“Jaga ma Hamu, Toktong ma Torang Pikkiranmuna!”

 1. Sipasingot aha do na dipaboa Jesus tu siseanna, jala boasa?

PIGA-PIGA ari sebelum mate Jesus, disukkun opat siseanna ma tu ibana, “Aha do . . . tanda ni panutup ni jaman on?” (Mat. 24:3) Disukkun nasida pe songon i tu Jesus, ala lomo do roha ni nasida mamboto andigan Jerusalem dohot bagas joro dihancurhon. Alus ni Jesus tu nasida dang holan taringot kehancuran ni Jerusalem dohot bagas joro, alai dohot do taringot “panutup ni jaman on”, i ma tikkitta saonari. Didok Jesus muse, “Taringot tu ari manang jamna dang adong na mamboto i, nang akka suru-suruan na di banua ginjang, nang anak i, holan Ama i do na mamboto.” Dung i dipaingot Jesus ma muse siseanna asa “toktong dungo” jala “sai jaga”.​—Mrk. 13:32-37.

 2. Boasa ikkon marjaga-jaga halak Kristen na di abad na parjolo?

² Ikkon toktong do marjaga-jaga halak Kristen na di Judea asa boi nasida malua. Dipaboa Jesus do akka tanda na mangurupi nasida mamboto na lao hancur nama Jerusalem dohot bagas jorona. Didok Jesus, “Molo diida hamu markemah akka tentara di sakaliling ni Jerusalem, boto hamu ma nungnga jonok be tikkina dihancurhon nama Jerusalem.” Di tikki i, ikkon diparrohahon nasida do sipasingot ni Jesus jala ‘ikkon lari do nasida tu akka dolok’. (Luk. 21:20, 21) Malua do akka halak na mamparrohahon sipasingot ni Jesus on tikki dihancurhon halak Rom kota Jerusalem.

 3. Aha do na lao tabahas di artikel on?

³ Saonari mangolu di ujung ni ari parpudi do hita. Jadi hita pe ikkon toktong do marjaga-jaga. Di artikel on, tabahas ma songon dia hita asa seimbang mangida akka na masa di portibi on, songon dia carana mamparrohahon diritta sandiri jala asa denggan tapakke tikkitta.

 4. Boasa lomo rohatta mamparrohahon akka na masa di portibi on?

⁴ Pasti lomo do rohatta mamboto songon dia akka na masa di portibi saonari on menggenapi surirang ni Bibel. Misalna, nungnga dipaboa Jesus hian akka peristiwa na mangurupi hita mamboto nungnga jonok ujung ni portibi ni Sibolis on. (Mat. 24:3-14) Apostel Petrus pe manjujui hita asa mamparrohahon surirang ni Bibel naung terjadi, asa boi lam togu haporseaotta. (2 Ptr. 1:19-21) Ayat na parjolo di bukku na parpudi di Bibel pe mandok, “On ma pangungkapon sian Jesus Kristus. Dilehon Debata do pangungkapon on tu Jesus lao patuduhon tu akka naposona akka na lao masa satokkin nai.” (Pgk. 1:1) Alani i lomo do rohatta mamparrohahon songon dia akka na masa di portibi saonari on menggenapi surirang ni Bibel. Jala bersemangat do hita menceritahon i tu na asing.

 5. Aha do na ikkon tahindari, jala aha do na porlu taulahon? (Ida gambar.)

⁵ Alai tikki mambahas surirang ni Bibel ikkon manat do hita asa unang mambahen kesimpulan sandiri. Boasa? Alana dang lomo rohatta pandapotta i mambahen huria dang marsada. Bisa jadi hea do tabege akka pamimpin politik mambahas songon dia nasida boi pasaehon akka masalah, jala berupaya mambahen dame dohot aman portibi on. Unang ma taanggap pernyataan ni nasida i menggenapi surirang di 1 Tessalonik 5:3. Gariada ikkon torus do taihutton pemahaman na terbaru na diparade organisasi. Molo sesuai na tahatahon tu publikasi na diparade organisasi ni Jahowa, gabe boi ma taurupi huria asa toktong ‘sapikkiran jala sapandapot’.​—1 Kor. 1:10; 4:6.

 6. Parsiajaran aha do na boi tadapot sian 2 Petrus 3:11-13?

⁶ Jaha 2 Petrus 3:11-13. Diurupi Apostel Petrus do hita asa seimbang mangida akka peristiwa na masa na menggenapi surirang ni Bibel. Dijujui ibana do hita “asa sai mangingot haroro ni ari ni Jahowa”. Boasa? Dang ala na lomo rohatta mamboto “ari dohot jamna” ro Armagedon i. Alai asa boi tapakke tikkitta saonari lao mambahen ‘badia pangalahotta jala marsitutu manomba Debata’. (Mat. 24:36; Luk. 12:40) Lapatanna asa berupaya hita mambahen lam denggan pangalahotta, jala mamastihon sude na taulahon lao melayani Jahowa alani holongta do i tu Ibana. Alani i, ikkon tapareso do diritta.

 7. Songon dia do hita mangihutton sipasingot ni Jesus di Lukas 21:34?

⁷ Dipaboa Jesus do tu akka siseanna asa unang holan mamparrohahon akka na masa di portibi on, alai ikkon diparrohahon nasida do tong diri ni nasida sandiri. Takkas do i tarida sian sipasingot ni Jesus di Lukas 21:34. (Jaha.) Di ayat i didok Jesus, “Manat ma hamu.” Lapatanna, ikkon taboto do akka bahaya na boi manegai hubungatta tu Jahowa jala menghindari bahaya i. Hasilna, gabe boi ma hita toktong di bagasan holong ni Debata.​—Poda 22:3; Jud 20, 21.

 8. Sipasingot aha do na dilehon Apostel Paulus tu halak Kristen?

⁸ Dipasingot Apostel Paulus do halak Kristen asa mamparrohahon diri ni nasida. Misalna, dipasingot ibana do halak Kristen di Epesus, “Sai parrohahon hamu ma pangalahomuna. Unang ma songon halak na so marbisuk hamu, alai marbisuk ma hamu.” (Eps. 5:15, 16) Sai torus do Sibolis berupaya manegai hubungatta tu Jahowa. Alani i, “sai lului ma lomo ni roha ni Jahowa” asa boi hita terlindung sian serangan ni Sibolis.​—Eps. 5:17.

 9. Songon dia do carana mamboto pikkiran ni Jahowa?

⁹ Dang dipaboa Bibel sude bahaya na boi mambahen sega hubungatta tu Jahowa. Jotjotan ikkon tabahen do keputusan tu situasi na so adong dipaboa di Bibel. Alani i ikkon taboto do “pikkiran ni Jahowa” asa boi tabahen keputusan na denggan. Songon dia carana? Taratur ma hita mamparsiajari Bibel jala mangarimangi i. Lam takkas taboto lomo ni roha ni Jahowa dohot “pikkiran ni Kristus”, gabe lam “marbisuk ma hita” tikki mambahen keputusan nang pe dang adong aturan na ikkon taulahon. (1 Kor. 2:14-16) Adong do bahaya na mura tatanda, alai adong do bahaya na agak maol tatanda.

10. Akka bahaya aha do na ikkon tahindari?

¹⁰ Akka bahaya na ikkon tahindari termasuk ma i menggoda lawan jenis, kecanduan minuman beralkohol, dirajai sipanganon na berlebihan, mandokkon hata na mambahen haccit roha, manonton hiburan na marisi kekerasan dohot pornografi, manang na asing. (Ps. 101:3) Sai berupaya do musutta Sibolis mangalului kesempatan lao manegai hubungatta tu Jahowa. (1 Ptr. 5:8) Molo dang manat hita, gabe disuanton Sibolis do tu roha dohot pikkiranta akka sifat na so denggan, songon mangiburu, dang jujur, tamak, sogo ni roha, ginjang ni roha, dohot dendam. (Gal. 5:19-21) Di mulana olo do tahilala dang pola berbahaya akka sifat sisongon i. Alai molo dang pittor tabolokkon i, boi do i hatop tubu di rohatta songon tanaman na marraccun jala parohon jea ma i tu hita.​—Jak. 1:14, 15.

11. Aha ma contohna bahaya na ikkon tahindari, jala boasa?

¹¹ Sada contoh bahaya na agak maol tatanda, i ma pergaulan na so denggan. Parrohahon ma situasi on. Bayakkon ma hamu rap karejo dohot sasahalak na so manomba Jahowa. Pasti lomo do rohamuna asa denggan pandanganna tu Saksi Jahowa. Alani i, burju do hamu tu ibana jala sai rade mangurupi. Mulana rap mangan siang ma hamu. Lam leleng, lam jotjot ma hamu rap mangan dohot ibana. Tikki na rap i hamu, sipata olo do ibana makkatahon akka hata na so suman. Mulana dang lomo rohamuna mambege hata sisongon i, alai lam leleng gabe terbiasa ma hamu jala gabe dang pola terganggu be panggora ni rohamuna. Sada tikki, diajak ibana ma hamu minum-minum dung sae karejo jala dioloi hamu do i. Ujungna, gabe sarupa ma cara marpikkirmuna tu ibana jala lam leleng gabe sarupa ma tong pangalahomuna. Memang ikkon burju jala ikkon taargai do sude halak. Alai taingot ma balga hian do pengaruh ni halak na jotjot rappak dohot hita. (1 Kor. 15:33) Alani i taihutton ma nasehat ni Jesus asa taparrohahon diritta. Tatolak ma pergaulan na so denggan khususna tu akka halak na so mangulahon standar ni Jahowa. (2 Kor. 6:15) Hasilna boi ma taboto bahaya jala tahindari ma i.

12. Aha do na ikkon diulahon sisean ni Jesus huhut paimahon kehancuran ni Jerusalem dohot bagas jorona?

¹² Lomo do roha ni Jesus asa toktong sibuk akka siseanna huhut paimahon kehancuran ni Jerusalem dohot bagas jorona. Alani i, dilehon Jesus ma tu nasida tugas asa marbarita na uli “di Jerusalem, di sude luat na di Judea, di Samaria, sahat tu ujung ni tano on”. (Ul. 1:6-8) Ulaon na massai balga do on! Alani i, ikkon denggan do nasida mamakke tikki asa boi mangulahon tugas na penting on.

13. Boasa ikkon denggan tapakke tikkitta? (Kolosse 4:5)

¹³ Jaha Kolosse 4:5. Sada cara mamparrohahon diritta, i ma mangarimangi songon dia caratta mamakke tikki. Alana boi do toppu masa “akka na so diharappon” tu hita sude. (Pjm. 9:11) Boi do toppu salpu ngolutta manang sadihari pe.

14-15. Songon dia do carana asa denggan tapakke tikkitta? (Heber 6:11, 12) (Ida gambar.)

¹⁴ Denggan ma tapakke tikkitta. Carana, taulahon ma lomo ni roha ni Jahowa jala tapatogu ma parale-aleotta tu Ibana. (Joh. 14:21) “Ikkon togu do hita, dang muba-uba, jala sai marsitutu ma hita mangulahon godang ulaon ni Tuhan.” (1 Kor. 15:58) Molo taulahon i, tung pe mate hita manang marujung portibi na jahat on, dang manolsoli be hita. Alana nungnga tabahen na dumenggan lao melayani Jahowa.​—Mat. 24:13; Rom 14:8.

¹⁵ Saonari, torus do diarahon Jesus akka siseanna paboahon Harajaon ni Debata di sude liat portibi on. Marhite organisasi ni Jahowa dilatik Jesus do hita songon dia carana marbarita, jala diparade do tong akka alat na tahaporluhon tikki marbarita na uli. (Mat. 28:18-20) Nungnga diulahon Jesus be bagianna. Alani i taulahon ma bagianta, semangat ma hita marbarita dohot mangajari. Jala sai toktong ma hita marjaga-jaga huhut paimahon Jahowa manghancurhon portibi na dirajai Sibolis on. Molo taulahon nasehat di Heber 6:11, 12, gabe ‘boi ma pos situtu rohatta sahat tu ujungna na lao saut do sude na tapaima-ima i’.​—Jaha.

16. Aha do tekadta?

¹⁶ Nungnga ditottuhon Jahowa andigan hancurhononna portibi na dirajai Sibolis on. Molo nungnga juppang tikkina, pasautton ni Jahowa ma sude surirang na disurat di Bibel. Sipata hira na leleng do tahilala ro ari ni Jahowa i. Alai pos ma rohatta, “dang na lao tarlambat” ari ni Jahowa i. (Hab. 2:3) Alani i, bertekad ma hita asa torus ‘maima-ima tu Jahowa’ jala ‘sabar ma hita paima-imahon Debata Sipalua hita’.​—Mik. 7:7.