Basahon an Tataramon nin Dios Asin Paglingkodan Sia sa Katotoohan
“Tokdoi ako, O Jehova, dapit sa saimong dalan. Ako maglalakaw sa saimong katotoohan.”—SALMO 86:11.
1. Sa pundamental, ano an isinabi kan enot na luwas kan magasin na ini manongod sa katotoohan?
SI Jehova nagsusugo nin liwanag asin katotoohan. (Salmo 43:3) Tinatawan man nia kita kan kapasidad na basahon an saiyang Tataramon, an Biblia, asin manodan an katotoohan. An enot na luwas kan babasahon na ini—Hulyo 1879—nagsabi: “An katotoohan, siring sa sadit na burak sa kaawagan nin buhay, napalilibotan asin haros nalamos na kan tubang na mga doot nin sala. Kun gusto nindong makua iyan kaipuhan na permi kamong magbantay. Kun gusto nindong maheling an kagayonan kaiyan kaipuhan na haleon nindo an mga doot nin sala asin an mga binit nin pagkapanatiko. Kun gusto nindong iyan mapasaindo kaipuhan na kamo dumoko tanganing iyan makua. Dai makontento sa sarong burak nin katotoohan. Kun bastante na an saro mayo na kutana nin iba. Padagos na magtipon, hanapon an dagdag pa.” An pagbasa kan asin pag-adal sa Tataramon nin Dios nagpapangyari sa sato na magkamit nin tamang kaaraman asin maglakaw sa saiyang katotoohan.—Salmo 86:11.
2. Ano an ibinunga kan basahon ni Esdras asin nin iba pa an Ley nin Dios sa mga Judio sa suanoy na Jerusalem?
2 Pakatogdokan liwat kan mga lanob nin Jerusalem kan 455 B.C.E., an saserdoteng si Esdras asin an iba pa binasa an Ley nin Dios sa mga Judio. Ini sinundan nin magayagayang Kapiestahan nin mga Payag-payag, pagtuga nin mga kasalan, asin paggibo nin “mapagtitiwalaan na areglo.” (Nehemias 8:1–9:38) Satong mababasa: “Nagpadagos sinda sa pagbasa nin makosog sa libro, sa ley kan tunay na Dios, na iyan ipinaliliwanag nin detalyado, asin may pagtao dian nin kahulogan; asin nagpadagos sindang ipasabot an pagbasa.” (Nehemias 8:8) Isinusuherir nin iba na an mga Judio daing gayo nakasasabot sa Hebreo asin na ginibo an pagtao nin kahulogan sa Aramaiko. Alagad an teksto dai nagpaparisa nin paglinaw sana sa mga termino nin lenguahe. Si Esdras asin an iba pa ipinaliwanag nin detalyado an Ley tangani na an banwaan masabotan an mga prinsipyo kaiyan asin ikaaplikar iyan. An Kristianong mga publikasyon asin pagtiripon nagseserbi man na ‘tawan nin kahulogan’ an Tataramon nin Dios. Iyo man an nombradong kamagurangan, na “kualipikadong magtokdo.”—1 Timoteo 3:1, 2; 2 Timoteo 2:24.
Nagdadanay na mga Pakinabang
3. Ano an nagkapirang pakinabang na nakakamtan sa pagbasa kan Biblia?
3 Kun an Kristianong mga pamilya iribang nagbabasa kan Biblia, posible na sinda makaeeksperyensia nin nagdadanay na mga pakinabang. Naaaraman ninda an mga ley nin Dios asin nanonodan an katotoohan manongod sa mga doktrina, hula, asin iba pang tema. Pakabasaha kan sarong kabtang kan Biblia, puedeng ihapot kan payo kan pamilya: Paano ini maninigong makaapektar sa sato? Paano ini konektado sa ibang katokdoan kan Biblia? Paano niato magagamit an mga puntong ini sa paghuhulit kan maogmang bareta? An pamilya nagkakamit nin mas dakulang pakarorop sa pagbasa kan Biblia kun sinda nagsisiyasat paagi sa paggamit kan Watch Tower Publications Index o iba pang mga indese. An duwang tomo kan Insight on the Scriptures puedeng konsultahon na may mga pakinabang.
4. Paano iaaplikar kaidto ni Josue an instruksion na nasusurat sa Josue 1:8?
4 An mga prinsipyong kinua sa Kasuratan makagigiya sa sato sa buhay. Dugang pa, an pagbasa kan asin pag-adal sa ‘banal na mga kasuratan makapadodonong sa sato para sa kaligtasan.’ (2 Timoteo 3:15) Kun mapagiya kita sa Tataramon nin Dios, kita magpapadagos na maglakaw sa saiyang katotoohan asin maootob an satong matanos na mga kamawotan. (Salmo 26:3; 119:130) Minsan siring, kaipuhan na hanapon niato an pakasabot, arog kan ginibo kan kasalihid ni Moises, si Josue. An ‘libro kan ley’ dai dapat na sumuhay sa saiyang ngoso, asin kaipuhan na basahon nia iyan aldaw asin banggi. (Josue 1:8) An dai pagtogot na an ‘libro kan ley’ sumuhay sa saiyang ngoso nangahulogan na si Josue dai maontok sa pagsabi sa iba kan nakatatao nin liwanag na mga sinasabi kaiyan. An pagbasa sa Ley aldaw asin banggi nangahulogan na iyan dapat na horophoropon ni Josue, adalan iyan. Sa kaagid na paagi sinadol ni apostol Pablo si Timoteo na “pensaron”—horophoropon—an saiyang gawe, ministeryo, asin pagtotokdo. Bilang Kristianong magurang, kaipuhan ni Timoteo na magin espesyalmenteng maingat na an saiyang buhay arogan asin na itinotokdo nia an katotoohan sa Kasuratan.—1 Timoteo 4:15.
5. an kaipuhan tangani na manompongan niato an katotoohan nin Dios?
5 An katotoohan nin Dios sarong kayamanan na daing kaagid sa halaga. An pakanompong kaiyan nagkakaipo nin pagkotkot, padagos na pagsiyasat sa Kasuratan. Solamente bilang garo aking mga estudyante kan Kaharohalangkaweng Paratokdo na kita magkakamit nin kadonongan asin makasasabot sa may pagsambang takot ki Jehova. (Talinhaga 1:7; Isaias 30:20, 21) Siempre, maninigo na patunayan niato an mga bagay paagi sa Kasuratan. (1 Pedro 2:1, 2) An mga Judio sa Berea “orog karahay an kamawotan kisa kaidtong mga nasa Tesalonica, huli ta inako ninda an tataramon na igwa nin dakulang pagkagalaga sa isip, na maingat na sinisiyasat an Kasuratan aroaldaw kun baga an mga bagay na ini [na isinabi ni Pablo] iyo man nanggad.” An mga taga-Berea inomaw imbes na inanggotan sa paggibo kaini.—Gibo 17:10, 11.
6. Taano ta nasabi ni Jesus na mayo nin karahayan na ikinatao sa nagkapirang Judio an pagsiyasat sa Kasuratan?
6 Sinabihan ni Jesus an nagkapirang Judio: “Sinisiyasat nindo an Kasuratan, huli ta naghohona kamo na paagi kaiyan magkakaigwa kamo nin buhay na daing katapusan; asin an mga ini mismo an nagpapatotoo dapit sa sako. Pero habo nindong dumolok sa sako tangani kamong magkaigwa nin buhay.” (Juan 5:39, 40) Siniyasat ninda an Kasuratan na may tamang ideya—tangani na an mga ini gumiya sa sainda pasiring sa buhay. An totoo, an Kasuratan igwa nin Mesiyanikong mga hula na nagtokdo ki Jesus bilang an paagi na mabuhay. Alagad ta isinikwal sia kan mga Judio. Kun siring, an pagsiyasat sa Kasuratan mayong karahayan na ikinatao sa sainda.
7. Ano an kaipuhan tanganing magtalubo sa pakasabot sa Biblia, asin taano?
7 Tanganing magtalubo sa satong pakasabot sa Biblia, kaipuhan niato an paggiya kan espiritu, o puersa aktiba, nin Dios. “An espiritu nagsisiyasat sa gabos na bagay, minsan an hararom na mga bagay nin Dios” tanganing mapaluwas an kahulogan kaiyan. (1 Corinto 2:10) An mga Kristiano sa Tesalonica kaipuhan na “siertohon an gabos na bagay” sa arin man na mga hula na saindang nadangog. (1 Tesalonica 5:20, 21) Kan si Pablo magsurat sa mga taga-Tesalonica (mga 50 C.E.), an solamenteng kabtang kan Griegong Kasuratan na nasusurat na kaidto iyo an Ebanghelyo ni Mateo. Kaya an mga taga-Tesalonica asin taga-Berea puedeng siertohon an gabos na bagay, posibleng paagi sa pagheling sa Griegong Septuagint na bersion kan Hebreong Kasuratan. Kaipuhan na sinda magbasa kan asin mag-adal sa Kasuratan, asin iyo man kita.
Mahalagang Marhay Para sa Gabos
8. Taano an nombradong kamagurangan ta maninigong labi sa iba an kaaraman sa Biblia?
8 An nombradong kamagurangan maninigong labi sa iba an kaaraman sa Biblia. Dapat na sinda magin “kualipikadong magtokdo” asin ‘marigon na mangapot sa fiel na tataramon.’ An paraataman na si Timoteo kaipuhan na ‘gamiton an tataramon kan katotoohan sa tamang paagi.’ (1 Timoteo 3:2; Tito 1:9; 2 Timoteo 2:15) An saiyang ina, si Eunice, asin an saiyang lolang si Loida tinokdoan sia sa banal na mga kasuratan poon sa pagkaomboy, na itinanom sa saiya an “pagtubod na dai nin pagsaginsagin,” minsan mayong pagtubod an saiyang ama. (2 Timoteo 1:5; 3:15) An mga amang may pagtubod dapat na padakulaon an saindang aki “sa disiplina asin pagtatanos nin isip ni Jehova,” asin an kamagurangan na mga ama nangorognang dapat na magkaigwa ‘nin mga aking nagtutubod na bakong masinuhay o isinusumbong na marigsok.’ (Efeso 6:4; Tito 1:6) Kun siring, ano man an satong kamugtakan, maninigo na isaboot na gayo niato an pangangaipo na basahon, adalan, asin iaplikar an Tataramon nin Dios.
9. Taano ta maninigong adalan an Biblia kaiba nin mga kapwa Kristiano?
9 Maninigo man niatong adalan an Biblia kaiba nin mga kapagtubod. Boot ni Pablo na an mga Kristianong taga-Tesalonica mag-orolay-olay manongod sa saiyang hatol. (1 Tesalonica 4:18) Tanganing mapatarom an pakasabot niato sa katotoohan, mayo na nin mas marahay pa kisa sa pakiiba sa ibang debotadong estudyante sa pagsiyasat sa Kasuratan. Totoo an talinhaga: “Sa batbat, an batbat mismo minatarom. Kaya an tawo minapatarom sa lalauogon nin ibang tawo.” (Talinhaga 27:17) An kasangkapan na batbat puedeng taklaon kun iyan dai ginagamit asin pinatatarom. Sa kaagid na paagi, kaipuhan na kita regular na magtiripon asin magpatinaroman paagi sa paghiras kan kaaraman na nakamtan niato gikan sa pagbasa, pag-adal, asin paghorophorop sa Tataramon kan katotoohan nin Dios. (Hebreo 10:24, 25) Dugang pa, ini sarong paagi na masierto na kita nakikinabang sa mga kilyab nin espirituwal na liwanag.—Salmo 97:11; Talinhaga 4:18.
10. Ano an boot sabihon kan paglakaw sa katotoohan?
10 Sa satong pag-adal sa Kasuratan, kita angay na makapamimibi sa Dios arog kan ginibo kan salmista: “Sugoan an saimong liwanag asin an saimong katotoohan. An mga ini logod gumiya sa sako.” (Salmo 43:3) Kun boot niatong kamtan an pag-oyon nin Dios, dapat kitang maglakaw sa saiyang katotoohan. (3 Juan 3, 4) Kaiba digdi an pagsunod sa saiyang mga kahagadan asin paglilingkod sa saiya na fiel asin sinsero. (Salmo 25:4, 5; Juan 4:23, 24) Dapat kitang maglingkod ki Jehova sa katotoohan, sono sa ihinayag sa saiyang Tataramon asin liniwanag sa mga publikasyon kan “fiel asin madonong na oripon.” (Mateo 24:45-47) Hinahagad kaini an tamang kaaraman sa Kasuratan. Kun siring, paano niato maninigong basahon asin adalan an Tataramon nin Dios? Maninigo daw niatong ponan an pagbasa dian sa Genesis kapitulo 1, bersikulo 1, padagos na sunod-sunod an 66 na libro? Iyo, an lambang Kristiano na igwa kan kompletong Biblia sa saiyang lenguahe maninigong basahon iyan poon Genesis sagkod Kapahayagan. Asin an katuyohan niato sa pagbasa kan Biblia asin Kristianong mga publikasyon maninigo na dugangan an pakasabot niato sa kadakoldakol na katotoohan sa Kasuratan na itinao nin Dios paagi sa ‘fiel na oripon.’
Basahon nin Makosog an Tataramon nin Dios
11, 12. Taano ta kapakipakinabang na basahon nin makosog an Biblia sa mga pagtiripon?
11 Puede kitang magbasa nin silensio kun nagsosolo. Minsan siring, kan suanoy na mga panahon makosog an pagbasa nin pribado. Kaya mantang an kapon na Etiope nakasakay sa saiyang karuwahe, nadangog sia kan ebanghelisador na si Felipe na nagbabasa sa hula ni Isaias. (Gibo 8:27-30) An termino sa Hebreo na trinadusir na “basahon” sa pangenot nangangahulogan “apodon.” Kaya an mga sa primero dai nakababasa nin silensio asin nakasasabot sa pagbasa maninigong dai pogolan na pronunsiaron nin makosog an kada termino. An pangenot iyo na manodan an katotoohan paagi sa pagbasa kan nasusurat na Tataramon nin Dios.
12 Kapakipakinabang na basahon nin makosog an Biblia sa Kristianong mga pagtiripon. Sinadol ni apostol Pablo an saiyang katabang na si Timoteo: “Magmahigos ka sa pampublikong pagbasa, sa pagsadol, sa pagtotokdo.” (1 Timoteo 4:13) Sinabihan ni Pablo an mga taga-Colosas: “Kun an surat na ini nabasa na sa tahaw nindo, iareglo na iyan basahon man sa kongregasyon kan mga taga-Laodicea asin na basahon man nindo an saro na hale sa Laodicea.” (Colosas 4:16) Asin an Kapahayagan 1:3 nagsasabi: “Maogma an nagbabasa nin makosog asin nagdadangog sa mga tataramon kan hulang ini, asin an nagkukuyog sa mga bagay na nasusurat dian; huli ta harani na an itinalaan na panahon.” Kun siring, an sarong nagpapahayag sa publiko maninigong bumasa nin mga teksto sa Biblia tanganing suportaran an sinasabi nia sa kongregasyon.
Sono sa Topikong Paagi nin Pag-adal
13. Ano an pinakaprogresibong paagi nin pakanood sa mga katotoohan sa Biblia, asin ano an makatatabang sa sato na makua an mga teksto?
13 An sono sa topikong pag-adal iyo an pinakaprogresibong paagi nin pakanood sa mga katotoohan sa Kasuratan. An mga konkordansia, na ilinilista sa alpabetikong pagkasunodsunod an mga termino sa Biblia sa konteksto kaiyan sono sa libro, kapitulo, asin bersikulo, ginigibong pasil an paghanap nin mga teksto na konektado sa sarong tema. Asin an mga tekstong iyan mapagkakaoroyon ta an Autor kan Biblia dai kinokontra an sadiri. Paagi sa banal na espiritu, pinasabngan nia an mga 40 katawo na isurat an Biblia sa laog nin 16 na siglo, asin an pag-adal dian sono sa topiko probado nang paagi na manodan an katotoohan.
14. Taano ta maninigong adalan na magkaibanan an Hebreo asin Kristianong Griegong Kasuratan?
14 An pag-apresyar niato sa katotoohan sa Biblia maninigong magpahiro sa sato na basahon asin adalan an Kristianong Griegong Kasuratan kaiba kan Hebreong Kasuratan. Ipaheheling kaini kun paanong an Griegong Kasuratan konektado sa katuyohan nin Dios asin tatawan nin liwanag an mga hula sa Hebreong Kasuratan. (Roma 16:25-27; Efeso 3:4-6; Colosas 1:26) Nakatatabang na marhay sa bagay na ini an New World Translation of the Holy Scriptures. Iyan inandam nin dusay na mga lingkod nin Dios na nag-aprobetsar sa yaon na nadugangan na kaaraman manongod sa orihinal na teksto kan Biblia saka sa kasaysayan sa likod kaiyan asin idiomatikong mga ekspresyon. Mahalaga man na marhay an mga pantabang sa pag-adal kan Biblia na itinao ni Jehova paagi sa “fiel asin madonong na oripon.”
15. Paano nindo patutunayan na tama na magkotar sa laen-laen na kabtang kan Biblia?
15 An iba tibaad magsabi, ‘An saindong mga publikasyon rinibo an kotasyon sa Biblia, alagad taano ta kinukua nindo an mga ini sa laen-laen na kabtang?’ Paagi sa pagkotar sa laen-laen na kabtang kan 66 na libro kan Biblia, kinukua kan mga publikasyon an nagkapirang pinasabngan na saksi tanganing patunayan an pagigin totoo nin sarong katokdoan. Ginamit mismo ni Jesus an paaging ini nin pagtotokdo. Kan itao nia an saiyang Sermon sa Bukid, 21 pagkotar sa Hebreong Kasuratan an ginibo nia. An diskursong iyan may tolong kotasyon sa Exodo, duwa sa Levitico, saro sa Bilang, anom sa Deuteronomio, saro sa Ikaduwang Hade, apat sa Salmo, tolo sa Isaias, asin saro sa Jeremias. Sa paggibo kaini, si Jesus daw ‘naghihingoang patunayan an minsan ano na sana’? Dai, huli ta ‘sia nagtokdo bilang saro na igwa nin autoridad, asin bakong arog kan mga eskriba.’ Idto huli ta sinuportaran ni Jesus an saiyang katokdoan kan autoridad kan nasusurat na Tataramon nin Dios. (Mateo 7:29) Iyo man si apostol Pablo.
16. Anong mga pagkotar sa Kasuratan an ginibo ni Pablo sa Roma 15:7-13?
16 Sa teksto na yaon sa Roma 15:7-13, si Pablo nagkotar sa tolong kabtang kan Hebreong Kasuratan—an Ley, an Mga Propeta, asin an Mga Salmo. Ipinaheling nia na an mga Judio asin Hentil magpapamuraway sa Dios, asin sa siring an mga Kristiano maninigong akoon an mga tawo hale sa gabos na nasyon. Sinabi ni Pablo: “Akoon nindo an lambang saro, kun paanong inako man kita kan Cristo, para sa kamurawayan nin Dios. Huli ta ako nagsasabi na si Cristo nagin nanggad ministro kan mga tinuri manonongod sa katotoohan nin Dios, tanganing patunayan an mga panuga Nia sa saindang mga apoon, asin tanganing an mga nasyon magpamuraway sa Dios huli sa saiyang pagkaherak. Siring sa nasusurat [sa Salmo 18:49]: ‘Kaya ika hayag kong mimidbidon sa tahaw kan mga nasyon asin sa saimong ngaran ako mag-aawit.’ Asin sa giraray sia nagsasabi [sa Deuteronomio 32:43]: ‘Pangag-ogma, kamong mga nasyon, kaiba kan saiyang banwaan.’ Asin sa giraray [sa Salmo 117:1]: ‘Pag-omaw ki Jehova, kamo gabos na nasyon, asin an gabos na banwaan mag-omaw logod sa saiya.’ Sa liwat si Isaias [sa 11:1, 10] nagsasabi: ‘May maabot na gamot ni Jese, asin may sarong matindog na mamamahala sa mga nasyon; sa saiya ibubugtak nin mga nasyon an saindang paglaom.’ Panoon logod kamo kan Dios na nagtatao nin paglaom nin bilog na kagayagayahan asin katoninongan huli sa saindong pagtubod, tanganing kamo magsopay sa paglaom paagi sa kapangyarihan kan banal na espiritu.” Paagi sa paaging ini na sono sa topiko, ipinaheling ni Pablo kun paano kokotaron an mga teksto tanganing mapatunayan an mga katotoohan sa Biblia.
17. Kaoyon sa anong arogan na an mga Kristiano nagkokotar sa laen-laen na kabtang kan bilog na Biblia?
17 An enot na ipinasabong na surat ni apostol Pedro may 34 kotasyon sa sampulong libro sa Ley, Mga Propeta, asin Mga Salmo. Sa saiyang ikaduwang surat, si Pedro nagkotar nin anom na beses sa tolong libro. An Ebanghelyo ni Mateo may 122 na kotasyon sa Genesis sagkod Malaquias. Sa 27 libro kan Griegong Kasuratan, igwa nin 320 direktang kotasyon sa Genesis sagkod Malaquias saka ginatos na iba pang pagkasambit sa Hebreong Kasuratan. Kaoyon sa arogan na itinao ni Jesus asin sinunod kan saiyang mga apostol, kun an mga Kristiano sa modernong aldaw minagibo nin sono sa topikong pag-adal sa sarong tema sa Kasuratan, sinda nagkokotar sa laen-laen na kabtang kan bilog na Biblia. Ini nangorognang angay sa “huring mga aldaw” na ini, na naootob an kadaklan sa Hebreo asin Griegong Kasuratan. (2 Timoteo 3:1) An ‘fiel na oripon’ ginagamit nin siring an Biblia sa mga publikasyon kaiyan, alagad nungka na iyan nagdadagdag sa Tataramon nin Dios o nag-iina dian.—Talinhaga 30:5, 6; Kapahayagan 22:18, 19.
Perming Maglakaw sa Katotoohan
18. Taano ta maninigo na ‘maglakaw sa katotoohan’?
18 Dai kita dapat na maghale nin ano man sa Biblia, huli ta an gabos na Kristianong katokdoan sa Tataramon nin Dios iyo “an katotoohan” o “katotoohan kan maogmang bareta.” An pagdadanay sa katotoohan na ini—‘paglakaw’ dian—mahalagang marhay para sa kaligtasan. (Galacia 2:5; 2 Juan 4; 1 Timoteo 2:3, 4) Mantang an Kristianismo iyo “an dalan kan katotoohan,” paagi sa pagtabang sa iba sa pagpaoswag kan intereses kaiyan, kita nagigin “mga katabang sa katotoohan.”—2 Pedro 2:2; 3 Juan 8.
19. Paano niato mahihimong ‘padagos na maglakaw sa katotoohan’?
19 Tangani na kita ‘padagos na maglakaw sa katotoohan,’ kaipuhan na basahon niato an Biblia asin aprobetsaran an espirituwal na tabang na itinatao nin Dios paagi sa ‘fiel na oripon.’ (3 Juan 4) Gibohon logod niato ini para sa sadiri niatong ikararahay asin tangani na kita makapagtokdo sa iba manongod ki Jehova Dios, ki Jesu-Cristo, asin sa katuyohan nin Dios. Asin magpasalamat kita na tinatabangan kita kan espiritu ni Jehova na masabotan an saiyang Tataramon asin magin mapanggana sa paglingkod sa saiya sa katotoohan.
Ano an Saindong Simbag?
◻ Ano an nagkapirang nagdadanay na pakinabang sa pagbasa kan Biblia?
◻ Taano ta maninigong adalan an Biblia kaiba nin mga kapagtubod?
◻ Taano ta tama na magkotar sa laen-laen na lugar sa bilog na Biblia?
◻ Ano an boot sabihon kan ‘paglakaw sa katotoohan,’ asin paano niato magigibo iyan?
[Retrato sa pahina 17]
Mga magurang, itokdo sa saindong mga aki an Kasuratan
[Retrato sa pahina 18]
Sa saiyang Sermon sa Bukid, si Jesus nagkotar sa laen-laen na kabtang kan Hebreong Kasuratan