“Bahenokku ma Nasida Gabe Sada Bangso”

1, 2. (a) Aha do na mambahen akka tawanan i mabiar? (b) Aha do na mambahen nasida tarsonggot? (c) Sukkun-sukkun aha do na lao tabahas?

NUNGNGA diperagahon si Hesekiel piga-piga surirang na sian Debata tu halak Jahudi na ditawan di Babel. Surirang na parjolo marisi barita panguhuman, songon i do nang surirang na paduahon, na patoluhon, dohot na asing. (Hes. 3:24-26; 4:1-7; 5:1; 12:3-6) Sude surirang na diperagahon i paboahon panguhuman na massai borat tu halak Jahudi.

² Jadi pasti mabiar do halak Jahudi na ditawan i tikki jongjong muse si Hesekiel di jolo ni nasida lao mamperagahon sada surirang na asing. Olo do ra didok nasida, ‘Barita panguhuman aha do muse na lao paboaonna tu hami?’ Alai tarsonggot do nasida, dang barita panguhuman na diperagahon si Hesekiel, alai janji na massai denggan do. (Hes. 37:23) Aha do barita na dipaboa si Hesekiel tu halak Jahudi? Aha do lapatanna? Aha do pengaruh ni barita i tu naposo ni Debata saonari on? Tabahas ma i di pasal on.

 3. (a) Aha do na digombarhon tukkot ni “si Juda”? (b) Boasa didok “tukkot ni si Epraim” manggombarhon harajaon na sappulu marga?

³ Disuru Jahowa ma si Hesekiel mambuat dua tukkot. Disuru ma ibana manurat di tukkot na sada “tu Juda”, jala di tukkot na sada nai disurat ma “tu si Josep, i ma tukkot ni si Epraim”. (Jaha Hesekiel 37:15, 16.) Aha do lapatan ni tukkot i? Tukkot “tu Juda” manggombarhon harajaon na dua marga, i ma Juda dohot Benjamin. Na dua marga i diparetta akka raja na sian pinoppar ni si Juda. Akka malim pe tinggal di harajaon na dua marga i. Ai di bagas joro na di Jerusalem do nasida marhobas. (2 Kron. 11:13, 14; 34:30) Jadi, harajaon ni Juda i termasuk ma akka raja na sian pinoppar ni si Daud dohot akka malim Lepi. “Tukkot ni si Epraim” manggombarhon harajaon ni Israel na sappulu marga. Sian dia do boi taboto? Raja ni nasida na parjolo, i ma si Jeroboam na sian marga Epraim. Di pudian ni ari, massai balga do pengaruh ni halak na sian marga Epraim di Israel. (5 Mus. 33:17; 1 Raj. 11:26) Jadi akka raja na sian pinoppar ni si Daud, manang akka malim Lepi dang bagian ni harajaon ni Israel na sappulu marga i.

 4. Aha do na lao dipatudu si Hesekiel tikki dipadomu ibana tukkot na dua i? (Ida gambar di mula ni parsiajaran.)

⁴ Disuru Jahowa ma muse si Hesekiel manggolom tukkot na dua i ‘asa gabe marsada di tanganna’. Alai torus do busisaon halak Jahudi mangida na dibahen si Hesekiel. Disukkun nasida ma si Hesekiel, “Na so paboaonmu do tu hami lapatan ni sude na diulahonmon?” Dipaboa si Hesekiel ma tu nasida na lao adong na masa tu nasida, jala Jahowa sandiri do na mambahen i. Taringot tukkot i didok Jahowa do, “Bahenokku ma i gabe sada tukkot jala bahenokku ma i marsada di tanganku.”​—Hes. 37:17-19.

 5. Aha do lapatan ni peragaan ni si Hesekiel i? (Ida kotak “Dua Tukkot Dibahen Gabe Marsada”.)

⁵ Dipatorang Jahowa ma aha lapatan ni dua tukkot na dibahen marsada i. (Jaha Hesekiel 37:21, 22.) Akka halak na ditawan sian harajaon ni Juda na dua marga, dohot na sian harajaon ni Israel na sappulu marga (Epraim), na lao diboan ma muse mulak tu luat ni halak Israel. Jala gabe “sada bangso” ma nasida sude.​—Jer. 30:1-3; 31:2-9; 33:7.

 6. Songon dia do dua surirang na di Hesekiel bindu 37 saling berhubungan?

⁶ Dua surirang taringot padenggatton na disurat di Hesekiel bindu 37 saling berhubungan do! Sian dua surirang i boi ma taboto Jahowa sanggup mambahen malua akka naposona sian tawanan (ayat 1-14). Alai dang holan i, boi do Ibana muse mambahen nasida marsada (ayat 15-28). Jadi dua surirang on marisi barita na palasson roha. Na ditawan boi dibahen malua, jala na marserak boi dibahen marsada.

 7. Songon dia do hatorangan di 1 Kronika 9:2, 3 patuduhon “dang adong na so tarbahen ni Debata”?

⁷ Anggo halak mandok dang mungkin be boi halak Jahudi na ditawan i dipalua jala marsada muse.a Alai “dang adong na so tarbahen ni Debata”. (Mat. 19:26) Ditepati Jahowa do janjina. Taon 537 SM, malua ma halak Jahudi na di Babel. Dung i, mulak ma akka halak na sian harajaon ni Juda dohot Israel tu Jerusalem, jala dipadenggan nasida ma ibadat na sittong. Bibel mandok, “On ma deba pinoppar ni si Juda, si Benjamin, si Epraim, dohot si Manasse na tinggal di Jerusalem.” (1 Kron. 9:2, 3; Esra 6:17) Jadi songon na disurirangkon Jahowa, marsada ma halak na sian harajaon ni Israel sappulu marga dohot akka halak na sian harajaon ni Juda na dua marga i.

 8. (a) Aha do na disurirangkon si Jesaya? (b) Aha do dua hal na boi taboto sian Hesekiel 37:21?

⁸ Hira-hira 200 taon sebelum na masa i, nungnga dipaboa si Jesaya hian aha na lao masa tu halak Israel dohot tu halak Juda molo dung dipalua nasida. Disurirangkon ibana do na lao dipapungu Jahowa “halak Israel na marserak”, dohot “halak Juda na marserak di sude liat portibi on”, termasuk ma i “sian Asiria”. (Jes. 11:12, 13, 16) Songon naung disurirangkon Jahowa, ‘Buatonna nama halak Israel sian tonga-tonga ni bangso.’ (Hes. 37:21) Adong dua hal na boi taida sian i. Na parjolo, tikki lao mandok halak na ditawan i dang didok Jahowa be nasida dua kelompok, “halak Juda” dohot “halak Epraim”, alai digoari do sude halak na ditawan i “halak Israel”. Na paduahon, Jahowa mandok nasida ro dang holan sian Babel, alai “sian tonga-tonga ni bangso” dohot “sian sude inganan”.

 9. Songon dia do Jahowa mangurupi halak Jahudi naung mulak i marsada?

⁹ Dung mulak halak na ditawan i tu Israel, songon dia do Jahowa mambahen nasida marsada? Dipillit Jahowa ma parmahan songon si Serubabel, si Josua Sintua ni Malim, si Esra, si Nehemia, dohot panurirang songon si Haggai, si Sakaria, dohot si Maleaki. Marsitutu do akka bawa na setia on mangurupi bangso i lao mangihutton tudu-tudu ni Debata. (Neh. 8:2, 3) Dijaga Jahowa do tong naposona. Dibahen Ibana do gagal rencana ni akka musu na jahat tu nasida.​—Est. 9:24, 25; Sak. 4:6.

10. Aha do na marhasil dibahen Sibolis?

¹⁰ Nang pe nungnga dipatuduhon Jahowa na holong rohana tu nasida sude, alai godang do halak Israel i manadikkon ibadat na sittong. Disurat do di Bibel akka aha na diulahon nasida dung mulak tu luat i. (Esra 9:1-3; Neh. 13:1, 2, 15) Dang sahat dope 100 taon dung mulak nasida, dang sesuai be na diulahon nasida tu ibadat na sittong. Alani i ma sai didok Jahowa tu nasida, “Mulak ma hamu tu Au.” (Mal. 3:7) Di tikki ni Jesus pe, agama ni halak Jahudi nungnga tarbagi-bagi gabe piga-piga sekte, jala dipimpin akka parmahan na so setia tu Debata. (Mat. 16:6; Mrk. 7:5-8) Marhasil do Sibolis manegai naposo ni Debata na marsada i. Nang pe songon i, pasti boi do naposo ni Debata marsada songon surirangna i. Songon dia carana?

11. (a) Aha do na dipaboa Jahowa di Hesekiel 37:24 taringot akka naposona na lao marsada i? (b) Aha do na diulahon Sibolis dung diusir ibana sian surgo?

¹¹ Jaha Hesekiel 37:24. Dipaboa Jahowa do di surirangna molo dung gabe raja ‘naposona si Daud’, boi ma toktong saleleng ni lelengna marsada naposona. Saut ma i taon 1914 dung gabe Raja Jesus.b (2 Sam. 7:16; Luk. 1:32) Di tikki i, akka halak na dimiahi do na didok “Israel ni Debata”, dang halak Jahudi be. (Jer. 31:33; Gal. 6:16; 3:29) Dung diusir Sibolis sian surgo, marsitutu do ibana manegai akka naposo ni Debata na marsada. (Pgk. 12:7-10) Umpamana taon 1916, dung mate si Russel, dipakke Sibolis do halak na murtad mambahen tarbagi-bagi akka halak na dimiahi. Alai dang pola leleng masa i, dipakaluar do halak na murtad i sian organisasi. Marhasil do muse Sibolis di tikki i mambahen akka dongan na mamimpin organisasi dipenjarahon. Alai toktong do marsada naposo ni Debata, ai torus do setia akka na dimiahi i tu Jahowa.

12. Boasa dang marhasil Sibolis mambahen Israel ni Debata gabe tarbagi-bagi?

¹² Dang songon halak Israel najolo, saonari dang marhasil Sibolis mambahen Israel ni Debata gabe tarbagi-bagi. Boasa? Alana sai torus do akka halak na dimiahi mangihutton sude tudu-tudu ni Jahowa. Hasilna, dijaga Jesus Kristus Raja i ma nasida, na toktong boi manaluhon Sibolis.​—Pgk. 6:2.

13. Parsiajaran aha do na boi tadapot sian surirang taringot dua tukkot na dipasada i?

¹³ Songon dia do surirang taringot dua tukkot na gabe sada i berkaitan tu naposo ni Debata di tikkinta saonari? Taingot ma surirang i manggombarhon songon dia dua kelompok dibahen gabe marsada. Alai na uppetting dipaboa di surirang i, Jahowa do na mambahen nasida marsada. Jadi, parsiajaran aha do na boi tadapot sian i taringot ibadat na sittong? Sian i taboto ma, Jahowa do na mambahen sude naposona “marsada”.​—Hes. 37:19.

14. Songon dia do surirang taringot dua tukkot na marsada i saut di taon 1919 tu godang halak?

¹⁴ Taon 1919, dung dipabadia naposo ni Debata gabe boi ma nasida marale-ale tu Jahowa jala marsada dohot dongan di liat portibi on. Mulai sian i, saut ma surirang taringot dua tukkot na dipasada tu godang halak. Di tikki i, godangan sian halak na marsada di organisasi ni Jahowa, i ma akka halak na dimiahi lao mamaretta gabe raja dohot malim di surgo. (Pgk. 20:6) Akka halak na dimiahi dipatudos songon “tukkot ni si Juda”, i ma bangso na sian pinoppar ni Raja Daud dohot akka malim Lepi. Alai di pudian ni ari, lam godang ma halak na lao mangolu di tano on na marsada dohot akka halak na dimiahi. Nasida dipatudos songon “tukkot ni si Epraim”, i ma bangso na so sian pinoppar ni akka raja dohot malim. Dua kelompok on marsada gabe naposo ni Jahowa jala sada ma Raja ni nasida, i ma Jesus Kristus.​—Hes. 37:24.

15. Songon dia do surirang na disurat di Hesekiel 37:26, 27 saut di tikkinta saonari?

¹⁵ Dipaboa do muse di surirang ni si Hesekiel i, na lao godang halak marsada dohot akka na dimiahi mangulahon ibadat na sittong. Dipaboa Jahowa do, “Bahenokku ma nasida lam godang . . . Bahenokku ma kemah inganakku di tonga-tonga ni nasida.” (Hes. 37:26, 27) Sarupa do on songon hata ni Apostel Johannes hira-hira 700 taon dukkon tikki ni si Hesekiel. Didok si Johannes do, “Ibana na hundul di tahta i paherbakkon tendana” tu “punguan bolon”. (Pgk. 7:9, 15; surat na di toru.) Saonari sude naposo ni Debata, akka halak na dimiahi dohot sude halak na sian punguan bolon marsada gabe songon sada bangso tinggal di toru ni kemah ni Jahowa.

16. Aha do na disurirangkon si Sakaria taringot na lao masa tu akka na dimiahi dohot akka halak na lao mangolu di tano on?

¹⁶ Surirang taringot naposo ni Debata na marsada i pe dipaboa si Sakaria do. Ibana ma sahalak tawanan na dohot mulak tu Jerusalem. Disurirangkon ibana ma adong “sappulu bawa na sian sude . . . bangso” gomos ‘maniop jubah ni sahalak Jahudi’, jala didokkon nasida do, “Dohot ma hami lao rap dohot ho. Ai nungnga hubege hami didongani Debata do bangsom.” (Sak. 8:23) “Sahalak Jahudi” na dimaksud di ayat i dang na sahalak Jahudi sabbing. Alana didok do di ayat i “bangsom”. Jadi na dimaksud di ayat i, halak Jahudi na dipillit Debata, i ma kelompok ni akka halak na dimiahi na adong dope di tano on. (Rom 2:28, 29) Alai anggo “sappulu bawa” na dimaksud di ayat i, i ma akka halak na mangolu salelengna di tano on. “Ditiop nasida” do gomos akka halak na dimiahi jala “dohot” mangihutton nasida. (Jes. 2:2, 3; Mat. 25:40) On patuduhon, dua kelompok i nungnga marsada.

17. Songon dia do Jesus patuduhon naung marsada hita saonari?

¹⁷ Mungkin surirang ni si Hesekiel do na di pikkiran ni Jesus tikki didok ibana dirina sahalak parmahan lao manogu-nogu akka biru-biruna (halak na dimiahi), dohot akka “biru-biru na asing” (halak na lao mangolu di tano on) gabe “sada punguan”. (Joh. 10:16; Hes. 34:23; 37:24, 25) Jadi cocok do hata ni Jesus dohot hata ni akka panurirang i lao manggombarhon situasi ni naposo ni Debata na marsada saonari on, dang soal lao mangolu di surgo manang di tano on nasida di ari na naeng ro. Hape saonari dang taretong be sadia godang kelompok ni agama palsu naung tarbagi-bagi. Alai anggo hita torus do marsada. Tutu ma on sada mukjizat!

18. Songon na dipaboa di Hesekiel 37:28, boasa naposo ni Debata dang boi parsidohot tu portibi on?

¹⁸ Sian hata na parpudi di surirang ni si Hesekiel on patuduhon, na lao martahan saleleng ni lelengna do akka naposo ni Debata na marsada i. (Jaha Hesekiel 37:28.) Boi do naposo ni Debata torus marsada ala “di tonga-tonga ni nasida” do inganan na badia ni Debata, jala diulahon nasida do ibadat na sittong. Molo toktong do nasida badia, dang parsidohot tu portibi ni Sibolis, boi ma nasida torus marsada. (1 Kor. 6:11; Pgk. 7:14) Di borngin andorang so mate Jesus, dipatuduhon ibana do na massai penting dang parsidohot tu portibi on. Tikki manangiakkon siseanna didok do, “Ale Amang na badia, jaga ma nasida . . . asa gabe sada nasida. . . . Dang sian portibi on nasida. . . . Pabadia ma nasida di bagasan hasittongan.” (Joh. 17:11, 16, 17) Jadi Jesus patuduhon, asa boi marsada dang boi sasahalak parsidohot tu portibi on.

19. (a) Songon dia do hita patuduhon na tatiru Debata? (b) Di borngin andorang so mate Jesus, aha do na ikkon diulahon siseanna i asa boi toktong nasida marsada?

¹⁹ Holan di tangiangna i do Jesus mandok Debata “Amang na badia”. Tutu, tigor jala badia do Jahowa. Didok Ibana do tu bangso Israel, “Ikkon badia do hamu. Ai badia do Au.” (3 Mus. 11:45) Ala naeng ‘tatiru Debata’ ikkon marsitutu do hita mangoloi parettana jala ikkon tarida do i sian pangalahotta. (Eps. 5:1; 1 Ptr. 1:14, 15) Molo dipakke hata “badia” tu jolma lapatanna “dipapulik”. Alani i, tangiang ni Jesus patuduhon, massai penting do siseanna toktong pulik sian portibi on asa boi nasida torus marsada. Unang ma diihutton pangalaho ni portibi na so olo marsada jala na so olo mardame.

20, 21. (a) Aha do na boi paposson rohatta na lao dijaga Debata hita? (b) Aha do na ikkon ulahononmuna?

²⁰ Hea do ditangiakkon Jesus tu Debata asa dijaga Ibana akka siseanna sian Sibolis. (Jaha Johannes 17:14, 15.) Saksi Jahowa na marsada di liat portibi on patuduhon nungnga dialusi Jahowa be tangiangna i. On patuduhon dang marhasil Sibolis mambahen sega naposo ni Debata na marsada i. On ma paposson rohatta na dijaga Jahowa do naposona. Di surirang ni si Hesekiel i Jahowa mandok lao gabe sada do tukkot na dua i di tanganna. Jadi tangan ni Jahowa sandiri do na mambahen marsada akka naposona, jala Ibana do manjaga nasida sian Sibolis.

²¹ Attong aha do na ikkon taulahon? Toktong ma hita marsitutu manjaga jala patoguhon parale-aleotta dohot na asing asa toktong marsada. Songon dia do carana hita ganup marsada-sada boi mangulahon i? Toktong ma taulahon ibadat na sittong dohot pengaturan na dilehon organisasi Jahowa na di tano on, ai massai penting do i. Alai aha do na termasuk tu ibadat na sittong i? Lao dibahas ma i di akka pasal na mangihut.