LAMPIRAN

Goar ni Debata, i ma Jahowa. Lapatanna, ”Ibana mambahen, Ibana pasauthon”. Jahowa, Debata Natumimbul jala Ibana na manompa saluhutna. Marhagogoon do Ibana laho mangulahon aha pe na dihalomohon rohaNa.

Di hata Heber, goar ni Debata disurat opat huruf. Di bahasa Batak Toba disurat gabe JHWH. Di Bibel na parjolo na marhata Heber disurat do goar ni Debata hirahira 7.000 hali. Marasingasing do panjouon ni halak di liat portibi on tu goar ni Debata mangihuthon hatana be.

▸ Psl. 1, par. 15

Debata do pangarang ni Bibel, alai dipangke Ibana do jolma laho manurat Bibel. On boi tapatudos tu sahalak kepala desa, tingki disuru sekretarisna mambahen surat. Marhite tondi parbadiaNa, ditogutogu Debata panurat ni Bibel manurat isi ni pingkiranNa. Sipata marhite parnidaon manang marhite parnipion.

▸ Psl. 2, par. 5

Prinsip na diajarhon di Bibel, paboahon hasintongan na so boi muba. Umpamana, prinsip ”Mago do adat na denggan anggo hinombar na roa!” Prinsip on mangajarhon tu hita, ise na tapillit gabe alealenta mangkorhon do i, denggan manang roa tu hita. (1 Korint 15:33) Jala prinsip ”Ia i disabur halak, i do gotilonna!” Mangajarhon tu hita, jaloonta do upa ni na taulahon.​—Galatia 6:7.

▸ Psl. 2, par. 12

Hata manang tudutudu sian Debata na paboahon sangkapNa, ajaranNa taringot moral, parentaNa manang panguhumanNa. Boi do i tudutudu taringot na laho masa di ari na naeng ro. Godang do surirang na disurat di Bibel naung digohi.

▸ Psl. 2, par. 13

Jesus ma na manggohi godang surirang taringot Messias. Ida kotak ”Surirang Taringot Messias.”

▸ Psl. 2, par. 17

Ditompa Jahowa tano on asa gabe Paradeiso, inganan ni jolma na mangkaholongi Ibana. Ndang muba sangkapNa i. Ndang sadia leleng nai, pasohotonNa ma hajahaton jala lehononNa ma hangoluan salelengna tu jolma.

▸ Psl. 3, par. 1

Sibolis, i ma surusuruan na parjolo mangalo tu Debata. Digoari do ibana Setan, lapatanna ”Pangalo”, ala mangalo ibana tu Jahowa. Sibolis lapatanna ”Pargabus” ala dihatahon ibana do gabus taringot Debata jala mangaliluhon jolma.

▸ Psl. 3, par. 4

Andorang so ditompa Jahowa tano on, nunga ditompa Ibana surusuruan. Ditompa nasida asa mangolu di surgo. Lobi sian marratus juta godang ni surusuruan. (Daniel 7:10) Adong do angka goar ni surusuruan i jala marasingasing do parange ni nasida. Ndang olo surusuruan na marsihohot tu Debata disomba jolma. Marasing do hak na sumurung dohot angka ulaon ni nasida. Adong na marhobas di jolo ni Jahowa. Adong na pasahathon hataNa, na mangaramoti jala na manogunogu naposo ni Debata di tano on. Adong na pasahathon panguhuman sian Jahowa dohot mangurupi ulaon marbarita na uli. (Psalmen 34:8; Pangungkapon 14:6; 22:8, 9) Di ari na naeng ro, nasida mandongani Jesus marporang di Armagedon.​—Pangungkapon 16:14, 16; 19:14, 15.

▸ Psl. 3, par. 5; Psl. 10, par. 1

Dosa, i ma pangkilalaan, pingkiran manang ulaon na maralo tu lomo ni roha ni Jahowa. Ala nunga sega paralealeonta tu Jahowa pangkorhon ni dosa, dilehon Ibana ma tu hita uhum dohot prinsip na mangurupi hita asa unang mangulahon dosa. Sian mulana, tipak do sude ditompa Jahowa. Alai, tingki si Adam dohot si Hawa ndang mangoloi tu Jahowa, mardosa ma nasida jala ndang tipak be. Matua jala mate nasida. Ala hita manean dosa sian si Adam, hita pe gabe matua jala mate.

▸ Psl. 3, par. 7; Psl. 5, par. 3

Armagedon, i ma porang ni Debata laho mangaripashon Sibolis jala pasohothon sude hajahaton.

▸ Psl. 3, par. 13; Psl. 8, par. 18

Harajaon ni Debata, i ma pamarentaon na pinajongjong ni Jahowa di surgo. Jesus ma rajana. Marhite Harajaon on, pasohoton ni Jahowa ma hajahaton di ari na naeng ro. Mamarenta ma Harajaon ni Debata di liat portibi on.

▸ Psl. 3, par. 14

Nunga ditompa Jesus andorang so ditompa angka na asing. Disuru Jahowa do Jesus tuat tu tano on bahen tobusan tu sude jolma. Alai, dung mate Jesus, dipahehe Jahowa do ibana muse. Saonari, nunga mamarenta Jesus di surgo gabe raja ni Harajaon ni Debata.

▸ Psl. 4, par. 2

Nunga disurirangkon di Bibel taringot haroro ni Messias. Messias ro di ujung ni 69 minggu, dietong sian taon 455 SM sahat tu taon 29 M.

Sian dia do taboto masa on di ujung ni taon 29 SM? Taon 455 SM ma 69 minggu i dimulai tingki si Nehemia sahat di Jerusalem jala dibangun muse Jerusalem. (Daniel 9:25; Nehemia 2:1, 5-8) Molo didok ”salusin”, na ro tu pingkiranta 12, molo didok ”saminggu”, na ro tu pingkiranta 7 ari. Pitu ari na dipaboa di surirang on, mandok pitu taon. Na dipangke laho mangetong surirang on i ma, ”sadari gabe sataon.” (4 Musa 14:34; Hesekiel 4:6) Alani i, pitu minggu na dipaboa di surirang on dietong gabe pitu taon jala 69 minggu sarupa ma on 483 taon (69 x 7). Molo taetong 483 taon sian taon 455 SM sahat ma hita tu taon 29 M. Di tingki on ma Jesus tardidi jala gabe Messias!​—Lukas 3:1, 2, 21, 22.

Dipaboa do muse di surirang i taringot minggu na asing, minggu na lelengna pitu taon. Di bagasan minggu i, dibunu ma Jesus di taon 33 M. Dung i, mulai taon 36 M dipasahat ma barita taringot Harajaon ni Debata tu saluhut bangso ndang holan tu halak Jahudi.​—Daniel 9:24-27.

▸ Psl. 4, par. 7

Diajarhon Bibel tu hita, Jahowa do Debata Sitompa saluhutna jala nunga ditompa Ibana Jesus andorang so ditompa angka na asing. (Kolosse 1:15, 16) Jesus ndang Debata Natumimbul. Ndang hea didok dos ibana dohot Debata. Alai, didok ibana, ”Umbalga do Damang asa Ahu.” (Johannes 14:28; 1 Korint 15:28) Alai, adong pigapiga agama mangajarhon Debata sitolusada, tolu Debata di bagasan sada hadirion i ma: Debata Ama, Anak dohot tondi parbadia. Ndang adong hata ”sitolusada” di Bibel. Ndang tutu ajaran sisongon i.

Tondi parbadia, i ma hagogoon ni Debata na dipangke manompa manang mangulahon lomo ni rohaNa. Tondi parbadia, ndang sada hadirion. Umpamana, halak Kristen na parjolo ”gabe gok Tondi Parbadia ma nasida saluhutna” jala didok Jahowa muse, ”Usehononku ma sian Tondingku, tu nasa na mardaging.”​—Ulaon ni Apostel 2:1-4, 17.

▸ Psl. 4, par. 12; Psl. 15, par. 17

Boasa silang ndang dipangke halak Kristen na sintong tingki manomba Debata?

1. Najolo, nunga leleng silang dipangke angka sipelebegu di panombaon ni nasida na gok ulaon parmainanon. Toluratus taon dung mate Jesus, ndang adong halak Kristen na mamangke silang laho manomba Debata. Alai dungkon i, asa lam godang na mananda manang na olo gabe halak Kristen, dipangke Kaisar Rom Konstantin ma silang gabe tanda ni halak Kristen. Ndang adong hubungan ni silang tu Jesus. New Catholic Encyclopedia patorangkon, ”Nunga hasomalan naung leleng di godangan halak mamangke silang andorang so adong dope hakristenon.”

2. Jesus ndang mate di silang. Hata Junani na diterjemahon ”silang”, lapatanna i ma ”sada tiang” manang ”sada hau”. The Companion Bible patorangkon, ”Ndang adong di hata Junani [New Testament] na patuduhon dua hau na gabe silang.” Alai, di sada tiang do Jesus mate.

3. Ndang hea lomo roha ni Jahowa hita mamangke silang manang patung tingki manomba Ibana.​—2 Musa 20:4, 5; 1 Korint 10:14.

▸ Psl. 5, par. 12

Disuru Jesus angka siseanna asa marningot ari hamamatena. Tanggal 14 Nisan, ganup taon ma i ulahonon ni nasida, mangihuthon tanggal ni perayaan Paskah. Roti dohot anggur manggombarhon sibuk dohot mudar ni Jesus. Halak na mangkirim rap mamarenta dohot Jesus di surgo, mangallang roti dohot minum anggur. Nang pe halak na mangkirim mangolu di tano on ro tu ari Parningotan i, ndang allangon ni nasida roti jala ndang inumon ni nasida anggur i.

▸ Psl. 5, par. 21

Di Bibel New World Translation English edition, hata ”tondi” dipangke tu (1) jolma, (2) binatang, (3) hangoluan ni jolma dohot binatang. Umpamana,

• Jolma. Di tingki ni si Noak, holan ualu tondi do na malua sian aek na sumar i. (1 Petrus 3:20) Hata ”tondi” dison mandok, jolma, i ma si Noak, tungganeboruna, tolu anakna dohot tolu parumaenna.

• Binatang. ”Didok Debata ma, ’gok ma angka na manggulmit [”tondi”, surat na di toru] di bagasan aek, jala marhabangan ma angka pidong di tongatonga ni langit.’ Didok Debata muse, ’Dipantubuhon tano i ma angka ragam ni na mangolu [”tondi”, surat na di toru], na jinak, na riar dohot na manginsir hombar tu ragam na be.’ Jadi saut ma i.”​—1 Musa 1:20, 24, New World Translation of the Holy Scriptures (NWT).

• Hangoluan ni jolma dohot binatang. Didok Jahowa tu si Musa, ”Sude na naeng mambunu ho [”tumahi tondim,” surat na di toru] nunga mate.” (2 Musa 4:19) Tingki di tano on Jesus, didok ibana, ”Ahu do parmahan na denggan roha; parmahan na denggan roha olo do mangalehon hosana [”tondi”, surat na di toru] paluahon angka birubiruna.”​—Johannes 10:11 (NWT).

  Na asing, tingki sasahalak mangulahon ulaon sian ”nasa tondina”, lapatan ni i rade jala marsitutu ibana laho mangulahon i. (Mateus 22:37 (NWT); 5 Musa 6:5) Hata ”tondi” pe, boi do lapatanna lomo ni roha manang giot ni daging. Halak naung mate, boi do didok tondi naung mate.​—4 Musa 6:6; Poda 23:2; Jesaya 56:11; Haggai 2:13.

▸ Psl. 6, par. 5; Psl. 15, par. 17

Sian hata Heber dohot hata Junani, ndang holan sada lapatan ni hata ”tondi” na diterjemahon tu Bibel Terjemahan Dunia Baru hata Inggris. Hata ”tondi” jotjot dipangke laho patuduhon hangoluan ni jolma manang binatang. Hata on pe dipangke do laho manggombarhon hagogoon ni Debata, i ma tondi parbadiaNa. Ndang hea diajarhon Bibel adong dope tondi ni jolma na tongtong mangolu molo dung mate nasida.​—2 Musa 35:21; Psalmen 104:29; Mateus 12:43; Lukas 11:13.

▸ Psl. 6, par. 5; Psl. 15, par. 17

Hata api na roko sasintongna dibuat sian hata Junani, i ma Gehenna. Gehenna, i ma goar ni rura na jonok tu Jerusalem inganan ni sampah dibolongkon jala ditutung. Tingki Jesus di tano on, ndang adong jolma manang binatang na mangolu didabuhon jala ditutung di inganan i. Alani i, Gehenna ndang manggombarhon inganan ni jolma naung mate na dipasiaksiak jala ditutung salelengna. Tingki didok Jesus taringot halak na didabuhon tu Gehenna, lapatanna ndang adong be pangkirimon hangoluan di nasida.​—Mateus 5:22; 10:28.

▸ Psl. 7, par. 20

On ma tangiang na diajarhon ni Jesus tu angka siseanna, digoari do on tangiang hatopan manang tangiang sitiruon. Umpamana, diajari Jesus do hita manangiangkon songon na di toru on:

• ”Sai pinarbadia ma Goarmu!”

  Hita martangiang tu Jahowa asa goarNa diparbadiai sian angka gabus. Marhite i, sude na adong di surgo dohot jolma na adong di tano on pasangaphon goar ni Debata.

• ”Sai ro ma Harajaonmu!”

  Hita martangiang asa ro Harajaon ni Debata laho mamarenta di tano on, mangaripashon Sibolis dohot angka parjahat jala mambahen tano on gabe Paradeiso.

• ”Sai saut ma lomo ni roham di banua tonga on”

  Hita martangiang asa saut sangkap ni Debata tu tano on, i ma mangolu salelengna jolma di Paradeiso. Songon sangkap ni Debata tu jolma sian mulana.

▸ Psl. 8, par. 2

Diparade Jahowa tobusan laho paluahon jolma sian dosa dohot hamatean. Tobusan, i ma arga na ingkon sigararon laho manobus hangoluan na tipak na mago binahen ni si Adam dohot laho padengganhon paralealeon tu Jahowa. Disuru Debata do Jesus ro tu tano on jala mate laho manobus dosa ni sude jolma. Ala naung mate Jesus bahen tobusan, sude jolma boi mangkirim mangolu salelengna di tano on jala mulak tipak muse.

▸ Psl. 8, par. 21; Psl. 9, par. 13

Surirang di Daniel bindu 4, mangajarhon tu hita nunga jongjong Harajaon ni Debata di taon 1914.

Surirang: Dilehon Jahowa surirang tu Raja Nebukadnesar marhite nipi taringot hau na balga na ditaba. Di nipi i, dirante do pangkal ni hau i mamangke rante na sian bosi dohot tombaga asa unang tubu muse saleleng ”pitu taon”. Dung i, tubu ma muse hau i.​—Daniel 3:31, 4:7-13.

Aha do lapatan ni surirang on: Hau manggombarhon pamarentaon ni Debata. Saleleng martaontaon, dipangke Jahowa do raja di Jerusalem laho mamarenta sude bangsoNa. (1 Kronika 29:23) Alai, angka raja on ndang marsihohot mangoloi Ibana. Alani i, marujung ma pamarentaon ni nasida. Dilengsehon ma Jerusalem taon 607 SM. On ma na gabe mula ni ”pitu taon”. (2 Rajaraja 25:1, 8-10; Hesekiel 21:30-32) Tingki didok Jesus, ”Gabe lotlotan ni halak parbegu ma huta Jerusalem, paima gok angka tingki ni parbegu”, taringot ”pitu taon” i do na dihatai Jesus disi. (Lukas 21:24) Tingki di tano on Jesus, ndang digohi dope ”pitu taon” i. Alana, marjanji do Jahowa laho miahanNa sada Raja di ujung ni si ”pitu taon” i. Pamarentaon ni Raja na baru on, i ma Jesus, mangalehon godang pasupasu tu halak na manomba Jahowa di liat portibi on salelengna.​—Lukas 1:30-33.

Leleng ni ”pitu taon”: Si ”pitu taon” i lelengna 2.520 taon. Jala 2.520 taon i, mulai dietong sian taon 607 SM, marujung ma on di taon 1914. Tingki i ma Jesus dipajongjong gabe Raja di surgo.

Sian dia do tadapot bilangan ni 2.520? Bibel paboahon, tolu satonga ombas (taon) dietong 1.260 ari. (Pangungkapon 12:6, 14) Alani i, ”pitu taon” sarupa ma on 2 x 1.260 ari, dapot ma etonganna 2.520 ari. Jadi, 2.520 ari sarupa ma on dohot 2.520 taon, ala dietong ”sadari gabe sataon”.​—4 Musa 14:34; Hesekiel 4:6.

▸ Psl. 8, par. 23

Pangulu ni surusuruan, lapatanna na manguluhon surusuruan. Di Bibel dipaboa, holan sada do pangulu ni surusuruan, i ma Mikhael.​—Daniel 12:1; Judas 9.

Si Mikhael ma na manguluhon surusuruan ni Debata. Pangungkapon 12:7 mandok, ”Martongtang ma Mikhael rap dohot angka surusuruanna dompak naga i.” Di buku Pangungkapon dipaboa, Jesus do na manguluhon surusuruan ni Debata. Mikhael, i ma goar ni Jesus na asing.​—Pangungkapon 19:14-16.

▸ Psl. 9, par. 4

Hata on, patuduhon tingki parpudi na masa di tano on andorang so diripashon Harajaon ni Debata dope portibi na nirajaan ni Sibolis. Sarupa do lapatan ni hata on tu ”ajal ni hasiangan on” dohot ”haroro ni Anak ni jolma”, dipangke do angka hata on di surirang na disurat di Bibel laho patuduhon ari parpudi. (Mateus 24:3, 27, 37) Dung jongjong Harajaon ni Debata di surgo taon 1914, mulai ma masa ”Tingki parpudi” jala marujung ma i dung diripashon portibi na nirajaan ni Sibolis di Armagedon.​—2 Timoteus 3:1; 2 Petrus 3:3.

▸ Psl. 9, par. 5

Tingki dibahen Debata mulak mangolu halak naung mate, on ma na didokna haheheon. Adong sia halak naung dipahehe na disurat di Bibel. Si Elia, si Elisa, Jesus, si Petrus dohot si Paulus hea do pahehehon halak naung mate. Tanda halongangan on masa alani huaso ni Debata. Marjanji do Jahowa laho pahehehon ”angka na tigor dohot angka na geduk” asa mangolu di tano on. (Ulaon ni Apostel 24:15) Dipaboa muse di Bibel taringot haheheon tu surgo. Masa ma on dung dipahehe Debata angka na miniahan tu surgo rap dohot Jesus.​—Johannes 5:28, 29; 11:25; Pilippi 3:11; Pangungkapon 20:5, 6.

▸ Psl. 9, par. 13

Spiritisme, i ma parsaoran dohot angka tondi manang angka begu na jotjot mamangke parhitean songon datu. Halak na mangulahon spiritisme porsea, na mangolu dope tondi ni halak naung mate jala boi dope mangurupi manang parohon jea tu nasida. Las roha ni angka begu molo jolma ndang mangoloi Jahowa. Angka na digoari spiritisme, i ma ramalan bintang, sulap, manjujur nipi, manjujur ari manang manjaha gurat ni tangan. Godang buku, majalah, buku ramalan bintang, film dohot ende mambahen ulaon hadatuon on gabe dihalomohon torop halak. Godang do muse angka adat manang hasomalan na hombar tu spiritisme, songon ulaon adat tu na mate, mamele tu na mate, bungka tujung manang borngin pandungoi.​—Galatia 5:20; Pangungkapon 21:8.

▸ Psl. 10, par. 10; Psl. 16, par. 4

Jahowa, i ma Debata Natumimbul jala Ibana na manompa saluhutna. (Pangungkapon 15:3) Ibana do nampuna saluhutna jala na marhak mamarenta tu sasude na tinompaNa. (Psalmen 24:1; Jesaya 40:21-23; Pangungkapon 4:11) Dibahen Ibana do patik tu sude tompaanNa. Marhak do tongtong Jahowa laho mamillit ise na laho mamarenta. Molo taakkui hak ni Jahowa mamarenta, taoloi jala tahaholongi ma Ibana.​—1 Kronika 29:11.

▸ Psl. 11, par. 10

Manggugurhon, i ma mambahen posoposo na di bortian mate. Ndang alani sahit manang alani parmaraan na asing na so panagaman. Posoposo ndang holan sada ruas ni daging sambing. Posoposo na so tubu pe, nunga sada hangoluan.

▸ Psl. 13, par. 5

Transfusi darah, i ma prosedur medis na mamangke mudar manang ubat na dibahen sian mudar jala ditransfusihon tu sasahalak. Adong opat komponen utama darah, i ma plasma, sel darah merah, sel darah putih dohot keping darah.

▸ Psl. 13, par. 13

Di Bibel, hata pinsangpinsang ndang na patuduhon panguhumon. Molo dipinsang hita, lapatanna hita diajari, dipodai jala dipasingot. Dihaholongi Jahowa do halak na mandapot pinsangpinsang sian Ibana. (Poda 4:1, 2) Dibahen Jahowa do tudosan manang sitiruon na denggan tu natuatua. Denggan do pinsangpinsang na nilehonNa, gabe dihalomohon jala dihaholongi halak na mandapot pinsangpinsang i ma Ibana. (Poda 12:1) Holong do roha ni Jahowa tu naposoNa jala diajarajari do nasida. Dilehon Ibana do tudutudu tu nasida jala dipasingot na sala. Diurupi do nasida mangulahon lomo ni rohaNa. Di natuatua, na nidokna pinsangpinsang dohot ma i pangajarion taringot boasa ingkon dioloi ianakhonna natuatuana. Diajari do ianakhonna asa mangkaholongi Jahowa jala mangantusi angka prinsipNa.

▸ Psl. 14, par. 13

Nasida ndang boi taida, ala tondi do nasida jala gumogo sian jolma. Surusuruan na jahat do angka begu. Nasida sandiri do na mambahen dirina jahat ala dialo Debata jala ndang dioloi Ibana. (1 Musa 6:2; Judas 6) Mardongan do surusuruan na jahat dohot Sibolis laho mangalo Jahowa.​—5 Musa 32:17; Lukas 8:30; Ulaon ni Apostel 16:16; Jakobus 2:19.

▸ Psl. 16, par. 4