Pira an Pangaran nin Diyos?

An simbag kan Bibliya

Saro sana an personal na pangaran nin Diyos. Isinusurat ini sa Hebreo na יהוה asin sa parati “Jehova” an translation kaiyan sa nagkapirang bersiyon kan Bibliya sa Bicol.a Paagi ki propeta Isaias, sinabi nin Diyos: “Ako si Jehova. Iyan an sakuyang ngaran.” (Isaias 42:8) Mga 7,000 na beses mababasa an pangaran na iyan sa suanoy na mga kopya nin Bibliya—mas dakul nanggad kisa sa iba pang apod para sa Diyos o sa kiisay pa man na personal na pangaran.b

May ibang pangaran pa daw an Diyos?

Saro sana an personal na pangaran nin Diyos na sinambit sa Bibliya, pero naggamit iyan nin kadakul na titulo saka deskripsiyon para sa Diyos. Mahihiling sa ibaba an pira sa mga titulo saka deskripsiyon na iyan. Ipinaparisa kan kada saro kaiyan an mga karakteristiko o personalidad ni Jehova.

Titulo	Teksto	Kahulugan
Ako si Ako	Exodo 3:14, An Marahay na Bareta Biblia	Nagigin ano man na kinakaipuhan para mangyari an saiyang kabutan. Nakakatabang an deskripsiyon na iyan para masabutan an kahulugan kan pangaran na Jehova na sinambit sa sunod na bersikulo.—Exodo 3:15.
Allah	(Mayo)	An “Allah” na hali sa lengguwaheng Arabe bakong personal na pangaran kundi sarong titulo na nangangahulugan na “Diyos.” Ginagamit an “Allah” bilang katumbas nin “Diyos” sa mga bersiyon nin Bibliya sa lengguwaheng Arabe saka sa iba pang lengguwahe.
Ama	Mateo 6:9	Kagtao nin buhay.
An Alpha asin an Omega	Kapahayagan 1:8; 21:6; 22:13	“An inot asin an huri,” o “an kapinunan asin an katapusan,” buot sabihon, mayong ibang Diyos na Makakamhan sa Gabos na nainot ki Jehova asin mayo man nin iba na kasunod niya. (Isaias 43:10) An alpha asin an omega iyo an inot saka an huring letra sa alpabetong Griego.
Diyos	Genesis 1:1	An Saro na sinasamba; Saro na makusog. Nasa plural form an Hebreong tataramon na ʼElo·himʹ na nagpaparisa kan kamurawayan asin pagigin nangungurog sa gabos ni Jehova.
Diyos nin mga diyos	Deuteronomio 10:17	An kahuruhalangkawing Diyos, lain na marhay sa daing serbing mga diyos na sinasamba kan iba.—Isaias 2:8.
Gapo	Salmo 18:2, 46	Ligtas na pailihan asin nagtatao nin kaligtasan.
Hading daing sagkod	Kapahayagan 15:3	An saiyang pamamahala daing kapinunan asin daing katapusan.
Kabanal-banaling Diyos	Talinhaga 9:10	Mas banal (malinig saka dalisay sa moral) kisa sa kiisay man.
Kaglalang	Isaias 40:28	An naglalang kan gabos na bagay.
Kagurangnan	Salmo 135:5	Kagsadiri; sa Hebreo ʼA·dhohnʹ asin ʼAdho·nimʹ.
Kagurangnan nin mga hukbo	Isaias 1:9, An Marahay na Bareta Biblia	“Pamayo” o Komandante nin dakulaon na hukbo nin mga anghel.—Roma 9:29.
Kahuruhalangkawi	Salmo 47:2	Igwa kan posisyon na nangungurog sa gabos.
Maimon	Exodo 34:14	Habo na may kaagaw sa pagsamba. An terminong iyan pig-translate man na “midbid na naghahagad na siya sana an sambahon.”
Makakamhan sa Gabos	Genesis 17:1	Daing kapantay an kapangyarihan. Mababasa sa Bibliya nin pitong beses an ekspresyon na ʼEl Shad·daiʹ, o “Diyos na Makakamhan sa Gabos.”
Maugmang Diyos	1 Timoteo 1:11	Midbid sa pagigin maugma asin magaya-gayang Diyos.—Salmo 104:31.
Paradangog nin pamibi	Salmo 65:2	Personal niyang dinadangog an lambang pamibi kan mga nagtutubod sa saiya.
Paragibo nin Kuron	Isaias 64:8	May awtoridad sa mga indibidwal saka sa mga nasyon, arog kan paragibo nin kuron na iyo an nagbubuot sa kun ano an gigibuhon niya sa dalipay.—Roma 9:20, 21.
Paraligtas	Isaias 45:21	Nagliligtas sa peligro o kapahamakan.
Paratubos	Isaias 41:14	Nagbalukat o nagtubos sa katawuhan hali sa kasalan asin kagadanan paagi sa atang na pantubos ni Jesu-Cristo.—Juan 3:16.
Pastor	Salmo 23:1	Inaataman an saiyang mga parasamba.
Pinakahalangkaw sa Gabos	Daniel 7:18, 27	An kahuruhalangkawing soberano.
Pinakanangungurog na Instruktor	Isaias 30:20, 21	Nagtatao nin kapaki-pakinabang na pagtutukdo asin paggiya.—Isaias 48:17, 18.
Pinakanangungurog na Kaggibo	Salmo 149:2	An naglalang kan gabos na bagay.—Kapahayagan 4:11.
Soberanong Kagurangnan	Genesis 15:2	Igwa nin pinakahalangkaw na awtoridad; Sa Hebreo ʼAdho·naiʹ.
Suanoy kan mga Aldaw	Daniel 7:9, 13, 22	Mayong kapinunan; yaon na siya bago pa mabuhay an siisay man o magkaigwa nin ano man na bagay.—Salmo 90:2.

Mga pangaran nin lugar sa Hebreong Kasuratan

May mga pangaran nin lugar sa Bibliya na kaiba an personal na pangaran nin Diyos, pero an mga iyan bakong ibang pangaran nin Diyos.

Pangaran nin lugar	Teksto	Kahulugan
Jehova-jireh	Genesis 22:13, 14	“Si Jehova Matao.”
Jehova-nissi	Exodo 17:15	“Si Jehova an Sakong Senyal na Poste.” Si Jehova an Diyos na madudumanan kan saiyang mga lingkod para sa proteksiyon asin tabang.—Exodo 17:13-16.
Jehova-salom	Hukom 6:23, 24	“Si Jehova Katuninungan.”
Jehova-shamma	Ezekiel 48:35, nota sa ibaba, American Standard Version	“Si Jehova Yaon Duman.”

Kun taano ta dapat aramon asin gamiton an pangaran nin Diyos

Siguradong mahalaga sa Diyos an saiyang personal na pangaran na Jehova, huling ipinasurat niya iyan nin ribo-ribong beses sa Bibliya.—Malakias 1:11.
Pauruutrong idinuon kan aki nin Diyos na si Jesus an kahalagahan kan pangaran nin Diyos. Halimbawa, namibi siya ki Jehova: “Pakangbanalon an pangaran mo.”—Mateo 6:9; Juan 17:6.
An inot na dapat gibuhon nin saro para magin amigo si Jehova iyo na aramon saka gamiton an pangaran niya. (Salmo 9:10; Malakias 3:16) Dahil sa pakikiamigong iyan, nakikinabang siya sa pangako nin Diyos: “Huling namumutan niya ako, ililigtas ko siya. Poprotektaran ko siya huling aram niya an sakuyang pangaran.”—Salmo 91:14.
Sinasabi kan Bibliya: “Igwa nin inaapod na mga diyos, sa langit man o sa daga, kun paanong dakul na ‘diyos’ asin dakul na ‘kagurangnan.’” (1 Corinto 8:5, 6) Pero ipinapabisto kaiyan an iyo sanang tunay na Diyos, na an pangaran Jehova.—Salmo 83:18.

a Mas gusto kan ibang Hebreong iskolar an translation na “Yahweh” para sa pangaran nin Diyos.

b Mga 50 beses na mababasa sa Bibliya an pinalipot na pangaran nin Diyos na “Jah,” kaiba na an pagkagamit kaiyan sa tataramon na “Hallelujah,” o “Alleluia,” na nangangahulugan na “Umawon si Jah.”—Kapahayagan 19:1; American Standard Version; King James Version.