“Dahelan Kaini na Ako Isinugo”

1-4. (a) Paano ekspertong tinokdoan ni Jesus an sarong Samaritana, asin may anong resulta? (b) Ano an reaksion kan saiyang mga apostol?

DAKOL na oras na sindang naglalakaw. Si Jesus asin an saiyang mga apostol nagbabaklay paamihanan, hale sa Judea pasiring sa Galilea. An pinakaharaning ruta​—na pagbaklay nin mga tolong aldaw—​iyo an pag-agi ninda sa Samaria. Kan haros udto na, uminabot sinda sa sarong sadit na siudad na an ngaran Sicar, kun saen sinda puminondo tanganing magparepresko.

² Mantang an saiyang mga apostol nagbabakal nin kakanon, si Jesus nagpahingalo sa may bubon sa luwas kan siudad. Uminabot an sarong babae tanganing magsakdo nin tubig. Puede kutanang dai na sana ini intindihon ni Jesus. Sia “napagal sa pagbaklay.” (Juan 4:6) Masasabotan man kun ipipirong na sana nia an saiyang mga mata asin dai na sana pag-intindihon an pag-abot asin paghale kan Samaritanang ini. Siring kan nasabotan niato sa Kapitulo 4 kan librong ini, posibleng marhay na inasahan kan babae na tatrataron sia na may pagmenos nin siisay man na Judio. Pero, si Jesus nagpoon na makipag-olay sa saiya.

³ Sia nagpoon paagi sa sarong ilustrasyon, na kinua sa pangaroaldaw na buhay kan babae​—sa katunayan, may koneksion sa ginigibo kaini sa mismong oras na iyan. Yaon sia digdi tanganing magsakdo nin tubig; si Jesus nagtaram manongod sa nagtatao nin buhay na tubig na makakahale kan saiyang espirituwal na pagkapaha. An babae nagkapirang beses na nagpalataw nin mga punto na puedeng magin dahelan nin pag-argumento.a Mataktikang linikayan ni Jesus an siring na mga isyu asin padagos na ipinakipag-olay an temang nasa isip nia. Nagkonsentrar sia sa espirituwal na mga bagay​—sa dalisay na pagsamba asin ki Jehova Dios. An saiyang mga tataramon may dakulang epekto, huli ta ipinaabot iyan kan babae sa mga lalaki kan siudad, asin sinda man gustong maghinanyog ki Jesus.​—Juan 4:3-42.

⁴ Pagbuelta ninda, ano daw an saboot kan mga apostol manongod sa pambihirang pagpapatotoo na ginigibo ni Jesus digdi? Mayong naheling na entusiasmo sa sainda. Nabigla sinda na si Jesus nakikipag-olay pa ngani sa babaeng ini, asin minalataw na dai sinda naggirong sa babae. Pagkahale kaini, padagos nindang sinadol si Jesus na magkakan kan kakanon na dara ninda. Minsan siring, sinabi sa sainda ni Jesus: “May kakanon akong kakakanon na dai nindo aram.” Nagngangalas, sa primero naghona sinda na si Jesus may literal na kakanon. Dangan sia nagpaliwanag: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.” (Juan 4:32, 34) Sa siring, itinotokdo sa sainda ni Jesus na an saiyang pangenot na gibohon sa buhay mas importante sa saiya kisa magkakan. Gusto nia na arog man kaiyan an mamatean ninda manongod dian. Ano an gibohon na ini?

 5. Ano an pangenot na gibohon sa buhay ni Jesus, asin ano an eestudyaran niato sa kapitulong ini?

⁵ Si Jesus sarong beses nagsabi: “Kaipuhan na ipahayag ko . . . an maogmang bareta kan kahadean nin Dios, huli ta dahelan kaini na ako isinugo.” (Lucas 4:43) Iyo, si Jesus isinugo tanganing maghulit asin magtokdo kan maogmang bareta kan Kahadean nin Dios.b Iyan man an gibohon kan mga parasunod ni Jesus ngonyan. Kun siring, mahalagang marhay na estudyaran niato kun taano ta naghulit si Jesus, kun ano an ihinulit nia, asin kun ano an saboot nia dapit sa asignasyon sa saiya.

6, 7. Ano an gusto ni Jesus na magin saboot kan “lambang paratokdo sa publiko” manongod sa pagpaabot kan maogmang bareta sa iba? Iilustrar.

⁶ Estudyaran niato kun ano an saboot ni Jesus manongod sa mga katotoohan na itinokdo nia; dangan pag-oolayan niato an saiyang saboot dapit sa mga tawo na tinokdoan nia. Si Jesus naggamit nin buhay na marhay na ilustrasyon tanganing ipaheling kun ano an saboot nia manongod sa pagpaabot sa iba kan mga katotoohan na itinokdo sa saiya ni Jehova. Sia nagsabi: “An lambang paratokdo sa publiko, kun natokdoan manongod sa kahadean kan kalangitan, nakakaagid sa sarong tawo, sarong kagharong, na ilinuluwas hale sa saiyang itinatagong kayamanan an mga bagay na bago asin daan.” (Mateo 13:52) Taano an kagharong sa ilustrasyon na ini ta ilinuluwas an mga bagay hale sa saiyang itinatagong kayamanan?

⁷ Dai man ipinagpapasikat kan kagharong an saiyang mga rogaring, arog kan ginibo kaidto ni Hadeng Ezequias kan suanoy​—na maraot an ibinunga. (2 Hade 20:13-20) Ano an motibo kan kagharong? Estudyare an sarong ilustrasyon: Binisita mo sa saiyang harong an sarong paboritong maestro. Binuksan nia an sarong sulong-sulong asin kinua an duwang surat​—an saro amarilyo na an kolor huli sa kalumaan, an saro mas bago. Mga surat iyan na naresibi nia hale sa saiyang ama​—an saro kaiyan naresibi nia mga dekada na an nakaagi kan an maestro aki pa, an saro dai pa sana nahahaloy. Mababanaag sa saiyang mga mata an kaogmahan mantang sinasabi nia saindo kun gurano nanggad an pagpahalaga nia sa mga surat na ini asin kun paanong an mga sadol na yaon dian nakapabago sa buhay nia saka puede man na makatabang sa saindo. Malinaw nanggad na pinapahalagahan na marhay kan maestro an mga surat, na rinirimpos iyan sa saiyang puso. (Lucas 6:45) Ipinaheling nia an mga iyan sa saindo, bako na tanganing ipaghambog iyan o magganansia dian minsan paano, kundi tanganing makinabang kamo asin ipasabot sa saindo an halaga kaiyan.

 8. Taano ta igwa kita nin marahay na dahelan na ibilang na mga kayamanan an mga katotoohan na nanonodan niato sa Tataramon nin Dios?

⁸ Kapareho kaiyan an mga motibo kan Dakulang Paratokdo, si Jesus, sa pagpaabot kan mga katotoohan nin Dios sa iba. Para sa saiya, an mga katotoohan na iyan mga kayamanan na daing kaagid sa halaga. Namomotan nia iyan, asin gustong-gusto niang ipaabot iyan. Gusto nia na an gabos na parasunod nia, “an lambang paratokdo sa publiko,” magin siring man kaiyan an saboot. Iyan daw an saboot niato? Igwa kita nin bastanteng dahelan na mamotan an lambang katotoohan na nanonodan niato sa Tataramon nin Dios. Pinapahalagahan niatong marhay an arog sa mga mutya nin katotoohan baga man iyan haloy nang rinirimpos na mga tinutubod o nakaagi pa sanang mga pagpakarhay sa pakasabot. Paagi sa pagtaram na may odok sa pusong entusiasmo asin pagpapadanay kan satong pagkamoot sa itinokdo sa sato ni Jehova, ipinapahayag niato an pagkamoot na iyan, arog kan ginibo ni Jesus.

 9. (a) Ano an saboot ni Jesus dapit sa mga tawo na tinokdoan nia? (b) Paano niato maaarog an saboot ni Jesus dapit sa mga tawo?

⁹ Namotan man ni Jesus an mga tawong tinokdoan nia, siring sa pag-oolayan niato nin mas lubos sa Kabtang 3. Ihinula na an Mesiyas ‘maheherak sa hamak asin sa dukha.’ (Salmo 72:13) Tunay nanggad na si Jesus nagmamakolog sa mga tawo. May pagmakolog sia sa mga kaisipan asin saboot na nagmotibar sa sainda; ikinahadit nia an manongod sa mga nagpapagabat sa sainda asin mga nakakaolang sa sainda na masabotan an katotoohan. (Mateo 11:28; 16:13; 23:13, 15) Halimbawa, girumdoma an Samaritana. Daing duwa-duwa na sia huminangang marhay na si Jesus nagpaheling nin interes sa saiya. An pakarorop ni Jesus sa personal na situwasyon kan babae nagpahiro digdi na akoon sia bilang propeta asin sabihon sa iba an manongod sa saiya. (Juan 4:16-19, 39) Totoo, an mga parasunod ni Jesus ngonyan dai nakakabasa kan puso kan mga tawong hinuhulitan ninda. Minsan siring, puede kitang magpaheling nin interes sa mga tawo, arog kan ginibo ni Jesus; puede niatong ipaheling an satong pagmakolog sa sainda; asin puede niatong ibagay an satong mga tataramon sa saindang partikular na mga pinagkakainteresan, problema, asin pangangaipo.

10, 11. (a) Ano an ihinulit ni Jesus? (b) Paano naglataw an pangangaipo para sa Kahadean nin Dios?

¹⁰ Ano an ihinulit ni Jesus? Kun hahanapon nindo an simbag paagi sa pagsiyasat sa mga katokdoan nin dakol na iglesia na naghihingakong nagrerepresentar sa saiya, tibaad ikonklusyon nindo na sia nagbalangibog nin sarong klase nin ebanghelyo para sa reporma sa sosyedad. O tibaad magkaigwa kamo nin impresyon na sia nagsuportar sa politikal na reporma o na idinoon nia na an personal na kaligtasan an pinakamahalaga sa gabos. Minsan siring, arog kan nasambitan na, si Jesus sayod na nagsabi: ‘Kaipuhan na ipahayag ko an maogmang bareta kan kahadean nin Dios.’ Ano man nanggad an kalabot dian?

¹¹ Girumdomon na presente si Jesus sa langit kan enot na kuestionon ni Satanas an pagigin tama kan soberaniya ni Jehova. Sierto nanggad na nakolgan si Jesus na maheling an saiyang matanos na Ama na binabalobagi asin sinasahotan nin pagigin bakong makatanosan na Namamahala na ipinapanguri an marahay sa Saiyang mga linalang! Siertong nakolgan na marhay an Aki nin Dios kan si Adan asin Eva, an magigin mga magurang kan katawohan, maghinanyog sa pagbalobagi ni Satanas! Naheling kan Aki na an pamilya nin tawo naolakitan nin kasalan asin kagadanan bilang resulta kan pagrebeldeng iyan. (Roma 5:12) Pero, siertong ogmahon sia na maaraman na sa maabot na panahon itatanos kan saiyang Ama an mga bagay-bagay!

12, 13. Anong mga inhustisya an itatanos kan Kahadean nin Dios, asin paano ginibo ni Jesus na prinsipal na kabtang kan saiyang ministeryo an Kahadean?

¹² Orog sa gabos, ano an kaipuhan na itanos? An banal na ngaran ni Jehova kaipuhan na pakangbanalon, halean nin gabos na katuyawan na ginigibo dian ni Satanas asin kan gabos na kuminampi sa saiya. An pagigin makatanosan kan soberaniya ni Jehova, an saiyang paagi nin pamamahala, kaipuhan na ibindikar. Orog kisa siisay man na ibang tawo, nasasabotan ni Jesus an mahalagang marhay na mga isyung ini. Sa modelong pamibi, tinokdoan nia an saiyang mga parasunod na hagadon nguna na pakangbanalon logod an ngaran kan saiyang Ama, sunod dumatong logod an Kahadean kan saiyang Ama, asin dangan gibohon logod digdi sa daga an kabotan nin Dios. (Mateo 6:9, 10) An Kahadean nin Dios, na si Cristo Jesus an Namamahala kaiyan, madali nang haleon sa daga an maraot na sistema ni Satanas asin patunayan nin sararoan sana na matanos an pamamahala ni Jehova.​—Daniel 2:44.

¹³ An Kahadean na iyan an pinakatema kan ministeryo ni Jesus. An gabos na tataramon nia asin an gabos na ginibo nia nakatabang na linawon kun ano an Kahadean na iyan asin kun paano kaiyan gigibohon an katuyohan ni Jehova. Dai tinogotan ni Jesus an ano man na bagay na irayo an saiyang atension sa saiyang misyon na maghulit kan maogmang bareta kan Kahadean nin Dios. Kan panahon nia, igwa nin kaipuhan na asikasohon tolos na mga isyu sa sosyedad, dai mabilang na mga inhustisya, pero nagpokus sia sa saiyang mensahe asin sa saiyang gibohon. An pagdadanay daw niang nakapokus dian nangahulogan na hayakpit an pananaw ni Jesus, na indiperente asin paorootro na sana an saiyang pamamaagi? Dai nanggad!

14, 15. (a) Paano si Jesus nagin “sarong labi pa kisa ki Salomon”? (b) Paano niato maaarog si Jesus kun dapit sa kun ano an ihinuhulit niato?

¹⁴ Siring kan maheheling niato sa bilog na kabtang na ini, ginibo ni Jesus an saiyang pagtotokdo na interesante sagkod nakakaakit. Inabot nia an puso kan mga tawo. Tibaad magirumdoman niato an madonong na si Hadeng Salomon, na naghanap nin kawiliwiling mga tataramon, tamang mga tataramon nin katotoohan, tanganing ikapahayag an mga kaisipan na ipinasabong sa saiya ni Jehova na isurat. (Eclesiastes 12:10) Tinawan ni Jehova an bakong sangkap na tawong iyan nin “kahiwasan nin puso,” na nagpangyari sa saiya na makapagtaram manongod sa dakol na bagay, kaiba an mga gamgam, sira, kahoy, asin hayop. An mga tawo hale sa harayo nag-arabot tanganing dangogon si Salomon na magtaram. (1 Hade 4:29-34) Pero, si Jesus “sarong labi pa kisa ki Salomon.” (Mateo 12:42) Sia mas madonong nanggad, orog nanggad na ‘mahiwas an puso.’ Kun nagtotokdo sa mga tawo, ginagamit ni Jesus an saiyang nakakalabing kaaraman manongod sa Tataramon nin Dios saka manongod sa mga gamgam, mga hayop, sira, agrikultura, panahon, mga nangyayari sa presente, kasaysayan, asin mga kamugtakan sa sosyedad. Kadungan kaiyan, dai noarin man ipinagpasikat ni Jesus an saiyang kaaraman tanganing pahangaon an iba. Pinagdanay niang simple asin malinaw an saiyang mensahe. Bakong makangangalas na naoogmang marhay an mga tawo na dangogon siang magtaram!​—Marcos 12:37; Lucas 19:48.

¹⁵ An mga Kristiano ngonyan nagmamaigot na sunodon an halimbawa ni Jesus. Mayo kita kan saiyang labi-labi kadakulang kadonongan asin kaaraman, alagad gabos kita igwa nin igong kaaraman asin eksperyensia na magagamit niato kun ipinapaabot niato sa iba an mga katotoohan sa Tataramon nin Dios. Halimbawa, puedeng gamiton nin mga magurang an saindang eksperyensia sa pagpadakula nin mga aki tanganing iilustrar an pagkamoot ni Jehova sa Saiyang mga aki. An iba puedeng gumamit nin mga halimbawa o ilustrasyon hale sa sekular na trabaho, eskuelahan, o sa kaaraman ninda manongod sa mga tawo asin mga nangyayari sa presente. Kadungan kaiyan, nag-iingat kita na dai pagtogotan an ano man na bagay na makaparayo kan atension sa satong mensahe​—an maogmang bareta kan Kahadean nin Dios.​—1 Timoteo 4:16.

16, 17. (a) Ano an saboot ni Jesus dapit sa saiyang ministeryo? (b) Paano ipinaheling ni Jesus na sa saiyang ministeryo nakapokus an saiyang buhay?

¹⁶ Ibinilang ni Jesus an saiyang ministeryo na sarong mahalagang marhay na kayamanan. Sia naogmang marhay sa pagtabang sa mga tawo na mamidbid an saiyang langitnon na Ama kun siisay talaga Sia, na dai pinapalibog nin nakakaribaraw na mga doktrina asin tradisyon na gibo nin tawo. Gustong-gusto ni Jesus an pagtabang sa mga tawo na magkaigwa nin inooyonan na relasyon ki Jehova asin kan paglaom na buhay na daing katapusan. Naogma siang marhay sa pagpaabot sa mga tawo kan karangahan asin kagayagayahan kan maogmang bareta. Paano nia ipinaheling na igwa sia kan siring na saboot? Estudyare an tolong paagi.

¹⁷ Enot, sa ministeryo pangenot na ipinokus ni Jesus an saiyang buhay. An pakikipag-olay manongod sa Kahadean iyo an saiyang okupasyon, an saiyang pangenot na gibohon sa buhay, an pangenot na pinagkakainteresan nia. Iyan an dahelan, siring sa nasasambitan sa Kapitulo 5, na may kadonongan na pinagdanay ni Jesus na simple an saiyang buhay. Arog kan ihinatol nia sa iba, pinagdanay nia an saiyang mata na nakapokus sa kun ano an pinakamahalaga. Dai sia nadisturbo nin kadakol na bagay na kaipuhan niang bayadan, manteneron, asin hirahayon o salidahan mantang nag-aagi an panahon. Namuhay sia nin simple tanganing mayo nin ano man na bagay na dai man kaipuhan na makadisturbo sa saiya sa saiyang ministeryo.​—Mateo 6:22; 8:20.

18. Sa anong mga paagi ginibo ni Jesus an saiyang pinakamakakaya sa saiyang ministeryo?

¹⁸ Ikaduwa, ginibo ni Jesus an saiyang pinakamakakaya sa saiyang ministeryo. Nagdusay sia dian nin dakulaon na kosog, na literal na naglalakaw nin ginatos na kilometro sa bilog na Palestina, na naghahanap nin mga tawo na puede niang paabotan kan maogmang bareta. Sia nakipag-olay sa sainda sa harong ninda, sa mga plasang pampubliko, sa mga sadan, asin sa luwas. Sia nakipag-olay sa sainda dawa kan kaipuhan nia nin pahingalo, kakanon, tubig, o kadikit na toninong na oras kaiba an saiyang pinakadayupot na mga katood. Dawa kan sia madali nang magadan, padagos niang ipinaabot sa iba an maogmang bareta kan Kahadean nin Dios!​—Lucas 23:39-43.

19, 20. Paano inilustrar ni Jesus an pagkaapurado kan gibohon na paghuhulit?

¹⁹ Ikatolo, ibinilang ni Jesus na apurado an ministeryo. Girumdoma an saiyang pakikipag-olay sa Samaritana sa may bubon sa luwas kan Sicar. Minalataw na dai naheling kan mga apostol ni Jesus sa situwasyon na iyan an apuradong pangangaipo na ipaabot sa iba an maogmang bareta. Si Jesus nagsabi sa sainda: “Bako daw na nagsasabi kamo na apat na bulan pa bago magdatong an pag-ani? Uya! Sinasabi ko sa saindo: Tingagan an saindong mga mata asin helinga an kaomahan, ta iyan maputi na tanganing anihon.”​—Juan 4:35.

²⁰ Ginamit ni Jesus an ilustrasyon na iyan basado sa presenteng panahon kaidto. Minalataw na bulan iyan nin Kislev (kabtang nin Nobyembre asin kabtang nin Disyembre). Apat na bulan pa bago an pag-ani nin sebada, na panahon man nin Paskua, sa Nisan 14. Kaya an mga paraoma dai nakakamate nin ano man na pag-apura manongod sa pag-ani kan panahon na idto. Haloy pa iyan na marhay. Alagad kumusta man an pag-ani nin mga tawo? A, dakol an andam na magdangog, makanood, magin mga disipulo ni Cristo asin magkamit kan marahayon na paglaom na inaalok ni Jehova sa sainda. Garo baga natatanaw ni Jesus an piguratibong mga omang idto asin naheheling nia na an mga iyan maputi na asin an gabos na hinog nang tipasi maluway na nagtataratabyon sa huyop nin doros, na tanda na puedeng-puede nang anihon iyan.c Iyan na an panahon, asin an gibohon apurado! Iyan an dahelan na kan an mga tawo sa sarong siudad nagprobar na papagdanayon si Jesus na kaibanan ninda, sia nagsimbag: “Kaipuhan na ipahayag ko sa iba pang mga siudad an maogmang bareta kan kahadean nin Dios, huli ta dahelan kaini na ako isinugo.”​—Lucas 4:43.

21. Paano niato maaarog si Jesus?

²¹ Sa gabos na tolong paagi na pinag-olayan pa sana, puede niatong maarog si Jesus. Puede niatong pangenot na ipokus an satong buhay sa Kristianong ministeryo. Dawa ngani kita tibaad may pamilya asin sekular na mga obligasyon, puede niatong ipaheling na an satong ministeryo an pangenot sa sato paagi sa maigot, regular na pakikikabtang dian, arog kan ginibo ni Jesus. (Mateo 6:33; 1 Timoteo 5:8) Puede niatong gibohon an pinakamakakaya niato sa ministeryo, na buka an palad na itinatao an satong panahon, kosog, asin materyal na mga bagay sa pagsuportar dian. (Lucas 13:24) Asin puede niatong pirmeng isaisip na an satong gibohon apurado. (2 Timoteo 4:2) Kaipuhan na aprobetsaran niato an gabos na oportunidad na maghulit!

22. Ano an eestudyaran sa sunod na kapitulo?

²² Ipinaheling man ni Jesus na nasabotan nia an importansia kan gibohon na iyan paagi sa pagsegurado na iyan magpapadagos pagkagadan nia. Isinugo nia an saiyang mga parasunod na ipadagos an paghuhulit asin pagtotokdo. An sugong iyan an magigin tema kan sunod na kapitulo.