Arogon an Saindang Pagtubod

Nanodan Nia sa Kagurangnan an Pagpapatawad

DAI noarin man malilingawan ni Pedro an nakakamondo na momentong idto kan magkatama an saindang pagheling. May naheling daw siang pagkadesganar o pagkaanggot sa ekspresyon kan lalawgon ni Jesus? Dai kita makakasierto; sinasabi sana kan ipinasabong na rekord na “an Kagurangnan suminalingoy asin hineling si Pedro.” (Lucas 22:61) Alagad sa saro sanang heling na iyan, nasabotan ni Pedro kun gurano kaseryoso kan saiyang nagibo. Narealisar nia na nagibo pa sana nia an mismong sinabi ni Jesus bago pa kaiyan, an sarong bagay na iininsistir ni Pedro na dai nia noarin man gigibohon—pinaindahan nia an saiyang namomotan na Kagurangnan. Iyan mamondong pangyayari para ki Pedro, tibaad an pinakagrabeng pangyayari sa pinakamamondong aldaw sa saiyang buhay.

Pero, may paglaom pa. Huling si Pedro sarong tawo na may dakulang pagtubod, sia may oportunidad pang makabawi sa saiyang mga sala asin manodan an saro sa pinakaimportanteng mga leksion na itinokdo ni Jesus. May koneksion iyan sa pagpapatawad. Kaipuhan na manodan kan lambang saro sa sato an iyo man sanang leksion, kaya estudyaran niato kun paano nanodan ni Pedro an masakit na leksion na ini.

Sarong Tawo na Dakol Pa an Dapat Manodan

Mga anom na bulan bago kaidto sa saiyang ginikanan na banwaan nin Capernaum, si Pedro nagdolok ki Jesus asin naghapot: “Kagurangnan, pirang beses na magkakasala tumang sa sako an sakong tugang asin papatawadon ko sia? Sagkod sa pitong beses?” Posibleng marhay na inisip ni Pedro na sia mapagpatawad na. Total, kan panahon na iyan itinokdo kan mga namomoon sa relihion na an saro kaipuhan na magpatawad nin tolo sanang beses! Si Jesus nagsimbag: “Bakong, Sagkod sa pitong beses, kundi, Sagkod sa setenta y sieteng beses.”—Mateo 18:21, 22.

Isinusuherir daw ni Jesus na irekord ni Pedro an mga ginigibo nin sarong nagkakasala? Dai man; imbes, sa paggibo nia na magin 77 an sinabi ni Pedro na 7, an boot niang sabihon dai magbugtak nin limitasyon kun nagpapatawad. Ipinaheling ni Jesus na naimpluwensiahan si Pedro nin pagigin matagas an puso asin bakong mapagpatawad na lakop kan mga panahon na idto, na garo baga nagpapatawad paagi sa libro nin kuenta nin akawntant. Minsan siring, an diosnon na pagpapatawad mahiwas.

Si Pedro dai nakiargumento ki Jesus. Alagad talaga daw na naabot an puso nia kan leksion na itinokdo ni Jesus? Kun beses, mas dakol an nanonodan niato manongod sa pagpapatawad kun narerealisar niato na kita mismo nangangaipong gayo kaiyan. Kaya balikan niato an mga pangyayari na suminagkod sa kagadanan ni Jesus. Sa masakit na mga oras na idto, dakol an ginibo ni Pedro na nangangaipo nin kapatawadan kan saiyang Kagurangnan.

Nag-oorog na Pangangaipong Patawadon

Sarong importanteng banggi idto—an ultimong banggi kan buhay ni Jesus digdi sa daga. Dakol pa an gustong itokdo ni Jesus sa saiyang mga apostol—halimbawa, an manongod sa kapakumbabaan. Si Jesus nagtao nin halimbawa paagi sa mapakumbabang paghanaw kan saindang mga bitis, na sa parate ginigibo kan pinakahamak sa mga surugoon. Kan primero, kinuestion ni Pedro an ginigibo ni Jesus. Dangan sinayumahan nia iyan. Sunod nag-insistir sia na hanawan ni Jesus bako sana an saiyang mga bitis kundi pati an saiyang mga kamot asin payo! Dai nawaran nin pasensia si Jesus kundi kalmadong ipinaliwanag an kahalagahan asin kahulogan kan saiyang ginigibo.—Juan 13:1-17.

Pero, dai nahaloy pagkatapos kaiyan, an mga apostol nagpoon na magdiriskutiran kun siisay sa sainda an pinakadakula. Siertong imbuelto si Pedro sa makasusupog na pagpaheling na iyan nin pagigin orgolyoso. Minsan siring, may kabootan sindang itinanos ni Jesus asin tinawan pa ngani sinda nin komendasyon sa marahay na nagibo ninda—an pagpaheling nin kaimbodan paagi sa pagdadanay sa saindang Kagurangnan. Pero, ihinula nia na sia babayaan ninda gabos. Si Pedro nagsimbag na sia magdadanay ki Jesus dawa mapaatubang sa kagadanan. Ihinula ni Jesus na, sa kabaliktaran, tolong beses na papaindahan ni Pedro an saiyang Kagurangnan kan banggi man sanang iyan bago magturaok an manok nin duwang beses. Dangan dai sana kinontra ni Pedro an sinabi ni Jesus kundi ipinaghambog pa nia na papatunayan nia na sia mas maimbod kisa sa gabos na iba pang apostol!—Mateo 26:31-35; Marcos 14:27-31; Lucas 22:24-28.

Si Jesus daw madali nang maubosan nin pasensia ki Pedro? Sa katunayan, sa bilog na masakit na panahon na ini, danay na hineheling ni Jesus an marahay na mga kualidad kan saiyang bakong sangkap na mga apostol. Aram nia na dai magigibo ni Pedro an dapat kaining gibohon, pero sia nagsabi: “Nakimaherak na ako para sa saimo na an saimong pagtubod dai madaog; asin ika, kun makabalik ka na, pakosoga an saimong mga tugang.” (Lucas 22:32) Sa siring, ipinahayag ni Jesus an saiyang kompiansa na si Pedro makakabawi sa espirituwal asin mabalik sa maimbod na paglilingkod. Kanigoan na pagpaheling nin kabootan asin pagpapatawad!

Paghaloyhaloy, sa hardin nin Getsemani, si Pedro kinaipuhan na itanos nin labi sa sarong beses. Si Jesus nakiolay sa saiya, saka ki Santiago asin Juan, na magdanay na mapagbantay mantang Sia namimibi. Labi-labi an emosyonal na pagsakit ni Jesus asin kaipuhan nia nin suporta, alagad si Pedro asin an iba pa paorootrong napatorog. Si Jesus madinamay asin mapagpatawad na nagsabi: “Siempre, an espiritu nagmamawot, alagad an laman maluya.”—Marcos 14:32-38.

Dai nahaloy, uminabot an sarong pagsururog, na may darang mga sulo asin armado nin mga espada saka pamakol. Panahon ini na humiro na may pagmamaan asin pakamansay. Pero, si Pedro bigla na sanang huminiro, na itinaga an espada sa may payo ni Malco, sarong oripon kan halangkaw na saserdote, asin tinakras an saro sa mga talinga kan lalaki. Kalmadong itinanos ni Jesus si Pedro, pinaomayan an lugad, asin ipinaliwanag an prinsipyo na paglikay sa kadahasan na naggigiya sa saiyang mga parasunod sagkod ngonyan. (Mateo 26:47-55; Lucas 22:47-51; Juan 18:10, 11) Dakol na an ginibo ni Pedro na nangangaipo nin kapatawadan kan saiyang Kagurangnan. An kamugtakan nia nagpapagirumdom sa sato na “kita gabos nasasala nin dakol na beses.” (Santiago 3:2) Siisay sa sato an dai nangangaipo nin pagpapatawad nin Dios sa kada aldaw? Pero, kun dapit ki Pedro, dakol pa an mangyayari sa bangging iyan. Mas grabe pa an gigibohon nia.

An Pinakagrabeng Pagkukulang ni Pedro

Nakipangatanosan si Jesus sa pagsururog na kun sia an hinahanap ninda, maninigong pabayaan nindang humale an saiyang mga apostol. Nakaheling si Pedro na daing maginibo mantang iginagapos si Jesus kan pagsururog. Dangan si Pedro duminulag, arog kan ginibo kan mga kapwa nia apostol.

Si Pedro asin Juan puminondo sa pagdulag, tibaad harani sa harong kan dating Halangkaw na Saserdoteng si Anas, kun saen enot na dinara si Jesus tanganing usisaon. Dangan, mantang si Jesus dinadara hale duman, si Pedro asin Juan nagsunod alagad “sa haroharayo.” (Mateo 26:58; Juan 18:12, 13) Si Pedro bakong kobarde. Seguradong kinaipuhan an igong kosog nin boot tanganing makasunod. An pagsururog armado, asin nalugadan na ni Pedro an saro sa sainda. Pero, dai niato naheheling digdi sa halimbawa ni Pedro an maimbod na pagkamoot na hiningako nia mismo—an pagigin andam na magadan sa kataed kan saiyang Kagurangnan kun kaipuhan.—Marcos 14:31.

Arog ki Pedro, dakol ngonyan an naghihingoang sumunod ki Cristo “sa haroharayo”—sa paagi na mayo nin siisay man na makakariparo. Alagad arog kan isinurat mismo ni Pedro kan huri, an solamenteng paagi na makasunod nin tama ki Cristo iyo an pagdadanay na dayupot sa saiya sagkod sa magigibo niato, na inaarog an saiyang halimbawa sa gabos na bagay, ano man an kaaabtan kaiyan.—1 Pedro 2:21.

Mapagmaan na suminunod si Pedro sagkod na makaabot sia sa trangkahan kan saro sa pinakadakulang mga mansion sa Jerusalem. Iyan an harong ni Caifas, an mayaman asin poderosong halangkaw na saserdote. An siring na mga harong parateng itinotogdok sa palibot nin sarong patyo, na may trangkahan sa atubangan. Nakaabot si Pedro sa trangkahan asin dai sia pinalaog. Si Juan, na nasa laog na, nagrani asin kinaolay an bantay sa trangkahan tanganing palaogon si Pedro. Garo baga si Pedro dai nagdanay na harani ki Juan; ni nagprobar man sia na maglaog sa harong tanganing ibanan an saiyang Kagurangnan. Nagdanay sia sa patyo, kun saen yaon an nagkapirang oripon asin surugoon na nagpapahimbong sa atubangan nin maliwanag na kalayo sa malipot na banggi, na nagheheling mantang sunod-sunod na minalaog asin minaluwas an putikon na mga testigo tumang ki Jesus sa pagbista na ginigibo sa laog.—Marcos 14:54-57; Juan 18:15, 16, 18.

Sa liwanag kan kalayo, orog na namansayan si Pedro kan babaeng nagpalaog sa saiya sa trangkahan. Midbid sia kan babae. Sia nagsabi na nag-aakusar: “Ika kaiba man ni Jesus na taga Galilea!” Huling dai iyan inaasahan ni Pedro, nagnegar siang midbid nia si Jesus—o na naiintindihan ngani nia an sinasabi kan babae. Sia ruminayo asin nagtindog harani sa trangkahan, na nagmamaigot na daing gayo marisa, alagad saro pang babae an nakarisa sa saiya asin iyo man giraray an sinabi: “An tawong ini kaiba ni Jesus na Nazareno.” Si Pedro suminumpa: “Dai ko midbid an tawong iyan!” (Mateo 26:69-72) Tibaad pagkatapos kan ikaduwang pagnegar na ini, nadangog ni Pedro an pagturaok nin manok, alagad may iba siang iniisip kaya dai nia nagirumdoman an hula na sinabi ni Jesus pira pa sanang oras bago kaiyan.

Dai nahaloy pagkatapos kaiyan, grabe pa man giraray an pagmamaigot ni Pedro na daing gayo marisa. Alagad duminolok an sarong grupo nin mga tawo na nakatindog sa may patyo. An saro sa sainda paryente ni Malco, an oripon na nalugadan ni Pedro. Sia nagsabi ki Pedro: “Bakong naheling taka sa hardin kaiba nia?” Namatean ni Pedro an pagmawot na kombensiron sinda na sala sinda. Kaya nagsumpa sia dapit sa bagay na iyan, na minalataw na nagsasabing maldisyonon logod sia kun sia nagpuputik. Kasasabi pa sana nia kan mga tataramon na iyan kan magturaok an manok—an ikaduwa na nadangog ni Pedro kan bangging iyan.—Juan 18:26, 27; Marcos 14:71, 72.

Kaluluwas pa sana ni Jesus sa beranda na dian natatanaw an patyo. Kan mismong oras na iyan, na isinaysay sa enotan, nagkatama an saindang pagheling ni Pedro. Narealisar ni Pedro na grabe an pagkukulang nia sa saiyang Kagurangnan. Huminale si Pedro sa patyo, na biyong nangluluya huli sa pakamate nia nin kasalan. Sia nagpasiring sa mga tinampo kan siudad, na an saiyang inaagihan naliliwanagan kan nagsosolnop na kabilogan nin bulan. Haros dai na nia naheheling an saiyang inaagihan. An luha buminolos asin sia tuminangis na may kapaitan.—Marcos 14:72; Lucas 22:61, 62.

Pagkarealisar kan siring kaiyan kagabat na pagkakasala, madali sanang ipamugtak nin saro na an saiyang kasalan grabe nanggad kaya bakong posible an kapatawadan. Tibaad inisip man iyan ni Pedro. Totoo daw iyan?

Dai Na daw Mapapatawad si Pedro?

Dai maiimahinar an rarom kan namamatean na kolog ni Pedro mantang mag-aagahon na asin minapoon na an mga aktibidad sa aldaw na iyan. Siertong sinagwe nia an saiyang sadiri kan magadan si Jesus kan hapon na iyan pagkatapos nin dakol na oras na pagpasakit! Siertong ikinakamondong gayo ni Pedro kun naiisip nia na nakadugang sia sa kolog na namatean kan saiyang Kagurangnan sa nagin huring aldaw kan buhay Nia bilang tawo. Sa ibong kan grabeng kamondoan ni Pedro, dai sia nagpadaog sa pagkadesesperar. Aram niato ini huling an pagkasaysay nagsasabi na dai nahaloy kaiba na nia giraray an saiyang mga tugang. (Lucas 24:33) Daing duda na pinagbasolan kan gabos na apostol an iginawe ninda kan madiklom na bangging idto, asin minsan paano sinda nagrinangahan.

Sa sarong paagi, si Pedro maheheling niato digdi na naggibo nin madonong nanggad na desisyon. Kun nagkakasala an sarong lingkod nin Dios, an pinakamahalaga bako an gabat kan saiyang pagkakasala kundi an kosog kan determinasyon nia na makabangon giraray asin itanos an mga bagay-bagay. (Talinhaga 24:16) Ipinaheling ni Pedro an saiyang tunay na pagtubod paagi sa pakikipagtipon sa mga tugang nia sa ibong kan saiyang makuring kamondoan. Kun an saro nagagabatan huli sa saiyang kamondoan o pagbasol, tibaad matentaran siang magsolosolo alagad peligroso iyan. (Talinhaga 18:1) An madonong na gibohon iyo na magdanay na dayupot sa mga kapagtubod asin pakosogon giraray an espirituwalidad.—Hebreo 10:24, 25.

Huling kaiba si Pedro kan saiyang espirituwal na mga tugang, nadangog nia an nakakabiglang bareta na an bangkay ni Jesus mayo sa lolobngan. Duminalagan si Pedro asin Juan pasiring sa linobongan ki Jesus na sinerahan. Si Juan, na posibleng marhay na mas hoben, an enot na nakaabot. Sia nag-alangan kan maheling niang nakabukas an lolobngan. Si Pedro dai nag-alangan. Minsan ngani sia naghahangoshangos pa, sia deretsong luminaog. Mayo iyan nin laog!—Juan 20:3-9.

Nagtubod daw si Pedro na binuhay na liwat si Jesus? Kan primero dai, minsan ngani ibinareta kan maimbod na mga babae na may mga anghel na nagpaheling sa sainda tanganing ipaisi na binuhay na liwat si Jesus. (Lucas 23:55–24:11) Alagad sa pagtatapos kan aldaw na iyan, nawara na an gabos na kamondoan asin pagduda sa puso ni Pedro. Buhay si Jesus, na ngonyan saro nang makakamhan na espiritu! Nagpaheling sia sa gabos na apostol nia. Pero, may ginibo nguna siang sarong pribadong bagay. Kan aldaw na iyan sinabi kan mga apostol: “Totoo nanggad na ibinangon an Kagurangnan asin nagpaheling sia ki Simon!” (Lucas 24:34) Kaagid kaiyan, si apostol Pedro nagsurat kan huri manongod sa pambihirang aldaw na si Jesus “nagpaheling ki Cefas, dangan sa dose.” (1 Corinto 15:5) An Cefas asin Simon ibang mga ngaran ni Pedro. Si Jesus nagpaheling sa saiya kan aldaw na iyan—minalataw na kan si Pedro nagsosolo.

Sa Biblia, si Jesus asin Pedro sana an nakakaaram kan mga detalye dapit sa nakakapukaw sa boot na paghelingan giraray na iyan. Maiimahinar sana niato kun gurano nanggad napukaw an boot ni Pedro na maheling na buhay na giraray an saiyang namomotan na Kagurangnan asin na magkaigwa nin oportunidad na ipahayag an saiyang kamondoan asin pagsolsol. Kapatawadan an gusto nia, na labi pa sa ano man na bagay. May makakapagduda daw na nagpatawad si Jesus nin lubos? Kaipuhan na girumdomon kan nagkasalang mga Kristiano ngonyan an nangyari ki Pedro. Maninigo na nungka niatong isipon na dai na kita mapapatawad nin Dios. Sangkap na ipinabanaag ni Jesus an saiyang Ama, na “bulaos na magpapatawad.”—Isaias 55:7.

Dugang Pang Prueba nin Pagpapatawad

Sinabihan ni Jesus an saiyang mga apostol na magpasiring sa Galilea, na duman maheheling giraray ninda sia. Pag-abot ninda, nagdesisyon si Pedro na manira sa Dagat nin Galilea. Inibanan sia kan nagkapirang iba pa. Sa giraray, yaon si Pedro sa danaw na parateng dinudumanan nia kan nakaagi. Pamilyar na marhay ki Pedro an ragitnit kan baroto, an luway-luway na pagtama kan mga alon, asin an magaspang na hikot sa saiyang kamot. Iniisip daw nia kan bangging idto kun ano na an maninigo niang gibohon sa saiyang buhay ngonyan na tapos na an ministeryo ni Jesus sa daga? Naaakit daw sia kan simpleng buhay nin sarong parasira? Sa paano man, mayo sindang nadakop na sira kan bilog na bangging idto.—Mateo 26:32; Juan 21:1-3.

Pero, kan mag-aagahon na, may saro na nasa baybayon na nag-apod asin nagsadol sa sainda na itaktak an saindang mga hikot sa ibong na kampi kan baroto. Nagsunod sinda asin kadakol an nadakop ninda, 153 na sira! Midbid ni Pedro kun siisay an personang iyan. Sia luminukso hale sa baroto asin luminangoy pasiring sa baybayon. Sa baybayon, tinawan sinda ni Jesus nin pagkakan na inihaw na sira. Tinawan nia nin atension si Pedro.

Hinapot ni Jesus si Pedro kun namomotan nia an saiyang Kagurangnan nin “orog kisa sa mga ini”—na minalataw na itinotokdo an kadakol na nadakop na sira. Sa puso ni Pedro, magigin mas matimbang daw an pagkamoot sa negosyo nin paninira kisa sa pagkamoot nia ki Jesus? Kun paanong tolong beses na pinaindahan ni Pedro an saiyang Kagurangnan, tinawan sia ngonyan ni Jesus nin oportunidad na tolong beses na patunayan an saiyang pagkamoot sa atubangan kan saiyang mga katood. Mantang ginigibo iyan ni Pedro, sinabi sa saiya ni Jesus kun paano ipapaheling an pagkamoot na iyan: paagi sa pagpaorog sa sagradong paglilingkod kisa sa gabos na ibang bagay, na pinapakakan asin pinapastoran an aripompon ni Cristo, an saiyang maimbod na mga parasunod.—Juan 21:4-17.

Sa siring, kinompirmar ni Jesus na si Pedro may pakinabang pa sa saiya asin sa saiyang Ama. Si Pedro magkakaigwa nin mahalagang papel sa kongregasyon sa paggiya ni Cristo. Mapuersa nanggad na patotoo kan lubos na pagpapatawad ni Jesus! Siertong napukaw an boot ni Pedro kan pagkaherak na iyan, asin isinapuso nia iyan.

Maimbod na ginibo ni Pedro an saiyang asignasyon sa laog nin dakol na taon. Pinakosog nia an saiyang mga tugang, siring kan ipinagboot ni Jesus kan banggi bago Sia magadan. Maboot asin mapasensiang pinastoran asin pinakakan ni Pedro an mga parasunod ni Cristo. An tawong si Simon namuhay kaoyon kan ngaran na itinao ni Jesus sa saiya—Pedro, o Dakulang Gapo—paagi sa pagigin marigon, makosog, asin masasarigan na impluwensia para sa ikakarahay kan kongregasyon. Dakol na prueba na nagsasabi kaiyan an yaon sa duwang mamomoton asin personal na surat ni Pedro na nagin mahalagang mga libro kan Biblia. Ipinapaheling man kan mga surat na iyan na nungkang nalingawan ni Pedro an leksion na nanodan nia ki Jesus manongod sa pagpapatawad.—1 Pedro 3:8, 9; 4:8.

Logod na manodan man niato an leksion na iyan. Kita daw aroaldaw na naghahagad nin tawad sa Dios huli sa satong dakol na sala? Dangan, inaako daw niato an pagpapatawad na iyan asin nagtutubod sa puersa kaiyan na linigon kita? Asin pinapatawad man daw niato an mga nasa palibot niato? Kun iyo, inaarog niato an pagtubod ni Pedro—asin an pagkaherak kan saiyang Kagurangnan.

[Blurb sa pahina 22]

Dakol an ginibo ni Pedro na nangangaipo nin kapatawadan kan Kagurangnan, pero siisay sa sato an dai nangangaipo nin kapatawadan aroaldaw?

[Ritrato sa pahina 23]

“An Kagurangnan suminalingoy asin hineling si Pedro”

[Ritrato sa pahina 24]

‘An Kagurangnan nagpaheling ki Simon!’