dihilala hamu proses na dipaboa di Rom 5:​2-4. Tikki adong sitaonon, martahan do hamu mangadopi i. Ala martahan hamu, gabe pos ma rohamuna na las do roha ni Debata mangida hamu. Hasilna gabe lam tamba ma muse pos ni rohamuna tu janji ni Debata. Alana, nungnga lam bagas i tarsuan di roha dohot di pikkiranmuna. Balga do pengaruh ni i tu ngolumuna jala gabe lam denggan ma hamu maradoppon keluarga, mambahen keputusan, dohot mamakke tikki.

18. Jaminan aha do na dipaboa Jahowa tu hita?

¹⁸ Dipapos si Paulus do muse rohatta, na lao saut do janji ni Debata i ala nungnga tabahen las roha ni Debata. Boasa boi pos rohatta? Ala adong do jaminan sian Debata. Dipaboa si Paulus do i di suratna, “Pos situtu do rohatta tu akka na tapaima-ima i. Ai nungnga digohi holong ni Debata rohatta marhite tondi parbadia na dilehon Ibana tu hita.” (Rom 5:5) Jadi pos do rohatta na lao saut do janji ni Debata i.

19. Aha do na lao jalootta molo toktong hita setia?

¹⁹ Tarimangi ma muse janji ni Debata tu si Abraham. Lomo do roha ni Debata mangida ibana, jala didok ma ibana ale-alena. Bibel mandok, “Ala sabar do si Abraham paimahon, dapotna ma janji ni Debata i.” (Heb. 6:15; 11:​9, 18; Rom 4:​20-22) Takkas ma, dang kecewa si Abraham dibahen Jahowa. Hamu pe boi do songon si Abraham. Molo setia hamu, pos ma rohamuna na lao jaloonmuna do upa di ari na naeng ro. Dang na lao kecewa hamu dibahen Jahowa. Gariada, marlas ni roha ma hamu. (Rom 12:12) Didok si Paulus, “Anggiat ma Debata na manjanjihon na denggan tu hamu, mambahen hamu marlas ni roha situtu jala makkilala dame ni roha. Ai porsea do hamu tu Ibana. Alani i marhite tondi parbadiana, marpos ni roha ma hamu tu janjina i sian nasa rohamuna.”—Rom 15:13.