Maghulit Tanganing Gumibo nin mga Disipulo

“Kan madangog . . . ni Priscila asin Aquila [si Apolos], ipinag-iba sia ninda asin ipinaliwanag sa saiya nin mas tama an dalan nin Dios.”​—GIBO 18:26.

 1. Minsan ngani sia “malaad sa espiritu,” ano an kaipuhan ni Apolos?

KAN si Apolos nagpapahayag sa sarong sinagoga sa siudad nin Efeso, inobserbaran sia ni Priscila asin Aquila, mag-agom na Kristiano kan enot na siglo. Paagi sa saiyang matibay na pagtaram asin kakayahan sa pangongombensir, nakua ni Apolos an atension kan mga nagdadangog sa saiya. Sia “malaad sa espiritu,” asin “nagtokdo nin tama kan mga bagay manongod ki Jesus.” Minsan siring, risang-risa na si Apolos “nakaaaram sana kan bautismo ni Juan.” An ihinuhulit ni Apolos manongod ki Cristo tama alagad limitado. An problema kulang iyan. Kaipuhan na dagdagan ni Apolos an saiyang kaaraman dapit sa kabtang ni Jesu-Cristo sa pagkaotob kan katuyohan ni Jehova.​—Gibo 18:24-26.

 2. Anong depisil na trabaho an inako ni Priscila asin Aquila?

² Daing pag-alangan na nagpresentar si Priscila asin Aquila tanganing tabangan si Apolos na makaotob kan “gabos na bagay” na ipinagboot ni Cristo. (Mateo 28:​19, 20) An pagkasaysay nagsasabi na “ipinag-iba . . . ninda [si Apolos] asin ipinaliwanag sa saiya nin mas tama an dalan nin Dios.” Minsan siring, may mga impormasyon manongod ki Apolos na nagin dahelan kutanang mag-alangan an nagkapirang Kristiano na tokdoan sia. Anong mga impormasyon? Asin ano an manonodan niato sa mga paghihingoa ni Priscila asin Aquila na ipaliwanag ki Apolos an Kasuratan? Paano an pagrepaso sa makasaysayan na estoryang ini makatatabang sa sato na ikonsentrar an satong mga paghihingoa sa pagpoon nin mga pag-adal sa Biblia?

Isentro an Atension sa mga Tawo

 3. Taano an pinaghalean ni Apolos ta dai nakapogol ki Priscila asin Aquila na tokdoan sia?

³ Huling Judio an ginikanan, minalataw na si Apolos nagdakula sa siudad nin Alejandria. An Alejandria kaidto an kabisera nin Egipto asin sentro nin mas halangkaw na inadalan, na bantog huli sa dakulang libreriya kaiyan. An siudad igwa nin dakulang populasyon na Judio, kabale an mga intelektuwal. Huli kaini, duman ginibo an Griegong traduksion kan Hebreong Kasuratan na inaapod Septuaginta. Bakong makangangalas na si Apolos “tuodan na marhay sa Kasuratan”! Si Aquila asin Priscila mga paragibo nin tolda. Naalangan daw sindang tumabang dahelan sa pagigin matibay magtaram ni Apolos? Dai. Huli sa pagkamoot kinonsiderar ninda an tawong iyan, an saiyang mga pangangaipo, asin kun paano sia ninda matatabangan.

 4. Saen asin paano nag-ako si Apolos kan tabang na kaipuhan nia?

⁴ Gurano man katibay magtaram si Apolos, nangaipo sia nin pagtotokdo. An tabang na kaipuhan nia dai makukua sa arin man na unibersidad kundi makukua sa mga kapwa miembro kan Kristianong kongregasyon. Makikinabang si Apolos sa mga punto na maresulta sa mas tamang pakasabot sa areglo nin Dios para sa kaligtasan. “Ipinag-iba sia [ni Priscila asin Aquila] asin ipinaliwanag sa saiya nin mas tama an dalan nin Dios.”

 5. Ano an masasabi nindo manongod sa espirituwalidad ni Priscila asin Aquila?

⁵ Si Priscila asin Aquila makosog sa espirituwal asin marigon sa pagtubod. Posibleng marhay na ‘pirme sindang andam na gumibo nin pagdepensa sa atubangan nin lambang tawo na naghagad nin rason para sa saindang paglaom,’ baga man iyan mayaman, dukha, intelektuwal, o oripon. (1 Pedro 3:15) Nahimo ni Aquila asin kan saiyang agom na ‘gamiton an tataramon kan katotoohan sa tamang paagi.’ (2 Timoteo 2:15) Minalataw na sinda seryosong mga nag-aadal sa Kasuratan. Napahirong gayo si Apolos kan pagtotokdo basado sa ‘tataramon nin Dios, na buhay asin mapuersa,’ na nakaaapektar sa puso.​—Hebreo 4:12.

 6. Paano niato naaaraman na inapresyar ni Apolos an tabang na naako nia?

⁶ Inapresyar ni Apolos an halimbawa kan saiyang mga paratokdo asin nagin orog pa nganing eksperto sa paggibo nin mga disipulo. Ginamit nia nin epektibo an saiyang kaaraman sa pagbalangibog kan maogmang bareta, partikular na sa populasyon na Judio. Si Apolos nagamit sa pambihirang paagi sa pagkombensir sa mga Judio manongod ki Cristo. ‘Huling matibayon sa Kasuratan,’ napatunayan nia sa sainda na an gabos na propeta kan suanoy naghalat sa pag-abot kan Cristo. (Gibo 18:​24, Kingdom Interlinear Translation) Sinasabi pa kan pagkasaysay na si Apolos sunod na nagduman sa Acaya, kun saen “tinabangan niang marhay an mga nagturubod huli sa dai na kutana maninigong kabootan nin Dios; huli ta may kaigotan na biyo niang pinatunayan nin hayagan na sala an mga Judio, mantang ipinaheheling nia paagi sa Kasuratan na si Jesus iyo an Cristo.”​—Gibo 18:​27, 28.

Makanood sa Halimbawa nin Ibang mga Paratokdo

 7. Paano nagin ekspertong mga paratokdo si Aquila asin Priscila?

⁷ Paano si Aquila asin Priscila nagin matibay na mga paratokdo kan Tataramon nin Dios? Apuera sa saindang kahigosan sa personal na pag-adal asin pag-atender sa mga pagtiripon, an saindang dayupot na pakiibaiba ki apostol Pablo seguradong nakatabang nin dakula. Si Pablo nag-istar nin 18 bulan sa harong ni Priscila asin Aquila sa Corinto. Magkaibanan sindang nagtrabaho sa paggibo asin paghirahay nin mga tolda. (Gibo 18:​2, 3) Imahinara nindo an siertong nagin hararom na mga pag-orolay dapit sa Kasuratan. Asin nakatabang nanggad sa saindang espirituwalidad an siring na pakiibaiba ki Pablo! “Sia na naglalakaw na kaiba nin mga madonong magigin madonong,” an sabi kan Talinhaga 13:20. An marahay na pag-iriba nagkaigwa nin marahayon na epekto sa saindang espirituwal na mga ugale.​—1 Corinto 15:33.

 8. Ano an nanodan ni Priscila asin Aquila sa pag-obserbar ki Pablo sa saiyang ministeryo?

⁸ Kan inoobserbaran ni Priscila asin Aquila si Pablo bilang sarong parabalangibog kan Kahadean, nakaheling sinda nin talagang halimbawa nin marahay na paratokdo. An pagkasaysay sa Mga Gibo nagsasabi na si Pablo “nagtatao nin pahayag sa sinagoga [sa Corinto] kada sabbath asin nangongombensir sa mga Judio asin sa mga Griego.” Sa huri, kan ibanan sia ni Silas asin Timoteo, si Pablo “nagpoon na masibot na gayo sa tataramon, na nagpapatotoo sa mga Judio tanganing patunayan na si Jesus iyo an Cristo.” Kan mayong gayo nin interesado sa mga miembro kan sinagoga, nariparo ni Priscila asin Aquila na nagbalyo si Pablo sa mas paborableng lugar, sa sarong harong na kataed kan sinagoga, tanganing duman isentro an saiyang aktibidad na paghuhulit. Duman natabangan ni Pablo si Crispo, an “nangengenot na opisyal sa sinagoga,” na magin disipulo. Posibleng marhay na narisa ni Priscila asin Aquila na an bagay na nagin disipulo an tawong iyan nagkaigwa nin dakula asin mabungang epekto sa teritoryo. An pagkasaysay nagsasabi: “Si Crispo . . . nagtubod sa Kagurangnan, asin iyo man an gabos niang kairiba sa harong. Asin dakol sa mga taga Corinto na nakadangog an nagpoon na tumubod asin mabautismohan.”​—Gibo 18:4-8.

 9. Ano an nagin reaksion ni Priscila asin Aquila sa halimbawa ni Pablo?

⁹ An halimbawa ni Pablo sa ministeryo sa langtad inarog nin iba pang parabalangibog kan Kahadean, arog ki Priscila asin Aquila. Sinadol kan apostol an iba pang Kristiano: “Magin kamong mga paraarog sa sako, siring na ako paraarog ki Cristo.” (1 Corinto 11:1) Kaoyon kan halimbawa ni Pablo, tinabangan ni Aquila asin Priscila si Apolos na masabotan nin mas tama an Kristianong katokdoan. Nagtabang man sia sa iba pa. Daing duda na nagtabang si Priscila asin Aquila sa paggibo nin mga disipulo sa Roma, Corinto, asin Efeso.​—Gibo 18:​1, 2, 18, 19; Roma 16:3-5.

10. Ano an nanodan nindo sa Gibo kapitulo 18 na makatatabang sa saindo sa paggibo nin disipulo?

¹⁰ Ano an manonodan niato sa pag-estudyar niato sa Gibo kapitulo 18? Bueno, kun paanong si Aquila asin Priscila puedeng nakanood ki Pablo, puede man niatong mapaoswag an satong kakayahan sa paggibo nin mga disipulo paagi sa pag-arog sa halimbawa nin marahay na mga paratokdo kan Tataramon nin Dios. Puede kitang makiibaiba sa mga “masibot na gayo sa tataramon” asin “lubos na nagpapatotoo” sa iba. (Gibo 18:​5, Kingdom Interlinear Translation) Puede niatong obserbaran kun paano ninda tinataros an puso kan mga tawo paagi sa paggamit nin nakakokombensir na mga abilidad sa pagtotokdo. An siring na mga abilidad makatatabang sa sato sa paggibo nin mga disipulo. Kun an saro nakikipag-adal sa sato sa Biblia, puede niatong isuherir na agdahon nia an ibang miembro kan saiyang pamilya o kataraed na umiba sa pag-adal. O puede niato siang hapoton kun may iba pa siang kamidbid na puede niatong alokan nin pag-adal sa Biblia.​—Gibo 18:6-8.

Maggibo nin mga Oportunidad na Gumibo nin mga Disipulo

11. Saen puedeng makanompong nin bagong mga disipulo?

¹¹ Si Pablo asin an saiyang mga kapwa Kristiano naghingoang gumibo nin mga disipulo paagi sa paghuhulit sa harong-harong, sa sadan, asin mantang sinda nagbibiahe​—iyo nanggad, sa gabos na lugar. Bilang maigot na trabahador kan Kahadean na naghihingoang gumibo nin mga disipulo, puede daw nindong pahiwason an saindong mga aktibidad nin paglilingkod sa langtad? Puede daw nindong aprobetsaran an mga oportunidad na hanapon an mga maninigo asin hulitan sinda? Ano an nagkapirang paagi na nakanompong nin mga disipulo an satong mga kapwa parahayag kan maogmang bareta? Helingon nguna niato an manongod sa paghuhulit paagi sa telepono.

12-14. Tanganing ipaheling an mga pakinabang nin paghuhulit paagi sa telepono, iestorya an saindong sadiring eksperyensia o eksperyensia sa mga parapong ini.

¹² Mantang naghuhulit sa harong-harong sa Brazil, an sarong Kristiana na aapodon niatong Maria nagtao nin pulyeto sa sarong hoben na babae na pahale sa sarong edipisyo nin apartment. Ginagamit an titulo kan pulyeto bilang introduksion, si Maria naghapot, “Ano gusto nindong makaaram pa nin orog manongod sa Biblia?” An babae nagsimbag: “Gusto ko. An problema saro akong maestra, asin nauubos an panahon ko sa pagtotokdo.” Ipinaliwanag ni Maria na puede nindang pag-olayan an mga topiko sa Biblia paagi sa telepono. Itinao kan babae ki Maria an numero kan saiyang telepono, asin kan banggi mismong idto, nagpoon siang mag-adal paagi sa telepono na ginagamit an brosyur na Ano an Kahagadan sa Sato nin Dios? a

¹³ Mantang naghuhulit paagi sa telepono, an sarong bilog na panahon na ministro sa Etiopia nakilagan huling kan sia nakikipag-olay sa sarong lalaki may nadadangog siang pagkariribok. Pinaapod na lang giraray sia kan lalaki pagtaodtaod. Kan mag-apod sia, an lalaki naghagad nin dispensasyon asin nagsabi na kan oras kan enot niang pag-apod, sindang mag-agom nasa katahawan nin mainit na pag-iiwal. Ginamit kan tugang na babae an sinabi kan lalaki bilang oportunidad na itokdo an madonong na giya kan Biblia sa pagresolber nin mga problemang pampamilya. Sinabi nia sa lalaki na dakol nang pamilya an natabangan kan An Sekreto sa Kaogmahan nin Pamilya, sarong libro na ipinublikar kan Mga Saksi ni Jehova. Pirang aldaw pagkahatod kan libro, inapodan giraray kan tugang na babae an lalaki. An lalaki nagkagsing: “Isinalbar kan librong ini an sakong pag-agom!” Sa katunayan, miniting nia an pamilya tanganing ihiras sa sainda an marahay na mga punto na nabasa nia sa libro. Naponan an sarong pag-adal sa Biblia, asin dai nahaloy an lalaki nagpoon nang mag-atender nin regular sa Kristianong mga pagtiripon.

¹⁴ An sarong parabalangibog kan Kahadean sa Dinamarca na nakapoon nin pag-adal sa Biblia paagi sa paghuhulit na naggagamit nin telepono nagsasabi: “Inenkaminar ako kan paraataman sa paglilingkod na makikabtang sa paghuhulit paagi sa telepono. Sa primero nagduwaduwa ako, na sinasabing: ‘Bako kong linya iyan.’ Minsan siring, sarong aldaw nagkaigwa ako nin kosog nin boot asin nagpoon na idayal an numero kan enot na kagharong. Nagsimbag si Sonja asin, pakatapos nin halipot na pag-oolay, nag-oyon na umako nin babasahon na basado sa Biblia. Sarong banggi pinag-olayan mi an dapit sa paglalang, asin gusto niang basahon an Life​—How Did It Get Here? By Evolution or by Creation.b Sinabi ko na magayon kun maghelingan kami sa personal asin pag-olayan an tema. Nag-oyon sia. Andam na sa pag-adal si Sonja kan dumatong ako, asin nag-adal kami kada semana poon kaidto.” An satong Kristianang tugang nagkonklusyon: “Dakol na taon kong ipinamibi na logod magkaigwa nin inaadalan sa Biblia, alagad dai ko linalaoman na makakua paagi sa paghuhulit na naggagamit nin telepono.”

15, 16. Anong mga eksperyensia an ikasasaysay nindo tanganing ipaheling an pakinabang nin pagigin listo sa laen-laen na paagi nin pagpoon nin mga pag-adal sa Biblia?

¹⁵ Dakol an nagigin mapanggana huli sa pag-aplikar kan mga suhestion na hulitan an mga tawo saen man sinda manompongan. An sarong Kristiana sa Estados Unidos nagparada kan saiyang kotse sa kataed nin sarong komersial na van sa sarong paradahan. Kan maheling sia kan babaeng nasa van, pinonan kan tugang na babae na ipaliwanag an manongod sa satong gibohon na pagtotokdo sa Biblia. Nagdangog an babae, naglusad sa van, asin nagrani sa kotse kan tugang na babae. Sia nagsabi: “Naoogma akong marhay ta nagpondo ka tanganing makipag-olay sa sako. Haloy na akong dai nakakabasa kan arin man sa mga babasahon nindo sa Biblia. Saka gusto kong mag-adal giraray sa Biblia. Ano puede mo akong tokdoan?” Sa siring, an satong tugang na babae naggibo nin sarong paborableng situwasyon tanganing ikahiras an maogmang bareta.

¹⁶ An sarong tugang na babae sa Estados Unidos nagkaigwa kan minasunod na eksperyensia kan sia dumalaw sa sarong klinika sa pag-ataman sa mga gurang: Dinulok nia an direktor nin nagkapirang aktibidad sa klinika, asin sinabi sa saiya na gusto niang magboluntaryo tanganing tumabang sa pagtao kan espirituwal na mga pangangaipo kan mga residente. An tugang niatong babae nagsabi pa na naoogma siang mamayo nin daing bayad na semanal na pag-adal sa Biblia sa gabos na gustong umatender. Tinogotan sia kan direktor na dalawon an mga kuarto kan laen-laen na residente. Dai nahaloy, namamayo na sia nin pag-adal sa Biblia tolong beses kada semana sa 26 gabos na residente, na an saro nakakaatender nin regular sa satong mga pagtiripon.

17. Anong pamamaagi an parateng epektibo sa pagpoon nin mga pag-adal sa Biblia?

¹⁷ Para sa nagkapirang parabalangibog kan Kahadean, an direktang pag-alok nin pag-adal sa Biblia nagbubunga nin marahay na mga resulta. Sarong aga an sarong kongregasyon na may 105 parahayag naggibo nin espesyal na paghihingoa na mag-alok nin pag-adal sa Biblia sa lambang kagharong na makakaolay ninda. Otsenta y sais na parahayag an nakikabtang sa paglilingkod sa langtad, asin pakalihis nin duwang oras sa paghuhulit, nanompongan ninda na kisuerra 15 bagong pag-adal sa Biblia an naponan.

Padagos na Hanapon an mga Maninigo

18, 19. Anong importanteng pagboot ni Jesus an maninigo na pirme niatong isaisip, asin sa katuyohan na iyan ano an maninigo na determinado niatong gibohon?

¹⁸ Bilang parabalangibog kan Kahadean, puedeng booton nindo na probaran an mga suhestion na nasambitan sa artikulong ini. Siempre, madonong na konsideraron an lokal na mga kostumbre kun nag-iisip nin mga pamamaagi nin paghuhulit. Orog sa gabos, pirme niatong isaisip an pagboot ni Jesus na hanapon an mga maninigo asin tabangan an siring na mga indibiduwal na magin mga disipulo.​—Mateo 10:11; 28:19.

¹⁹ Sa katuyohan na iyan, logod na ‘gamiton niato an tataramon kan katotoohan sa tamang paagi.’ Magigibo niato iyan paagi sa pangongombensir na marigon na nakabasar sa Kasuratan. Tatabangan kita kaini na matudok an puso kan mga naghihimate asin madagka sinda na humiro. Mantang kita mapagngayongayo na nagsasarig ki Jehova, makakapakikabtang kita sa pagtabang sa nagkapira na magin mga disipulo ni Jesu-Cristo. Asin nakakokontento nanggad an gibohon na ini! Kun siring ‘gibohon niato an bilog niatong makakaya tanganing ikaatubang an satong sadiri na inooyonan nin Dios,’ na pirmeng tinatawan nin onra si Jehova bilang maigot na mga parabalangibog kan Kahadean, na naghuhulit sa katuyohan na gumibo nin mga disipulo.​—2 Timoteo 2:15.

[Mga Nota sa Ibaba]

Nagigirumdoman daw Nindo?

• Taano ta kinaipuhan ni Apolos na ipaliwanag sa saiya nin mas kompleto an dalan nin Dios?

• Sa anong mga paagi nakanood ki apostol Pablo si Priscila asin Aquila?

• Sa Gibo kapitulo 18, ano an nanodan nindo manongod sa gibohon na paggibo nin disipulo?

• Paano kamo makagigibo nin mga oportunidad na gumibo nin mga disipulo?

[Ritrato sa pahina 18]

‘An dalan nin Dios ipinaliwanag ni Priscila asin Aquila nin mas tama’ ki Apolos

[Ritrato sa pahina 20]

Si Apolos nagin eksperto sa paggibo nin mga disipulo

[Ritrato sa pahina 21]

Naghulit si Pablo saen man sia magduman

[Mga Ritrato sa pahina 23]

Gumibo nin mga oportunidad na maghulit