Ikaduwang Cronica

32 Pagkatapos na maimbod na maisagibo ni Hezekias an mga bagay na ini,+ nag-abot si Hading Senakerib kan Asiria asin sinalakay an Juda. Sinalikupan niya an mga siyudad na may matibay na depensa, huling gusto niyang laugon an mga iyan asin sakupon.+

2 Kan mahiling ni Hezekias na nag-abot si Senakerib asin gusto kaining makigiyera sa Jerusalem, 3 asin pakatapos na konsultahon an saiyang mga pamayo* saka mga parapakilaban, nagdesisyon siyang sulaton* an mga burabod nin tubig na nasa luwas kan siyudad,+ asin sinuportaran ninda siya. 4 Dakul na tawo an tinipon, asin sinulat ninda an gabos na burabod saka sinagop an sapa na minasulog sa kadagaan, asin an sabi ninda: “Taano ta tutugutan tang may makuang dakul na tubig an mga hadi kan Asiria pag nag-abot sinda?”

5 Apuwera kaini, determinado niyang itinugdok giraray su enterong pader na narumpag asin nagtugdok siya nin mga tore sa ibabaw kaiyan, asin sa luwas nagtugdok siya nin saro pang pader. Hinirahay man niya an Bulod-bulod*+ kan Siyudad ni David, asin naggibo siya nin dakul na armas* saka kalasag. 6 Dangan nagnombra siya nin mga namamayo nin mga suldados na manginginot sa banwaan asin tiniripon niya sinda sa plasa sa may trangkahan kan siyudad asin pinakusog an buot ninda,* na sinasabi: 7 “Kusugi an buot nindo asin magpakakusog kamo. Dai kamo matakot o makubhanan sa hadi kan Asiria+ asin sa bilog na dakulang hukbo na kaiba niya, huling mas dakul an kaiba ta kisa sa kaiba niya.+ 8 An nasa saiya takyag na laman,* pero an nasa satuya si Jehova na satong Diyos na matabang sa sato asin makikipaglaban kan satong mga ralaban.”+ Asin napakusog an banwaan sa mga sinabi ni Hading Hezekias kan Juda.+

9 Pagkatapos kaini, mantang nasa Lakis+ si Hading Senakerib kan Asiria kaiba an bilog na puwersa kan saiyang imperyo,* isinugo niya an saiyang mga lingkod pasiring sa Jerusalem, ki Hading Hezekias kan Juda asin sa gabos na taga Judea sa Jerusalem,+ na nagsasabi:

10 “Ini an sabi ni Hading Senakerib kan Asiria, ‘Sa ano kamo nagtitiwala ta yaon pa kamo sa Jerusalem mantang sinasalikupan na iyan?+ 11 Bako daw na dinadaya lang kamo ni Hezekias tanganing magkagaradan kamo sa gutom saka sa paha, kan siya magsabi: “Ililigtas kita ni Jehova na satuyang Diyos sa kamot kan hadi kan Asiria”?+ 12 Bakong an Hezekias man na ini an nagharali kan mga halangkaw na lugar+ asin kan mga altar kan saindong Diyos,*+ dangan sinabi niya sa Juda asin Jerusalem: “Sa atubangan nin sarong altar kamo dapat magduko asin sa ibabaw kaiyan kamo magpaaso nin mga atang”?+ 13 Dai nindo aram kun ano an ginibo ko asin kan sakong mga apuon laban sa gabos na banwaan kan mga nasyon sa kadagaan?+ Ikinaligtas daw kan mga diyos kan mga nasyon an saindang nasyon sa sakong kamot?+ 14 Siisay sa gabos na mga diyos kan mga nasyon na ini na linaglag kan sakong mga apuon an nakapagligtas kan saindang banwaan sa sakong kamot, kun kaya maililigtas man kamo kan saindong Diyos sa sakong kamot?+ 15 Dai kamo magpaloko o magpadaya nin arog kaiyan ki Hezekias!+ Dai kamo magtubod sa saiya, ta mayong diyos nin ano man na nasyon o kahadian an nakapagligtas na kan saiyang banwaan sa sakong kamot asin sa kamot kan sakong mga apuon. Di lalo nang dai kamo maililigtas kan saindong Diyos sa sakong kamot!’”+

16 Dakul pa an pigparataram kan saiyang mga lingkod laban ki Jehova na tunay na Diyos asin laban ki Hezekias na saiyang lingkod. 17 Naggibo man siya nin mga surat+ tanganing insultuhon si Jehova na Diyos kan Israel+ asin tanganing magtaram laban sa saiya, na sinasabi: “Arog kan mga diyos kan mga nasyon sa kadagaan na dai nailigtas an banwaan ninda sa sakong kamot,+ dai man ililigtas kan Diyos ni Hezekias an saiyang banwaan sa sakong kamot.” 18 Padagos sindang nagtaram nin makusog sa mga taga Jerusalem na nasa ibabaw kan pader gamit an lengguwahe kan mga Judio, tanganing magkatarakot sinda saka magkakurubhanan, asin sa siring masakop ninda an siyudad.+ 19 Nagtaram sinda laban sa Diyos kan Jerusalem arog kan ginibo ninda laban sa mga diyos kan mga banwaan sa daga, na mga gibo man sana kan mga kamot nin tawo. 20 Pero padagos ining ipinamibi ni Hading Hezekias asin ni propeta Isaias+ na aki ni Amoz asin nakimahirak sinda sa kalangitan na tabangan sinda.+

21 Dangan nagsugo si Jehova nin sarong anghel asin ginaradan an gabos na matitibay na parapakilaban,+ lider, saka pamayo sa kampo kan hadi kan Asiria, mala ta nagpuli ini sa sadiri niyang nasyon na grabe an pagkasupog. Kan huri, naglaog siya sa harong* kan saiyang diyos, asin ginadan siya duman kan saiya mismong mga aki paagi sa espada.+ 22 Kaya ilinigtas ni Jehova si Hezekias asin an mga nag-iistar sa Jerusalem sa kamot ni Hading Senakerib kan Asiria asin sa kamot kan gabos na iba pa asin tinawan niya sinda nin kapahingaluan sa enterong palibot. 23 Asin dakul an nagdara nin mga regalo para ki Jehova sa Jerusalem asin nin magagayon na mga bagay ki Hading Hezekias kan Juda,+ asin irinespeto siyang marhay kan gabos na nasyon pagkatapos kaiyan.

24 Kan panahon na idto, nagkahilang si Hezekias asin madali na siyang magadan; namibi siya ki Jehova,+ asin sinimbag niya siya asin tinawan siya nin sarong tanda.*+ 25 Pero dai nagin mapagpahalaga si Hezekias sa karahayan na ginibo sa saiya, huling nagin mapalangkaw an puso niya, kaya naanggot an Diyos sa saiya asin sa Juda saka sa Jerusalem. 26 Pero, pinakumbaba ni Hezekias an mapalangkaw niyang puso,+ siya asin an mga nag-iistar sa Jerusalem, kaya an kaanggutan ni Jehova dai uminabot sa sainda kan panahon ni Hezekias.+

27 Asin nagkaigwa si Hezekias nin dakulang kayamanan saka kamurawayan;+ asin naggibo siya para sa sadiri niya nin mga bodega+ para sa plata, bulawan, mamahalon na mga gapo, lanang balsamo, mga kalasag, asin para sa gabos na kawili-wiling bagay. 28 Naggibo man siya nin mga bodega para sa inaning mga tipasi saka mga bagong arak asin lana, siring man nin mga kuwadra para sa gabos na manlain-lain na klase nin ataman na hayop asin mga kuwadra para sa mga aripumpon. 29 Nagkaigwa man siya para sa sadiri niya nin mga siyudad, asin nin dakul na ataman na hayop, mga aripumpon, asin mga baka, huling tinawan siya nin Diyos nin dakulon na pagsadiri. 30 Si Hezekias an nagsulat kan burabod nin tubig na nasa itaas na parte+ kan Gihon+ asin pinalikaw niya ini pababa, pasulnupan pasiring sa Siyudad ni David,+ asin nagin mapanggana si Hezekias sa gabos niyang ginibo. 31 Alagad, kan isinugo pasiring sa saiya kan mga halangkaw na opisyal* kan Babilonya an saindang mga tagapagtaram tanganing ihapot sa saiya an manungod sa tanda*+ na nangyari sa nasyon,+ pinabayaan siya kan tunay na Diyos tanganing baluon siya,+ para maaraman an gabos na nasa puso niya.+

32 Kun manungod sa iba pang nangyari sa buhay ni Hezekias asin sa mga ipinahiling niyang maimbod na pagkamuot,+ nakasurat iyan sa bisyon ni propeta Isaias,+ na aki ni Amoz, na nasa Libro kan mga Hadi kan Juda asin kan Israel.+ 33 Dangan nagadan* si Hezekias, asin ilinubong ninda siya sa bakilid na pasiring sa lubungan kan mga aki ni David;+ asin tinawan siya nin onra kan bilog na Juda asin kan mga nag-iistar sa Jerusalem kan siya magadan. Asin si Manases na saiyang aki an nagsalida sa saiya bilang hadi.