An Tataramon ni Jehova Buhay

Tampok na mga Kabtang sa Libro nin Kapahayagan​—II

ANO an mangyayari sa mga nagsasamba ki Jehova Dios asin sa mga dai nagsasamba sa saiya? Ano an kaaabtan ni Satanas asin kan saiyang mga demonyo? Anong mga bendisyon an maeeksperyensiahan nin makinuyog na katawohan durante kan Sangribong Taon na Paghade ni Cristo? An simbag digdi asin sa iba pang mahalagang marhay na hapot ihinayag sa Kapahayagan 13:1–22:21.a Yaon sa mga kapitulong ini an huring 9 sa 16 na bisyon na inako ni apostol Juan sa pagtatapos kan enot na siglo C.E.

“Maogma an nagbabasa nin makosog asin an mga nagdadangog sa mga tataramon kan propesiyang ini,” an isinurat ni Juan, “asin nag-ootob kan mga bagay na nasusurat dian.” (Kap. 1:3; 22:7) An pagbasa sa libro nin Kapahayagan asin an pag-aplikar kan satong mga nanonodan dian puedeng makaapektar sa satong puso, magpakosog kan pagtubod niato sa Dios saka sa saiyang Aki, si Jesu-Cristo, asin magtao sa sato nin maogmang paglaom sa ngapit.b​—Heb. 4:12.

IINULA AN PITONG MANGKO KAN KAANGGOTAN NIN DIOS

(Kap. 13:1–16:21)

“An mga nasyon nagkaaranggot nin grabe,” an sabi kan Kapahayagan 11:18, ‘asin nagdatong an grabeng kaanggotan mismo nin Dios, asin an itinalaan na panahon sa paglaglag sa mga nagraraot sa daga.’ Sa pagtao nin impormasyon manongod digdi, ipinapaheling kan ikawalong bisyon an aktibidad nin “sarong mabangis na hayop . . . na may sampulong sungay asin pitong payo.”​—Kap. 13:1.

Sa ikasiyam na bisyon, naheling ni Juan “an Kordero na nagtitindog sa Bukid nin Sion” asin kaiba nia an “siento kuarenta y kuatro mil.” Sinda “binakal hale sa katawohan.” (Kap. 14:1, 4) Suminunod an mga paisi hale sa mga anghel. Sa sunod na bisyon, naheling ni Juan an “pitong anghel na may pitong damat.” Malinaw nanggad, si Jehova mismo an nagboot sa mga anghel na ini na iula sa manlaenlaen na kabtang kan kinaban ni Satanas “an pitong mangko kan kaanggotan nin Dios.” An mga mangkong iyan may laog na mga kapahayagan asin patanid dapit sa mga paghokom na gigibohon nin Dios. (Kap. 15:1; 16:1) An duwang bisyon na ini nagtatao nin mga detalye dapit sa dugang pang mga paghokom kan Kahadean na konektado sa ikatolong herak man asin sa pagpatanog sa ikapitong trumpeta.​—Kap. 11:14, 15.

Mga Hapot sa Kasuratan na Sinimbag:

13:8​—Ano an “rolyo nin buhay kan Kordero”? Piguratibong rolyo ini na an nakasurat sana iyo an ngaran kan mga mamamahalang kaiba ni Jesu-Cristo sa saiyang langitnon na Kahadean. Kaiba dian an ngaran kan linahidan na mga Kristiano na yaon pa digdi sa daga, na may paglaom na mag-ako nin buhay sa langit.

13:11-13​—Paanong an mabangis na hayop na may duwang sungay minahiro nin siring sa dragon asin nagpapababa nin kalayo hale sa langit? An katunayan na nagtataram siring sa dragon an mabangis na hayop na may duwang sungay​—an Pambilog na Kinaban na Kapangyarihan na Anglo-Amerikano—​nagpaparisa na naggagamit iyan nin pananakot, panggigipit, asin kadahasan tanganing piriton an mga tawo na akoon an klase nin pamamahala kaiyan. Nagpapababa iyan nin kalayo hale sa langit sa bagay na nagpapakangpropeta iyan paagi sa paghingako na nadaog kaiyan an mga puersa nin maraot sa duwang guerra mundial kan ika-20 siglo asin na nanggana iyan laban sa Komunismo.

16:17​—Ano an “aire” na inulaan kan ikapitong mangko? An “aire” nagsisimbolisar sa satanikong kaisipan, “an espiritu [inklinasyon kan isip] na naghihiro ngonyan sa mga aki nin kasumbikalan.” Hinahangos kan bilog na maraot na sistema nin mga bagay ni Satanas an nakakahilong aireng ini.​—Efe. 2:2.

Mga Leksion Para sa Sato:

13:1-4, 18. “Sarong mabangis na hayop” na nagsisimbolisar sa mga gobyerno nin tawo an buminutwa hale “sa dagat,” an boot sabihon, hale sa maribok na masa nin katawohan. (Isa. 17:12, 13; Dan. 7:2-8, 17) An hayop na ini, na ginibo asin tinawan nin kapangyarihan ni Satanas, may numerong 666, na nagdodoon kun gurano iyan kabakong sangkap. An pakasabot sa kun ano an hayop na iyan nakakatabang sa sato na dai iyan sundon nin may paghanga ni sambahon iyan arog kan ginigibo nin katawohan sa pangkagabsan.​—Juan 12:31; 15:19.

13:16, 17. Sa ibong kan mga kasakitan na tibaad mapaatubang sa sato mantang ginigibo an pangaroaldaw na mga aktibidad na arog nin ‘pagbakal o pagtinda,’ maninigong dai kita magpaimpluwensia na kontrolon kan mabangis na hayop an buhay niato. An pag-ako sa ‘marka kan mabangis na hayop sa satong kamot o sa satong angog’ masasabing pagtogot niato sa mabangis na hayop na kontrolon an satong paggawe o makaapektar sa kaisipan niato.

14:6, 7. An pagbalangibog kan anghel nagtotokdo sa sato na maninigo niatong ipahayag na may pagkaapurado an maogmang bareta kan naestablisar nang Kahadean nin Dios. Maninigo tang tabangan an mga inaadalan niato sa Biblia na magkaigwa nin tamang pagkatakot sa Dios asin pamurawayon si Jehova.

14:14-20. Kun matapos na an pag-ani kan mga “anihon sa daga,” an boot sabihon, an pag-ani sa mga maliligtas, panahon na tanganing iapon kan anghel “sa dakulang pugaan nin ubas kan kaanggotan nin Dios” an tinigpas na “poon nin ubas kan daga.” Dangan lalaglagon na sagkod lamang an poon nin ubas na iyan​—an maraot na naheheling na sistema nin mga gobyerno ni Satanas na namamahala sa katawohan pati na an “mga bagikoy” nin maraot na bunga kaiyan. Kita maninigong magin determinado na dai maimpluwensiahan kan poon nin ubas kan daga.

16:13-16. An “maating ipinasabong na mga tataramon” nagsisimbolisar sa demonikong propaganda na ginibo tanganing masierto na an mga hade sa daga dai maiimpluwensiahan kan pag-ula kan pitong mangko nin kaanggotan nin Dios kundi namamaniobra na magin tumang ki Jehova.​—Mat. 24:42, 44.

16:21. Mantang nagrarani na an katapusan kan kinaban na ini, an pagbalangibog kan mga paghokom ni Jehova sa maraot na sistema ni Satanas tibaad may kaibang pambihira an gabat na berbal na mga kapahayagan kan mga paghokom nin Dios, na posibleng marhay na ilinadawan kan tuminagas na tubig. Pero, an kadaklan sa katawohan mapadagos sa paglanghad sa Dios.

NAMAMAHALA NA AN MAPANGGANANG HADE

(Kap. 17:1–22:21)

An “Dakulang Babilonya,” an pambilog na kinaban na imperyo nin falsong relihion, sarong makababaldeng parte kan maraot na kinaban ni Satanas. Ilinaladawan sia kan ika-11 bisyon bilang sarong “dakulang patotot”​—imoral na babae—​“na nangangabayo sa sarong kolor eskarlatang mabangis na hayop.” Sia biyong lalaglagon kan “sampulong sungay” kan mismong hayop na kinakabayoan nia. (Kap. 17:1, 3, 5, 16) Sa pag-agid sa patotot sa sarong “dakulang siudad,” iinanunsiar kan suminunod na bisyon an saiyang pagbagsak asin nagtao iyan nin apretadong pangapodan sa banwaan nin Dios na ‘lumuwas sa saiya.’ Ipinagmondo nin dakol an pagbagsak kan dakulang siudad na iyan. Minsan siring, naggayagaya sa langit huli sa “kasal kan Kordero.” (Kap. 18:4, 9, 10, 15-19; 19:7) Sa ika-13 bisyon, nakiguerra sa mga nasyon an nakasakay sa “sarong kabayong puti.” Tinapos nia an maraot na kinaban ni Satanas.​—Kap. 19:11-16.

Kumusta man “an orihinal na halas, na iyo an Diablo asin Satanas”? Noarin sia ‘iaapon sa danaw nin kalayo’? Saro iyan sa mga tema kan ika-14 bisyon. (Kap. 20:2, 10) An huring duwang bisyon nagtatao nin ideya sa magigin buhay durante kan Milenyo. Sa pagtatapos kan “kapahayagan,” naheling ni Juan ‘an sarong salog kan tubig nin buhay na nagbobolos sa tahaw kan tinampo,’ asin sarong marahayon na pangagda an itinao sa “siisay man na napapaha.”​—Kap. 1:1; 22:1, 2, 17.

Mga Hapot sa Kasuratan na Sinimbag:

17:16; 18:9, 10​—Taano ta ipinagmondo kan “mga hade sa daga” an mismong organisasyon na sinda mismo an naglaglag? Kaimotan sana an dahelan kan saindang pagmondo. Pagkatapos na laglagon an Dakulang Babilonya, malinaw na narealisar kan mga hade sa daga kun gurano sia kanagin kapakipakinabang sa sainda. Sia nagin relihiosong pantahob sa saindang mapang-aping mga gibo. Tinabangan man sinda kan Dakulang Babilonya sa pagreklutar nin mga hoben tanganing gamiton sa guerra. Dugang pa, nagkaigwa sia nin importanteng kabtang sa pagpapadanay sa mga tawo na nasasakop.

19:12​—Sa anong paagi na mayo nin siisay man na nakakaaram sa dai sinambit na ngaran ni Jesus kundi sia sana? An ngaran na ini garo baga nanonongod sa posisyon asin mga pribilehio, arog kan mga sinambit sa Isaias 9:6, na nakamtan ni Jesus durante kan aldaw kan Kagurangnan. Mayo nin siisay man na nakakaaram kan ngaran na ini kundi sia mismo huli ta an saiyang mga pribilehio daing kaagid asin sia sana an makakasabot sa kahulogan kan pagkaigwa nin siring kalangkaw na posisyon. Minsan siring, ihiniras ni Jesus sa mga miembro kan saiyang grupong nobya an nagkapira sa mga pribilehiong ini, na garo man sana ‘isinusurat nia sa sainda an saiyang bagong ngaran na iyan.’​—Kap. 3:12.

19:14​—Siisay an mangangabayo kaiba ni Jesus sa Armagedon? Kabilang sa ‘mga hukbo sa langit’ na maiba ki Jesus sa guerra nin Dios iyo an mga anghel saka an linahidan na mga nakadaog na nag-ako na kan saindang langitnon na balos.​—Mat. 25:31, 32; Kap. 2:26, 27.

20:11-15​—Kiisay na mga ngaran an nakasurat sa “rolyo [o, “sa libro”] nin buhay”? Ini an rolyo na dian nakasurat an ngaran kan mga mag-aako nin buhay na daing katapusan​—an linahidan na mga Kristiano, an mga miembro kan dakulang kadaklan, asin an maimbod na mga lingkod nin Dios na makakaeksperyensia kan ‘pagkabuhay liwat kan mga matanos.’ (Gibo 24:15; Kap. 2:10; 7:9) Sa mga bubuhayon sa ‘pagkabuhay liwat kan mga bakong matanos,’ an saindang ngaran isusurat sana sa “balumbon nin buhay” kun sinda mahiro kaoyon kan “mga bagay [mga instruksion] na nakasurat sa mga rolyo” na bubukasan durante kan Milenyo. Minsan siring, an mga ngaran dai pa permanenteng nakasurat dian. An ngaran kan mga linahidan magigin permanente kun mapatunayan na nindang maimbod sinda sagkod sa kagadanan. (Kap. 3:5) An ngaran kan mga maako nin buhay digdi sa daga magigin permanente kun makapasar na sinda sa pangultimong pagbalo sa katapusan kan sangribong taon.​—Kap. 20:7, 8.

Mga Leksion Para sa Sato:

17:3, 5, 7, 16. “An kadonongan hale sa itaas” nakakatabang sa sato na masabotan “an misteryo kan babae asin kan [kolor eskarlatang] mabangis na hayop na nagpapakabayo sa saiya.” (Sant. 3:17) An simbolikong mabangis na hayop na ini Liga de Naciones dati asin kan huri binuhay giraray bilang an Naciones Unidas. Bako daw na an paglinaw sa misteryong ini maninigong magpahiro sa sato na magin maigot sa paghuhulit kan maogmang bareta kan Kahadean nin Dios asin sa pagbalangibog kan aldaw nin paghokom ni Jehova?

21:1-6. Lubos kitang makakasierto na mangyayari an ihinulang mga bendisyon sa irarom kan pamamahala kan Kahadean. Taano? Huli ta mapadapit sa mga iyan, sinasabi: “Nangyari na an mga iyan!”

22:1, 17. An “salog kan tubig nin buhay” nagrerepresentar sa mga probisyon ni Jehova sa pagkalda sa makinuyog na mga tawo hale sa kasalan asin kagadanan. May makukua na ngonyan na kabtang kan tubig na ini. Logod na bako sanang mapagpasalamat niatong akoon an pangagda na dumolok asin “kumua kan tubig nin buhay na daing bayad” kundi maigot man niatong ipaabot iyan sa iba!

[Mga Nota sa Ibaba]

[Ritrato sa pahina 5]

Marahayon nanggad na mga bendisyon an maeeksperyensiahan kan makinuyog na katawohan sa pamamahala kan Kahadean!