LEKSIYON 34

Paano Ta Maipapahiling na Namumutan Ta si Jehova?

Imprentadong Edisyon

Namati mo daw na nagin mas harani ka sa Diyos puon kan mag-adal ka nin Bibliya? Gusto mo daw na pakusugon pa an relasyon mo sa saiya? Kun iyo, tandaan na mas lalo kang mamumutan ni Jehova mantang nahihiling niya na mas namumutan mo siya. Paano mo maipapahiling na namumutan mo siya?

1. Paano ta maipapahiling ki Jehova na namumutan ta siya?

Ipinapahiling ta na namumutan ta si Jehova paagi sa pagsunod sa saiya. (Basahon an 1 Juan 5:3.) Dai niya pinipirit an siisay man na sumunod sa saiya. Imbes, tinatawan niya kita nin oportunidad na magdesisyon kun baga masunod kita sa saiya o dai. Taano? Gusto ni Jehova na magin “masinunod [kita] nin gikan sa puso.” (Roma 6:17) Sa ibang pagtaram, gusto niya na magsunod ka sa saiya bakong dahil ta kaipuhan mo iyan gibuhon kundi dahil namumutan mo siya. Tatabangan ka kan Seksiyon 3 asin 4 kan librong ini na maipahiling an saimong pagkamuot ki Jehova paagi sa paggibo kan mga ikinakaugma niya asin paglikay sa mga ikinakaanggot niya.

2. Taano ta puwedeng magin dipisil sa sato na ipahiling an satong pagkamuot ki Jehova?

“Dakul an kasakitan kan saro na matanos.” (Salmo 34:19) Gabos kita nakikipaglaban sa satong pagkabakong perpekto. Asin tibaad nakakaeksperyensiya man kita nin mga problema sa pinansiyal, inhustisya, asin iba pang mga problema. Pag nag-aagi kita nin mga problema, tibaad masakitan kitang gibuhon an ipinapagibo sa sato ni Jehova. Mas pasil kaya kun minsan na dai na lang magsunod. Pero kun padagos mong gigibuhon an ipinapagibo sa saimo ni Jehova, maipapahiling mong siya an pinakanamumutan mo. Asin mapapatunayan mo na maimbod ka sa saiya. Bilang balos, magigin maimbod man siya sa saimo. Dai ka niya nuarin man papabayaan.—Basahon an Salmo 4:3.

ARAMON PA

Aramon kun taano ta mahalaga ki Jehova an pagsunod mo asin kun paano mo iyan padagos na magigibo.

3. Inaakusaran ka ni Satanas

Mababasa sa libro sa Bibliya na Job an akusasyon ni Satanas ki Job saka sa gabos na tawo na gustong maglingkod ki Jehova. Basahon an Job 1:1, 6–2:10, dangan pag-ulayan an mga hapot na ini:

Uyon ki Satanas, taano daa ta nagsusunod si Job ki Jehova?—Hilingon an Job 1:9-11.
Ano an akusasyon ni Satanas sa gabos na tawo, kaiba ka na?—Hilingon an Job 2:4.

Basahon an Job 27:5b, dangan pag-ulayan an hapot na ini:

Paano pinatunayan ni Job na talagang namumutan niya si Jehova?

Si Satanas na pig-aangat si Jehova. Kinukuwestiyon niya an integridad ni Job, na pano nin pigsa, saka an integridad kan sarong sister na naglilingkod ki Jehova ngunyan. — Pinatunayan ni Job na namumutan niya si Jehova paagi sa pagdanay na maimbod sa saiya

Pinapatunayan ta na namumutan ta si Jehova paagi sa pagdanay na maimbod sa saiya

4. Paugmaha an puso ni Jehova

Basahon an Talinhaga 27:11, dangan pag-ulayan an mga hapot na ini:

Ano an namamatian ni Jehova pag sinusunod mo siya asin ginigibo an tama? Taano?

5. Kaya mong magin maimbod ki Jehova

An satong pagkamuot ki Jehova mapahiro sa sato na sabihon sa iba an manungod sa saiya. An kaimbudan ta man sa saiya mapahiro sa sato na gibuhon iyan dawa sa mga sitwasyon na bako iyan pasil gibuhon. I-play an VIDEO, dangan pag-ulayan an mga hapot.

VIDEO: Depensahan an Saimong Pagtubod Dawa May Pagkontra (5:09)

May mga pagkakataon daw na nasasakitan kang sabihon sa iba an manungod ki Jehova?
Sa video, ano an nakatabang ki Grayson na madaog an saiyang takot?

Pag namumutan ta an namumutan ni Jehova asin ikinakaungis an ikinakaungis niya, magigin mas madali sa sato na magsunod sa saiya. Basahon an Salmo 97:10, dangan pag-ulayan an mga hapot na ini:

Base sa mga nanudan mo, ano an pira sa mga bagay na namumutan o ikinakaugma ni Jehova? Ano an pira sa mga ikinakaungis niya?
Paano mo mamumutan an marahay asin ikakaungis an maraot?

6. Nakikinabang kita pag sinusunod ta si Jehova

Pinakamarahay pirmi na magsunod ki Jehova. Basahon an Isaias 48:17, 18, dangan pag-ulayan an mga hapot na ini:

Sa hiling mo, makakapagtiwala daw kita na pirming aram ni Jehova kun ano an pinakamarahay para sa sato? Taano?
Paano ka nakinabang puon kan mag-adal ka nin Bibliya asin mabisto an tunay na Diyos na si Jehova?

MAY MGA NAGSASABI: “Mayo man epekto sa Diyos an mga ginigibo ko.”

Anong teksto an puwede mong gamiton para ipahiling na puwedeng makapamundo o makapaugma ki Jehova an mga ginigibo ta?

SUMARYO

Mapapatunayan ta na namumutan ta si Jehova kun sinusunod ta siya asin kun padagos tang ginigibo an mga sinasabi niya dawa sa mga sitwasyon na masakit iyan gibuhon.