An Duwang Pinakadakulang Kapahayagan nin Pagkamoot na Ginibo
“An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya . . . magkaigwa nin buhay na daing katapusan.”—JUAN 3:16.
1. Ano an boot sabihon kan mga tataramon na “An Dios pagkamoot”?
“AN Dios pagkamoot.” Duwang beses iyan na isinabi ni apostol Juan. (1 Juan 4:8, 16) Iyo, si Jehova Dios mamomoton sa sokol na sia man madonong, makatanosan, asin makakamhan. Dugang pa, sia IYO AN pagkamoot. Sia an nagrerepresentar, an personipikasyon, nin pagkamoot. Puwede nindong ihapot sa saindong sadiri: ‘Aram ko daw kun taano iyan ta totoo? Makatatao daw ako sa iba nin malinaw na paliwanag, na suportado nin ebidensia o mga halimbawa na nagpapatunay na Sia pagkamoot? Asin ano an koneksion kaiyan sa sakong buhay asin mga aktibidad?’
2. An Dios nagtao nin anong naheheling na mga kapahayagan kan saiyang pagkamoot?
2 Kanigoan na pagkamoot an ipinaheling ni Jehova Dios sa saiyang mga linalang na tawo digdi sa daga! Horophoropa an lubos na kagayonan asin nagigibo kan satong mga mata, an makangangalas niatong makosog na mga tolang, an kosog kan satong kalamnan, asin an pagkasensitibo kan satong pakamate. May dahelan kita na ipahayag man an saboot kan salmista: “Ika oomawon ko huli ta sa makangingirhat na paagi ako makangangalas na ginibo.” Horophoropa man an magagayon na bukid, an toninong na mga sapa nin malinaw na tubig, an mga kaomahan nin mga burak kun tigsoli, asin an magayonon na mga pagsolnop nin aldaw. “Kanigoan kadakol kan saimong mga gibo, O Jehova! Iyan gabos ginibo mo sa kadonongan. An daga pano kan saimong mga ginibo.”—Salmo 139:14; 104:24.
3, 4. Anong mga halimbawa an itinatao kan Hebreong Kasuratan sa mga kapahayagan nin pagkamoot nin Dios?
3 An mga kapahayagan kan pagkamoot nin Dios dai nagpondo kan magrebelde an enot na mga linalang niang tawo. Halimbawa, si Jehova nagpaheling nin pagkamoot paagi sa pagtogot sa mag-agom na idto na magkaigwa nin mga aki na tibaad makinabang sa probisyon ni Jehova paagi sa saiyang ipinanugang “banhi.” (Genesis 3:15) Kan huri, pinagibo nia si Noe nin sarong dahong para sa pagkapreserbar kan rasa nin tawo asin nin iba pang linalang sa daga. (Genesis 6:13-21) Dangan sia nagpaheling nin dakulang pagkamoot ki Abraham, na namidbid na katood ni Jehova. (Genesis 18:19; Isaias 41:8) Sa pagkalda sa mga gikan ni Abraham sa kaoripnan sa Egipto, an Dios nagtao nin dugang pang kapahayagan kan saiyang pagkamoot, arog kan mababasa niato sa Deuteronomio 7:8: “Idto huli sa pagkamoot sa saindo ni Jehova . . . na kamo ilinuwas ni Jehova sa makosog na kamot.”
4 Minsan ngani an mga Israelitas perming nagpapaheling nin pagkaingrato asin paorootrong nagrerebelde, dai tolos sinda isinikwal nin Dios. Imbes, sia mamomoton na nakimaherak sa sainda: “Talikod kamo sa saindong maraot na mga dalan, huli ta taano ta kaipuhan pa kamong magadan, O harong ni Israel?” (Ezequiel 33:11) Minsan siring, dawa pa si Jehova an personipikasyon nin pagkamoot, sia makatanosan asin madonong man. Kaya uminabot an panahon na an saiyang rebeldeng banwaan nakaabot sa sagkodan kan saiyang pakatios! Sinda nakaabot sa punto na “mayo na nin kaomayan,” kaya pinabayaan nia sindang mabihag sa Babilonya. (2 Cronica 36:15, 16) Minsan sa panahon na iyan an pagkamoot nin Dios dai nag-ontok sagkod lamang. Sineguro nia na pakalihis nin 70 taon an natada sa sainda tinogotan na magpuli sa saindang sadiring daga. Tabi basahon an Salmo 126 asin helingon dian kun ano an saboot kan mga nagpuruli.
Pag-andam Para sa Saiyang Pinakadakulang Kapahayagan nin Pagkamoot
5. Taano ta masasabi na an pagsugo kan saiyang Aki sa daga kapahayagan kan pagkamoot nin Dios?
5 Sa huri pang kabtang kan kasaysayan nag-abot an panahon na itao ni Jehova an pinakadakulang kapahayagan kan saiyang pagkamoot. Idto tunay na mapagsakripisyong pagkamoot. Sa pag-andam para kaini, ibinalyo nin Dios an buhay kan saiyang bugtong na Aki hale sa espiritung pagkabuhay sa langit pasiring sa matris kan daragang Judia na si Maria. (Mateo 1:20-23; Lucas 1:26-35) Horophoropa an espesyal na pagkadayupot sa pag-oltanan ni Jehova asin kan saiyang Aki. Mababasa niato manongod sa pagkabuhay ni Jesus bago sia nagin tawo sa irarom kan simbolo nin kadonongan na nagpersonipikar: “Yaon ako sa kataed [nin Dios] bilang pangenot na trabahador, asin ako an nangongorog niang kinaoogmahan sa aroaldaw, mantang ako maogma sa atubang nia sa bilog na panahon.” (Talinhaga 8:30, 31) Kaya dai daw kamo maoyon na an paghale sana kan Saiyang bugtong na Aki sa atubangan Nia saro nang sakripisyo para ki Jehova?
6. Anong sa-magurang na interes an seguradong yaon ki Jehova sa pagkaaki ni Jesus?
6 Daing duwa-duwa, binantayan ni Jehova na may pag-atento asin dakulang interes an pagtalubo kan saiyang aki poon sa pangingidam bilang tawo padagos. Iningatan si Maria kan banal na espiritu nin Dios tanganing mayo nin makadanyar sa nagdadakulang aki sa matris. Sineguro ni Jehova na si Jose asin Maria magduman sa Betlehem para sa pagsenso tanganing si Jesus mamundag duman bilang kaotoban kan Miqueas 5:2. Paagi sa anghel, pinatanidan nin Dios si Jose manongod sa planong paggadan ni Hadeng Herodes, na nagin dahelan na si Jose asin an saiyang pamilya dumulag sa Egipto sagkod na magadan si Herodes. (Mateo 2:13-15) Segurado na ipinagpadagos nin Dios an saiyang interes sa pagtalubo ni Jesus. Kanigoan na kagayagayahan para sa Dios na pagmasdan an 12 anyos na si Jesus na pinapagngalas an mga paratokdo asin iba pa sa templo paagi sa mga hapot asin simbag!—Lucas 2:42-47.
7. Anong tolong kapahayagan an nagpatunay kan interes nin Dios sa ministeryo ni Jesus?
7 Pakalihis nin desiotsong taon si Jehova nagmamasid kan si Jesus dumolok ki Juan Bautista sa pagpabautismo. Dangan maogma niang isinugo an saiyang banal na espiritu ki Jesus asin nagsabi: “Ini an sakong Aki, an namomotan, na sakong inooyonan.” (Mateo 3:17) Maiimahinar nin siisay man na Kristianong ama kun gurano kaogma para sa Dios na sundan an ministeryo ni Jesus asin maheling kun paano nia itinatao an gabos na pag-omaw sa saiyang langitnon na Ama. Sarong beses ipinag-iba ni Jesus an nagkapirang apostol sa itaas nin halangkaw na bukid. Duman pinapangyari ni Jehova na si Cristo magliwanag nin pambihira, asin an Ama nagsabi: “Ini an sakong Aki, an namomotan, na sakong inoyonan; maghinanyog kamo saiya.” (Mateo 17:5) Ipinadangog ni Jehova an saiyang tingog sa ikatolong beses sa pagsimbag sa pakimaherak ni Jesus na pamurawayon logod nin Dios an saiyang ngaran. Si Jehova nagsabi: “Pinamuraway ko na iyan asin pamumurawayon ko iyan liwat.” Malinaw na ini isinabi para sa kapakinabangan ni Jesus, huli ta an ibang kaiba nia naghona na may nagtaram na anghel, mantang an iba naghona na nagdagoldol.—Juan 12:28, 29.
8. Ano an saboot nindo manongod sa pagkamoot nin Dios?
8 Ano an konklusyon nindo sa halipot na pagrepasong ini sa mga iginawe nin Dios manongod sa saiyang Aki asin sa saiyang interes sa saiya? Malinaw na namomotan na gayo ni Jehova an saiyang bugtong na Aki. Nasa isip iyan, asin sa pagsabot kun ano an saboot nin haros siisay man na tawong magurang sa sarong bugtong na aki, horophoropa an suminunod na nangyari—an sakripisyal na kagadanan ni Jesus.
An Pinakadakulang Kapahayagan nin Pagkamoot
9, 10. Ano an pinakadakulang kapahayagan nin pagkamoot nin Dios sa katawohan, na nagdodoon kan anong patotoo sa Kasuratan?
9 Ipinaheheling kan Biblia na an satong langitnon na Ama may pakikidamay. Mababasa niato sa Isaias 63:9 manongod sa saiyang banwaan na Israel: “Sa bilog na panahon kan saindang kasakitan sia nasakitan man. Asin an saiyang personal na mensahero nagligtas sa sainda. Huli sa saiyang pagkamoot asin pagkaherak tinubos nia sinda, asin inalsa nia sinda asin dinara sinda sa gabos na aldaw kan suanoy.” Sierto na orog pang nasakitan si Jehova na madangog asin maheling an “makosog na mga pagtangis asin luha” ni Jesus. (Hebreo 5:7) Si Jesus namibi nin siring sa tatamnan nin Getsemani. Sia ibinilanggo, iinatubang sa putik na pagbista, hinampak asin pinaglatigo, asin idinoon sa saiyang payo an koronang tonok. Girumdoma, iyan gabos pinagmamasdan kan saiyang mamomoton na Ama. Naheling man nia si Jesus na nabuyo huli sa gabat kan hariging pasakitan asin nagmasid kan an saiyang Aki sa huri ipinako sa hariging iyan. Dai niato paglingawan na kaya nin Dios na olangon an kasakitan na ini kan saiyang namomotan na Aki. Alagad ta itinogot ni Jehova na si Jesus magsakit nin labi-labi. Mantang an Dios may kamatean, an pagheling nia sa mga pangyayaring ini daing duwa-duwa na nagtao saiya kan pinakagrabeng kolog na namatean nia asin mamamatean pa.
10 Huli sa gabos na ini, maheheling niato kun gurano an kahulogan kan mga tataramon ni Jesus ki Nicodemo: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) May kaparehong kahulogan an mga tataramon ni Juan, an namomotan na apostol ni Jesus: “Huli kaini nahayag sa sato an pagkamoot nin Dios, huli ta sinugo nin Dios an saiyang Aking bugtong sa kinaban . . . bilang pantubos na atang para sa satong mga kasalan.”—1 Juan 4:9, 10.
11. Paano idinodoon ni apostol Pablo an pinakadakulang kapahayagan nin pagkamoot nin Dios?
11 Sa siring masasabotan nindo kun taano si apostol Pablo, sa Roma 5:6-8, ta idinoon an dakulang pagkamoot ni Jehova Dios sa mga tataramon na: “Si Cristo, mantang kita mga maluya pa, nagadan para sa maraot na mga tawo sa itinalaan na panahon. Huli ta talagsad na an saro magpagadan para sa matanos; sa katunayan, para sa sarong marahay, tibaad may saro na mangahas na magpagadan. Alagad ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato.” Tunay na, sa pagtogot na an saiyang bugtong na Aki padigdi sa daga, magsakit, asin magadan sa pinakamakasosopog na kagadanan, ginibo ni Jehova Dios an pinakadakulang kapahayagan nin pagkamoot.
An Ikaduwang Pinakadakulang Kapahayagan
12, 13. (a) Sa anong paagi na pambihira an kapahayagan nin pagkamoot ni Jesus? (b) Paano dinadara ni Pablo an atension sa dakulang pagkamoot ni Jesus?
12 ‘Ano,’ tibaad ihapot nindo, ‘an ikaduwang pinakadakulang kapahayagan nin pagkamoot?’ Si Jesu-Cristo nagsabi: “Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.” (Juan 15:13) Totoo, sa kasaysayan nin tawo, may nagkapira na isinakripisyo an saindang buhay para sa iba. Alagad ta an buhay ninda limitado sana; pag-abot nin panahon sinda magagadan man sana. Alagad si Jesu-Cristo sarong sangkap na tawo na may diretso sa buhay. Dai sia napapaatubang sa minanang kagadanan arog kan gabos na iba pang tawo; ni na makukua man nin siisay man sa pirit an buhay ni Jesus kun iyan dai nia itogot. (Juan 10:18; Hebreo 7:26) Girumdoma an saiyang mga tataramon: “Naghohona ka na dai ako makakapakimaherak sa sakong Ama na tawan ako ngonyan nin labi sa kagduwang hukbo nin mga anghel?”—Mateo 26:53; Juan 10:17, 18.
13 Orog pa niatong maaapresyar an pagkamoot na napalabot sa ginibo ni Jesus paagi sa pagkonsiderar sa mga bagay na ini: Binayaan nia an mamuraway na pagkabuhay bilang espiritung linalang sa kalangitan na duman sia nabuhay bilang dayupot na kaibaiba asin katabang kan unibersal na Soberano asin Hadeng daing sagkod. Pero, huli sa daing kapasloan na pagkamoot, ginibo ni Jesus an siring sa sinasabi sato ni apostol Pablo: “Minsan ngani sia kabaing nin Dios, dai [sia] nag-isip na man-agaw, an boot sabihon, na sia makapantay sa Dios. Dai, kundi sia nagpakang-daing halaga asin buminaing sa sarong oripon asin nagin kaagid nin mga tawo. Orog pa kaiyan, kan makua nia an saiyang sadiri na kabaing nin tawo, sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.”—Filipos 2:6-8.
14. Paano si propeta Isaias nagpatotoo sa dakulang kapahayagan kan pagkamoot ni Jesus?
14 Bako daw iyan na kapahayagan nin pagkamoot? Iyo nanggad—ikaduwa sana sa kapahayagan ni Jehova Dios, an saiyang langitnon na Ama. An makahulogan na mga tataramon kan Isaias kapitulo 53 nagpapatunay sa gabos na tinios ni Jesus: “Sia pinagduhagi asin isinikwal nin mga tawo, sarong lalaki na itinalaga sa mga kakologan asin sa pakamidbid nin helang. . . . Totoong gayo na an satuyang mga helang iyo an saiyang pinasan; asin kun manongod sa satuyang mga kakologan, tinios nia iyan. Alagad ta sia ibinilang niato na dinadamat, linugad nin Dios asin pinasasakitan. Alagad ta linugad sia huli sa satuyang paglapas; hinampak sia huli sa satuyang mga kasalan. . . . Nin huli kan saiyang mga labod naomayan kita. . . . Pinabolos nia an saiyang kalag sagkod sa mismong kagadanan.”—Isaias 53:3-5, 12.
15, 16. Na idto sakripisyo para ki Jesus maririsa sa anong mga tataramon nia?
15 Huli sa gabos na kalabot sa saiyang kagadanan, si Jesus namibi sa tatamnan nin Getsemani: “Ama ko, kun mapupuwede, togoti na an kopang ini lumihis sa sako. Minsan siring, bakong an boot ko, kundi an boot mo.” (Mateo 26:39) Ano an hinahagad ni Jesus kan isabi nia an mga tataramon na iyan? Boot daw niang sumibog sa pagigin “Kordero nin Dios na naghahale kan kasalan kan kinaban?” (Juan 1:29) Dai puwedeng iyan an kahulogan, huli ta perming sinasabi ni Jesus sa saiyang mga disipulo na sia magsasakit asin magagadan, na sinasabi pa ngani kun paano sia magagadan. (Mateo 16:21; Juan 3:14) Kaya segurado na may ibang nasa isip si Jesus kan namimibi nin siring.
16 Daing duwa-duwa na an pinaghahaditan ni Jesus iyo an sahot na paglanghad na aram niang isasangat sa saiya, an pinakagrabeng krimen na puwedeng gibohon nin sarong Judio. Taano ta paghahaditan an sarong putik na sahot? Huli ta an saiyang kagadanan sa siring na kamugtakan magtatao nin kalanghadan sa saiyang langitnon na Ama. Iyo, an daing kaninan na Aki nin Dios, na namomoot na gayo sa katanosan asin naoongis sa karatan asin nagdigdi sa daga tanganing pamurawayon an ngaran kan saiyang Ama, gagadanon ngonyan kan mismong banwaan nin Dios bilang paralanghad ki Jehova Dios.—Hebreo 1:9; Juan 17:4.
17. Taano an klase nin kagadanan na inaatubang ni Jesus ta nagin labi-labing kasakitan para sa saiya?
17 Sa kapinonan kan saiyang ministeryo si Jesus nagsabi: “Sa katotoohan, may sarong bautismo na ibabautismo sa sako, asin kanigoan an sakong kahaditan sagkod na iyan matapos!” (Lucas 12:50) Ngonyan an kulminasyon kan bautismong ini. Maliwanag na iyan an dahelan na an saiyang ganot nagin siring sa mga toro nin dugo kan sia namimibi. (Lucas 22:44) Dugang pa, igwa nin magabaton na pasan na nasa saiyang abaga kan bangging idto, pasan na dai niato kayang saboton. Aram nia na kaipuhan siang magmaimbod ta kun sia magkulang, iyan magigin dakulaon na tampal ki Jehova! Sasabihon ni Satanas na sia tama asin si Jehova Dios sala. Alagad ta dakulaon na tampal an inako ni Satanas na Diablo huli ta si Jesus nagmaimbod sagkod sa kagadanan! Paagi kaiyan pinatunayan nia na si Satanas makababalde, marigsok, asin maringis na putikon.—Talinhaga 27:11.
18. Taano si Jesus ta labi-labi kagabat an pasan kan bangging idto?
18 Kanigoan an pagsarig ni Jehova Dios sa kaimbodan kan saiyang Aki kaya ihinula nia na si Jesus magmamaimbod. (Isaias 53:9-12) Pero aram man ni Jesus na an pasan nin pagdadanay sa integridad nasa saiya. Puwede siang magkulang. Puwede siang magkasala. (Lucas 12:50) Nakataya kan bangging idto an saiya mismong buhay na daing sagkod asin kan bilog na rasa nin tawo. Seguradong idto nagin labi-labi kagabat na pasanon! Kun si Jesus nanluya asin nagkasala, dai kutana sia puwedeng maghagad nin pagkaherak basado sa atang nin iba, arog kan magigibo niatong bakong sangkap na mga linalang.
19. Ano an nagibo ni Jesus huli sa saiyang ginibong daing kapasloan?
19 Tunay na an pagtagal ni Jesus kan Nisan 14, 33 C.E., iyo an pinakadakulang kapahayagan nin daing kapasloan na pagkamoot na ginibo nin siisay man na tawo, ikaduwa sana sa ginibo ni Jehova Dios. Asin makangangalas nanggad na mga bagay an nagibo nia para sa sato paagi sa saiyang kagadanan! Paagi sa saiyang kagadanan sia nagin “an Kordero nin Dios na naghahale kan kasalan kan kinaban.” (Juan 1:29) Binukasan nia an dalan na an 144,000 sa saiyang mga parasunod magin mga hade asin saserdote asin maghade kaiba nia sa laog nin sangribong taon. (Kapahayagan 20:4, 6) Dugang pa, an “dakulang kadaklan” nin “ibang karnero” ngonyan nakikinabang sa atang ni Cristo asin makalalaom na makaligtas sa katapusan kan daan na palakaw na ini nin mga bagay. An mga ini an enot na magkakamit kan mga bendisyon nin daganon na paraiso. Sierto na magkakaigwa man nin binilyon na tawo na bubuhayon liwat bilang resulta kan ginibo ni Jesus. Sinda magkakaoportunidad man na magkamit nin daing sagkod na buhay sa sarong daganon na Paraiso. (Kapahayagan 7:9-14; Juan 10:16; 5:28, 29) Tunay na “minsan gurano kadakol kan mga panuga nin Dios, an mga iyan nagin Iyo paagi sa saiya,” an boot sabihon, paagi ki Jesu-Cristo.—2 Corinto 1:20.
20. Ano an maninigong magin reaksion niato sa duwang pinakadakulang kapahayagan nin pagkamoot ni Jehova Dios asin Jesu-Cristo?
20 Angay nanggad na kita magpaheling nin pag-apresyar sa gabos na ginibo ni Jehova Dios asin ni Jesu-Cristo para sa sato paagi sa pagtao sato kan pinakadakulang mga kapahayagan na ini nin pagkamoot. Utang niato sa sainda an pag-apresyar na ini, asin tangani na kita lubos na makinabang, kaipuhan na ipahayag niato an pag-apresyar na iyan. An minasunod na artikulo magsasabi kan pira sa pinakamarahay na paagi na ini magibo niato.
Nagigirumdoman Daw Nindo?
◻ Anong mga kapahayagan kan pagkamoot nin Dios an naheheling nin gabos na tawo?
◻ Paano niato maaaraman na si Jehova nagsakit kan maheling niang nagsasakit an saiyang Aki?
◻ Paano an kagadanan ni Jesus para sa mga tawo laen sa kagadanan nin iba na tibaad isinakripisyo an saindang buhay?
◻ Paano kita maninigong maapektaran kan pagkamoot na ipinaheling sa sato ni Jehova asin Jesus?