?Yu Yu “Soemaot Fasin Blong Stap Wet Long God”?

“Yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem [“ol wok blong fasgud long God,” NW ] . . . Mo yufala i mas gohed blong wok blong mekem Dei ya i kamtru kwik.”​—2 PITA 3:​11, 12.

1, 2. ?Wanem pijatok i soemaot fasin we yumi mas gat taem yumi “stap wet” long dei blong Jeova?

LONG tingting blong yu, pijarem wan famle we oli singaot sam fren oli kam kakae long haos blong olgeta. I klosap taem nao we ol fren ya bambae oli kam. Mama i bisi blong rerem ol kakae. Papa mo ol pikinini oli klinim ples finis, nao oli stap putumgud ol samting. Olgeta evriwan oli hapi. Yes, ful famle ya i wet wetem glad se ol fren blong olgeta oli kam. Oli wantem tumas blong harem gud long wan gudfala kakae mo storian we bambae oli serem wanples.

² Yumi we yumi Kristin, yumi stap wet long wan samting we i impoten moa. ?Wanem samting ya? !Hemia ‘Dei blong God’ we yumi stap wet long hem! Bifo we dei ya i kamtru, yumi mas mekem olsem profet Maeka we i talem se: “Mi mas gohed blong lukaot Jeova. Bambae mi soemaot fasin blong stap wet long God ya we i save sevem mi.” (Maeka 7:7, NW ) ?Hemia i min se yumi sidaon nomo, yumi wet? Nogat. I gat plante wok blong mekem.

 3. ?Folem ol tok blong 2 Pita 3:​11, 12, wanem fasin we ol Kristin oli mas gat?

³ Aposol Pita i halpem yumi blong gat stret tingting taem yumi stap wet. Hem i se: “Yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem [“ol wok blong fasgud long God,” NW ] . . . Mo yufala i mas gohed blong wok blong mekem Dei ya i kamtru kwik.” (2 Pita 3:​11, 12) Makemgud se hemia i no wan kwestin we Pita i stap askem, be hem i wan tok save we hem i stap givim. Tabu spirit i pulum Pita blong raetem tufala leta blong hem, mo long tufala leta ya hem i talem ol fasin mo wok we ol Kristin oli mas mekem. Hem i givim advaes ya tu se oli mas ‘tabu mo mekem ol fasin we God i wantem.’ Taem hem i raetem ol tok ya, samting olsem 30 yia i pas finis we Jisas Kraes i bin tokbaot saen we bambae i soemaot se klosap ‘wol ya i finis.’ Be ol Kristin oli no mas kam slak, oli mas stap wekap. (Matiu 24:3) Oli mas gohed blong stap ‘wet long Dei ya blong [Jeova], mo oli mas gohed blong wok blong mekem Dei ya i kamtru kwik.’

 4. ?Tok ya ‘gohed blong wok blong mekem Dei blong Jeova i kamtru kwik,’ i min se yumi mekem wanem?

⁴ I tru se, i no yumi man we bambae i mekem dei blong Jeova i “kamtru kwik” from we yumi ‘no save dei mo aoa’ we Jisas Kraes bambae i kam blong jajem ol enemi blong Papa blong hem. (Matiu 24:36; 25:13) Wan buk i talem stamba mining blong tok ya “mekem i kamtru kwik” we Pita i yusum long ples ya, se “ ‘no westem taem.’ From samting ya, tok ya i karem tingting ya se man i ‘strong blong wok, i stap bisi, mo i putum tingting blong hem i stap nomo long wan samting.’ ” Yes, Pita i stap pulum ol Kristin brata blong hem blong oli wantem tumas blong luk dei ya blong Jeova. Oli save mekem olsem, sipos oli holem dei ya i stap oltaem long tingting blong olgeta. (2 Pita 3:​12) Yumi tu, yumi mas wokem wan tingting olsemia, from we “bigfala dei blong Jeova we bambae i mekem ol man oli fraet” i klosap tumas naoia.​—Joel 2:​31, NW.

Yumi Wet Mo Long Semtaem Yumi “Mas Tabu”

 5. ?Wanem bambae i soemaot se yumi wantem tumas blong luk ‘dei blong Jeova’?

⁵ Sipos yumi wantem tumas blong laef tru long dei blong Jeova, yumi mas soemaot samting ya long klia ples. Hemia i min se yumi mas ‘tabu mo yumi mas mekem ol fasin we God i wantem.’ Ating tok ya ‘yumi mas tabu’ i mekem yumi tingbaot advaes ya blong Pita we i se: “Yufala i mas obei long God. Yufala i no letem ol samting ya we yufala i wantem bifo, taem we yufala i no save hem yet, oli pulum tingting blong yufala bakegen. God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala i mas klin gud long olgeta samting we yufala i mekem. Long Baebol God i talem se, ‘Yufala i mas tabu, yufala i mas klin gud, olsem we mi mi tabu, mi klin gud.’ ”​—1 Pita 1:​14-​16.

 6. ?Blong stap tabu, yumi mas mekem wanem?

⁶ Blong stap olsem man we i tabu i min se yumi mas klin long bodi, long tingting, long fasin, mo long wosip blong yumi. ?Yumi wanwan we yumi holem nem blong Jeova, yumi traehad blong stap tabu, mekem se bambae yumi rere taem “dei blong Jeova” i kamtru? I no isi blong holem fasin klin olsemia, from we long wol tede, ol gudfala fasin oli stap lus hareap. (1 Korin 7:​31; 2 Timoti 3:​13) ?Yumi luk se fasin blong yumi wetem fasin blong wol ya tufala i defren bigwan? Sipos no, ating yumi mas tinghevi long saed ya. ?Nating se ol rul we yumi stap folem long saed blong gudfala fasin oli hae moa bitim hemia blong wol, yumi luk se sloslo yumi stap lego ol rul ya? Sipos i olsem, yumi mas mekem wan samting kwiktaem blong stretem yumi wan mo mekem God i glad.

7, 8. (a) ?Wanem samting i save mekem we yumi no moa tinghae long ol fasin we oli “tabu”? (b) ?Maet yumi nidim blong mekem wanem samting blong stretem yumi wan?

⁷ Naoia ol doti pija long saed blong seks oli kam antap bigwan long Intenet, mo man i save haed isi nomo blong lukluk ol pija ya long kompiuta. From samting ya, plante moa man we maet bifo oli neva luk ol doti pija ya, be naoia oli save go faenem ol pija ya isi nomo. Olsem wan dokta i talem, ol man oli save faenem “plante defdefren rod blong mekem rabis fasin long saed blong seks, we lis blong olgeta i no gat en blong hem.” Sipos yumi lukluk ol doti samting ya long Intenet, yumi stap brekem oda blong Baebol we i talem se yumi “no mas tajem ol samting we i doti.” (Aesea 52:11) ?Sipos yumi stap brekem oda ya, yu ting se yumi rili stap wok blong ‘mekem dei ya blong Jeova i kamtru kwik’? ?No maet long tingting blong yumi, yumi stap seftem dei ya i go moa, yumi stap tingting se i oraet nomo sipos yumi fulumap hed blong yumi wetem ol doti samting ya, from we i gat taem yet blong mekem yumi klin bakegen? Sipos yumi gat tingting ya, yumi mas hareap naoia blong askem long Jeova blong i ‘blokem yumi blong yumi no folem ol fasin ya we i no gat wan gudfala samting i save kamaot long hem, mo i mekem we yumi gat gudfala laef we i folemgud ol fasin blong hem.’​—Ol Sam 119:37.

⁸ Bighaf blong ol Witnes blong Jeova, ol yangfala wetem ol olfala tu, oli holem strong long ol haefala rul blong God mo oli no letem wol ya i winim olgeta blong mekem ol nogud fasin. Olgeta ya oli save se yumi laef long wan taem we i impoten tumas. Oli tingbaot woning ya blong Pita se “Dei blong Masta blong yumi bambae i kam olsem we man blong stil i kam.” From samting ya oli gohed blong mekem ol fasin we oli “tabu.” (2 Pita 3:​10) Ol wok mo fasin blong olgeta i pruvum se oli stap ‘wet mo gohed blong wok blong mekem dei ya i kamtru kwik.’a

Yumi Wet Mo Yumi Mekem “Ol Wok Blong Fasgud Long God”

 9. ?Fasin blong fasgud long God i mas pusum yumi blong mekem wanem?

⁹ Sipos yumi no wantem fogetem dei blong Jeova, i gud we yumi mekem “ol wok blong fasgud long God.” Tok ya “fasgud long God” i minim fasin blong ona bigwan long hem. Ona ya nao bambae i pusum yumi blong mekem ol samting we God i glad long hem. Yumi wantem stap tru long Jeova, ale samting ya i pusum yumi blong mekem ol wok ya blong fasgud long hem. Yes, God i “wantem sevem olgeta man, mo i wantem we olgeta man bambae oli save trutok blong hem.” (1 Timoti 2:4) “Hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Taswe, fasin ya blong fasgud long God i mas pulum yumi blong wantem traehad moa blong halpem ol man blong oli save Jeova mo folem ol fasin blong Hem.​—Efesas 5:1.

10. ?From wanem yumi mas lukaot long fasin blong ‘wantem tumas blong kam rijman’?

¹⁰ Sipos yumi lukaot Kingdom fastaem, laef blong yumi bambae i fulap long ol wok blong fasgud long God. (Matiu 6:​33) Blong lukaot Kingdom fastaem, yumi mas skelemgud tingting we yumi gat long saed blong mane mo ol sas samting long laef. Jisas i givim woning ya se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stamba blong prapa laef blong man i no stap long ol samting ya.” (Luk 12:15) I tru se, maet i had long yumi blong tingbaot se fasin blong lavem mane i save mekem yumi blaen long saed blong spirit. Be i impoten we yumi makem se fasin blong ‘tingting tumas from laef long wol ya, mo fasin blong wantem tumas blong kam rijman’ oli save “blokem tok” blong God. (Matiu 13:22) Maet i no isi blong kasem mane we yumi nidim blong laef. From samting ya, long sam ples long wol plante man oli tingting se sipos oli wantem gat wan laef we i moagud, oli mas muv i go long wan kantri we i rij moa. Ale, maet oli lego ol famle blong olgeta blong longtaem. Sam man blong God tu oli gat tingting olsemia. Taem oli go long narafala kantri blong wok, maet oli naf blong givim wan gudfala haos mo plante samting long famle blong olgeta. ?Be olsem wanem? ?Famle we i stap long hom, hem i gohed gud long saed blong spirit? ?Sipos i no gat hed blong famle blong lidimgud olgeta, bambae oli strong naf long saed blong spirit blong stap sef long dei blong Jeova?

11. ?Olsem wanem wan man we i go faenem wok long nara kantri i soem se fasin fasgud long God i moa impoten i bitim mane?

¹¹ Wan man Filipin we i aot long kantri blong hem blong go wok long Japan, i lanem trutok blong Baebol wetem ol Witnes blong Jeova long kantri ya. Taem hem i luk wok we Baebol i talem se hed blong famle i mas mekem, hem i luksave se hem i mas halpem famle blong hem blong wosipim Jeova. (1 Korin 11:3) Waef blong hem i agensem strong, niufala bilif blong man blong hem. Hem i no wantem nating se man blong hem i kamhom blong tijim ol bilif blong Baebol long famle, be i wantem nomo se man ya i gohed blong sanem mane i kam long olgeta. Be man ya i wari long famle blong hem mo i tingbaot se taem blong yumi naoia i impoten tumas, ale hem i gohom. Gudfala frut i kamaot from we hem i gat longfala tingting mo i soem lav long famle blong hem. Sloslo, famle blong hem i joen long trufala wosip, mo woman blong hem i kam wan fultaem paenia.

12. ?From wanem yumi mas putum ol samting long saed blong spirit fasples long laef blong yumi?

¹² Laef blong yumi naoia i laenap gud wetem pijatok ya: Tingbaot se yu stap long wan stori haos we faea i stap kakae hem. ?Yu ting se i waes sipos yu resis olbaot blong hivimap olgeta sas samting blong haos ya we klosap bambae i foldaon? Nogat. Ating i moa impoten sipos yumi resis olbaot blong traem sevem ol man we oli stap insaed long haos ya, famle blong yumi mo yumi wan. ?I tru no? Yes, rabis wol ya i stap go blong i lus olgeta, taswe laef blong plante man i stap long denja. Sipos yumi luksave samting ya, i sua se bambae yumi putum ol samting blong spirit fastaem mo bambae yu wok strong blong talemaot Kingdom we i save sevem laef blong ol man.​—1 Timoti 4:​16.

Yumi Mas Stap We Yumi “No Gat Doti”

13. ?Taem dei blong Jeova i kamtru, i gud we God i faenem yumi se yumi olsem wanem?

¹³ Pita i soemaot se i impoten blong gat wanem fasin taem yumi stap wet, i se: “Ol fren, taem yufala i stap wet long ol samting ya, yufala i mas traehad blong bambae [God] i faenem yufala, we yufala i no gat doti, yufala i no gat rong, mo yufala i stap long pis.” (2 Pita 3:​14, NW ) I tru, afta we Pita i tokbaot fasin tabu mo ol wok blong fasgud long God, hem i soemaot se i impoten blong Jeova i faenem yumi, we yumi klin long fes blong Hem from blad blong Jisas. (Revelesen 7:​9, 14) Blong mekem olsem, wan man i mas soem bilif long sakrefaes blong Jisas mo i mas kam wan man blong Jeova we i givim laef blong hem long God mo i tekem baptaes.

14. ?Sipos yumi wantem stap we i “no gat doti” long yumi, yumi mas mekem wanem?

¹⁴ Pita i talem strong se yumi mas traehad blong stap we i “no gat doti” long yumi. ?Yumi stap lukaot gud se ol Kristin fasin mo laef blong yumi i klingud, we wol ya i no sakem doti long hem? Taem yumi luk wan doti long klos blong yumi, yumi traem blong karemaot. Sipos hemia wan klos we yumi laekem tumas, ating bambae yumi wasemaot doti ya kwiktaem nomo. ?Olsem wanem long Kristin klos blong yumi? ?Sipos yumi gat sam slak fasin no sam wei we oli nogud, bambae yumi hareap blong sakemaot olgeta?

15. (a) ?From wanem ol man Isrel oli mas somap ol tasel oli hanghang long klos blong olgeta? (b) ?From wanem ol man blong Jeova tede oli defren long ol man blong wol?

¹⁵ Ol man Isrel bifo oli mas “somap ol tasel oli stap hanghang long ol kona blong ol klos” blong olgeta, mo oli mas putum “blu rop long ol tasel ya.” ?From wanem? Hemia blong mekem olgeta oli tingbaot ol loa blong Jeova, oli obei long hem, mo oli “kam tabu” long fored blong God. (Namba 15:38-​40) Tede, yumi ol man blong Jeova yumi defren long ol man blong wol from we yumi folem ol loa mo rul blong God. Sam eksampol blong samting ya, se yumi no folem ol doti fasin blong seks, yumi respektem blad we i tabu, mo yumi no wosipim aedol long enikaen fasin. (Ol Wok 15:28, 29) Plante man oli respektem yumi from strong tingting we yumi soem blong stap longwe long ol samting we i save mekem yumi doti long ae blong God.​—Jemes 1:​27.

Yumi Mas Stap We Yumi “No Gat Rong”

16. ?Yumi mas mekem wanem sipos yumi wantem stap we yumi “no gat rong” long yumi?

¹⁶ Pita i talem tu se bambae God i mas faenem we yumi “no gat rong.” ?Hemia i minim wanem? Plante taem, wan doti i isi blong ravemaot no wasemaot, be wan rong hem i defren. Hem i minim wan samting insaed long yumi, long hat blong yumi, we i nidim blong stretem. Aposol Pol i givim advaes long ol Kristin long Filipae se: “Yufala i mas mekem olgeta samting long fasin ya we yufala i no toktok tumas, mo yufala i no raorao long yufala. Nao long fasin ya, bambae tingting blong yufala i klin gud, mo i no gat man we i gat poen agens long yufala. Bambae yufala i olsem ol pikinini blong God we yufala i stret gud olgeta. Mo bambae yufala i givimaot tok ya blong laef long ol man ya we oli gat ol krangke fasin, mo oli agens long evri samting. Yufala i mas saenaot long medel blong olgeta.” (Filipae 2:​14, 15) Sipos yumi folem advaes ya, bambae yumi lukaot blong no toktok smol agensem narafala mo rao wetem olgeta. Mo bambae yumi meksua se tingting we i pusum yumi blong mekem wok blong Jeova i klingud, i stret. Lav we yumi gat long Jeova mo long ol man bambae i pusum yumi blong talemaot “gud nius ya blong Kingdom.” (Matiu 22:35-​40; 24:14, NW ) Mo tu, bambae yumi gohed blong talemaot gud nius, nating sipos ol man oli ting se yumi stap westem taem mo paoa blong yumi blong halpem ol man blong save God mo Tok blong hem, Baebol.

17. ?Wanem samting nao i mas pusum yumi blong wantem kasem wok insaed long Kristin kongregesen?

¹⁷ Yumi wantem tumas blong stap olsem man we i “no gat rong” long fes blong God. Taswe, i gud yumi lukluk ol samting we yumi stap traehad blong kasem long laef mo tingbaot wanem risen nao i stap pusum yumi blong traehad from ol samting ya. Yumi lego wol ya finis, i min se yumi no moa mekem samting blong yumi wan nomo, olsem fasin blong wantem kam rijman no kasem wan hae posisen. Sipos yumi wantem kasem wan wok insaed long Kristin kongregesen, tingting we i pusum yumi long saed ya i mas stretgud mo i mas stanap long lav we yumi gat long Jeova mo ol man. Yumi glad taem ol man we oli strong long saed blong spirit, oli traehad blong kasem “wok blong elda long kongregesen” from we oli glad mo oli gat tingting daon blong mekem wok blong Jeova mo blong ol Kristin brata blong olgeta. (1 Timoti 3:1, NW ; 2 Korin 1:​24) Yes, ol man we oli stret blong tekem wok blong elda oli ‘lukaot gud long ol man we God i givim long olgeta . . . we tingting blong olgeta i glad blong mekem, olsem we God i wantem. I nogud oli mekem blong kasem pei nomo. Oli mas mekem from we oli glad long hem. Bambae oli no kam olsem bigfala masta blong olgeta ya we God i putum olgeta long han blong olgeta. Oli mas soemaot ol stret fasin long ol man . . . blong oli save folem, olsem we ol sipsip oli folem man blong lukaot long olgeta.’​—1 Pita 5:​1-4.

Yumi Mas “Stap Long Pis”

18. ?Ol man oli savegud ol Witnes blong Jeova from wanem fasin blong olgeta?

¹⁸ Laswan samting we Pita i talem, hemia se yumi mas “stap long pis.” Blong mekem laef blong yumi i laenap wetem tok ya, yumi mas gat pis wetem Jeova mo ol man raonabaot long yumi. Pita i talem se i impoten tumas we ‘yumi lavlavem yumi’ mo holem pis wetem ol Kristin brata sista blong yumi. (1 Pita 2:​17; 3:​10, 11; 4:8; 2 Pita 1:​5-7) Sipos yumi wantem stap long pis, yumi mas lavlavem yumi. (Jon 13:34, 35; Efesas 4:​1, 2) Lav mo pis i kamaot klia long taem blong ol intenasnal asembli blong yumi. Long wan bigfala asembli long Kosta Rika long yia 1999, plante Witnes oli go long epot blong welkamem ol Kristin brata sista we oli kam long narafala kantri. Wan man we i gat stoa blong hem long epot i kros from we ol lokol Witnes ya we oli plante tumas, oli blokem ples nao ol man oli no save luk stoa blong hem. Be long nekis dei, taem hem i stap wajem ol Witnes ya we oli welkamem gud ol narafala Witnes nating se oli no save olgeta, hem i luk se oli gat lav mo pis. Ale, long laswan dei, bisnes man ya tu i joen wetem ol Witnes blong welkamem ol brata sista we oli kam long plen, mo hem i askem wan Witnes blong stadi Baebol wetem hem.

19. ?From wanem i impoten tumas we yumi holem pis wetem ol Kristin brata sista blong yumi?

¹⁹ Traehad we yumi mekem blong holem pis wetem ol Kristin brata sista blong yumi, i save soemaot sipos yumi rili stap wet mo yumi wantem tumas blong luk dei blong Jeova mo niufala wol we hem i promes long hem. (Ol Sam 37:11; 2 Pita 3​:13) Tingbaot. ?Sipos yu faenem i hadwok blong stap long pis wetem wan Kristin brata, yu save pijarem yu wan wetem brata ya long Paradaes? ?Bambae yutufala i save stap long pis? Sipos wan brata i gat wan poen agens long yu, yu mas hareap blong “go stretem poen ya wetem brata blong yu blong yutufala i fren gud” bakegen. (Matiu 5:​23, 24) I impoten tumas blong mekem olsem sipos yu wantem stap long pis wetem Jeova.​—Ol Sam 35:27; 1 Jon 4:​20.

20. ?Wanem ol samting we bambae yumi mekem sipos yumi gat fasin ya blong “stap wet long God”?

²⁰ ?Yu yu ‘stap wet long Dei blong God blong i kamtru, mo yu stap gohed blong wok blong mekem Dei ya i kamtru kwik’? Taem yumi stap tabu long wol ya we i doti, yumi soemaot se yumi rili wantem we rabis fasin i lus. Mo tu, taem yumi mekem ol wok blong fasgud long God, yumi soemaot se yumi wantem we dei blong Jeova i kam mo yumi wantem laef aninit long rul blong Kingdom. Mo ol man oli luksave se yumi stap wet blong laef long niufala wol we pis nomo i stap long hem, from we naoia finis yumi man blong mekem pis wetem ol Kristin brata blong yumi. Long fasin ya, yumi soem se yumi “stap wet long God” mo yumi stap ‘gohed blong wok blong mekem Dei blong Jeova i kamtru kwik.’

[Futnot]

?Yu Yu Tingbaot?

• ?Tok ya ‘wet mo gohed blong wok blong mekem dei blong Jeova i kamtru kwik’ i minim wanem?

• ?Olsem wanem yumi soemaot long fasin blong yumi se yumi “stap wet long God”?

• ?From wanem i impoten blong mekem “ol wok blong fasgud long God”?

• ?Yumi mas mekem wanem sipos yumi wantem we long ae blong Jeova yumi ‘no gat doti, yumi no gat rong, mo yumi stap long pis’?

[Tok blong pija long pej 11]

Ol fasin we oli tabu oli soemaot se yumi “stap wet long God”

[Tok blong pija long pej 12]

Wok blong talemaot Kingdom i save sevem laef blong man

[Tok blong pija long pej 14]

Taem yumi wet long dei blong Jeova, i gud yumi stap long pis wetem ol narafala