Jeremias

33 Mantang nakadetenir pa sa Patyo kan Guwardiya+ si Jeremias, uminabot sa saiya an tataramon ni Jehova sa ikaduwang pagkakataon, na an sabi: 2 “Ini an sabi ni Jehova na Kaggibo kan daga, si Jehova na naghaman kaiyan asin marigon na nag-establisar kaiyan; Jehova an saiyang pangaran, 3 ‘Mag-apod ka sa sako, asin sisimbagon taka asin andam akong sabihon sa saimo an dakula asin dai marurop na mga bagay na dai mo pa aram.’”+

4 “Huli ta iyo ini an sabi ni Jehova na Diyos kan Israel manungod sa mga harong sa siyudad na ini asin sa mga harong kan mga hadi kan Juda na nagkagaraba huli kan mga pansalikop na rampa asin kan espada,+ 5 asin manungod duman sa mga nag-aarabot tanganing makipaglaban sa mga Caldeo, asin manungod sa mga lugar na napapano kan mga bangkay kaidtong mga ginaradan ko huli kan sakuyang kaanggutan asin pagkaungis, na dahil kan karatan ninda itinago ko an lalawgon ko sa siyudad na ini: 6 ‘Papaumayan ko siya asin ibabalik ko an saiyang marahay na salud,+ asin bubulungon ko sinda asin tatawan nin abundang katuninungan saka katotoohan.+ 7 Asin ibabalik ko an mga nabihag hali sa Juda asin an mga nabihag hali sa Israel,+ asin papasarigon ko sinda arog kan ginibo ko kan primero.+ 8 Asin dadalisayon ko sinda sa gabos nindang kasalan sa sako,+ asin papatawadon ko an gabos na pagkakasala saka paglapas ninda laban sa sako.+ 9 Asin magtatao sa sako nin labi-labing kagaya-gayahan an saiyang pangaran asin magigin siyang sakuyang kaumawan saka kagayunan sa atubangan kan gabos na nasyon sa daga na makakadangog kan gabos na karahayan na itinatao ko sa sainda.+ Asin magkakatarakot na marhay asin matarakig+ an mga nasyon huli sa gabos na karahayan saka katuninungan na itatao ko sa saiya.’”+

10 “Ini an sabi ni Jehova: ‘Sa lugar na ini na sasabihon nindong tiwangwang, na mayo nin tawo o ataman na hayop, sa mga siyudad kan Juda asin sa mga tinampo kan Jerusalem na garaba, na mayo nin tawo o nag-iistar o ataman na hayop, madadangog giraray 11 an kurahaw nin labi-labing kagaya-gayahan asin an kurahaw nin pag-ugma,+ an boses kan nobyo saka an boses kan nobya, an boses kan mga nagsasabi: “Magpasalamat kamo ki Jehova na pamayo nin mga hukbo, huli ta marahay si Jehova;+ nagdadanay sagkod lamang an maimbod na pagkamuot niya!”’+

“‘Magdadara sinda sa harong ni Jehova nin mga dulot nin pasasalamat,+ huling ibabalik ko an mga nabihag sa nasyon, arog kan kamugtakan ninda kan primero,’ an sabi ni Jehova.”

12 “Ini an sabi ni Jehova na pamayo nin mga hukbo: ‘Sa tiwangwang na lugar na ini, na mayo nin tawo o ataman na hayop, asin sa gabos na siyudad kaini, magkakaigwa giraray nin mga pasabsaban na diyan papalukuhon kan mga pastor an mga aripumpon ninda.’+

13 “‘Sa mga siyudad kan mabukid na rehiyon, sa mga siyudad sa kapatagan, sa mga siyudad sa timog, sa daga nin Benjamin, sa mga lugar sa palibot kan Jerusalem,+ asin sa mga siyudad kan Juda,+ maaragi giraray an mga aripumpon sa irarom kan mga kamot kan nagbibilang sa sainda,’ an sabi ni Jehova.”

14 “‘Uya! Maabot an mga aldaw,’ an sabi ni Jehova, ‘na uutubon ko an marahay na panuga na sinabi ko manungod sa nasyon* nin Israel asin sa nasyon* nin Juda.+ 15 Sa mga aldaw na iyan asin sa panahon na iyan mapasupang ako para ki David nin sarong matanos na supang,*+ asin ipapautob niya an hustisya saka katanusan sa daga.+ 16 Sa mga aldaw na iyan, an Juda maliligtas+ asin an Jerusalem maistar nin tiwasay.+ Asin ini an iaapod sa saiya: Si Jehova an Satuyang Katanusan.’”+

17 “Huli ta ini an sabi ni Jehova: ‘Pirming igwa nin saro sa mga gikan ni David na matukaw sa trono kan nasyon nin Israel,+ 18 asin pirmi man na may sarong hali sa mga Levitang saserdote na matindog sa sakong atubangan tanganing mag-atang nin mga bílog na dulot na pigtututong, tanganing magtutong nin mga dulot na tipasi, asin tanganing magdulot nin mga atang.’”

19 Asin uminabot giraray ki Jeremias an tataramon ni Jehova, na an sabi: 20 “Ini an sabi ni Jehova, ‘Kun mararaot nindo an tipan ko may koneksiyon sa aldaw asin an tipan ko may koneksiyon sa banggi, tanganing ulangon an pag-abot kan aldaw asin banggi sa tamang oras kan mga iyan,+ 21 saka lang mararaot an tipan ko sa lingkod kong si David,+ na huli kaiyan dai na siya magkakaigwa nin aking lalaki na mamamahala bilang hadi sa saiyang trono,+ asin siring man an mangyayari sa tipan ko sa mga Levitang saserdote, na mga lingkod ko.+ 22 Kun paanong dai mabibilang an hukbo sa kalangitan* asin an mga baybay sa dagat, arog ko kaiyan papadakulon an mga gikan* kan lingkod kong si David asin an mga Levita na naglilingkod sa sako.’”

23 Asin uminabot giraray ki Jeremias an tataramon ni Jehova, na an sabi: 24 “Dai mo nariparo an sinasabi kan banwaan na ini, ‘Isisikwal ni Jehova an duwang pamilya na pinili niya’? Asin dai ninda iginagalang an banwaan ko, asin dai na ninda sinda ibinibilang na sarong nasyon.

25 “Ini an sabi ni Jehova: ‘Kun paanong inestablisar ko na an sakuyang tipan may koneksiyon sa aldaw asin sa banggi,+ an mga ley* kan langit asin daga,+ 26 dai ko man nuarin man isisikwal an mga gikan* ni Jacob asin ni David na sakuyang lingkod, asin makua ako sa mga gikan* niya nin magigin mga tagapamahala sa mga gikan* ni Abraham, Isaac, asin Jacob. Huli ta titipunon ko asin ibabalik an mga nabihag sa sainda+ asin mahihirak ako sa sainda.’”+