Seken Leta blong Pita

3 Ol gudfala fren. Hemia seken leta blong mi we mi raetem i kam long yufala. Mo long tufala leta ya, mi stap talem bakegen ol tok blong wekemap tingting blong yufala, blong mekem yufala i tingting gud,+ 2 blong yufala i tingbaot bakegen ol tok we ol tabu profet oli talemaot bifo, mo loa blong Masta mo Sevia we ol aposol* oli bin talemaot long yufala. 3 Fastaem yufala i mas save samting ya: Long ol las dei, ol man blong jikim man bambae oli kam wetem ol tok jik blong olgeta, mo oli mekem ol nogud samting we olgeta nomo oli wantem.+ 4 Mo oli talem se: “?Olsem wanem? ?Hem i promes finis blong kam,* be hem i stap wea?+ Ol olfala blong yumi oli lus evriwan finis, be i no gat wan samting i jenis. I stat bifo olgeta, taem God i mekem wol ya i kam kasem tede, evri samting oli stap sem mak nomo.”+

5 Olgeta oli stap tok olsem be oli no wantem tingbaot we longtaem bifo, God i tok, nao heven mo wol tufala i kamaot, mo graon i stap strong antap long wota mo hem i stap long medel blong wota.+ 6 Ol samting ya oli spolem wol ya we i stap bifo, long wota ya we i ron bigwan.+ 7 Sem tok ya i holemtaet heven mo wol blong naoia blong faea i kasem tufala, mo tufala i stap olsem gogo kasem dei ya blong jajmen mo blong spolem ol man we oli no obei long God.+

8 Ol gudfala fren, i gat wan poen we yufala i mas tingbaot. Long lukluk blong Jehova,* wan dei i sem mak long wan taosen yia, mo wan taosen yia i sem mak long wan dei.+ 9 Sam man oli ting se Jehova* i slo blong mekem promes blong hem i kamtru, be i no olsem.+ Hem i gat longfala tingting long yufala, from we hem i no wantem se wan man i ded, hem i wantem se olgeta man oli tanem tingting blong olgeta.+ 10 Be dei blong Jehova*+ bambae i kam olsem we man blong stil i kam.+ Long dei ya, bambae i gat bigfala noes, nao heven bambae i lus.+ Mo ol samting long heven mo long wol bambae oli hot we oli hot bitim mak nao oli ronaot, mo wol tu wetem evri wok long hem bambae oli kam long klia ples.+

11 !From we olgeta samting ya bambae oli lus olsem, yufala i mas jekemgud se yufala i wanem kaen man! Yufala i mas man we fasin blong laef blong yufala i tabu, mo yufala i mas soemaot long ol wok blong yufala se yufala i stap fasgud long God, 12 mo long semtaem yufala i mas wet long dei blong Jehova* we bambae i kam,+ mo yufala i mas tingbaot dei ya oltaem.* Long dei ya, bambae faea i kakae heven we i finisim gud,+ mo ol samting long heven mo long wol bambae oli ronaot from we oli hot tumas. 13 Be hem i promes se bambae i gat niufala heven mo wan niufala wol we stret fasin nomo bambae i stap long tufala.+ Mo yumi stap wet long ol samting ya.+

14 Taswe ol gudfala fren, taem yufala i stap wet long ol samting ya, yufala i mas mekem bes blong yufala blong bambae hem i luk we i no gat doti long yufala, mo yufala i no gat rong, mo yufala i gat pis.+ 15 Masta blong yumi i gat longfala tingting blong wet, ale yufala i mas luk fasin ya blong hem olsem janis blong God i sevem yufala, olsem gudfala brata ya blong yumi Pol i talem long leta we hem i raetem i kam long yufala, folem waes we God i givim long hem.+ 16 Oltaem long ol leta blong hem, hem i stap tokbaot ol samting ya. Be i gat sam tok long ol leta ya we oli had tumas blong kasemsave long olgeta. Mo sam man we oli no gat hed* mo samfala we tingting blong olgeta i no stret, oli tanem mining blong ol tok ya i kam narafala, olsem we oli stap mekem long ol narafala Tok Blong Baebol. Long fasin ya oli stap spolem olgeta, mo bambae oli lus.

17 Taswe ol gudfala fren, from we yufala i save finis olgeta samting ya, yufala i mas lukaot gud, blong ol nogud samting we ol man blong brekem loa oli mekem, oli no pulum yufala i go krangke wetem olgeta, nao bambae yufala i aot long sef ples ya we yufala i stap long hem, yufala i foldaon.+ 18 Masta mo Sevia blong yumi Jisas Kraes, i kaen tumas. From samting ya, oltaem yufala i mas gohed moa blong kasem save long fasin ya blong hem, mo yufala i mas gohed blong save hem moa. I gud yumi givim glori long hem, i stat naoia gogo i no save finis. Amen.