Aroaldaw daw Nindong Ihinahapot, “Haen si Jehova?”

1, 2. (a) Ano an espirituwal na kamugtakan kan mga Judio kan panahon ni Jeremias? (b) Ano an dapat kutanang ginibo kan mga taga Juda dapit sa saindang kamugtakan?

NAGHIHIBI si Jeremias. Apektado sia kan kamugtakan kan saiyang banwaan sagkod kan ipinapahula sa saiya nin Dios manongod sa kaaabtan ninda. Minawot nia na kun puede pa sana, an saiyang payo magin siring sa burabod nin tubig asin an saiyang mga mata magin siring sa burabod nin luha tanganing sia makahibi nin dagos-dagos. May dahelan si Jeremias na magmondo sa kamugtakan kan nasyon. (Jer. 9:1-3; basahon an Jeremias 8:20, 21.) Padagos na isinisikwal kan mga Judio an ley nin Dios asin dai kinukuyog an tingog ni Jehova, kaya may kapahamakan na maabot.—Jer. 6:19; 9:13.

² Minsan siring, an gustong dangogon kan mga taga Juda iyo an ‘mayo man nin problema’ na pirmeng sinasabi kan saindang mga namomoon sa relihion; bako talaga sindang interesado sa kun ano an pagheling ni Jehova sa saindang paggawe. (Jer. 5:31; 6:14) Sinda siring sa mga pasyente na naghahanap nin doktor na mapakalma sa sainda paagi sa mga tataramon alagad binabaliwala an seryosong mga sintomas. Kun grabe an helang nindo, bako daw na gusto nindong ma-diagnose nin tama tanganing mabolong tolos? Sa espirituwal na paagi, maninigo kutanang sadiosan na siniyasat kan mga Judio kan panahon ni Jeremias an saindang espirituwal na kamugtakan. Dapat kutanang ihinapot ninda: “Haen si Jehova?”—Jer. 2:6, 8.

 3. (a) Ano kutana an dapat na nagin kahulogan para sa mga Judio kan paghapot nin “Haen si Jehova?” (b) Ano an sarong paagi tanganing mahanap kan mga Judio si Jehova?

³ Para sa mga Judio, an paghapot nin “Haen si Jehova?” nangahulogan kutana nin paghagad ninda kan paggiya nin Dios kun napapaatubang sa mga desisyon, dakula man asin sadit. Dai iyan ginibo kan mga Judio kan panahon na idto. Alagad pagkagaba kan Jerusalem asin pakabalik ninda hale sa Babilonya, dapat nindang ‘hanapon si Jehova.’ Sa paggibo kaiyan, sia makukua ninda asin maaaraman ninda an saiyang mga dalan. (Basahon an Jeremias 29:13, 14.) Paano ninda magigibo iyan? An sarong paagi iyo an pagdolok sa Dios sa sinserong pamibi, na hinahagad an saiyang paggiya. Arog kaiyan an kaisipan ni Hadeng David. Nakiolay sia sa Dios: “Ipaaram mo sa sako an saimong mga dalan, O Jehova; tokdoi ako kan saimong mga dana.” (Sal. 25:4) Mangnoha an imbitasyon kan Paradangog nin pamibi paagi ki Jeremias kan ikasampulong taon ni Hadeng Zedequias. “Mag-apod ka sa sako, asin sisimbagon taka asin sasabihon ko tolos sa saimo an dakula asin dai marorop na mga bagay na dai mo pa naaraman.” (Jer. 33:3) Kun an hade asin an rebeldeng nasyon nag-apod sa Dios, puede Niang ihayag an mga bagay na “dai [ninda] marorop,” an pagkagaba kan Jerusalem asin pagtogdok liwat kaiyan pakalihis nin 70 taon.

4, 5. Sa anong iba pang mga paagi hinanap kutana si Jehova kan saiyang banwaan?

⁴ An saro pang paagi na hinanap kutana kan mga Judio si Jehova iyo an pagsiyasat sa kasaysayan asin pag-estudyar kun paano nia giniyahan an saiyang banwaan. Sa siring, nagirumdoman kutana ninda kun ano an inooyonan nin Dios asin kun ano an saiyang ikinakaanggot nin grabe. Yaon sa sainda an mga isinurat ni Moises asin an dakol na ipinasabong na rekord nin kasaysayan saka an mga pagkasaysay dapit sa mga hade kan Israel asin Juda. Paagi sa paghorophorop dian asin paghinanyog sa tunay na mga propeta nin Dios, nasabotan kutana kan mga Judio kan panahon ni Jeremias an boot sabihon kan paghapot nin “Haen si Jehova?”

⁵ An ikatolong paagi na hinanap kutana kan mga Judio si Jehova iyo an pakanood sa personal na mga eksperyensia ninda asin nin iba. Dai man ninda kaipuhan na mag-eksperimento tanganing manodan an gabos, alagad nakinabang kutana sinda kun inisip-isip ninda an saindang ginibo kan nakaagi asin kun paano minansay ni Jehova an iginawe ninda. Kun nagin mapag-obserbar sinda, nasabotan kutana ninda kun paano minansay nin Dios an iginawe ninda.—Tal. 17:10.

 6. Anong pagparigon sa boot an makukua nindo sa halimbawa ni Job?

⁶ Alagad kumusta man kita ngonyan? Pirme daw nindong ihinahapot, “Haen si Jehova?” kun kamo nagdedesisyon kun ano an gigibohon nindo? Tibaad iniisip nin nagkapira na daing gayo ninda natatawan nin atension ini. Kun maski paano tibaad dai nindo iyan nagigibo, dai mangluya an boot nindo. Dawa an maimbod na patriarkang si Job nadepisilan sa bagay na ini. Kan sia nasasakitan, sadiri sana nia an inisip nia. Kinaipuhan ni Eliu na ipagirumdom sa saiya an komun na tendensia nin mga tawo: “Mayo nin siisay man na nagsasabi, ‘Haen an Dios na Kaharohalangkaweng Kaggibo sa sakuya?’” (Job 35:10) Dinagka ni Eliu si Job: “Magtao ka nin atension sa makangangalas na mga gibo nin Dios.” (Job 37:14) Kinaipuhan ni Job na masdan an makakamhan na mga gibo ni Jehova sa mga linalang na nasa palibot nia asin sa paggiya Nia sa mga tawo. Paagi sa naeksperyensiahan mismo ni Job, nasabotan nia an mga dalan ni Jehova. Kan matagalan ni Job an saiyang kasakitan asin maheling kun paano sia tinabangan ni Jehova, sia nagsabi: “Ako nagtaram, alagad dai ko nasasabotan an mga bagay na makangangalas na marhay para sa sakuya, na dai ko aram. Nadangog ko sa iba an manongod sa saimo, alagad ngonyan naheheling ka kan sako mismong mata.”—Job 42:3, 5.

 7. Arog kan maheheling sa pahina 116, ano an sunod niatong pag-oolayan?

⁷ Kun dapit ki propeta Jeremias mismo, padagos niang hinanap si Jehova asin nakua nia Sia. Bakong arog kan mga kahimanwa ni Jeremias, sa nag-aging mga dekada kan saiyang maimbod na paglilingkod, padagos niang ihinahapot: “Haen si Jehova?” Sa mga totokaron sa kapitulong ini, maheheling niato sa halimbawa ni Jeremias kun paano niato hahanapon si Jehova asin kun paano sia makukua paagi sa pamibi, pag-adal, asin personal na mga eksperyensia.—1 Cron. 28:9.

 8. Sa anong mga kamugtakan si Jeremias nagdolok sa Dios sa pamibi?

⁸ Sa pag-agi nin mga taon mantang si Jeremias naglilingkod bilang representante sa pagtaram nin Dios sa nasyon nin Juda, hinanap nia si Jehova paagi sa odok sa pusong mga pamibi. Naghagad sia nin suporta sa Dios kan kaipuhan niang magpahayag nin mga mensahe na hinahaboan nin mga tawo, kan sa pagmate nia dai na nia kayang magpadagos, asin kan may mga hapot sia kun taano ta nangyayari an nagkapirang bagay. Sia sinimbag nin Dios asin tinawan nin instruksion kun paano sia mapadagos. Estudyare an pirang halimbawa.

 9. (a) Sa Jeremias 15:15, 16, paano ipinahayag ni Jeremias an nasa boot nia, asin paano nagsimbag si Jehova? (b) Taano ta naniniwala kamo na mahalagang ipahayag sa pamibi an nasa boot nindo?

⁹ Sarong beses, kan si Jeremias pagbotan na magpahayag nin mensahe nin pagdenunsiar, an pagmate nia isinusumpa sia kan gabos. Kaya an propeta nag-apod sa Dios na girumdomon sia. Estudyare an saiyang pamibi, na nasa Jeremias 15:15, 16, na dian sinabi nia kun ano an namatean nia sa simbag nin Dios. (Basahon.) Sa pamibing iyan, ipinahayag ni Jeremias an saiyang labi-labing kamondoan. Pero, kan makua nia an mga tataramon nin Dios asin ihinungit nia iyan, sabi ngani, sia naggayagaya! Tinabangan sia ni Jehova na pahalagahan an pribilehio na magdara kan ngaran nin Dios asin magpahayag kan Saiyang mensahe. Malinaw na nasabotan ni Jeremias an kabotan ni Jehova sa bagay na ini. Anong leksion an manonodan niato dian?

10. Sa anong paagi nagsimbag an Dios kan magsabi an propeta na dai na sia mataram sa ngaran ni Jehova?

¹⁰ Sa saro pang pangyayari, pagkatapos na si Jeremias hampakon kan saserdoteng si Pasur na aki ni Imer, sia nagsabi na dai na sia mataram sa ngaran ni Jehova. Sa anong paagi sinimbag nin Dios an pamibi ni Jeremias? (Basahon an Jeremias 20:8, 9.) Dai sinasabi sa sato kan Biblia na sinimbag nin Dios si Jeremias paagi sa pagtaram hale sa langit. Alagad an tataramon nin Dios nagin siring sa naglalaad na kalayo na nalalaom sa saiyang mga tolang, asin dai nia mapugolan na ipahayag iyan. Tunay nanggad, paagi sa sadiosan na pagpahayag sa Dios kan nasa boot nia asin paghiro segun sa aram nia dapit sa Saiyang kabotan, si Jeremias namotibar na ipadagos an gusto nin Dios na gibohon nia.

11, 12. Paano si Jeremias nag-ako nin simbag sa saiyang hapot manongod sa garo baga kapangganahan kan mga maraot?

¹¹ Si Jeremias igwa nin nakakapurisaw na hapot kan marisa nia na nagigin mapanggana an mga maraot. (Basahon an Jeremias 12:1, 3.) Minsan ngani dai man talaga kinukuestion kan propeta an katanosan ni Jehova, sia naghanap nin simbag sa saiyang “iinaagrangay.” An saiyang pagigin prangka malinaw na nagpaheling na sia igwa nin makosog na relasyon sa Dios, arog nanggad nin sarong aki sa saiyang namomotan na ama. Dai talaga masabotan ni Jeremias kun taano ta dakol na Judio an nagigin mapanggana apisar na maraot sinda. Nakakua daw si Jeremias nin nakakakontentong simbag? Sinierto sa saiya ni Jehova na hahaleon Nia an mga maraot. (Jer. 12:14) Mantang naheheling ni Jeremias na naootob an ipinamibi nia sa Dios, siertong nagrarom an kompiansa nia sa Saiyang hustisya. Bilang resulta, si Jeremias siertong orog na nagdolok sa Dios sa pamibi, na ipinapahayag sa saiyang Ama an nasa boot nia.

¹² Sa paghinanapos kan paghade ni Zedequias, kan sinasalikopan kan mga Babilonyo an Jerusalem, sinambit ni Jeremias “na an mga mata [ni Jehova] nagheheling sa gabos na dalan kan mga aki nin tawo, tanganing itao sa lambang saro an oyon sa saiyang mga dalan asin oyon sa bunga kan saiyang mga ginibo.” (Jer. 32:19) Naheling ni Jeremias kun ano an paninindogan ni Jehova dapit sa hustisya, na talagang minamasdan nin Dios an ginigibo nin lambang saro asin dinadangog an odok na mga pamibi kan saiyang mga lingkod. Asin, sa kaparehong paagi, maheheling ninda an mas dakol pang ebidensia na Sia nagtatao sa ‘lambang saro kan oyon sa saiyang mga dalan asin oyon sa bunga kan saiyang mga ginibo.’

13. Taano ta may kompiansa kamo na maootob an kabotan nin Dios?

¹³ Tibaad mayo man kita nin ano man na pagduda sa hustisya nin Dios asin sa kadonongan kan paagi na inootob nia saka ootobon pa an saiyang kabotan. Minsan siring, makikinabang kita sa paghorophorop kan inagihan ni Jeremias asin pagpahayag sa satong mga pamibi kan nasa puso niato. An siring kaiyan na pagpahayag kan nasa boot niato makakapakosog sa satong kompiansa ki Jehova, na siertong maootob an saiyang kabotan. Dawa kun dai niato lubos na nasasabotan ngonyan kun taano ta nangyayari an mga bagay-bagay, o kun taano ta garo baga haloy maotob an kabotan nin Dios, paagi sa pamibi ikakapahayag niato sa saiya an satong kompiansa na kontrolado nia nin lubos an mga bagay-bagay. An saiyang kabotan mangyayari sa paagi asin panahon na aram niang pinakamarahay. Garantisado ini; mayo kita nin dahelan na pagdudahan iyan. Padagos niatong ihahapot, “Haen si Jehova?” na an boot sabihon mamimibi kita na logod masabotan niato an saiyang kabotan asin maheling an ebidensia na naootob iyan.—Job 36:5-7, 26.

14. Paano niato naaraman na siniyasat ni Jeremias an kasaysayan kan banwaan nin Dios?

¹⁴ May koneksion sa hapot na “Haen si Jehova?,” aram na marhay ni Jeremias na kaipuhan an ‘kaaraman dapit ki Jehova.’ (Jer. 9:24) Siertong pinag-adalan nia an kasaysayan kan banwaan nin Dios mantang isinusurat nia an mga libro na inaapod ngonyan na 1 asin 2 Hade. Espesipiko niang sinambit an “libro kan mga agi-agi ni Salomon,” “libro kan mga agi-agi kan kaaldawan kan mga hade kan Israel,” asin “libro kan mga agi-agi kan kaaldawan kan mga hade kan Juda.” (1 Ha. 11:41; 14:19; 15:7) Huli kaiyan, nasabotan nia kun ano an ginibo ni Jehova sa laen-laen na situwasyon. Puedeng maaraman ni Jeremias kun ano an nakapaogma ki Jehova asin kun paano Nia minansay an mga desisyon kan mga tawo. Puede man niang konsultahon an ipinasabong na mga isinurat na yaon kan panahon na idto, arog kan ki Moises, Josue, Samuel, David, asin Salomon. Daing duda na dakol an aram nia manongod sa naenot na mga propeta saka sa mga katemporanyo nia. Paano si Jeremias nakinabang sa saiyang personal na pag-adal?

15. Anong pakinabang an nakua ni Jeremias sa saiyang pagsiyasat sa hula ni Elias?

¹⁵ Isinurat ni Jeremias an pagkasaysay manongod ki Jezebel, an maraot na agom ni Hadeng Ahab nin Samaria. Kaiba dian an ipinahayag ni Elias na si Jezebel kakakanon nin mga ayam sa lote na sakop kan Jezreel. (1 Ha. 21:23) Asin kaoyon kan isinurat ni Jeremias, aram nindo na pakalihis nin mga 18 taon, si Jezebel ihinulog hale sa bintana, tinimaktimakan kan mga kabayo ni Jehu, asin kinakan nin mga ayam. (2 Ha. 9:31-37) An pagsiyasat sa hula ni Elias asin sa kaotoban kaiyan, pati sa mga detalye kaiyan, siertong nakapakosog sa pagtubod ni Jeremias sa tataramon nin Dios. Tunay nanggad, nakapagpadagos sia bilang propeta huli sa pagtubod na napakosog paagi sa saiyang pag-adal sa nakaaging mga ginibo ni Jehova.

16, 17. Sa paghona nindo, taano ta nakapagpadagos si Jeremias sa pagpatanid sa maraot na mga hade kan panahon nia?

¹⁶ Estudyaran niato an saro pang halimbawa. Ano sa paghona nindo an nakatabang ki Jeremias—sa ibong nin pagpersegir sa saiya—na padagos na patanidan an maraot na mga hade na arog ki Joaquim asin Zedequias? An sarong mayor na dahelan iyo na ginibo ni Jehova si Jeremias na magin siring sa “siudad na nakukutaan asin hariging batbat asin mga lanob na tanso” tumang sa mga hade kan Juda. (Jer. 1:18, 19) Alagad dai niato paglingawan na si Jeremias nagsiyasat na marhay dapit sa pamamahala kan naenot na mga hade kan Juda asin Israel. Isinurat nia na si Manases nagtogdok nin “mga altar para sa bilog na hukbo nin kalangitan sa duwang patyo kan harong ni Jehova,” iinatang sa kalayo an saiya mismong aking lalaki, asin nagpabolos nin kadakol na dugo na daing sala. (2 Ha. 21:1-7, 16; basahon an Jeremias 15:4.) Pero, siertong naaraman ni Jeremias na kan si Manases magpakumbaba asin padagos na mamibi ki Jehova, ‘Sia nagtogot na makimaherak sa saiya’ an hade, asin sia ibinalik ni Jehova sa saiyang puesto bilang hade.—Basahon an 2 Cronica 33:12, 13.

¹⁷ Sa mga isinurat ni Jeremias, dai nia sinambit an pagkaherak ni Jehova ki Manases. Alagad si Jeremias nagpoon na magin propeta mga 15 taon pa sana pagkagadan ni Manases. Huli kaini, siertong nabaretaan kan propeta an nangyari kan an hade magsolsol sa saiyang nakaaging karatan. An pagsiyasat sa maraoton na paggawe ni Manases asin sa resulta kaiyan siertong nakatabang ki Jeremias na masabotan an kahalagahan kan pagsadol sa mga hade, arog ki Zedequias, na hagadon an pagkaherak asin mamomoton na kabootan ni Jehova. Dawa an sarong hade na midbid sa idolatriya asin pagpabolos nin dugo puedeng magsolsol asin patawadon. Kun kamo an nasa kamugtakan ni Jeremias, nakaparigon daw kutana sa saindo an mga pangyayari may koneksion ki Manases, na nagtatao sa saindo nin dahelan na magpadagos durante kan pamamahala kan iba pang maraot na mga hade?

18. Ano an nanodan ni Jeremias sa nangyari ki Urias, asin taano ta iyan an simbag nindo?

¹⁸ Durante kan pagigin propeta ni Jeremias, sia siertong nakanood sa pag-obserbar kun ano an ginibo kan saiyang mga katemporanyo sa laen-laen na situwasyon. An saro iyo si propeta Urias, na naghula tumang sa Jerusalem asin Juda durante kan paghade ni Joaquim. Minsan siring, huli sa takot ki Hadeng Joaquim, si Urias nagdulag pa-Egipto. Pagkatapos kaiyan, an hade nagsugo nin mga lalaki tanganing ibalik sia hale sa Egipto, dangan ipinagadan nia si Urias. (Jer. 26:20-23) Sa paghona nindo, may nanodan daw na leksion si Jeremias sa nangyari ki Urias? Siertong igwa, huli ta si Jeremias padagos na nagpatanid sa mga Judio—dawa sa lugar kan templo—dapit sa nagdadangadang na kalaglagan ninda. Napagdanay ni Jeremias an saiyang kosog nin boot, asin sia dai binayaan ni Jehova. Siertong pinahiro nin Dios si Ahicam, na aki ni Safan, na protehiran an buhay kan makosog an boot na si Jeremias.—Jer. 26:24.

19. Ano an nanodan ni Jeremias sa padagos na pagsugo ni Jehova nin mga propeta sa Saiyang banwaan?

¹⁹ Nakanood man si Jeremias sa paggamit sa saiya ni Jehova tanganing patanidan an Saiyang banwaan. Kan ikaapat na taon ni Hadeng Joaquim, ipinasurat ni Jehova ki Jeremias an gabos na itinaram Nia poon kan panahon ni Josias sagkod kan panahon na idto. Taano ta ipinasurat ini nin Dios? Sa katuyohan na dagkahon an mga indibiduwal na talikdan an paggibo nin maraot tanganing mapatawad sinda. (Basahon an Jeremias 36:1-3.) Si Jeremias, na nagmamata nin amay tanganing magtao nin nagpapatanid na mga mensahe gikan sa Dios, nakiolay pa ngani sa mga tawo na pumondo na sa saindang mga gibo na makauuyam nin makuri. (Jer. 44:4) Bako daw na malinaw na siertong narealisar ni Jeremias base sa saiya mismong eksperyensia na an Dios nagsugo nin mga propeta huli sa pagmalasakit sa Saiyang banwaan? Asin bako daw na huli kaiyan nagin mapagmalasakit man mismo si Jeremias? (2 Cron. 36:15) Kun siring, masasabotan nindo na kan si Jeremias makaligtas sa pagkalaglag kan Jerusalem, nasabi nia: “Huli sa mga gibo nin mamomoton na kabootan ni Jehova kaya dai kita napoho, huli ta an saiyang mga pagkaherak dai nanggad matatapos. Iyan bago kada aga.”—Lam. 3:22, 23.

20. Paano nindo maaarog si Jeremias sa paghanap ki Jehova?

²⁰ Sa mga desisyon na napapaatubang sa saindo aroaldaw, sinisierto daw nindong aramon kun ano an kabotan nin Dios, na maghapot nin “Haen si Jehova?” (Jer. 2:6-8) Bakong arog kan mga Judio kan panahon nia, si Jeremias pirmeng nagdodolok sa Makakamhan sa Gabos para sa tabang na maaraman kun arin na dalan an maninigo niang lakawan. An pag-aram aroaldaw kun ano an pagmansay ni Jehova, bilang pag-arog ki Jeremias, daing duda na iyo an madonong na gibohon kan lambang saro sa sato kun nagdedesisyon.

21. Anong klaseng pamibi an puedeng makatabang sa saindo may koneksion sa saindong paghuhulit, siring baga kun may magsimbag nin maisog?

²¹ An desisyon dai man kaipuhan na mapadapit sa sarong magabat na isyu o dakulang pagbabago sa buhay. Halimbawa, paano kun nagdesisyon kamong maglingkod sa langtad sa aldaw na plinano nindo? Tibaad pagmata nindo naheling nindo na malumlom, kaya alanganon na lumuwas. Tibaad paorootro nang nahuhulitan an teritoryong nakaiskedyul sa aldaw na iyan. Tibaad nagigirumdoman nindo na may mga kagharong na nagsayuma sa saindo paagi sa pagsagin magalang o dai nanggad nin modo. Sa amay na oras kan agang iyan, puede daw nindong ihapot sa pamibi, “Haen si Jehova?” Makakatabang iyan sa saindo na isip-isipon an kagayonan kan mensaheng ipapaabot nindo asin orog nanggad na mamatean na kabotan nin Dios na ihulit nindo an mensaheng iyan. Dangan mamamatean nindo na an tataramon ni Jehova nagigin gikanan nin kaogmahan asin labi-labing kagayagayahan nindo, arog ki Jeremias. (Jer. 15:16, 20) Kun durante kan paghuhulit nakanompong kamo nin tawo na maisogon o nanghuhuma pa ngani, puede giraray kamong mamibi asin ipahayag sa Dios an nasa boot nindo. Ipapamibi daw nindo iyan? Dai paglingawan na puede siang magtao nin banal na espiritu tanganing makasimbag kamo nin tama, asin an saindong negatibong saboot madadaog kan pagmawot nindo na sabihon an mensahe nin Dios.—Luc. 12:11, 12.

22. Taano ta may mga pamibi na puedeng maolang?

²² Marahay na maaraman na may mga pamibi na puedeng maolang. (Basahon an Lamentacion 3:44.) Dai si Jehova naghinanyog sa mga pamibi kan rebeldeng mga Judio huling ‘irinarayo ninda sa saiya an saindang talinga’ asin padagos na naggigibo nin katampalasanan. (Tal. 28:9) Siertong nagin malinaw ki Jeremias an leksion, na dapat iyo man sa sato: Kun an saro dai naghihiro oyon sa mga ipinapamibi nia, iyan ikakamondo nin Dios asin magigin dahelan na dai na Nia dangogon an mga pamibing iyan. Segurado nanggad, maninigo niatong pagmaigotan na dai iyan mangyari sa sato.

23, 24. (a) Ano an kaipuhan tanganing maaraman niato an kabotan ni Jehova? (b) Ano an magigibo nindo tanganing magin mas kapakipakinabang an saindong personal na pag-adal?

²³ Apuera sa sinserong pamibi ki Jehova para sa paggiya, kaipuhan kitang magpadagos sa satong personal na pag-adal, na mahalagang paagi tanganing maaraman an kabotan ni Jehova. Sa bagay na ini, mas may bentaha kita kisa ki Jeremias. Igwa kita kan kompletong Biblia. Arog ni Jeremias, na nagsiyasat na marhay tanganing ikasurat an ipinasabong na historikong pagkasaysay, puede man kamong magsiyasat sa Tataramon nin Dios asin hanapon an saiyang paggiya, na ihinahapot, “Haen si Jehova?” Paagi sa pagmamaigot na manodan an saiyang kabotan, kamo nagtitiwala sa saiya, asin kamo “magigin nanggad siring sa kahoy na itinanom sa kataed kan katubigan, na pinapatubo an mga gamot kaiyan sa mismong kataed kan sinusulogan nin tubig.”—Basahon an Jeremias 17:5-8.

²⁴ Mantang kamo nagbabasa asin naghohorophorop sa Banal na Kasuratan, pagmaigotan na saboton kun ano an gusto ni Jehova na gibohon nindo sa laen-laen na kamugtakan. Puede kamong maghanap nin mga prinsipyo na gusto nindong magirumdoman asin iaplikar sa saindong buhay. Mantang nagbabasa nin historikong mga pagkasaysay, mga pagboot nin Dios, diosnon na mga prinsipyo, asin madonong na mga sinabi sa Tataramon nin Dios, isip-isipon kun paano an mga tekstong iyan maninigong makaimpluwensia sa saindong mga desisyon sa aroaldaw. Bilang simbag sa paghapot nindo nin “Haen si Jehova?,” puede niang ihayag sa saindo paagi sa saiyang nasusurat na Tataramon kun ano an gigibohon dawa sa masakit na mga kamugtakan na tibaad mapaatubang sa saindo. Iyo, puede nindong maheling sa Biblia an ‘dai marorop na mga bagay na dai pa nindo naaraman’ o nasabotan kaidto!—Jer. 33:3.

25, 26. Taano ta puede kitang makinabang sa mga eksperyensia?

²⁵ Dugang pa, puede nindong estudyaran an mga eksperyensia nindo mismo asin kan iba. Halimbawa, maheheling nindo na may pira na nagpondo sa pagsarig ki Jehova, arog ni Urias. (2 Tim. 4:10) Kamo makakanood sa ginibo ninda asin makakalikay sa kaparehong kapahamakan na nangyari sa sainda. Parateng isaisip an mamomoton na kabootan ni Jehova sa saindo, na ginigirumdom na pinahalagahan man ni Jeremias an mga pagkaherak asin pagmalasakit nin Dios. Gurano man kadesesperado an kamugtakan nindo, dai pag-isipon na mayong pagmakolog sa saindo an Kaharohalangkawe. Sia nagmamakolog, siring kan pagmakolog nia ki Jeremias.

²⁶ Mantang hinohorophorop nindo an paggiya ni Jehova sa mga indibiduwal ngonyan, marerealisar nindo na sia nagtatao nin paggiya sa aroaldaw sa laen-laen na paagi. Si Aki, sarong hoben na babaeng Saksi sa Hapon, nakamate na sia bako nang angay sa pagigin Kristiano. Sarong aldaw, kan sia naglilingkod sa langtad kaiba kan agom kan paraataman sa sirkito, ipinahayag ni Aki an nasa boot nia: “An pagmate ko madali na akong isikwal ni Jehova, pero habo kong mangyari iyan kaya nakikiolay ako sa saiya na pagpasensiahan nia ako nin dikit pang panahon.” Hineling sia sa mata kan agom kan paraataman sa sirkito asin nagsabi: “Nungka kong inisip na ika gabinhod na Kristiano!” Dangan, inisip-isip ni Aki an pag-asegurar na iyan. Sa katunayan, mayo man talaga nin nagpaparisa na sia nagin gabinhod man lamang sa pagheling ni Jehova. Pagkatapos kaiyan, si Aki namibi ki Jehova: “Isugo mo po ako saen mo man gusto. Gigibohon ko po an ano man na gusto mong gibohon ko.” Kan panahon man na idto, nagpasyar sia sa sarong nasyon na igwa nin sadit na grupo nin mga Hapones na nangangaipo nin saro na tatao kan lenguahe ninda asin makakaistar duman saka makakapaglingkod kaiba ninda. Nataon man na si Aki namundag sa nasyon na iyan, kaya nagin madali para sa saiya na bumalyo duman asin tumabang. Alagad saen sia puedeng mag-istar? Nag-alok nin kuarto an sarong Kristiana na an aking babae kababalyo pa sana sa ibang lugar. “Garo man sana may nag-areglar na sa mga bagay-bagay; si Jehova an nag-andam para sa sako,” an sabi ni Aki.

27. Paano kamo nakikinabang sa paghapot nin “Haen si Jehova?”

²⁷ Dakol na tugang an makakasaysay nin mga pangyayari na personal nindang namatean an paggiya nin Dios, tibaad durante kan saindang pagbasa sa Biblia o personal na pag-adal. Tibaad naeksperyensiahan na man nindo iyan. Siertong makakapakosog iyan sa saindong relasyon ki Jehova asin makakapahiro sa saindo na magdolok sa saiya sa pamibi nin mas parate asin mas odok pa ngani. Magtiwala kamo na mantang aroaldaw niatong ihinahapot, “Haen si Jehova?,” itotokdo nia sa sato an saiyang dalan.—Isa. 30:21.