Pakusugon an Pagtubod sa mga Bagay na Piglalauman Nindo

1, 2. (a) Paano napapalain an mga linalauman kan tunay na mga Kristiyano sa mga linalauman kan mga tawo sa kinaban ni Satanas? (b) Anong mahalagang mga hapot an pag-uulayan ta ngunyan?

MAY magayunon nanggad na paglaom an tunay na mga Kristiyano! Gabos kita, linahidan man o kabilang sa ‘ibang mga karnero,’ naglalaom na mahiling an kautuban kan orihinal na katuyuhan ni Jehova asin an pagpakangbanal kan saiyang pangaran. (Juan 10:16; Mat. 6:9, 10) An siring na mga paglaom an pinakamahalaga sa ano man na puwedeng antisiparon nin siisay man. Linalauman man niyato an ipinanugang balos na buhay na daing katapusan, ini man bilang kabtang kan ‘bagong langit’ nin Diyos o kan saiyang “bagong daga.” (2 Ped. 3:13) Pero mantang hinahalat iyan, naglalaom kita sa padagos na pagigin abunda sa espirituwal kan mga lingkod nin Diyos.

² An mga kabtang kan kinaban ni Satanas igwa man nin mga linalauman, pero dai sinda sigurado kun talagang magkakatotoo iyan. Halimbawa, minilyon na parasugal an naglalaom na manggana sa lotto, pero dai sinda nakakasigurado na talagang mangyayari iyan. Sa ibong na lado, an tunay na pagtubod iyo “an masarig na kumpiyansa” sa satong paglaom bilang Kristiyano. (Heb. 11:1, NW) Pero tibaad maihapot nindo, ‘Paano kita magigin mas sigurado sa satong mga linalauman? Asin ano an mga pakinabang kan pagkaigwa nin makusog na pagtubod sa mga bagay na linalauman niyato?’

 3. Sa ano nakabasar an tunay na Kristiyanong pagtubod?

³ Dai namumundag na igwa na nin pagtubod an makasalan na katawuhan; ni basta na sana nagkakaigwa kaiyan an saro. Tanganing magkaigwa nin Kristiyanong pagtubod, kaipuhan niyatong tugutan an banal na espiritu na iyo an maggiya sa satong puso. (Gal. 5:22) Dai sinasabi kan Bibliya na si Jehova may pagtubod o nangangaipo siya nin pagtubod. Huling si Jehova an makakamhan asin madunong sa gabos, mayong makakapugol sa saiya sa pag-utob kan saiyang katuyuhan. Siguradong marhay an satong Ama sa langit na mauutob an ipinanuga niyang mga bendisyon huling para sa saiya garo man sana nangyayari na an mga iyan. Kaya, sinabi niya: ‘An mga inot na bagay nakalihis na!’ (Basahon an Kapahayagan 21:3-6.) An Kristiyanong pagtubod nakabasar sa katotoohan na si Jehova sarong ‘Diyos na maimbod,’ na pirming inuutob an saiyang mga panuga.—Deut. 7:9.

 4. Anong paglaom an inaantisipar kan maimbod na mga lalaki asin babayi na nabuhay bago an panahon kan mga Kristiyano?

⁴ Nakalista sa kapitulo 11 kan libro nin Hebreo an mga pangaran kan 16 na lalaki asin babayi na may makusog na pagtubod. Sinambit man kan pinasabngan na kagsurat kaiyan an iba pang mga “nag-ako . . . nin marahay na patotoo hali sa Diyos dahil sa saindang pagtubod.” (Heb. 11:39, NW) Gabos sinda may “masarig na kumpiyansa” na ibabangon nin Diyos an ipinanugang “banhi” tanganing tapuson an pagrebelde ni Satanas asin utubon an orihinal na katuyuhan ni Jehova. (Gen. 3:15) Gadan na an mga maimbod na idto kan buksan kan ipinanugang “banhi,” si Jesu-Cristo, an dalan pasiring sa buhay sa langit. (Gal. 3:16) Pero, huli sa dai nasusudyang mga panuga ni Jehova, bubuhayon sinda sa sarong paraisong daga asin magigin perpektong mga tawo.—Sal. 37:11; Isa. 26:19; Os. 13:14.

5, 6. Anong paglaom an pinagdanay ni Abraham asin kan saiyang pamilya na malinaw sa saindang isip, asin paano ninda napagdanay na makusog an saindang pagtubod? (Hilingon an ritrato sa kapinunan kan artikulo.)

⁵ Ini an sinasabi kan Hebreo 11:13 dapit sa mga nabuhay bago an panahon kan mga Kristiyano: “An gabos na ini nagadan na marigon an pagtubod, maski ngani dai ninda nakamtan an kautuban kan mga panuga; alagad nahiling ninda iyan sa harayo asin ikinaugma iyan.” (NW) An saro sa mga ini iyo si Abraham. Pinagdanay daw niyang malinaw sa isip an maugmang paglaom na mabuhay sa irarom kan pamamahala kan ipinanugang “banhi”? Sinimbag ni Jesus an hapot na ini kan sabihon niya sa mga nagkokontra sa saiya: ‘An saindong amang si Abraham naugmang [marhay sa paglaom na] mahiling an sakong aldaw, asin nahiling niya iyan asin naugma.’ (Juan 8:56) Totoo man iyan ki Sara, Isaac, Jacob, asin dakul na iba pa na pinagdanay na malinaw sa isip an paglaom na sa maabot na panahon mamamahala an Kahadian, “na an disenyador asin kaggibo iyo an Diyos.”—Heb. 11:8-11, NW.

⁶ Paano napagdanay ni Abraham asin kan saiyang pamilya na makusog an saindang pagtubod? Padagos sindang nagkua nin kaaraman manungod sa Diyos, posibleng paagi sa pagdangog sa maimbod na mga may edad na, paagi sa mga kapahayagan mismo nin Diyos sa sainda, o paagi sa pagbasa kan masasarigan na suanoy na mga isinurat. An mas mahalaga, dai ninda liningawan an mga nanudan ninda kundi pinahalagahan nindang marhay an mga panuga saka kahagadan nin Diyos asin hinurop-hurop ninda iyan. Huling sigurado sinda sa saindang paglaom, andam sinda na atubangon an ano man na kadipisilan para magdanay na maimbod sa Diyos.

 7. Anong mga probisyon an itinatao ni Jehova tanganing mapakusog an satong pagtubod, asin ano an dapat niyatong gibuhon sa mga probisyon na iyan?

⁷ Tanganing mapagdanay na makusog an satong pagtubod, itinao ni Jehova sa sato an saiyang kumpletong Tataramon, an Bibliya. Para magin “maugma” asin “mapanggana,” dapat na regular niyatong basahon an Tataramon nin Diyos, aroaldaw kun posible. (Sal. 1:1-3, NW; basahon an Guibo 17:11.) Dangan, arog kan mga parasamba ni Jehova bago an panahon kan mga Kristiyano, kaipuhan niyatong padagos na hurop-hurupon an mga panuga nin Diyos asin sunudon an saiyang mga kahagadan. Tinatawan man kita ni Jehova nin abundang suplay nin espirituwal na kakanon paagi kan “maimbod asin mapagmansay na uripon.” (Mat. 24:45, NW) Kaya, kun papahalagahan tang marhay an mga nanunudan niyato sa espirituwal na mga probisyon na itinatao sa sato ni Jehova, magigin arog kita kan suanoy na mga halimbawa nin pagtubod na may “masarig na kumpiyansa” sa saindang paglaom sa Kahadian.

 8. Paano mapapakusog nin pagpamibi an satong pagtubod?

⁸ Nakatabang man na marhay an pagpamibi tanganing magdanay na makusog an pagtubod kan mga lingkod nin Diyos bago an panahon kan mga Kristiyano. Pag nahihiling nindang sinisimbag nin Diyos an saindang mga pamibi, napapakusog an saindang pagtubod. (Neh. 1:4, 11; Sal. 34:4, 15, 17; Dan. 9:19-21) Puwede man niyatong sabihon ki Jehova sa pamibi an mga ikinakahadit ta huling aram niyato na dadangugon saka papakusugon niya kita tanganing magdanay kitang maugma mantang nagtatagal. Asin kun mahiling niyatong sinisimbag niya an satong mga pamibi, mas minakusog an satong pagtubod. (Basahon an 1 Juan 5:14, 15.) An pagtubod sarong aspekto kan bunga kan espiritu, kaya kaipuhan niyatong “padagos na maghagad” nin banal na espiritu nin Diyos, arog kan isinasadol sa sato ni Jesus.—Luc. 11:9, 13, NW.

 9. Apuwera sa pagpamibi para sa satong sadiri, sairisay pa an dapat niyatong ipamibi?

⁹ Pero kun kita namimibi, bakong puro sana paghagad nin tabang sa Diyos an dapat niyatong sambiton. Dapat man niyatong aroaldaw na pasalamatan asin umawon si Jehova huli sa saiyang ‘makangangalas na mga gibo’ na sa kadakulan kaiyan dai ta kayang isaysay! (Sal. 40:5) Dapat man na mahiling sa satong pamibi na ‘ginigirumdom niyato idtong mga nasa presuhan, na garo man sana nakapreso kitang kaiba ninda.’ Asin dapat niyatong ipamibi an satong mga tugang sa bilog na kinaban, lalo na “idtong mga nanginginot diyan sa [sato].” Talagang napapakusog nanggad an satong pagtubod pag nahihiling tang sinisimbag ni Jehova an sararo niyatong mga pamibi!—Heb. 13:3, 7, NW.

10. Sairisay an satong mga halimbawa nin mga lingkod nin Diyos na dai ikinompromiso an saindang integridad, asin ano an nagtao sa sainda nin kusog para magibo iyan?

¹⁰ Sa Hebreo kapitulo 11, may mga sinambit si apostol Pablo na mga kadipisilan na tinagalan kan dakul na dai na nginaranan na lingkod nin Diyos. Halimbawa, sinambit kan apostol an dapit sa maimbod na mga babayi na nakaibanan giraray an nagadan nindang mga aking lalaki huling kan huri, binuhay liwat an mga ini. Dangan may sinambit siyang iba pa na “[habong] nigaran an saindang pagtubod para lang makalibre, tanganing sa siring makamtan ninda an mas marahay na pagkabuhay liwat.” (Heb. 11:35, NW) Dai ta aram kun sairisay an nasa isip ni Pablo kan sabihon niya ini, pero an iba, arog ni Nabot asin Zacarias, ginarapo sagkod na magadan huling sinunod ninda an Diyos asin ginibo an saiyang kabutan. (1 Ha. 21:3, 15; 2 Cron. 24:20, 21) Daing duda na may oportunidad kutanang “makalibre” si Daniel asin an saiyang mga kairiba kun ikinompromiso ninda an saindang integridad. Imbes, an pagtubod ninda sa kapangyarihan nin Diyos an nagpangyari na, sabi ngani, ‘matakupan ninda an mga nguso nin mga leon’ asin ‘masigbo ninda an kapangyarihan nin kalayo.’—Heb. 11:33, 34; Dan. 3:16-18, 20, 28; 6:13, 16, 21-23.

11. Anong mga pagbalo an natagalan kan nagkapirang propeta huli sa saindang pagtubod?

¹¹ Huli sa saindang pagtubod, an mga propetang arog ni Micaya asin Jeremias “uminagi nin pagbalo, na tinutuya-tuya saka linalatigo . . . asin pinepreso.” An iba, arog ni Elias, “naglagaw-lagaw . . . sa mga disyerto asin kabukidan asin mga kuweba saka mga lungib kan daga.” Gabos sinda nakatagal huling igwa sinda nin “masarig na kumpiyansa na mangyayari an [saindang] piglalauman.”—Heb. 11:1, 36-38, NW; 1 Ha. 18:13; 22:24-27; Jer. 20:1, 2; 28:10, 11; 32:2.

12. Siisay an satong pinakamarahay na halimbawa nin pakatagal sa mga pagbalo, asin ano an nakatabang sa saiya na magibo iyan?

¹² Pagkatapos na sambiton an manlain-lain na lalaki asin babayi na mga halimbawa nin pagtubod, idinuon ni Pablo an pinakamarahay na halimbawa sa gabos—an satong Kagurangnan na Jesu-Cristo. An Hebreo 12:2 nagsasabi: “Huli sa kaugmahan na inaantisipar niya, tinagalan niya an hariging pasakitan, na dai iniintindi an kasusupgan, asin tuminukaw siya sa may tuo kan trono nin Diyos.” (NW) Iyo, dapat niyatong ‘hurop-hurupon’ an halimbawa nin pagtubod ni Jesus kan siya mag-agi nin pinakagrabeng mga pagbalo. (Basahon an Hebreo 12:3.) Arog ni Jesus, dai man ikinompromiso kan inot na Kristiyanong mga martir, arog kan disipulong si Antipas, an saindang integridad. (Kap. 2:13) Nakamtan na ninda an balos na pagkabuhay liwat pasiring sa langit—na nakakalabing marhay sa “mas marahay na pagkabuhay liwat” na inantisipar kan suanoy na mga maimbod. (Heb. 11:35, NW) Pakalihis nin dikit na panahon, pagkatapos na mamundag an Kahadian kan 1914, an gabos na maimbod na linahidan na nagtuturog sa kagadanan, binuhay liwat bilang espiritu pasiring sa langit tanganing maghadi sa katawuhan kaiba ni Jesus.—Kap. 20:4.

13, 14. Anong mga pagbalo an inatubang ni Rudolf Graichen, asin ano an nakatabang sa saiya na makatagal?

¹³ Minilyon na parasamba nin Diyos sa panahon niyato an nagsusunod sa halimbawa ni Jesus paagi sa pagpapadanay na malinaw sa saindang isip an paglaom ninda asin paagi sa dai pagtugot na paluyahon kan mga pagbalo an saindang pagtubod. Pag-isipan an halimbawa ni Rudolf Graichen, na namundag sa Germany kan 1925. Nagigirumduman niya an mga ritrato nin mga eksena sa Bibliya na nakasabit sa lanob kan harong ninda. Isinurat niya: “Ipinapahiling sa sarong ritrato an sarong lobo saka kordero, sarong ugbon na kanding saka leopardo, sarong ugbon na baka saka leon—gabos matuninong, na ginigiyahan nin sarong sadit na aking lalaki. . . . Dai ko talaga malingawan an siring kaiyan na mga ritrato.” (Isa. 11:6-9) Dawa maringis na pinersegir nin dakul na taon, inot kan Gestapo kan Nazi asin kan huri, kan Komunistang Stasi kan East Germany, napagdanay ni Rudolf na makusog an saiyang pagtubod sa Paraiso.

¹⁴ An iba pang grabeng pagbalo na inatubang ni Rudolf iyo an pagkagadan kan saiyang namumutan na ina, na nagadan sa hilang na tipus mantang nasa kampo de-konsentrasyon sa Ravensbrück, asin an pagluya kan pagtubod kan saiyang ama sagkod sa punto na pinirmahan kaini an sarong dokumento na nagpapahayag na tinatalikdan na kaini an pagigin Saksi ni Jehova. Pagkaluwas niya sa presuhan, nagkapribilehiyo si Rudolf na maglingkod bilang paraataman nin sirkito, dangan naimbitaran siya sa Gilead School. Idinestino siya bilang misyonero sa Chile na diyan naglingkod siya giraray bilang paraataman nin sirkito. Pero dai diyan natapos an mga pagbalo ki Rudolf. Sarong taon pagkatapos niyang magpakasal sa sarong misyonera na si Patsy, nagadan an saindang umboy na babayi. Kan huri, nagadan man an saiyang namumutan na agom sa edad na 43. Natagalan ni Rudolf an gabos na pagbalong ini asin, dawa gurang na saka mahihilangon, naglilingkod pa siya bilang regular payunir saka elder kan magluwas an istorya kan saiyang buhay sa isyu kan An Torrengbantayan na Agosto 1, 1997, pahina 20-25.^[1]

15. Magtao nin mga halimbawa nin mga Saksi ni Jehova sa ngunyan na nagdadanay na maugma dawa nagtatagal nin persekusyon.

¹⁵ Sa ibong kan grabe asin padagos na pagpersegir sa mga Saksi ni Jehova, danay pa man giraray sindang maugma huli sa saindang paglaom. Halimbawa, dakul na tugang niyato sa Eritrea, Singapore, asin South Korea an iprineso, sa parati, huli sa pagsunod ninda sa pagbuot ni Jesus na dai magkapot nin armas. (Mat. 26:52) Kaiba sa ginatos na nakapresong ini si Isaac, Negede, asin Paulos, na labing 20 taon nang nasa kampong presuhan kan Eritrea! Sobra an pagmaltrato sa sainda diyan asin dai ninda maataman an saindang naggugurang na mga magurang o dai ninda magibong magbilog nin sadiri nindang pamilya. Pero sa ibong kaini, nagdanay sindang maimbod. An nakangirit nindang ritrato na mahihiling sa satong website na jw.org, nagpapahiling na napagdadanay nindang makusog an saindang pagtubod. Iginagalang na man sinda ngunyan dawa kan mga guwardiya sa presuhan.

16. Paano ka mapoprotektaran kan makusog na pagtubod?

¹⁶ An kadaklan sa mga lingkod ni Jehova dai man nagtatagal nin grabeng persekusyon. Pero, napapaatubang sinda sa ibang klase nin mga pagbalo sa pagtubod. Dakul sa sainda an kaipuhan na tagalan an sakit nin pagbuhay o an mga kasakitan na dara kan mga giyera sibil o natural na kalamidad. An iba man inarog si Moises asin an mga patriyarka na binayaan an oportunidad na magin mayaman asin bantog sa kinaban na ini. Maigot nindang pinaglalabanan an sugot na magkaigwa nin materyalistiko asin makasadiring pamumuhay. Ano an nakatabang sa sainda para magibo ini? An pagkamuot ninda ki Jehova saka an makusog nindang pagtubod sa panuga na hahalion niya an gabos na inhustisya asin babalusan niya an saiyang maimbod na mga lingkod nin buhay na daing katapusan sa sarong matanos na bagong kinaban.—Basahon an Salmo 37:5, 7, 9, 29.

17. Ano an determinado mong gibuhon, asin ano an pag-uulayan sa masunod na artikulo?

¹⁷ Nanudan niyato sa artikulong ini kun paano ta mapagdadanay na makusog an satong pagtubod paagi sa paghurop-hurop sa mga panuga nin Diyos asin regular na pagpamibi. Dangan an pagtubod na iyan, matabang sa sato na matagalan an mga pagbalo sa pagtubod mantang pinagdadanay niyatong malinaw sa isip an satong paglaom bilang Kristiyano na may “masarig na kumpiyansa.” Pag-uulayan sa masunod na artikulo kun ano pa an kalabot sa pagkaigwa nin pagtubod uyon sa deskripsiyon kaiyan kan Bibliya.