א [Aleph]
119 Ba nsansa abashaba na mulandu mu myendele yabo,
Abenda mu mafunde ya kwa Yehova.+
2 Ba nsansa abakonka ifyo atwibukishako,+
Abamufwaya no mutima wabo onse.+
3 Tabacita ifyabipa;
Benda mu nshila shakwe.+
4 Mwalitweba ukuti
Tulekonka bwino bwino ifipope+ fyenu.
5 Nga nali uwashipa+
Pa kuti ndekonka ifyo mutweba!
6 Ninshi te kuti mbe ne nsoni+
Nga nasambilila amafunde yenu yonse.
7 Nkamulumbanya no mutima uwa kaele
Ilyo ndesambilila ubupingushi bwenu ubwalungama.
8 Nkalacita ifyo mutweba.
Mwikandekelesha.
ב [Beth]
9 Cinshi umulumendo engacita pa kuti asangulule inshila yakwe?
Afwile ukulakonka ifyo mulanda.+
10 Ndamufwaya no mutima wandi onse.
Mwileka nshe amafunde yenu.+
11 Ifyo mulanda mfisungila mu mutima wandi+
Pa kuti nimubembukila.+
12 Mwalilinga mwe Yehova ukumulumbanya;
Nsambilisheni ifipope fyenu.
13 Imilomo yandi ilasabankanya ubupingushi bwenu bonse.
14 Ndasekelela sana pa fyo munjibukishako+ amafunde yenu
Ukucila ifyo nsekelela pa fintu fimbi ifyacindama.+
15 Nkalatontonkanya sana pa fyo mutweba+
Kabili nkabika amano ku nshila+ shenu.
16 Nalitemwisha amafunde yenu.
Nshakalabe ifyo mulanda.+
ג [Gimel]
17 Beni ne cikuuku ku mubomfi wenu, pa kuti mbe no mweo
Kabili ndekonka ifyo mulanda.+
18 Nshibuleni amenso pa kuti mone bwino bwino
Ifintu ifisuma nga nshi ifyaba mu mafunde yenu.
19 Ndeumfwa kwati ndi mulebeshi mu calo.+
Mwimfisa amafunde yenu.
20 Ndefwaisha
Ukwishiba ubupingushi bwenu inshita yonse.
21 Mulakalipila abaituntumba,
Abatiipwa abashikonka amafunde yenu.+
22 Fumyeni pali ine umuseebanya no kupumya,
Pantu ndakonka ifyo mutwibukishako.
23 Na lintu intungulushi shaikala pamo, shalalanda ifibi pali ine,
Umubomfi wenu alatontonkanya sana pa fyo mutweba.
24 Nalitemwisha ifyo mutwibukishako,+
Fyaba nge mpanda+ mano shandi.
ד [Daleth]
25 Nalambalala mu lukungu.+
Nsungeni uwa mweo nga fintu mwalandile.+
26 Nalimwebele inshila shandi, kabili mwalinjaswike;
Nsambilisheni ifipope fyenu.+
27 Lengeni njishibe umwalola ifyo mutweba,
Pa kuti ndetontonkanya sana pa fisuma ifyo mwacita.+
28 Ndafilwa ukulaala pa mulandu wa bulanda.
Nkosheni nga fintu mwalandile.
29 Mfumyeni mu nshila ya bufi,+
Kabili nsambilisheni amafunde yenu pa kunanga icikuuku.
30 Nalisala+ inshila ya cishinka.
Nalishiba ukuti ubupingushi bwenu bwalilungama.
31 Nalambatila ku fyo mutwibukishako.+
Mwe Yehova, mwileka ifintu fimbipile.+
32 Nakulakonka sana inshila ya mafunde yenu
Pantu mulalenga mu mutima wandi mwaba incende apa kuti yekale.
ה [He]
33 Mwe Yehova,+ nsambilisheni pa kuti nde-enda mu nshila ya mafunde yenu,
Kabili e mo nakulaenda lyonse.+
34 Mpeeleni amaka ya kwiluka,
Pa kuti ndekonka amafunde yenu,
Kabili ndeyakonka no mutima wandi onse.
35 Ntungululeni mu nshila ya mafunde yenu,+
Pantu e mo nsansamukila.
36 Lengeni umutima wandi utemwishe ifyo mutwibukishako,
Mwilenga ulefwaisha ukunonka.+
37 Lengeni amenso yandi yaleke ukulolesha ifishawama;+
Lengeni nde-enda mu nshila yenu pa kuti mbe uwa mweo.
38 Fikilisheni ifyo mwalaya umubomfi wenu,
Pa kuti abantu balemutiina.
39 Fumyenipo ukuseebana uko ntiina,
Pantu ubupingushi bwenu busuma.+
40 Moneni ifyo natemwisha ifipope fyenu.
Nsungeni uwa mweo, pa mulandu wa kuti mwalilungama.
ו [Waw]
41 Lengeni imone ukutemwa kwenu ukushipwa mwe Yehova,+
Kabili mpususheni nga fintu mwalaile,+
42 Lyena nkaasuka ulelanda ifyabipa pali ine,
Pantu nalicetekela ifyo mulanda.
43 Mwifumya ifyebo fya cine mu kanwa kandi,
Pantu nalicetekela ubupingushi bwenu.
44 Nkalakonka amafunde yenu lyonse,
Umuyayaya.+
45 Kabili nakulaenda mu cifulo umo ningacingililwa,+
Pantu ndafwaya amafunde yenu pa kuti ndeyakonka.
46 Nkalanda pa fyo mutwibukishako pa ntanshi ya mfumu,
Kabili nshakomfwe insoni.+
47 Nalitemwa amafunde yenu,
Naliyatemwa nga nshi.+
48 Nkemisha amaboko yandi ku mafunde yenu ayo natemwa,+
Kabili nkalatontonkanya sana pa fyo mutweba ukulakonka.+
ז [Zayin]
49 Ibukisheni amashiwi mwaebele umubomfi wenu,
Ayalengele imbe ne subilo.
50 Ifyo mwanjebele e finsansamusha ilyo ndecula,+
Pantu ifyo mulanda fyalenga natwalilila ukuba no mweo.
51 Abaituntumba balampumya nga nshi.
Lelo nshaleka ukukonka amafunde yenu.+
52 Ndebukisha ubupingushi bwenu ubwabako ukutula na kale,+ mwe Yehova,
Kabili bulansansamusha.+
53 Ninkalipa nga nshi pa mulandu wa babifi,
Abasuula amafunde yenu.+
54 Amafunde yenu e nyimbo nyimba
Konse uko njikala.
55 Mu nshita ya bushiku ndebukisha ishina lyenu mwe Yehova,+
Pa kuti ndekonka amafunde yenu.
56 Ifi e fyo ncita lyonse,
Pantu ndakonka amafunde yenu.
ח [Heth]
57 Yehova e cakaniko candi;+
Nalilaya ukuti nkalakonka ifyo mulanda.+
58 Ndemupaapaata no mutima+ wandi onse;
Mbeleleni uluse+ nga fintu mwalaile.
59 Ninceeceeta inshila shandi,
Pa kuti mbweseshe amakasa yandi ku fyo mutwibukishako.+
60 Ndangufyanya kabili nshiwayawaya
Ukukonka amafunde yenu.+
61 Intambo sha babifi shalimpomba,
Lelo nshalaba+ amafunde yenu.
62 Pa kati ka bushiku ndema pa kuti imutashe+
Pa bupingushi bwenu ubwalungama.
63 Bonse abamutiina e banandi
Na bakonka amafunde yenu.+
64 Ukutemwa kwenu ukushipwa mwe Yehova, kwaba mwi sonde lyonse;+
Nsambilisheni amafunde yenu.
ט [Teth]
65 Mwe Yehova mwalicitila umubomfi wenu ifisuma,
Nga fintu mwalandile.
66 Nsambilisheni ifya kwiluka no kwishiba ifintu,+
Pantu nalicetekela amafunde yenu.
67 Ilyo nshilatendeka ukucula nalefuma mu nshila,
Lelo nomba ndakonka ifyo mulanda.+
68 Muli basuma+ kabili ifyo mucita na fyo fisuma.
Nsambilisheni amafunde yenu.+
69 Abaituntumba balalanda ifya bufi pali ine,
Lelo ine ndakonka amafunde yenu no mutima wandi onse.
70 Imitima yabo yalikunkuma,+
Lelo ine nalitemwisha amafunde yenu.+
71 Cili fye bwino ifi ndecula,+
Pa kuti nsambilile amafunde yenu.
72 Amafunde ayo mwabilisha yasuma kuli ine,+
Yalicila golde iingi na silfere.+
י [Yod]
73 Iminwe yenu yalimpangile kabili yalimumbile.
Lengeni ndeiluka,
Pa kuti nsambilile amafunde yenu.+
74 Abamutiina balasekelela nga bamona ine,
Pantu nacetekela ifyo mulanda.+
75 Mwe Yehova nalishiba ukuti ubupingushi bwenu bwalilungama+
No kuti ico munsalapwila ni co muli ba cishinka.+
76 Ukutemwa kwenu ukushipwa+ nakunsansamushe,
Nga fintu mwalaile umubomfi wenu.
77 Mbeleleni uluse pa kuti ntwalilile ukuba no mweo,+
Pantu nalitemwisha amafunde yenu.+
78 Abaituntumba nabaseebane,
Pantu balamfyenga apabula umulandu.
Lelo ine ntontonkanya sana pa mafunde yenu.+
79 Lekeni abamutiina babwelele kuli ine,
Abaishiba ifyo mutwibukishako.
80 Umutima wandi naube uwa kaele, ilyo ulekonka amafunde yenu,+
Pa kuti niseebana.+
כ [Kaph]
81 Ndafwaisha ukupususha kwenu,+
Pantu nacetekela ifyo mulanda.
82 Amenso yandi nayanaka ukulolela ukuti mufikilishe ifyo mwalaya+
Kabili ntila: “Ni lilali mukansansamusha?”+
83 Pantu naba nge nyambi iyauma ku cushi,
Lelo nshilaba+ amafunde yenu.
84 Ni nshiku shinga umubomfi wenu afwile ukulolela?
Ni lilali mukapingula abancusha?+
85 Abaituntumba banyimbila amacinga,
Abashikonka amafunde yenu.
86 Amafunde yenu yonse yalicetekelwa.
Abantu balancusha apabula umulandu; ngafweni!+
87 Kwashele fye panono nga balimfumishe mu calo,
Lelo ine nshalekele ukukonka amafunde yenu.
88 Nsungeni uwa mweo pa mulandu wa kutemwa kwenu ukushipwa,
Pa kuti ndekonka ifyo mutwibukishako ifyo mwanjeba.
ל [Lamed]
89 Icebo cenu mwe Yehova,
Cikabako umuyayaya mu muulu.+
90 Mukatwalilila ukuba aba cishinka mu nkulo shonse.+
Mwalilenga isonde lyaba ilyakosa pa kuti likatwalilile ukubako.+
91 Pa mulandu wa bupingushi bwenu, fyalitwalilila ukubako ukufika na lelo,
Pantu ifi fyonse filamubombela.
92 Nga nshatemenwe sana amafunde yenu,
Nga nalifwa pa mulandu wa bucushi.+
93 Nshakalabe amafunde yenu,
Pantu mulansunga+ uwa mweo pa mulandu wa kuti ndayakonka.
94 Ndi muntu wenu; mpususheni,+
Pantu ndafwaya amafunde+ yenu pa kuti ndeyakonka.
95 Ababifi balandolela pa kuti banjipaye,
Lelo ine ndatontonkanya sana pa fyo mutwibukishako.
96 Nalimona ukuti ifintu fyonse ifyapwililika fyalikwata apa kupeleela
Lelo amafunde yenu yena tayakwata apa kupelela.
מ [Mem]
97 Amafunde yenu naliyatemwa icine cine!+
Ndayatontonkanyapo sana akasuba konse.+
98 Amafunde yenu yalalenga naba uwa mano ukucila abalwani bandi,+
Pantu naba nayo umuyayaya.
99 Pali bonse abansambilisha tapaba nangu umo uwancila ukwiluka,+
Pantu ndatontonkanya sana pa fyo mutwibukishako.
100 Ifyo ncita filanga ukuti ndeluka sana ukucila abakalamba,
Pantu ndakonka amafunde yenu.
101 Nshifwaya ukwenda mu nshila yonse iyabipa,+
Pa kuti ndekonka ifyo mulanda.
102 Nshaleka ukukonka ubupingushi bwenu,
Pantu mwalinsambilisha.
103 Ifyo mulanda fyalilowa pa lulimi lwandi,
Fyalilowa ukucila ubuci mu kanwa kandi!+
104 Amafunde yenu yalalenga ndeiluka+ ilyo ndecita ifintu.
E co napatila inshila+ yonse iya bufi.
נ [Nun]
105 Icebo cenu ni nyali iisanika apo amakasa yandi yalenyanta,
Kabili lubuuto ulusanika mu nshila yandi.+
106 Nindapa umulapo kabili nkaufikilisha,
Umulapo wa kulakonka ubupingushi bwenu ubwalungama.
107 Nincula nga nshi.+
Mwe Yehova, nsungeni uwa mweo nga fintu mwalandile.+
108 Mwe Yehova, pokeleleni imituulo yandi iya kuitemenwa iya kumulumbanya,+
Kabili nsambilisheni ubupingushi bwenu.+
109 Lyonse ubumi bwandi buba mu kapoosa mweo,
Lelo nshalaba amafunde yenu.+
110 Ababifi bateya iciteyo pa kuti banjikate,
Lelo nshaleka ukukonka amafunde yenu.+
111 Nshakaleke ukukonka ifyo mutwibukishako,
Pantu e filenga umutima+ wandi ulesekelela.
112 Ninsalapo ukulakonka amafunde yenu
Ubumi bwandi bonse, mpaka nkafwe.
ס [Samekh]
113 Nalipata aba mitima ibili,+
Lelo nalitemwa amafunde yenu.+
114 Nimwe icifulo candi ica kuubamo kabili inkwela yandi,+
Pantu nacetekela ifyo mulanda.+
115 Ntalukeni mwe bacita ifyabipa,+
Pa kuti ndekonka amafunde ya kwa Lesa wandi.
116 Ngafwilisheni nga fintu mwalaile,+
Pa kuti ntwalilile ukuba no mweo;
Nalimucetekela, e ico mwileka bansaalule.+
117 Ngafwilisheni pa kuti mpusuke;+
Lyena, lyonse nkalabika amano ku mafunde yenu.+
118 Bonse abashikonka amafunde+ yenu mulabakaana,
Pantu ba bucenjeshi kabili ba bufi.
119 Ababifi bonse aba pano isonde mulabapoosa nga munyela iishakwata incito.+
E co natemenwa ifyo mutwibukishako.
120 Umubili wandi ulatutuma pa mulandu wa kuti ndamutiina;
Ndatiina ubupingushi bwenu.
ע [Ayin]
121 Nimpingula mu mulinganya kabili nincita icalungama.
Mwileka ingwile mu minwe ya bafwaya ukuncusha!
122 Layeni ukuti mukaafwa umubomfi wenu;
Mwileka abaituntumba bancushe.
123 Amenso yandi nayanaka pa mulandu wa kulolela ukupususha+ kwenu
No bulayo bwenu ubwalungama.+
124 Langeni umubomfi+ wenu ukutemwa ukushipwa,
Kabili nsambilisheni amafunde yenu.+
125 Ndi mubomfi wenu. Mpeeleni amaka ya kwiluka,+
Pa kuti njishibe ifyo mutwibukishako.
126 Inshita ya kuti Yehova acitepo cimo yafika,+
Pantu tabakonkele amafunde yenu.
127 E co natemenwa sana amafunde yenu
Ukucila golde,+ nangu fye ni golde iisuma.
128 Imona fyonse ifyo mutweba ukulakonka ukuti fyalilungama;+
Nalipata inshila+ yonse iya bufi.
פ [Pe]
129 Ifyo mutwibukishako fisuma nga nshi.
E co mfikonkela.
130 Ifyo mulanda nga bafilondolola filalenga abantu baishiba,+
Filalenga abashaishiba ifingi bailuka.+
131 Na-asamuna akanwa kandi kabili naisha icefu,
Pantu ndefwaisha amafunde yenu.+
132 Alukileni kuli ine no kumbelela uluse,+
Mpeeleni ubupingushi ubo mwasungila abatemwa ishina lyenu.+
133 Lekeni ifyo mulanda filentungulula, pa kuti amakasa yandi yale-enda umwacingililwa;
Mwileka icabipa nangu cimo cilentungulula+
134 Mpokololeni ku bancusha,
Kabili nakulakonka amafunde yenu.
135 Lengeni icinso cenu cibalikile umubomfi wenu,+
Kabili nsambilisheni amafunde yenu.
136 Amenso yandi yalalukusha ifilamba
Pantu abantu tabakonka amafunde yenu.+
צ [Tsade]
137 Mwe Yehova,+ mwalilungama,
No bupingushi bwenu bwalilungama.+
138 Ifyo mutwibukishako fyalilungama
Kabili fyalicetekelwa nga nshi.
139 Ndafwaisha ukucita ifyo mufwaya, ica kuti ng’umfwa kwati mu mubili wandi muli umulilo+
Pantu abalwani bandi balisuula ifyo mulanda.
140 Ifyo mulanda fyalisanguluka,+
Kabili umubomfi wenu alifitemwa.+
141 Abantu bamona ukuti nshacindama kabili balinsuula;+
Lelo nshalaba ifipope fyenu.
142 Ubulungami+ bwenu bwa muyayaya,
Kabili amafunde yenu e cine.+
143 Nangu ukucula na mafya fyaisa pali ine,
Nshileka ukutemwa amafunde yenu.
144 Ifyo mutwibukishako fyalilungama umuyayaya.
Mpeeleni amaka ya kwiluka+ pa kuti ntwalilile ukuba no mweo.
ק [Qoph]
145 Nalilila kuli imwe no mutima wandi onse. Njasukeni mwe Yehova.
Nkalakonka amafunde yenu.
146 Nalilila kuli imwe; mpususheni!
Nkalakonka ifyo mutwibukishako.
147 Mbuuka ku macaca pa kuti ndilile kuli imwe ukuti mungafwe,+
Pantu nacetekela ifyo mulanda.
148 Amenso yandi yashibatuka pa kati ka bushiku,
Pa kuti ntontonkanye sana pa fyo mulanda.+
149 Umfweni ifyo ndelanda pa mulandu wa kuti mwaliba no kutemwa ukushipwa.+
Mwe Yehova, nsungeni uwa mweo pantu muli bamulinganya.
150 Abacita ifya nsoni bapalama;
Balitaluka sana ku mafunde yenu.
151 Mwaba mupepi mwe Yehova,+
Kabili amafunde yenu yonse e cine.+
152 Kale sana nasambilile pa fyo mutwibukishako,
Ukuti mwalifibikileko pa kuti fikabeko umuyayaya.+
ר [Resh]
153 Moneni ifyo ndecula kabili mpususheni;+
Pantu nshalaba amafunde yenu.
154 Ncingilileni kabili mpususheni;+
Nsungeni uwa mweo nga fintu mwalaile.
155 Ipusukilo lyaba ukutali sana na babifi,
Pantu tabafwaya amafunde yenu.+
156 Mwalikwatisha uluse mwe Yehova.+
Nsungeni uwa mweo pantu muli bamulinganya.
157 Abancusha na balwani bandi bengi;+
Lelo nshaleka ukukonka ifyo mutwibukishako.
158 Imona aba bucenjeshi ukuti ba bunani,
Pantu tabakonka ifyo mulanda.+
159 Moneni ifyo natemwa amafunde yenu!
Mwe Yehova, nsungeni uwa mweo pantu mwaliba no kutemwa ukushipwa.+
160 Icebo cenu conse e cine,+
Ubupingushi bwenu bonse bwalilungama kabili bukabako umuyayaya.
ש [Sin] nelyo [Shin]
161 Intungulushi shilancusha+ apabula umulandu,
Lelo nalicindika sana ifyo mwalanda.+
162 Ndasekelela pa mulandu wa fyo mulanda+
Nga filya umuntu asekelela nga asanga ifipe ifingi, ifya bantu abo bacimfishe.
163 Nalipata ubufi, nalibupatisha.+
Nalitemwa amafunde yenu.+
164 Ndamulumbanya imiku 7 cila bushiku
Pa mulandu wa bupingushi bwenu ubwalungama.
165 Abatemwa amafunde+ yenu balaba sana no mutende;
Kabili takuli icingalenga baipununa.
166 Nalicetekela ukuti mulapususha mwe Yehova,
Kabili ndasunga amafunde yenu.
167 Ndakonka ifyo mutwibukishako,
Kabili nalifitemwa nga nshi.+
168 Ndakonka amafunde yenu ne fyo mutwibukishako,
Pantu muleshiba fyonse ifyo ncita.+
ת [Taw]
169 Lekeni ukupaapaata kwandi ukwa kuti mungafwe kufike kuli imwe, mwe Yehova.+
Nengeni njiluke+ ukulingana ne fyo mwalanda.
170 Ukupaapaata kwandi ukwa kuti mumbelele uluse, nakwise pa ntanshi yenu.
Mpususheni nga fintu mwalaile.
171 Lekeni imilomo yandi ilemulumbanya,+
Pantu mulansambilisha amafunde yenu.
172 Ululimi lwandi nalwimbe pa fyo mulanda,+
Pantu amafunde yenu yonse yalilungama.
173 Ukuboko kwenu nakuipekanye ukungafwa,+
Pantu nasalapo ukulakonka amafunde yenu.+
174 Ndafwaisha ukuti mumpusushe mwe Yehova,
Kabili nalitemwisha amafunde yenu.+
175 Lekeni mbe no mweo pa kuti ndemulumbanya;+
Ubupingushi bwenu nabungafwe.
176 Nde-endauka nge mpaanga iilubile.+ Fwayeni umubomfi wenu,
Pantu nshalaba amafunde yenu.+