Pinagtitiwalaan Kang Mayordomo!

 1. Ano an pagmansay kan kadaklan sa kinaban kun dapit sa pagigin oripon?

MGA 2,500 na taon na an nakaagi, sarong Griegong parasurat nin drama an nagsabi: “Mayo nin siisay man na gustong magpaoripon.” Dakol ngonyan an maoyon tulos sa mga tataramon na iyan. Dapit sa pang-ooripon, naiisip nin dakol an mga tawong inaapi asin bihag, na an nakikinabang sa saindang mga pinagalan saka sakripisyo bako sinda, kundi an mga nakakasakop asin nagdodominar sa sainda.

2, 3. (a) Ano an nakakamtan kan mga andam na magin oripon o lingkod ni Cristo? (b) Anong mga hapot dapit sa pagkamayordomo an eestudyaran niato?

² Pero sinabi ni Jesus na an saiyang mga disipulo magigin hamak na mga lingkod, o oripon. Alagad an pagkaoripon na ini kan tunay na mga Kristiano dai nangangahulogan na minemenos o inaapi sinda. An mga oripon na ini pinagtitiwalaan, iginagalang, asin may onra. Halimbawa, isip-isipa an sinabi ni Jesus dapit sa sarong “oripon” kan madali na Siang magadan. Ihinula ni Cristo na tatawan nia nin mga asignasyon an “maimbod asin mapagmansay na oripon.”—Mat. 24:45-47, NW.

³ Mangnohon na sa kaagid na pagkasaysay, an oripon inaapod na “pinaniwalaan,” o mayordomo. (Basahon an Lucas 12:42-44.) An kadaklan na maimbod na Kristiano na nabubuhay ngonyan bakong miembro kan grupong maimbod na mayordomo. Minsan siring, ipinapahiling kan Kasuratan na sa sarong paagi, an gabos na naglilingkod sa Dios mga mayordomo. Anong mga responsabilidad an kalabot dian? Paano iyan maninigong mansayon? Tanganing maaraman an simbag, pag-olayan niato an papel kan mga mayordomo kan suanoy na mga panahon.

4, 5. Ano an mga responsabilidad kan suanoy na mga mayordomo? Magtao nin mga halimbawa.

⁴ Kan suanoy na mga panahon, an mayordomo sa parate sarong pinagtitiwalaan na oripon na inaasignaran na mamahala sa harong o sa negosyo kan saiyang kagurangnan. An mga mayordomo tinatawan nin autoridad na mamahala sa mga pagsadiri sa harong, kuarta, asin sa ibang mga oripon. An sarong halimbawa kaiyan iyo si Eliezer, na pinagkatiwalaan na mamahala sa kadakol na rogaring ni Abraham. Posibleng si Eliezer an pinaduman ni Abraham sa Mesopotamia tanganing pumili nin agom para sa saiyang aki na si Isaac. Dakulaon nanggad na responsabilidad iyan!—Gen. 13:2; 15:2; 24:2-4.

⁵ An makoapo sa tuhod ni Abraham na si Jose namahala sa harong ni Potifar. (Gen. 39:1, 2) Pag-abot nin panahon, si Jose mismo nagkaigwa nin mayordomo, na inasignaran na mamahala sa “harong ni Jose.” Inistimar kan mayordomong iyan an sampulong tugang na lalaki ni Jose. Asin sa pagboot ni Jose, isinagibo nia an plano dapit sa paghabon daa kan kopang plata. Malinaw nanggad, an mga mayordomo pinagtitiwalaan na marhay.—Gen. 43:19-25; 44:1-12.

 6. Ano an ipinagkatiwala sa manlaenlaen na paraataman?

⁶ Pakalihis nin mga siglo, si apostol Pablo nagsurat na an mga Kristianong paraataman mga “[mayordomo] nin Dios.” (Tito 1:7) Huling inasignaran na pastoran an “aripompon nin Dios,” ginigiyahan asin pinangengenotan kan mga paraataman an mga kongregasyon. (1 Ped. 5:1, 2) Siempre, magkakalaen an responsabilidad ninda. Halimbawa, an kadaklan sa Kristianong mga paraataman ngonyan naglilingkod sa sarong kongregasyon. An nagbibiaheng mga paraataman naglilingkod sa dakol na kongregasyon. Asin an mga miembro nin Komite kan Sangay nangangataman sa mga kongregasyon sa bilog na nasyon. Pero, an gabos inaasahan na maimbod nindang gigibohon an saindang obligasyon; an gabos maninimbag sa Dios.—Heb. 13:17.

 7. Paano niato masasabi na an gabos na Kristiano mayordomo?

⁷ Kumusta man an dakol na maimbod na Kristiano na bakong paraataman? Si apostol Pedro nagsurat sa gabos na Kristiano: ‘Siring sa pag-ako kan lambang saro nin balaog, maglingkod kamo sa lambang saro, siring sa mga marahay na [mayordomo] kan dakol na biyaya nin Dios.’ (1 Ped. 1:1; 4:10) Huli sa dai na kutana maninigong kabootan nin Dios, gabos kita tinawan nia nin mga balaog, kapakipakinabang na mga bagay, mga abilidad, o talento na magagamit niato sa ikakarahay nin mga tugang. Kaya, an gabos na naglilingkod sa Dios mga mayordomo, asin an pagigin mayordomo ninda may kaibang onra, pagtitiwala, asin responsabilidad.

 8. Ano an sarong importanteng prinsipyo na dapat niatong girumdomon?

⁸ Magkonsentrar kita ngonyan sa tolong prinsipyo na kaipuhan niatong pag-olayan. Enot: Gabos kita sadiri nin Dios asin maninimbag sa saiya. Si Pablo nagsurat: “Kamo bakong sadiri nindo man sana; huli ta kamo binakal nin halaga,” an iinatang na dugo kan Cristo. (1 Cor. 6:19, 20) Huling sadiri kita ni Jehova, obligado kitang kuyogon an mga togon nia, na bako man magabat. (Roma 14:8; 1 Juan 5:3) Kita oripon man kan Cristo. Arog kan mga mayordomo kan suanoy, kita igwa nin dakulang katalingkasan—pero may limitasyon iyan. Kaipuhan niatong otobon an satong mga responsabilidad oyon sa ipinagboot sa sato. Ano man an satong mga pribilehio nin paglilingkod, mga oripon pa man giraray kita nin Dios asin ni Cristo.

 9. Paano iinilustrar ni Jesus an relasyon kan kagurangnan asin oripon?

⁹ Tinatabangan kita ni Jesus na maintindihan an relasyon kan kagurangnan asin oripon. Sinabi nia sa saiyang mga disipulo an manongod sa sarong oripon na nagpuli sa harong pakatrabaho nin bilog na aldaw. Sinabi daw kan kagurangnan: ‘Madia tulos, asin tumukaw ka sa kakanan’? Dai. Sinabi nia: ‘[Mag-aroandam] ka na kan sakong pamanggihan, asin magbolos ka, patin maglingkod ka sako sagkod na ako makakakan asin makainom; dangan magkakan ka asin mag-inom.’ Paano iinaplikar ni Jesus an ilustrasyon? ‘Siring man sana, kun magibo na nindo an gabos na ipinagboboot saindo, magsabi kamo, “Kami mga [daing kamanungdanan] na oripon; ginibo mi sana an samong katongdan.”’—Luc. 17:7-10.

10. Ano an nagpapahiling na pinapahalagahan ni Jehova an satong mga paghihingoa na paglingkodan sia?

¹⁰ Siempre, pinapahalagahan ni Jehova an mga paghihingoa niato na paglingkodan sia. Inaasegurar kita kan Biblia: ‘An Dios bakong biko na makalingaw kan saindong gibo asin kan pagkamoot na ipinahayag nindo sa saiyang ngaran.’ (Heb. 6:10) Si Jehova rasonable nanggad sa mga kahagadan nia sa sato. Dugang pa, ano man an kahagadan nia, para iyan sa pinakaikakarahay niato asin bako man pagabat. Pero, arog kan ipinapahiling kan parabola ni Jesus, dai pinapanigoan nin oripon an saiyang sadiri, na ineenot an saiyang personal na intereses. Idinodoon digdi na sa pagdusay niato kan satong sadiri sa Dios, pinipili tang enoton sa satong buhay an saiyang kabotan. Oyon ka daw dian?

11, 12. Bilang mga mayordomo, anong kualidad an dapat niatong ipahiling, asin ano an dapat niatong likayan?

¹¹ An ikaduwang prinsipyo iyo ini: Bilang mga mayordomo, an sinusunod niatong pundamental na mga pamantayan saro sana. Totoo, may mga responsabilidad na iinaasignar sa nagkapira sana sa laog kan Kristianong kongregasyon. Minsan siring, an kadaklan na responsabilidad puedeng akoon nin gabos. Halimbawa, bilang mga disipulo ni Cristo asin mga Saksi ni Jehova, pinagbotan kita na mamotan an lambang saro. Sinabi ni Jesus na an pagkamoot iyo an tanda kan tunay na mga Kristiano. (Juan 13:35) Pero bako sanang mga tugang an namomotan niato. Hinihingoa niatong magpahiling nin pagkamoot sa mga bako man niatong kapagtubod. Sarong bagay ini na magigibo asin maninigong gibohon niato gabos.

¹² Kahagadan man sa sato an marahay na paggawi. Mawot niatong likayan an paggawi asin pamumuhay na kinokondenar sa Tataramon nin Dios. Si Pablo nagsurat: ‘Minsan an mga parapakisaro, ni an mga parasamba sa ladawan, ni an mga parasambay, ni an mga binabae, ni an mga nagdodorog sa kapwa lalaki, ni an mga parahabon, ni an mga maaraon, ni an mga paraburat, ni an mga paramuda, ni an mga paraagaw, dai magmamana kan kahadean nin Dios.’ (1 Cor. 6:9, 10) Totoo, nangangaipo nin paghihingoa an pagsunod sa matanos na mga pamantayan nin Dios. Pero, an siring na paghihingoa sulit asin may dakol na pakinabang, kaiba na an pamumuhay na nagreresulta sa marahay na salud, marahay na relasyon sa iba, saka pag-oyon nin Dios.—Basahon an Isaias 48:17, 18.

13, 14. Anong responsabilidad an itinao sa gabos na Kristiano, asin paano niato iyan maninigong mansayon?

¹³ Girumdomon man na an sarong mayordomo igwa nin dapat gibohon. Iyo man kita. Tinawan kita nin mahalagang marhay na regalo—an pakaaram kan katotoohan. Linalaoman nin Dios na ipapaabot niato sa iba an katotoohan na iyan. (Mat. 28:19, 20) Si Pablo nagsurat: ‘Ibilang kami nin tawo na siring sa mga paralingkod ni Cristo, asin mga pinagkatiwalaan kan mga tagong hilom [“sagradong mga hilom,” NW] nin Dios.’ (1 Cor. 4:1) Aram ni Pablo na bilang mayordomo, ipinagkatiwala sa saiya an “sagradong mga hilom” asin kaipuhan niang maigot na ipaabot iyan sa iba oyon sa paggiya kan Kagurangnan, si Jesu-Cristo.—1 Cor. 9:16.

¹⁴ Tutal, an pagpaabot kan katotoohan sarong mamomoton na gibohon. Siempre, magkakalaen an kamugtakan nin lambang Kristiano. Bakong parareho an magigibo nin gabos sa ministeryo. Naiintindihan iyan ni Jehova. An mahalaga iyo na gibohon niato an bilog na makakaya niato bilang indibiduwal. Sa siring, ipinapahiling niato an bakong maimot na pagkamoot sa Dios asin sa satong kapwa.

15-17. (a) Taano ta mahalagang marhay na magin maimbod an sarong mayordomo? (b) Paano ipinahiling ni Jesus an resulta nin pagkabakong maimbod?

¹⁵ An ikatolong prinsipyo, na konektadong marhay sa duwang naenot, iyo ini: Dapat kitang magin maimbod asin mapagtitiwalaan. An sarong mayordomo tibaad may dakol na marahayon na kualidad asin abilidad, alagad gabos iyan daing saysay kun sia iresponsable o bakong maimbod sa saiyang kagurangnan. An kaimbodan mahalagang marhay tanganing magin epektibo asin mapangganang mayordomo. Girumdomon na sinurat ni Pablo: ‘Kinakaipuhan sa mga [mayordomo] na an tawo magin maimbod.’—1 Cor. 4:2.

¹⁶ Kun kita maimbod, siertong bebendisyonan kita. Kun kita bakong maimbod, lugi kita. Mahihiling niato an prinsipyong ini sa ilustrasyon ni Jesus dapit sa mga talento. An mga oripon na maimbod na ipinagnegosyo an kuarta kan kagurangnan nag-ako nin komendasyon asin abundang binendisyonan. An oripon na iresponsable sa ipinagkatiwala sa saiya kan kagurangnan hinusgaran na “maraot,” ‘hugakon,’ asin “daing halaga.” Kinua sa saiya an talento asin ipinatapok sia sa luwas.—Basahon an Mateo 25:14-18, 23, 26, 28-30.

¹⁷ Sa saro pang pangyayari, ipinahiling ni Jesus an resulta nin pagkabakong maimbod. Sinabi nia: ‘May sarong mayaman na igwa nin sarong [mayordomo]; asin ini ipinagsumbong saiya na pinagsasayang nia an saiyang mga rogaring. Asin inapod nia sia asin sinabihan, “Ano ining nadadangog ko manongod saimo? Magtao ka nin kahusayan kan ipinagkatiwala saimo; huli ta dai ka na makakapagdanay sa saimong katongdan.”’ (Luc. 16:1, 2) Huling sinayang kan mayordomo an pagsadiri kan saiyang kagurangnan, sinisante sia kan kagurangnan. Mapuersang leksion nanggad ini para sa sato! Mamawoton nanggad niatong magin maimbod sa kahagadan sa sato.

18. Taano ta dai maninigo na ikomparar an satong sadiri sa iba?

¹⁸ Puedeng ihapot kan lambang saro sa sato, ‘Paano ko minamansay an sakong pagkamayordomo?’ Puedeng magkaproblema kun ikinokomparar niato an satong sadiri sa iba. An Biblia nagsasadol sa sato: ‘An lambang saro magpatotoo kan saiyang gibo, dangan sia magkakamit kan saiyang pagpamuraway dapit sa saiya man sana, asin bakong dapit sa saiyang kataed.’ (Gal. 6:4) Imbes na ikomparar sa iba an ginigibo niato, maninigo kitang magkonsentrar sa magigibo niato bilang indibiduwal. Makakatabang ini sa sato na dai magin maabhaw asin dai magluya an boot. Sa pagsiyasat kan satong sadiri, maninigo niatong tandaan na nagbabago an mga kamugtakan. Tibaad huli sa maluyang salud, edad, o manlaenlaen na responsabilidad, dai ta na nagigibo an gabos na nagigibo niato dati. O tibaad orog pa an magigibo ta kisa sa ginigibo niato ngonyan. Kun iyo, taano ta dai probaran na paoswagon an mga aktibidad niato?

19. Kun dai kita magkamit nin sarong partikular na pribilehio, taano ta dai kita dapat na pangluyahan nin boot?

¹⁹ Pag-olayan man niato an satong mga responsabilidad ngonyan o an minamawot ta pang mga responsabilidad. Halimbawa, tibaad minamawot nin sarong brother na magin elder sa kongregasyon o magkaigwa nin kabtang sa mga asamblea asin kombension. Marahay na magmaigot na makualipikar sa siring na mga pribilehio, alagad dai kita dapat na pangluyahan nin boot kun dai niato iyan maabot sa linalaoman niatong panahon. Sa mga dahilan na tibaad dai tulos niato masabotan, an nagkapirang pribilehio tibaad makamtan ta nin mas haloy kisa sa linalaoman niato. Girumdomon na tibaad inisip ni Moises na andam siang pangenotan an mga Israelita paluwas sa Egipto, pero kinaipuhan niang maghalat nin 40 taon bago iyan gibohon. Nagtao iyan sa saiya nin igong panahon na pataluboon an mga kualidad na kaipuhan nia tanganing mapangenotan an banwaan na matagas an payo asin rebelyoso.—Gui. 7:22-25, 30-34.

20. Anong leksion an manonodan niato sa halimbawa ni Jonatan?

²⁰ Kun beses tibaad dai talaga itao sa sato an sarong partikular na pribilehio. Arog kaiyan an nangyari ki Jonatan. Aki sia ni Saul kaya may oportunidad siang magin hade sa bilog na Israel. Minsan siring, an pinili nin Dios na magin hade iyo an mas hoben na si David. Ano an reaksion ni Jonatan sa pangyayaring iyan? Inako nia iyan asin sinuportaran si David dawa ngani nameligro an buhay nia. Sinabi nia ki David: ‘Ika maghahade sa Israel, asin ako an ikaduwa na masunod sa saimo.’ (1 Sam. 23:17) Ano an manonodan niato? Si Jonatan dai nagreklamo, asin bakong arog kan saiyang ama, dai sia nauri ki David. Imbes na mauri sa asignasyon nin iba, gabos kita puedeng magkonsentrar sa pag-asikaso kan mga responsabilidad niato. Makakasierto kita na sa bagong kinaban, papanigoan ni Jehova an tamang mga kamawotan kan gabos niang lingkod.

21. Paano niato maninigong mansayon an satong pagkamayordomo?

²¹ Tandaan niato na bilang pinagtitiwalaan na mga mayordomo, an pagigin oripon niato bakong makaheherak, na may kaibang pang-aapi asin pagsakit. Imbes, kita may onra huling pinagtitiwalaan kita sa gibohon na dai na noarin man maootro, an pagpaabot kan maogmang bareta sa huring mga aldaw kan sistemang ini nin mga bagay. Mantang ginigibo iyan, igwa kita nin dakulang katalingkasan sa kun paano niato gigibohon an satong mga responsabilidad. Kun siring, magin maimbod kita bilang mga mayordomo. Asin pakamahalon lugod niato an pribilehio na maglingkod sa Saro na nakakalabi sa gabos sa bilog na uniberso.