Yobo

1 Kwali umuntu umo mu calo ca Usi, ishina lyakwe ali ni Yobo.*+ Uyu muntu ali mulungami kabili uwa kaele;*+ aletiina Lesa kabili talefwaya ukucita ifyabipa.+ 2 Akwete abana abaume 7 na bana abanakashi batatu. 3 Akwete impaanga 7,000, ingamila 3,000, ing’ombe* 1,000, impunda* 500 na babomfi abengi nga nshi ica kuti aishileba umukankaala ukucila abena Kabanga bonse kabili abantu balimucindike.

4 Abana bakwe abaume balepekanya umutebeto cila muntu mu ng’anda yakwe pa bushiku ubo alingile ukupekanishishapo. Kabili baleita bankashi yabo batatu pa kuti bese baliile no kunwena pamo. 5 Nomba inshiku sha mutebeto nga shapwa, Yobo aleita abana bakwe pa kuti abasangulule. Alecelela ukwima no kutuulilako cila mwana ilambo lya koca.+ Pantu Yobo aletontonkanya ukuti: “Nalimo abana bandi nababembuka kabili nabasaalula Lesa mu mitima yabo.” Ifi fine e fyo Yobo alecita lyonse.+

6 Nomba bushiku bumo ilyo abana baume ba kwa Lesa wa cine*+ baileiminina pa ntanshi ya kwa Yehova,+ Satana+ na o aileiminina pamo nabo.+

7 Lyena Yehova aipwishe Satana ati: “Wafuma kwi?” Satana ayaswike Yehova ati: “Nafuma mu kwendauka pe sonde, mu kumona ifyabapo.”+ 8 E lyo Yehova aebele Satana ati: “Bushe naumona* umubomfi wandi Yobo? Takwaba uwaba nga ena pe sonde. Mulungami, wa kaele,*+ alatiina Lesa kabili tafwaya ukucita ifyabipa.” 9 Lyena Satana ayaswike Yehova ati: “Bushe Yobo atiinina Lesa+ apa fye? 10 Bushe tamwamucingilila+ no kucingilila ing’anda yakwe na fyonse ifyo akwata? Mulamupaala muli fyonse ifyo acita,+ kabili mwalilenga ifitekwa fyakwe fyafula pe sonde. 11 Nomba fungululeni ukuboko kwenu, mukupishe na pali fyonse ifyo akwata, kabili nangu cibe shani akamusaalula pa menso yenu.” 12 Lyena Yehova aebele Satana ati: “Mona! Fyonse ifyo akwata fili mu minwe yobe.* Lelo pali ena wibikapo ukuboko kobe!” E ico Satana alifumine pa ntanshi* ya kwa Yehova.+

13 Nomba bushiku bumo ilyo abana bakwe abaume na bana bakwe abanakashi balelya no kunwa umwangashi mu ng’anda ya kwa munyinabo umukalamba pali bonse,+ 14 kwaishile uwaebele Yobo ati: “Ing’ombe shacilalima ne mpunda shacilalya umulemfwe mupepi ne ng’ombe, 15 lyena abena Sebea bacisatusansa basenda ne nama, kabili nabepaya ababomfi benu ku lupanga. Nine fye mpuswike, e co naishila mu kumweba ificitike.”

16 Ilyo uyu acili alelanda, umbi na o alishile kabili alandile ati: “Umulilo wa kwa Lesa* wacifuma mu muulu no koca impaanga shonse na babomfi benu! Nine fye mpuswike, e co naishila mu kumweba ificitike.”

17 Ilyo uyu acili alelanda, umbi na o aliishile kabili alandile ati: “Abena Kaldi+ bacakanikana mu mabumba yatatu, basansa ingamila shenu e lyo bashisenda, kabili bacipaya ababomfi benu ku lupanga. Nine fye nacipusuka, e co naishila mu kumweba ificitike.”

18 Ilyo uyu acili alelanda, umbi na o aliishile kabili alandile ati: “Abana benu abaume na bana benu abanakashi bacilalya no kunwa umwangashi mu ng’anda ya kwa munyinabo umukalamba pali bonse. 19 Mukupumikisha umwela uukalamba wacifuma ku matololo, kabili wacipuupila pa makoona 4 aya ng’anda, ica kuti yacibongolokela abana benu, e fyo bafwile. Nine fye mpuswike, e co naishila mu kumweba ificitike.”

20 Ilyo Yobo aumfwile ifi aliimine, alepula ifya kufwala fyakwe, abeya no mushishi wakwe. Lyena alifukeme afisha ne mpumi panshi 21 kabili alandile ati:

Yehova alimpeele,+ kabili Yehova ampokolola.

Ishina lya kwa Yehova nalilumbanishiwe.”

22 Nangu ca kuti ifi fyonse fyalimucitikile, Yobo tabembwike kabili tapeele Lesa umulandu.