Paglilingkod ki Jehova Bilang Sararong Pamilya

ISINAYSAY NI ANTONIO SANTOLERI

An sakong ama 17 anyos kan maghale sia sa Italia kan 1919. Buminalyo sia sa Brazil sa paghanap nin mas marahay na buhay. Pag-abot nin panahon, nagkaigwa sia nin barberya sa sarong sadit na banwaan sa interyor kan estado nin São Paulo.

SARONG ALDAW kaidtong 1938, kan ako siete anyos, si Tatay nagkua kan bersion kan Biblia na Brasileira sa sarong lalaki na naghapit sa saiyang barberya. Pakalihis nin duwang taon si Nanay nagkahelang nin grabe asin nagdanay na imbalido sagkod kan saiyang kagadanan. Si Tatay nagkahelang man, kaya kami gabos​—si Nanay, Tatay, an tugang kong si Ana, asin ako—​nakiistar sa mga paryente sa siudad nin São Paulo.

Durante kan sakong pag-eskuela sa Saõ Paulo, nagin mahilig akong magbasa, nangorogna nin makasaysayan na mga isinurat. Naghanga ako na an Biblia paminsanminsan nasasambitan sa mga iyan. An sarong librong nobela, na sinubli ko sa pampublikong libreriya sa Saõ Paulo, nasambitan nin nagkapirang beses an Sermon sa Bukid. Kaidto ako nagdesisyon na kumua nin Biblia tanganing mabasa ko mismo an Sermon na iyan. Hinanap ko an Biblia na kinua ni Tatay dakol na taon na an nakaagi asin sa katapustapusi nakua ko iyan sa irarom nin sarong baul, na namugtakan kaiyan sa laog nin pitong taon.

Katoliko an samuyang pamilya, kaya nungka akong inenkaminar na basahon an Biblia. Ngonyan, sa sadiri ko, pinag-adalan kong hanapon an mga kapitulo asin bersikulo. Binabasa ko na may dakulang pagkawili bako sanang an Sermon sa Bukid kundi an bilog na librong Mateo siring man an iba pang libro sa Biblia. An hinangaan kong marhay iyo an nagpapamidbid na karakter kan katotoohan na paagi kaiyan iinatubang an mga katokdoan asin milagro ni Jesus.

Narerealisar kun gurano kanapapalaen an relihion na Katoliko sa sakong nabasa sa Biblia, nagpoon akong umatender sa Iglesya Presbiteriano, asin uminiba sa sako si Ana. Pero, an pagmate ko may kulang pa giraray sa puso ko. Sa laog nin mga taon may pagkabangkag akong naghahanap sa Dios. (Gibo 17:27) Sa sarong mabitoon na banggi, kan ako mamondong naghohorophorop, napag-isip-isip ko, ‘Taano ta yaon ako digdi? Ano an katuyohan nin buhay?’ Naghanap ako nin daing tawong lugar sa libod, nagluhod, asin namibi, ‘Kagurangnan na Dios! Siisay ka? Paano ko po kamo mamimidbid?’ Uminabot an simbag dai nahaloy pakalihis kaiyan.

Pakanood kan Katotoohan sa Biblia

Sarong aldaw kan 1949, an sarong daragita nagdolok ki Tatay mantang sia palusad sa auto. Inalokan nia sia kan mga magasin na An Torrengbantayan asin Awake! Nagsuskribir sia sa An Torrengbantayan asin pinadalaw nia an babae sa samong harong, na ipinaliliwanag na igwa sia nin duwang aki na nag-aatender sa Iglesya Presbiteriano. Durante kan pagdalaw kan babae, winalatan nia si Ana kan librong Children asin pinonan na pakiadalan sia sa Biblia. Kan huri uminiba ako sa pag-adal.

Kan Nobyembre 1950 nag-atender kami sa samong enot na kombension kan Mga Saksi ni Jehova. Duman ilinuwas an librong “Let God Be Found True,” asin ipinadagos mi an samong pag-adal sa Biblia na ginagamit an librong iyan bilang samong giya. Dai nahaloy pakatapos kaiyan namansayan mi na nanompongan mi na an katotoohan, asin kan Abril 1951 nabautismohan kami bilang simbolo kan samong pagdusay ki Jehova. Nagdusay si Tatay pakalihis nin nagkapirang taon asin nagadan na maimbod sa Dios kan 1982.

Maogma sa Bilog na Panahon na Paglilingkod

Kan Enero 1954, kan ako 22 anyos pa sana, inako ako para sa paglilingkod sa sangang opisina kan Mga Saksi ni Jehova, na inaapod na Bethel. Pag-abot duman, nabigla akong madiskobre na an sarong lalaki na matua sana sa sako nin duwang taon, si Richard Mucha, iyo an paraataman kan sanga. Kan 1955, kan lumataw an pangangaipo para sa mga lingkod nin sirkito, na apod kaidto sa nagbibiaheng mga paraataman, kaiba ako sa limang lalaki na inimbitaran na makikabtang sa paglilingkod na ini.

An destino ko iyo an estado nin Rio Grande do Sul. Walo sana an kongregasyon nin Mga Saksi ni Jehova kan ako magpooon, alagad mayo pang 18 bulan 2 bagong kongregasyon asin 20 napapasuhay na grupo an inorganisar. Sa lugar na ini ngonyan, igwang 15 sirkito nin Mga Saksi ni Jehova, na an kada saro igwa nin mga 20 kongregasyon! Sa katapusan nin 1956, pinaisi ako na an sakong sirkito binanga sa apat na mas saradit na grupo na paglilingkodan nin apat na paraataman nin sirkito. Kan panahon na idto pinabalik ako sa Bethel para sa sarong bagong asignasyon.

Sa sakong pagkabigla asin pagkaogma, idinestino ako sa amihanan na Brazil bilang sarong lingkod nin distrito, sarong nagbibiaheng paraataman na naglilingkod sa nagkapirang sirkito. An Brazil kaidto igwa nin 12,000 na ministro kan Mga Saksi ni Jehova, asin an nasyon igwa nin duwang distrito. Si Richard Wuttke naglingkod sa timog, asin sako an distrito sa amihanan. Sa Bethel sinanay kaming magpaandar nin projector para sa pagpasale kan pelikulang prinodusir kan Mga Saksi ni Jehova, an The New World Society in Action asin an The Happiness of the New World Society.

Kan mga aldaw na idto ibang marhay an pagbiahe. Mayo sa mga Saksi na may sasakyan, kaya nagbiahe ako paagi sa bangka, barotong de sagwan, kariton, kabayo, kareta, trak, asin sarong beses sa eroplano. Nakaoogmang lumayog sa ibabaw kan kadlagan nin Amazon patugpa sa Santarém, sarong siudad sa pag-oltanan nin Belém sa bunganga kan Amazon asin Manaus, an kabisera kan Estado nin Amazona. Kadikit pa kaidto an pansirkitong mga asamblea na pinaglilingkodan kan mga lingkod nin distrito, huli kaini ginagamit ko an kadaklan kong oras sa pagpasale kan mga pelikula kan Sosyedad. Sa mas darakulang siudad, ginatos an nag-atender.

An hinangaan kong marhay sa amihanan na Brazil iyo an rehion nin Amazon. Mantang naglilingkod ako duman kan Abril 1957, an Salog nin Amazon asin an mga sanga kaiyan nagsurupay sa mga gilid kaiyan. Nagkapribilehio ako na ipaheling sa kadlagan an saro sa mga pelikula, na inuunat an sarong temporaryong tilon sa pag-oltanan nin duwang kahoy. An koryente para sa projector naggikan sa sarong barotong de motor na nakaangkla sa sarong haraning salog. Idto an enot na pelikula na nadalan kasuarin pa man kan kadaklan na nagdangog.

Dai nahaloy pakalihis kaiyan nagbalik ako sa paglilingkod sa Bethel, asin kan sumunod na taon, kan 1958, nagkapribilehio akong makaatender sa makasaysayan na “Banal na Kabotan” na Internasyonal na Asamblea kan Mga Saksi ni Jehova, sa Siudad nin Nueva, York. An mga delegado hale sa 123 na kadagaan kabale sa 253,922 na nakapano sa Yankee Stadium asin sa karaning Polo Grounds sa huring aldaw kan walong aldaw na kombension na idto.

Pagkamit nin mga Pagbabago sa Sakong Buhay

Dai nahaloy pakabalik sa Bethel, nakabisto ko si Clara Berndt, asin kan Marso 1959 kinasal kami. Iinasignar kami sa paglilingkod sa sirkito sa estado nin Bahia, kun saen naglingkod kami nin mga sarong taon. May kagayagayahan na nagigirumdoman mi pa ni Clara an kapakumbabaan, pagkamapag-istimar, kaigotan, asin pagkamoot kan mga tugang duman; dukha sinda sa materyal alagad mayaman sa bunga kan Kahadean. Dangan ibinalyo kami sa Estado nin Saõ Paulo. Duman, kan 1960, nagbados an sakong agom, asin kinaipuhan ming bayaan an pambilog na panahon na ministeryo.

Nagdesisyon kaming bumalyo sa sarong lugar sa estado nin Santa Catarina, na namundagan kan sakong agom. An samong aking lalaki, si Gerson, an panganay sa samong limang aki. Sinundan sia ni Gilson kan 1962, ni Talita kan 1965, ni Tárcio kan 1969, asin ni Janice kan 1974. Huli ki Jehova asin sa marahay na hatol na itinatao nia, nahimo ming atubangon an mga angat nin pagpadakula sa sainda sa “disiplina asin pagtatanos nin isip ni Jehova.”​—Efeso 6:4.

Mahal na marhay para sa samo an lambang saro kan samong mga aki. Marahay an pagkapahayag kan salmista sa samong mga saboot: “Uya! An mga aki mana hale ki Jehova.” (Salmo 127:3) Sa ibong nin mga problema, inataman mi an samong mga aki siring kan gigibohon mi sa ano man na “mana hale ki Jehova,” na ginigirumdom an mga instruksion na yaon sa saiyang Tataramon. Dakol an balos. Nagtao iyan sa samo nin dai masabing kagayagayahan kan an gabos na lima sunod-sunod, kanya-kanya, asin sa sadiri nindang desisyon magpahayag kan saindang pagmawot na pabautismo bilang simbolo kan saindang pagdusay ki Jehova.​—Eclesiastes 12:1.

An mga Pinili kan Samong mga Aki

Labi-labi an samong kagayagayahan kan si Gerson, dai nahaloy pakatapos nin kurso sa data processing, nagsabi na gusto niang maglingkod sa Bethel, sa siring pinipili an pambilog na panahon na ministeryo imbes na propesyonal na karera. Pero sa primero bakong pasil para ki Gerson an buhay sa Bethel. Pakasongkoa sa saiya kan sia apat na bulan pa sana sa Bethel, nabigla akong marhay sa kamondoan na nabanaag sa saiyang lalauogon mantang pahale kami. Sa salming na nakaatubang sa likod kan samong kotse, naheling ko siang nagtatanaw sa samo sagkod na malampasan mi an enot na kurbada kan tinampo. Pano-pano nin luha an sakong mga mata kaya kinaipuhan kong pumondo sa gilid kan tinampo bago magpadagos sa samong 700 kilometros na biahe papuli.

Talagang nagustohan ni Gerson an Bethel. Pakalihis nin haros anom na taon duman, naagom nia si Heidi Besser, asin magkaibanan sindang naglingkod sa Bethel sa laog nin duwa pang taon. Dangan nagbados si Heidi, asin kinaipuhan nindang humale. An saindang aki, si Cintia, na ngonyan sais anyos na, kaibaiba ninda sa saindang mga aktibidad sa Kahadean.

Dai nahaloy pakalihis kan enot ming pagsongko ki Gerson sa Bethel, si Gilson, na bago pa sanang makatapos sa saiyang enot na taon sa business administration, nagsabi na gusto man niang maglingkod duman. Plano nia na ipadagos an saiyang kurso pakatapos na maglingkod nin sarong taon sa Bethel. Alagad nagbago an saiyang mga plano, asin nagdanay sia sa paglilingkod sa Bethel. Kan 1988 naagom nia si Vivian Gonçalves, sarong payunir, na apod sa pambilog na panahon na mga ministro. Poon kaidto, magkaibanan sindang naglilingkod sa Bethel.

Nagpadagos an samong kagayagayahan kan an samong ikatolong aki, si Talita, nagdesisyon na lumaog sa paglilingkod bilang payunir kan 1986 pakatapos nin kurso sa drafting. Pakalihis nin tolong taon inapodan man sia sa Bethel. Kan 1991 naagom sia ni José Cozzi, na naglilingkod sa Bethel sa laog nin sampulong taon. Nagpapadagos sinda duman bilang mag-agom.

Ogmahon liwat kami mag-agom kan si Tárcio, an sunod, inotro an iyo man sanang frase na tolong beses mi nang nadangog, “Tatay, gusto kong lumaog sa Bethel.” Inako an saiyang aplikasyon, asin kan 1991 nagpoon man sia sa paglilingkod sa Bethel, kun saen sia nagdanay sagkod kan 1995. Naoogma kami na ginamit nia an saiyang kosog nin pagkabarobata tanganing palakopon an intereses kan Kahadean ni Jehova sa paaging ini sa laog nin labing tolong taon.

An samong ngohod, si Janice, nagdesisyon na maglingkod ki Jehova asin nabautismohan sa edad na 13. Durante kan saiyang pag-eskuela, sarong taon siang naglingkod bilang auxiliary payunir. Dangan, kan Setyembre 1, 1993, nagpoon sia bilang regular payunir sa samong kongregasyon digdi sa siudad nin Gaspar.

An Dalan nin Kapangganahan

Ano an sekreto sa pagpapadanay sa pamilya na sararo sa pagsamba ki Jehova? Dai ako naniniwala na igwa nin mahikong pormula. Si Jehova nagtao nin hatol sa saiyang Tataramon tanganing sunodon nin Kristianong mga magurang, kaya an gabos na kaomawan maninigo na mapasaiya para sa marahay na mga resulta na samong nakamtan. Hiningoa mi sanang sunodon an saiyang mga paggiya. (Talinhaga 22:6) Minana sa sako kan gabos ming aki an Latin na sentimentalidad asin sa saindang ina an praktikal na espiritung Aleman. Alagad an pinakamahalagang bagay na inako ninda sa samo espirituwal na pamana.

An samong buhay sa harong nakasentro sa intereses kan Kahadean. Bakong pasil an pagpapadanay na pangenot sa intereses na ini. Halimbawa, permi kaming nasasakitan sa pagpapadanay nin regular na pampamilyang pag-adal sa Biblia, pero nungka kaming minasuko. Poon sa saindang enot na mga aldaw sa buhay, an kada aki dinadara sa Kristianong mga pagtiripon siring man sa mga asamblea asin kombension. Kamatean sana o ibang emerhensia an nakaoolang sa samo sa pag-atender. Dugang pa, sa amay na edad, an mga aki nag-iiba sa samo sa Kristianong ministeryo.

Kan sinda mga dies anyos na, an mga aki nagpoon na magpahayag sa Teokratikong Paadalan sa Pagmiministro. Tinabangan mi sindang mag-andam kan saindang enot na mga pahayag, na pinaririgon an saindang boot na gumamit nin outline imbes na manuskrito. Kan huri, an kada saro nag-aandam kan saiyang sadiring pahayag. Siring man, kan sinda nasa pag-oltanan nin edad na 10 asin 12, an kada saro nagpoon nang makikabtang nin regular sa ministeryo. Ini an solamenteng dalan nin buhay na aram ninda.

An sakong agom, si Clara, nagkaigwa nin mahalagang marhay na kabtang sa pagpadakula sa samong mga aki. Kada banggi, kan sinda aki pang marhay​—an panahon na an aki inaako siring sa espongha an gabos na itinotokdo sa saiya—​binabasahan sinda ni Clara nin estorya sa Biblia asin namimibi kaiba kan kada saro. Ginamit nia sa kapakipakinabang na paagi an mga librong Hale sa Paraisong Nawara Sagkod sa Paraisong Nakamtan-liwat, Paghinanyog sa Dakulang Paratokdo, asin My Book of Bible Stories.a Ginamit mi man an audio asin bisuwal na mga pantabang na itinao kan Mga Saksi ni Jehova kan magkaigwa na kaiyan.

An samong eksperyensia bilang Kristianong mga magurang nagpapatunay na an mga aki nangangaipo nin aroaldaw na atension. An makosog na pagkamoot, personal na interes, asin supisyenteng panahon kabale sa pundamental na mga pangangaipo kan mga hoben. Bako sanang ibinilang mi na paninimbagan nin magurang na panigoan an mga pangangaipong ini sa pinakamakakaya mi kundi nag-ani man kami nin dakulang kaogmahan sa paggibo kaiyan.

Tunay nanggad, nakakokontento para sa mga magurang na marealisar an kaotoban kan mga tataramon sa Salmo 127:​3-5: “Uya! An mga aki mana hale ki Jehova; an bunga kan tulak sarong balos. Siring sa mga pana sa kamot nin sarong tawong makosog, an mga aki sa pagkabarobata. Maogma an makosog na tawo na pinano an saiyang suksukan nin pana kaiyan.” An paglilingkod ki Jehova bilang sararong pamilya tunay nanggad na nagpagayagaya sa samo!

[Nota sa Ibaba]

[Retrato sa pahina 26]

Si Antonio Santoleri kaiba an saiyang pinakaharaning pamilya