Paggamit kan Materyales na Iinasignar

IKINOKOMPARAR kan Biblia an Kristianong kongregasyon sa hawak nin tawo. Kaipuhan an balang kabtang, alagad “bakong gabos parareho an katongdan.” Kaoyon kaiyan, maninigo niatong pagmaigotan an ano man na pribilehiong ipinagkatiwala sa sato. Hinahagad kaini na satuyang saboton asin gibohon nin toltol an ano man na asignasyon na pahayag imbes na inaan an importansia nin nagkapirang tema huli ta iniisip niato na mas magigin interesante an ibang tema. (Roma 12:4-8) An grupong fiel asin may diskresion na oripon iyo an may paninimbagan na magtagama nin espirituwal na kakanon “sa igong panahon.” (Mat. 24:45) Kun ginagamit niato an personal niatong mga abilidad sa pagbilog nin mga pahayag segun sa mga instruksion na inako niato, nagpapaheling kita nin apresasyon sa areglong iyan. Nakakokontribwir ini sa aregladong pagpunsionar kan kongregasyon sa kabilogan.

Kun Ano an Iiiba. Kun iinasignar sa saindo an sarong tema sa paadalan, seguradohon na an temang iyan an bilogon asin bakong iba man. Sa kadaklan na kaso, may itataong espesipikong reperensia. Kun dai sinabi sa saindo kun anong imprentadong materyales an gagamiton bilang basehan kan saindong pahayag, puede kamong kumua nin materyales sa mga reperensiang gusto nindo. Minsan siring, mantang ginigibo nindo an saindong pahayag, seguradohon na an bilog na pag-atubang nakasentro sa temang iinasignar. Sa pagdesisyon kun ano an iiiba, kaipuhan na konsideraron man nindo an mga magdadangog sa saindo.

Maingat na adalan an reperensia, na inaanalisar an mga tekstong yaon dian. Dangan estudyaran kun paano iyan pinakaepektibong magagamit para sa kapakinabangan kan mga nagdadangog. Pumili nin duwa o puedeng tolong punto sa imprentadong materyales na gagamiton bilang prinsipal na mga punto kan saindong pahayag. Siring man, pilion sa materyales na iinasignar an mga teksto na plano nindong basahon asin tokaron.

Gurano kadakol na materyales an maninigong trataron nindo? An kaya sana nindong ipahayag nin epektibo. Dai ipagsakripisyo an marahay na pagtotokdo tangani sanang dakol na impormasyon an ikasuso nindo. Kun an ibang materyales bakong tama sa obheto kan pahayag nindo, magkonsentrar sa mga kabtang na makatatabang sa saindo na maabot an pasohan na iyan. Sa materyales na iinasignar, gamiton an magigin pinakanakapagtotokdo asin kapakipakinabang para sa mga magdadangog sa saindo. An obheto nindo sa puntong ini na tatawan nin konseho sa pagtaram, bakong probaran kun gurano kadakol an matatratar nindo, kundi gamiton an iinasignar bilang basehan kan saindong pahayag.

An pahayag nindo bakong tanganing magin sumaryo sana kan materyales na iinasignar. Maninigo na iplano nindo na ieksplikar an nagkapirang punto, idetalye iyan, iilustrar iyan, asin tibaad magtao nin halimbawa kan pag-aplikar kaiyan. An dagdag na mga ideya maninigong gamiton sa pagpaliwanag kan importanteng mga punto hale sa materyales na iinasignar sa saindo imbes na salidahan an materyales na iyan.

An mga tugang na lalaki na igwa kan kinakaipuhan na mga kualipikasyon bilang paratokdo tibaad pag-abot nin panahon imbitaran na magtokdo sa Pagtiripon sa Paglilingkod. Nasasabotan ninda an pangangaipo na gamiton nin tama an materyales na iinasignar imbes na salidahan iyan nin iba. Kaagid kaiyan, an mga tugang na nagtatao nin mga pampublikong pahayag tinatawan nin mga outline na susundan. Tinatawan kan mga ini nin lugar an pakibagay sa kamugtakan, alagad malinaw na sinasabi kan mga iyan an prinsipal na mga punto na dapat na ipaliwanag, an nagsusuportar na mga argumentong gagamiton, asin an mga teksto na pinakapundasyon kan pahayag. An pakanood kun paano magtotokdo na ginagamit an materyales na iinasignar bilang basehan importanteng kabtang nin pag-andam para sa iba pang pribilehio na magpahayag.

An pagpatood na ini makatatabang man sa saindo na pamayohan an progresibong mga pag-adal sa Biblia. Makakanood kamong magkonsentrar sa pinag-aadalan imbes na maparayo sa tema paagi sa pagtao nin pagdodoon sa ibang bagay na tibaad interesante alagad dai man kaipuhan sa pakasabot kan tema. Pero, kun makukua nindo an intension kan leksion na ini, dai man kamo magigin estriktong marhay na dai na logod kamo nakatatao nin dagdag na eksplikasyon na tibaad kaipuhan kan inaadalan.