‘Magin Kamong Banal sa Gabos Nindong Gawe’

“Kaoyon sa Banal na Saro na nag-apod sa saindo, magin man kamong banal sa gabos nindong gawe, huli ta nasusurat: “‘Kaipuhan kamong magin banal, huli ta ako banal.’”​—1 PEDRO 1:​15, 16.

 1. Taano ta pinarigon ni Pedro an boot nin mga Kristiano na magin banal?

TAANO ta itinao ni apostol Pedro an hatol sa itaas? Huli ta naheling nia an pangangaipo na an kada Kristiano bantayan an saiyang mga kaisipan asin hiro-hiro tangani na mapagdanay iyan na kaoyon sa kabanalan ni Jehova. Sa siring, iinintrodusir nia an mga tataramon sa itaas paagi sa pagsabi: “Pasariga an saindong isip para sa gibohon, papagdanayon nindo an toltol na pag-iisip . . . Bilang makinuyog na mga aki, dai na kamo mamolde sono sa dati nindong mga kamawotan kan kamo yaon pa sa kamangmangan.”​—1 Pedro 1:​13, 14.

 2. Taano ta bakong banal an satong mga kamawotan bago niato nanodan an katotoohan?

² An dati niatong mga kamawotan bakong banal. Taano? Huli ta an dakol sa sato nagsunod sa kinabanon na mga hiro-hiro bago niato inako an Kristianong katotoohan. Aram ini ni Pedro kan sia malinaw na sumurat: “An panahon na nakaagi igo na sa saindo na nagibo an kabotan kan mga nasyon kan kamo maglakaw sa mga gibo nin malaswang gawe, mga horot, mga pagpalabilabi sa arak, mga sobrang kaogmahan, mga pag-irinoman, asin ilegal na mga idolatriya.” Siempre, dai nginaranan ni Pedro an bakong banal na mga gibo na sa satuya sanang modernong kinaban nangyayari, ta an mga iyan dai pa aram kaidto.​—1 Pedro 4:​3, 4.

 3, 4. (a) Paano niato mapaglalabanan an salang mga kamawotan? (b) Kaipuhan daw na magin daing emosyon an mga Kristiano? Ipaliwanag.

³ Narisa daw nindo na an mga kamawotan na ini iyo an mga gusto kan laman, kan mga sentido, asin kan mga emosyon? Kun tinotogotan niato na an mga ini an mangibabaw, madalion na nagigin bakong banal an satong mga kaisipan asin hiro-hiro. Iiniilustrar kaini an pangangaipo na pabayaan na an satong mga hiro-hiro kontrolon kan satong kakayahan na mangatanosan. Arog kaini an pagkasabi dian ni Pablo: “Bilang resulta ako nakikimaherak sa saindo huli sa mga pagkamadinamayon nin Dios, mga tugang, na idolot nindo an saindong hawak na siring sa buhay na atang, banal, inaako nin Dios, sarong sagradong paglilingkod na igwa kan saindong kakayahan na mangatanosan.”​—Roma 12:​1, 2.

⁴ Tanganing makapagdolot sa Dios nin banal na atang, kaipuhan na togotan niatong mangibabaw an kakayahan na mangatanosan, bakong an mga emosyon. Abaa kadakol kan nadara sa inmoralidad huli ta tinogotan ninda na an magkontrol sa saindang gawe an saindang mga saboot! Dai iyan nangangahulogan na kaipuhan na pogolan an satong mga emosyon; ta kun siring, paano niato ikapahahayag an kagayagayahan sa paglilingkod ki Jehova? Minsan siring, kun boot niatong mapaluwas an mga bunga kan espiritu imbes na an mga gibo kan laman, kun siring kaipuhan na liwaton niato an satong isip na magin kapareho kan kaisipan ni Cristo.​—Galacia 5:​22, 23; Filipos 2:5.

Banal na Pamumuhay, Banal na Karibay

 5. Taano ta mate ni Pedro an pangangaipo nin kabanalan?

⁵ Taano ta mateng marhay ni Pedro an pangangaipo nin Kristianong kabanalan? Huli ta aram niang marhay an banal na karibay na ibinayad tanganing mabalukat an makinuyog na katawohan. Sia nagsurat: “Aram nindo na bakong paagi sa mga bagay na matutunawon, paagi sa pirak o bulawan, na kamo ilinigtas sa saindong daing kamanungdanan na gawe na inako paagi sa tradisyon gikan sa saindong mga kag-anak. Kundi idto paagi sa mahal na marhay na dugo, siring kan sa daing kaninan asin daing digtang kordero, an ki Cristo.” (1 Pedro 1:​18, 19) Iyo, an Burabod nin kabanalan, si Jehova Dios, isinugo sa daga an saiyang bugtong na Aki, “an Banal na Saro,” tanganing bayadan an pantubos na matogot sa mga tawo na magkaigwa nin marahay na relasyon sa Dios.​—Juan 3:​16; 6:​69; Exodo 28:36; Mateo 20:28.

 6. (a) Taano ta bakong pasil para sa sato na magpadagos sa banal na gawe? (b) Ano an makatatabang sa sato na mapagdanay na banal an satong gawe?

⁶ Minsan siring, kaipuhan na midbidon niato na bakong pasil an mamuhay nin banal mantang nasa tahaw kan maraot na kinaban ni Satanas. Binubugtakan nia nin mga siod an tunay na mga Kristiano, na naghihingoang mabuhay sa saiyang palakaw nin mga bagay. (Efeso 6:​12; 1 Timoteo 6:​9, 10) Huli sa mga pangigipit nin sekular na trabaho, nin pagtumang kan pamilya, nin pag-olog-olog sa eskuelahan, asin nin impluwensia nin mga kaedad kaipuhan an makosog na espirituwalidad tangani na mapagdanay nin saro an kabanalan. Idinodoon kaiyan an mahalagang marhay na kabtang kan satong personal na pag-adal asin kan satong dayaday na pag-atender sa Kristianong mga pagtiripon. Hinatolan ni Pablo si Timoteo: “Padagos mong pangaptan an arogan nin nakapakokosog na mga tataramon na nadangog mo sa sako kaiba kan pagtubod asin pagkamoot na mapadapit ki Cristo Jesus.” (2 Timoteo 1:13) Nadadangog niato an nakapakokosog na mga tataramon na iyan sa satong Kingdom Hall asin sa satong pribadong pag-adal kan Biblia. Makatatabang iyan sa sato na magin banal sa satong gawe aroaldaw sa dakol na laen-laen na kamugtakan.

Banal na Gawe sa Pamilya

 7. Paano maninigong makaapektar sa satong buhay pampamilya an kabanalan?

⁷ Kan kotaron ni Pedro an Levitico 11:​44, ginamit nia an termino sa Griego na haʹgi·os, na nangangahulogan “siblag sa kasalan asin kun siring konsagrado sa Dios, sagrado.” (An Expository Dictionary of New Testament Words, ni W. E. Vine) Paano ini maninigong makaapektar sa sato sa satong Kristianong buhay pampamilya? Iyan dapat nanggad na mangahulogan na an satong buhay pampamilya maninigong basado sa pagkamoot, huli ta “an Dios pagkamoot.” (1 Juan 4:8) An mapagsakripisyo sa sadiring pagkamoot iyo an aseite na nakapararahay sa dalagan kan relasyon sa pag-oltanan nin mga mag-agom saka sa pag-oltanan nin mga magurang asin aki.​—1 Corinto 13:​4-8; Efeso 5:​28, 29, 33; 6:4; Colosas 3:​18, 21.

8, 9. (a) Anong situwasyon an kun beses nangyayari sa Kristianong harong? (b) Anong madonong na hatol an itinatao kan Biblia sa bagay na ini?

⁸ Tibaad isipon niato na an pagpahayag nin siring na pagkamoot magigin automatiko sa sarong Kristianong pamilya. Pero, kaipuhan na admitiron na an pagkamoot dai perming nangingibabaw sa pirang Kristianong harong sa sokol na maninigo. Tibaad garo baga iyan nangyayari sa Kingdom Hall, alagad abaa kapasil na puedeng mainaan an satong kabanalan sa harong. Sa panahon na iyan tibaad bigla niatong malingawan na an agom na babae iyo pa man giraray an satong Kristianong tugang na babae o na an agom na lalaki iyo pa man giraray an tugang na lalaki (asin tibaad ministeryal na lingkod o magurang sa kongregasyon) na garo baga iginagalang sa Kingdom Hall. Nagkakainit an mga payo, asin puedeng magkaigwa nin mainit na diriskutiran. Puede pa nganing makalaog sa satong buhay an duwang pamantayan. An relasyon bako nang sa mag-agom na arog-Cristo kundi sa lalaki asin babae na dai nagkakaoyon. Nalilingawan ninda na maninigong magin banal an kamugtakan sa harong. Tibaad magpoon na sindang magtaram na arog nin mga kinabanon. Dangan abaa kapasil na lumuwas sa ngoso an daing galang, mapagtuyang komento!​—Talinhaga 12:18; ikomparar an Gibo 15:37-​39.

⁹ Minsan siring, si Pablo naghahatol: “Dai kamo magpaluwas nin maraot na tataramon [Griego, loʹgos sa·prosʹ, “nakararamog na tataramon,” kun siring bakong banal] sa saindong ngoso, kundi ano man na tataramon na marahay para sa pagpakosog siring sa kinakaipuhan, tanganing iyan makatao nin karahayan sa mga nagdadangog.” Asin pinanonongdan kaiyan an gabos na nagdadangog sa harong, pati an mga aki.​—Efeso 4:29; Santiago 3:​8-10.

10. Paano minaaplikar sa mga aki an hatol manongod sa kabanalan?

¹⁰ Ngonyan an giyang ini sa kabanalan aplikado man sa mga aki sa Kristianong pamilya. Abaa kapasil para sa sainda na pumuli hale sa eskuelahan asin pumoon na arogon an rebelde asin daing galang na pagtaram kan saindang kinabanon na mga kaedad! Mga aki, dai kamo paakit sa mga gawe na ipinaheling kan daing ugaleng mga aking lalaki na nan-insulto sa propeta ni Jehova asin may pararaway, paralanghad na mga katimbang ngonyan. (2 Hade 2:​23, 24) An saindong pananaram dai maninigong maramogan kan bastos na pananaram sa kalye nin mga tawo na hinuhugakan na marhay o daing konsiderasyon tanganing gumamit nin disenteng mga tataramon. Bilang mga Kristiano, an satong pagtaram maninigong banal, marahay pagdangogon, nakapakokosog, maboot, asin “tinimplahan nin asin.” Maninigo na ipamidbid kita kaiyan na napapalaen sa ibang tawo.​—Colosas 3:​8-​10; 4:6.

Kabanalan Asin an mga Miembro kan Satong Pamilya na Daing Pagtubod

11. Taano an pagigin banal ta dai nangangahulogan nin pagigin mapagpakangmatanos sa sadiri?

¹¹ Minsan ngani kita makinuyog sa konsensia na naghihingoa na gumibo nin kabanalan, maninigo na dai kita gumawe na garo baga superyor asin nagpapakangmatanos sa sadiri, nangorogna sa pakikiiba sa mga miembro nin pamilya na daing pagtubod. An satong maboot na Kristianong gawe minsan paano maninigong makatabang sa sainda na maheling na kita napapalaen sa positibong paagi, na tatao kitang magpaheling nin pagkamoot asin pakikidamay, kapareho kan marahay na Samaritano sa ilustrasyon ni Jesus.​—Lucas 10:​30-37.

12. Paano magigibo nin Kristianong mga agom na orog na nakaaakit an katotoohan sa saindang agom?

¹² Idinoon ni Pedro an halaga nin tamang gawe sa mga miembro kan satong pamilya na daing pagtubod kan sia sumurat sa Kristianong mga agom na babae: “Sa siring man na paagi, kamong mga agom na babae, magpasakop kamo sa saindong agom na lalaki, tanganing, kun an siisay man dai nagkukuyog sa tataramon, sinda madara minsan daing tataramon paagi sa gawe kan saindang agom na babae, huli sa pakaheling sa saindong malinig na gawe na may hararom na paggalang.” An Kristianong agom na babae (o pati agom na lalaki) puedeng gibohon na orog na nakaaakit an katotoohan para sa sarong agom na daing pagtubod kun an saiyang gawe malinig, makonsiderasyon, asin magalang. Ini nangangahulogan na maninigo na puedeng liwatliwaton an teokratikong iskedyul tangani na an agom na daing pagtubod dai mangyaring mapabayaan o dai matawan nin atension.a​—1 Pedro 3:​1, 2.

13. Paano an mga magurang sa kongregasyon asin ministeryal na lingkod kun beses makatatabang sa daing pagtubod na mga agom na lalaki na maapresyar an katotoohan?

¹³ An mga magurang sa kongregasyon asin ministeryal na mga lingkod kun beses makatatabang paagi sa pakikiamigo sa daing pagtubod na agom na lalaki. Sa paaging ini tibaad maheling nia na an mga Saksi normal, disenteng mga tawo na dakol man an pinagkakainteresan, pati an mga tema na apuera kan Biblia. Sa sarong pangyayari, an sarong magurang sa kongregasyon nagpaheling nin interes sa apisyon nin sarong agom na lalaki na mamanwit. Igo na idto na magkaamigo sinda. An agom na lalaking idto sa huri nagin bautisadong tugang. Sa saro pang pangyayari, an sarong daing pagtubod na agom na lalaki naaaling na marhay sa mga kanaryo. Dai suminuko an mga magurang sa kongregasyon. An saro sa sainda pinag-adalan an manongod dian tangani na sa sunod na manompongan nia an lalaki, mabukasan nia an orolay manongod sa paboritong tema kan agom na lalaking iyan! Kun siring, an pagigin banal dai nangangahulogan nin pagigin estriktohon o hayakpit an isip.​—1 Corinto 9:​20-23.

Paano Kita Magigin Banal sa Kongregasyon?

14. (a) Ano an saro sa mga paagi ni Satanas sa pagpaluya sa kongregasyon? (b) Paano niato mapaglalabanan an siod ni Satanas?

¹⁴ Si Satanas na Diablo parapakaraot, ta an Griegong ngaran para sa Diablo, an di·aʹbo·los, nangangahulogan “parasahot” o “parapakaraot.” An pagpakaraot saro sa saiyang mga espesyalisasyon, asin hinihingoa niang gamiton iyan sa kongregasyon. An paborito niang paagi iyo an tsismis. Itinotogot daw niato na kita magin madali niang maloko sa bakong banal na gaweng ini? Paano iyan puedeng mangyari? Paagi sa pagpoon kaiyan, paagi sa pag-otro kaiyan, o paagi sa paghinanyog kaiyan. An madonong na talinhaga nagsasabi: “An tawong may mga pakana danay na nagpapaluwas nin pasuruhay, asin pinapagbubulag nin sarong parapakaraot an mga nagkakamiridbidan.” (Talinhaga 16:28) Ano an panlaban sa tsismis asin pagpakaraot? Maninigo na seguradohon niato na an satong pagtaram perming nakapakokosog asin basado sa pagkamoot. Kun hahanapon niato an mga karahayan imbes na an ipinamumugtak na mga pagkukulang kan satong mga tugang, an orolay niato perming magigin marahay pagdangogon asin espirituwal. Girumdoma na pasil an pagtatsar. Asin an tawo na nagtsitsismis sa saindo manongod sa iba tibaad itsinitsismis man kamo sa iba!​—1 Timoteo 5:​13; Tito 2:3.

15. Anong mga kualidad na arog-Cristo an makatatabang na mapagdanay na banal an gabos sa kongregasyon?

¹⁵ Tanganing mapagdanay na banal an kongregasyon, kita gabos kaipuhan na magkaigwa kan kaisipan ni Cristo, asin aram niato na an nangongorog na kualidad nia iyo an pagkamoot. Sa siring, hinatolan ni Pablo an mga taga-Colosas na magin madinamayon arog ni Cristo: “Huli kaiyan, bilang mga pinili nin Dios, banal asin namomotan, isolog nindo an mamomoton na mga pagmate nin pagdamay, kabootan, kababaan nin isip, kahoyoan, asin pakatios . . . , sueltong magpatarawadtawadan . . . Laen pa sa gabos na bagay na ini, isolog nindo an pagkamoot, huli ta iyan sangkap na bogkos nin pagkasararo.” Dangan idinugang nia: “Siring man, togotan nindo na an katoninongan kan Cristo mamogol sa saindong puso.” Tunay na paagi sa mapagpatawad na espiritung ini, mapagdadanay niato an pagkasararo asin an kabanalan kan kongregasyon.​—Colosas 3:​12-15.

Naririsa daw an Satong Kabanalan sa Satong Pagtaraed?

16. Taano ta maninigong magin maogmang pagsamba an satong banal na pagsamba?

¹⁶ Kumusta man an satong pagtaraed? Ano an pagheling ninda sa sato? Ipinababanaag daw niato an kagayagayahan sa katotoohan, o ipinaheheling daw niato iyan na garo pagabat? Kun kita banal kun paanong si Jehova banal, kun siring iyan maninigong marisa sa satong pagtaram asin sa satong gawe. Maninigong magin malinaw na an satong banal na pagsamba maogmang pagsamba. Taano man? Huli ta si Jehova na satong Dios maogmang Dios, na gustong magin magayagaya an saiyang mga parasamba. Sa siring, nasabi kan salmista manongod sa banwaan ni Jehova kan suanoy na mga panahon: “Maogma an banwaan na an Dios iyo si Jehova!” Ipinababanaag daw niato an kaogmahan na iyan? Nagpapaheling man daw nin pagkakontento an satong mga aki sa pagigin kabilang kan banwaan ni Jehova sa Kingdom Hall asin sa mga asamblea?​—Salmo 89:​15, 16; 144:​15b.

17. Ano an magigibo niato sa praktikal na paagi tanganing ikapaheling an timbang na kabanalan?

¹⁷ Ikapaheheling man niato an satong timbang na kabanalan paagi sa satong pakikikooperar asin kabootan sa kataed. Kun beses kaipuhan na an magtaraed magtarabang, tibaad sa paglinig sa komunidad o, arog sa ibang nasyon, sa pagtabang na mapakarhay an mga kalye asin tinampo. Sa bagay na ini, an satong kabanalan maririsa sa satong pag-asikaso sa satong mga hardin, natad, o iba pang rogaring. Kun pinababayaan niatong wararak an basura o maati o daing kahusayan an natad, na tibaad igwa pa nin raot nang mga sasakyan na naheheling kan gabos, masasabi daw niato na iginagalang niato an satong pagtaraed?​—Kapahayagan 11:18.

Kabanalan sa Trabaho Asin sa Eskuelahan

18. (a) Ano an alanganon na kamugtakan para sa mga Kristiano ngonyan? (b) Paano kita mapapalaen sa kinaban?

¹⁸ Si apostol Pablo nagsurat sa mga Kristiano sa bakong banal na siudad nin Corinto: “Sinuratan ko kamo na umontok sa pakikiiba sa mga parapakisaro, bako man na an boot sabihon iyo an mga parapakisaro kan kinaban na ini o an mga paslo asin mga parakikil o mga parasamba sa idolo. Ta kun iyo, kaipuhan kamong lumuwas sa kinaban.” (1 Corinto 5:​9, 10) Ini alanganon na kamugtakan para sa mga Kristiano, na kaipuhan na makisalak aroaldaw sa mga tawong inmoral o daing moral. Ini dakulang pagbalo sa integridad, nangorogna sa mga kultura na isinasadol o kinokonsinte an seksuwal na panriribok, karatan, asin pandadaya. Sa kamugtakan na ini dai niato puedeng ibaba an satong mga pamantayan tangani na magin garo “normal” sa pagheling kan nasa palibot niato. Imbes, an satong maboot alagad napapalaen na Kristianong gawe maninigo na ipalaen kita sa pagheling nin mapagmansay na mga tawo, kan mga nakamimidbid sa saindang espirituwal na pangangaipo asin naghahanap nin mas marahay.​—Mateo 5:​3; 1 Pedro 3:​16, 17.

19. (a) Ano an mga pagbalo sa mga aki sa eskuelahan? (b) Ano an magigibo nin mga magurang tanganing masuportaran an saindang mga aki asin an saindang banal na gawe?

¹⁹ Siring man, kadakol kan pagbalo na napapaatubang sa satong mga aki sa eskuelahan. Binibisita daw nindo mga magurang an eskuelahan kan saindong mga aki? Aram daw nindo kun ano an kamugtakan na lakop dian? Igwa daw kamo nin marahay na pakiiba sa mga maestro? Taano ta mahalaga an mga hapot na ini? Huli ta sa dakol na siudad kan kinaban, an mga eskuelahan nagin mga depisil mabuhayan na lugar nin kadahasan, droga, asin sekso. Paano makapagdadanay sa integridad an saindong mga aki asin mapagdadanay na banal an saindang gawe kun mayo sa sainda an bilog na may simpatiyang pagsuportar kan saindang mga magurang? Tama sana na hinatolan ni Pablo an mga magurang: “Kamong mga ama, dai nindo pagpaanggoton an saindong mga aki, tanganing dai sinda panluyahan nin boot.” (Colosas 3:21) An sarong paagi na mapaanggot an mga aki iyo an dai pakasabot sa saindang mga problema asin inaagihan na pagbalo sa aroaldaw. An pag-andam para sa mga sugot sa eskuelahan minapoon sa espirituwal na kamugtakan nin sarong Kristianong harong.​—Deuteronomio 6:​6-9; Talinhaga 22:6.

20. Taano ta kaipuhan niato gabos an kabanalan?

²⁰ Bilang konklusyon, taano ta kaipuhan niato gabos an kabanalan? Huli ta iyan nagseserbing proteksion tumang sa mga pagsalakay kan kinaban asin kaisipan ni Satanas. Iyan bendisyon ngonyan asin sa maabot. Nakatatabang iyan na ikagarantiya sa sato an buhay na magigin tunay na buhay sa bagong kinaban nin katanosan. Tinatabangan kita kaiyan na magin timbang, madaling dolokon, nakikikomunikar na mga Kristiano​—bakong daing herak na mga panatiko. Sa halipot, ginigibo kita kaiyan na magin arog-Cristo.​—1 Timoteo 6:19.

[Nota sa Ibaba]

Nagigirumdoman daw Nindo?

◻ Taano ta naheling ni Pedro an pangangaipo na hatolan an mga Kristiano manongod sa kabanalan?

◻ Taano ta bakong pasil an magkaigwa nin banal na pamumuhay?

◻ Ano an magigibo niato gabos tanganing mapaoswag an kabanalan sa pamilya?

◻ Tanganing magdanay na banal an kongregasyon, anong bakong banal na gawe an maninigo niatong likayan?

◻ Paano kita makapagdadanay na banal sa trabaho asin sa eskuelahan?

[Mga retrato sa pahina 16, 17]

Bilang mga Saksi ni Jehova, kita maninigong magin magayagaya sa paglilingkod sa Dios asin sa ibang mga aktibidad