Ezekiel

34 Nag-abot giraray sako an tataramon ni Jehova, na sinasabi: 2 “Aki nin tawo, magpropesiya ka laban sa mga pastor kan Israel. Magpropesiya ka, asin sabihon mo sa mga pastor, ‘Ini an sinabi kan Soberanong Kagurangnan na Jehova: “Hirak man sa mga pastor kan Israel,+ na pinapakakan an saindang sadiri! Bakong an aripumpon an dapat na pinapakakan kan mga pastor?+ 3 Kinakakan nindo an taba, nagsusulot kamo nin bado na gibo sa barahibo nin karnero, asin binubuno nindo an pinakamatabang hayop,+ pero dai nindo pinapasabsab an aripumpon.+ 4 Dai nindo pinakusog an maluya o binulong an may hilang o binendahan an nabarian o ibinalik an nalagalag o hinanap an nawara;+ imbes, nagin maringis saka mapang-api kamo sa sainda.*+ 5 Kaya nagkasuruway-suway sinda dahil mayong pastor;+ nagkasuruway-suway sinda asin nagin pagkakan kan lambang mabangis na hayop sa kalangtadan. 6 An mga karnero ko naglagaw-lagaw sa gabos na kabukidan asin sa gabos na halangkaw na bulod; nagkasuruway-suway an mga karnero ko sa bilog na daga, asin dai man lamang nin nagsususog o naghahanap sa sainda.

7 “‘“Kaya, kamong mga pastor, dangugon nindo an sinabi ni Jehova: 8 ‘“Isinusumpa ko sa sadiri ko,”* an sabi kan Soberanong Kagurangnan na Jehova, “dahil an mga karnero ko siniriba asin nagin pagkakan kan lambang mabangis na hayop sa kalangtadan huling mayong pastor, asin dai hinanap kan mga pastor ko an sakuyang mga karnero; imbes, pigparapakakan ninda an saindang sadiri asin dai pinakakan an sakuyang mga karnero,”’ 9 kaya, kamong mga pastor, dangugon nindo an sinabi ni Jehova. 10 Ini an sinabi kan Soberanong Kagurangnan na Jehova: ‘Mahiro ako laban sa mga pastor, asin papanimbagon ko sinda para sa* sakuyang mga karnero, asin hahalion ko sinda bilang pastor* kan sakuyang mga karnero,+ asin dai na papakakanon kan mga pastor an sadiri ninda. Ililigtas ko an sakong mga karnero hali sa nguso ninda, asin dai na sinda magigin mga pagkakan ninda.’”

11 “‘Huli ta ini an sinabi kan Soberanong Kagurangnan na Jehova: “Uni ako, asin ako mismo an mahanap sa sakuyang mga karnero, asin aatamanon ko sinda.+ 12 Aatamanon ko an sakuyang mga karnero siring sa pastor na nasumpungan an saiyang nagkasuruway-suway na mga karnero asin nagpapasabsab sa sainda.+ Ililigtas ko sinda sa gabos na lugar kun sain sinda nagkasuruway-suway kan aldaw na madampog asin may mahibog na kadikluman.+ 13 Iluluwas ko sinda hali sa mga banwaan asin titiripunon sinda hali sa mga kadagaan tapos dadarahon ko sinda sa saindang daga asin papasabsabon sa mga bukid kan Israel,+ sa may gilid kan mga sapa saka kan gabos na pig-iistaran na lugar sa kadagaan. 14 Papasabsabon ko sinda sa magayon na pasabsaban, asin masabsab sinda sa halangkaw na mga bukid kan Israel.+ Maluko sinda duman sa sarong maduot* na daga,+ asin masabsab sinda sa magagayon na pasabsaban sa mga bukid kan Israel.”

15 “‘“Ako mismo an mapasabsab sa sakuyang mga karnero,+ asin ako mismo an mapaluko sa sainda,”+ an sabi kan Soberanong Kagurangnan na Jehova. 16 “An nawawara hahanapon ko,+ an nalalagalag ibabalik ko, an nabarian bebendahan ko, asin an maluya papakusugon ko; pero an mataba saka an makusog pupuhuon ko. Paghukom an ipapasabsab ko sa sarong iyan.”

17 “‘Kun manungod sa saindo, sakuyang mga karnero, ini an sinabi kan Soberanong Kagurangnan na Jehova: “Madali na akong maghusgar sa mga karnero, asin madali na akong maghukom sa mga lalaking karnero saka lalaking kanding.+ 18 Kulang pa daw saindo na sa pinakamagagayon na pasabsaban kamo nagsasabsab? Kaipuhan pa daw nindong timak-timakan an nagkataradang duot sa saindong mga sabsaban? Asin pagkatapos na inumon an pinakamalinaw na tubig, kaipuhan pa daw nindong atian an tubig paagi sa pagturutumak diyan? 19 Dapat daw na magsabsab an sakuyang mga karnero sa pasabsaban na tinimak-timakan nindo asin mag-inom kan maating tubig na pigturutumakan nindo?”

20 “‘Kaya ini an sinabi sa sainda kan Soberanong Kagurangnan na Jehova: “Uni ako, asin ako mismo an mahusgar sa pag-ultanan kan matabang karnero saka kan maniwang na karnero, 21 huli ta sige nindong panuklang gamit an saindong tagiliran saka abaga, asin pigpaparasuag nindo an gabos na may hilang sagkod na magkasuruway-suway sinda sa hararayong lugar. 22 Ililigtas ko an sakuyang mga karnero, asin dai na sinda magigin pagkakan kan ibang hayop;+ asin mahusgar ako sa pag-ultanan kan mga karnero. 23 Tatawan ko sinda nin sarong pastor,+ an sakuyang lingkod na si David,+ asin papakakanon niya sinda. Siya mismo an mapakakan sa sainda asin magigin pastor ninda.+ 24 Asin ako, si Jehova, an magigin Diyos ninda,+ asin an sakuyang lingkod na si David an magigin pamayo ninda.+ Ako mismo, si Jehova, an nagsabi kaiyan.

25 “‘“Asin makikipagtipan ako sa sainda nin tipan nin katuninungan,+ tapos hahalion ko sa kadagaan an mga mabangis asin layas na hayop,+ tanganing makaistar sinda nin tiwasay sa kaawagan asin makaturog sa mga kadlagan.+ 26 Gigibuhon ko sindang bendisyon pati an mga lugar sa palibot kan sakuyang bulod,+ asin mapauran ako sa tamang panahon. Mauran nin mga bendisyon.+ 27 Mamumunga an mga kahoy sa kalangtadan, asin itatao kan daga an bunga kaiyan,+ tapos maistar sinda nin tiwasay sa kadagaan. Asin mamimidbid nanggad ninda na ako si Jehova pag binari ko na an saindang mga sakal+ saka ilinigtas ko na sinda sa mga nang-uripon sa sainda. 28 Dai na sinda magigin pagkakan kan mga nasyon, asin dai sinda sisibaon kan mababangis na hayop sa daga, asin maistar sinda nin tiwasay, na mayo nin siisay man na matakot sa sainda.+

29 “‘“Magibo ako para sa sainda nin tanuman na magigin bantog,* asin dai na sinda magagadan dahil sa tiggutom sa kadagaan,+ tapos dai na sinda susupugon kan mga nasyon.+ 30 ‘Dangan maaaraman nanggad ninda na ako, si Jehova na saindang Diyos, nasa kaibanan ninda asin na sinda, an banwaan* nin Israel, an sakuyang banwaan,’+ an sabi kan Soberanong Kagurangnan na Jehova.”’

31 “‘Asin kamo, na sakuyang mga karnero,+ an mga karnero na inaataman ko, mga tawo sana kamo, asin ako an saindong Diyos,’ an sabi kan Soberanong Kagurangnan na Jehova.”