Japta 29

Singsing Long Nambawan Nyufala Sing

Revelesen 14:1-20

Stampa tok: 144,000 wetem Smol Sipsip oli stanap long Hil ya Saeon. Ol enjel oli talemaot ol mesej long olgeta man long wol. Taem blong tekem kakae we i rere long garen

Taem we i kamtru: I stat long 1914 go kasem taem we bigfala trabol bambae i kamtru long wol

 1. ?Yumi lanem wanem finis long Revelesen japta 7, 12, mo 13? Mo bambae yumi lanem wanem?

!YUMI save haremgud long nekis vison blong Jon! Hem i defren olgeta long ol nogud wael anamol we i minim ol ogenaesesen blong bigfala algita. Naoia yumi save luk ol gudfala man blong wok blong Jeova, mo wok we oli stap mekem long dei blong Masta. (Revelesen 1:10) Revelesen 7:1, 3 i talem finis se ol enjel oli stap blokem fo win blong oli no spolem wol gogo ol 144,000 tabu slef oli kasem mak blong God long fes blong olgeta. Mo yumi lanem finis long Revelesen 12:17 se long taem ya tu, algita ya, Setan, i traehad moa blong spolem ‘ol narafala pikinini blong woman.’ Mo long Revelesen japta 13, yumi lukluk klia vison we i minim ol politik ogenaesesen we Setan i stanemap long wol blong traem mo ronem ol gudfala man blong Jeova. !Be bigfala enemi ya i no save spolem plan blong God! Naoia bambae yumi lanem se nating we Setan i mekem ol rabis wok ya, be God i win, hem i hivimap ol 144,000 man.

 2. ?Long Revelesen 14:1, Jon i talemaot wanem long yumi fastaem we bambae i hapen biaen? ?Mo hu ya Smol Sipsip ya?

² Jon, mo grup tede we oli olsem Jon, oli luk fastaem ol gudfala frut we oli kamaot biaen: “Nao mi luk, mo antap long bigfala hil ya Saeon, i gat Smol Sipsip blong God i stap stanap. Mo i gat wan handred fotefo taosen man oli stap wetem hem, we i gat nem blong Smol Sipsip ya wetem nem blong Papa blong hem i stap finis long fes blong olgeta.” (Revelesen 14:1) Olsem yumi lanem finis, Smol Sipsip ya i Maekel. Hem i klinim heven, hem i sakemaot Devel Setan mo ol rabis enjel blong hem. Hemia nao Maekel we Daniel i talem se “i stanap blong givhan long ol pikinini blong ol man blong [God].” Long semtaem, hem i rere blong “stanap” long narafala fasin tu, hemia blong mekem ol stret jajmen blong Jeova i kamtru. (Daniel 12:1; Revelesen 12:7, 9) Smol Sipsip ya blong God, we i givim laef blong hem, hem i stanap long Hil ya Saeon long 1914, mo i stat rul olsem Mesaea King.

 3. ?Wanem ya “Hil ya Saeon” we Smol Sipsip mo 144,000 oli “stap stanap” long hem?

³ I olsem tok ya we Jeova i talemaot finis se: “Mi mi putumap king blong mi long Saeon long tabu hil blong mi.” (Ol Sam 2:6; 110:2) Hemia i no minim Hil ya Saeon long wol, we Jerusalem i stap long hem bifo, mo we ol king long laen blong Deved oli sidaon long jea blong king long taon ya. No gat. (1 Kronikel 11:4-7; 2 Kronikel 5:2) Taem Jisas i ded mo i laef bakegen long 33 K.T., hem i kam olsem nambawan ston long faondesen blong Hil ya Saeon long heven. Hemia ples ya long heven we Jeova i wantem putum long hem “bigfala taon ya we i ples blong God ya we i laef, . . . Jerusalem ya we i stap long heven.” Taswe “Hil ya Saeon” i minim haeples mo paoa blong Jisas mo ol man we oli rul wetem hem. Olgeta evriwan ya oli olsem Jerusalem long heven, hemia Kingdom. (Hibrus 12:22, 28; Efesas 3:6) Hemia haeples mo paoa we Jeova i givim long olgeta, olsem ol king, long dei blong Masta. Long ol handred yia we oli pas finis, ol tabu Kristin we oli olsem “ol ston we oli laef,” oli wantem tumas blong stanap long Hil ya Saeon long heven. Oli wantem joen wetem Masta Jisas Kraes we i tekem paoa blong hem finis long Kingdom blong hem.—1 Pita 2:4-6, NW; Luk 22:28-30; Jon 14:2, 3.

 4. ?Olsem wanem fulnamba blong ol 144,000 man oli stap stanap long Hil ya Saeon?

⁴ I no Jisas nomo we Jon i luk. Fulnamba blong 144,000 man we oli rul wetem hem long Kingdom blong heven, olgeta tu oli stap stanap long Hil ya Saeon. Long taem ya we vison ya i kamtru, i no olgeta long grup blong ol 144,000 man we oli stap finis long heven. No gat. Biaen, long sem vison, Jon i luk se sam long ol tabu man ya oli mas stanap strong yet mo holemtaet bilif blong olgeta gogo oli ded. (Revelesen 14:12, 13) From samting ya, i klia se sam long ol 144,000 man ya oli stap yet long wol. ?Oraet, olsem wanem nao Jon i luk fulnamba blong olgeta oli stap stanap wetem Jisas long Hil ya Saeon?a Mining blong hem i olsem: From we ol man ya oli memba blong kampani blong ol tabu Kristin man, i olsem we oli “kam long bigfala hil ya we oli kolem Saeon, mo long bigfala taon ya we i ples blong God ya we i laef, we i no save ded. Hemia narafala Jerusalem ya we i stap long heven.” (Hibrus 12:22) Oli sem mak long Pol, taem hem i stap yet long wol. Oli stap yet long wol, be i olsem we oli go antap finis long saed blong speret blong joen wetem Jisas Kraes long heven. (Efesas 2:5, 6) Mo tu, long 1919 oli obei long tok we i kamaot long heven se: ‘Yufala i kam antap long ples ya.’ Nao i olsem we oli “go antap long heven, [oli] go insaed long wan klaod.” (Revelesen 11:12) From ol vas ya, yumi luksave se long saed blong speret, i olsem we olgeta 144,000 man oli stap long Hil ya Saeon wetem Jisas Kraes.

 5. ?Ol 144,000 man oli gat nem blong hu i stap long fes blong olgeta? ?Mo wanem mining blong samting ya?

⁵ Ol man we oli mekem wosip long wael anamol, oli gat nem blong wael anamol ya, olsem namba 666, i stap long olgeta. Be ol 144,000 man ya oli no joen nating wetem olgeta. (Revelesen 13:15-18) Ol gudfala man ya oli gat nem blong God mo blong Smol Sipsip i stap long fes blong olgeta. I klia se Jon, we hem i man Jyu, i luk nem blong God long Hibru raeting olsem hemia: יהוה.b From oli gat nem blong Papa blong Jisas i stap long fes blong olgeta, hemia i min se olgeta ya we oli kasem mak blong God finis oli talemaot long olgeta man se oli wetnes blong Jeova, oli slef blong Hem nomo. (Revelesen 3:12) From oli gat nem blong Jisas i stap long fes blong olgeta, hemia i min se oli agri mo oli glad blong talemaot se Jisas i Masta blong olgeta. Hem i olsem “man blong olgeta” we i promes finis blong mared long olgeta. Mo olgeta bambae oli “woman” blong hem. Oli kam olsem ol “nyufala man,” oli mekem wok blong God wetem tingting se bambae oli save kasem laef long heven. (Efesas 5:22-24; Revelesen 21:2, 9; 2 Korin 5:17) Oli frengud wetem Jeova mo Jisas Kraes, mo samting ya i gat paoa long olgeta tingting mo fasin blong olgeta.

Oli Singsing Long Wan Nyufala Sing

 6. ?Jon i harem wanem sing? ?Olsem wanem hem i eksplenem samting ya?

⁶ Stret long poen ya, Jon i talem se: “Nao mi harem wan tok i kamaot long heven, we noes blong hem i olsem noes blong bigfala solwora we i stap brok long rif, i olsem noes blong bigfala tanda. Tok ya, mi harem i olsem noes blong plante gita we ol man oli stap plei long olgeta. Olgeta man ya oli stanap long fes blong God, we hem i stap sidaon long bigfala jea blong hem, mo long fes blong ol fo anamol ya, mo long fes blong ol twantefo elda. Nao oli stap sing long [samting olsem, “NW”] wan nyufala sing we i no gat narafala man i save sing long hem, ol wan handred fotefo taosen man ya we God i pemaot olgeta oli fri long wol, olgeta ya nomo oli save sing long hem.” (Revelesen 14:2, 3) I klia from wanem Jon i tingbaot bigfala solwora mo bigfala tanda, taem hem i harem gudfala sing blong ol 144,000 man. !Hem i haremgud long noes blong ol gita we oli stap plei! (Ol Sam 81:2) ?Olsem wanem, i gat wan grup blong ol man blong singsing long wol we oli save singsing gud olsem olgeta long vison ya? No gat.

 7. (a) ?Wanem nyufala sing ya blong Revelesen 14:3? (b) ?Olsem wanem sing blong Ol Sam 149:1 i nyufala long taem blong yumi?

⁷ ?Wanem “nyufala sing” ya? Olsem yumi makem finis taem yumi storeyan long Revelesen 5:9, 10, sing ya i long saed blong plan blong Kingdom blong Jeova mo ol gudfala samting we bambae hem i mekem from Jisas Kraes, blong mekem Isrel long saed blong speret, i kam “wan kingdom, mo ol pris blong God blong yumi.” (NW) Sing ya i presem Jeova, i talemaot ol nyufala samting we hem i stap mekem from Isrel blong Hem long saed blong speret, mo ol samting we hem i stap mekem blong givhan long olgeta tu. (Galesia 6:16) Ol memba blong Isrel ya long saed blong speret oli obei long toktok blong man we i raetem Ol Sam se: “!Yumi presem Hae God [Ja, NW]! Yumi ol man blong Hae God [Jeova, NW] we yumi stap strong long hem, i gud yumi wokem wan nyufala singsing, yumi kam wanples, yumi sing long hem, yumi presem Hae God. Yumi ol man Isrel, hem i mekem yumi. I gud yumi joen long hem, yumi glad. Yumi ol man Saeon, hem i king blong yumi. I gud yumi joen long hem, yumi glad.” (Ol Sam 149:1, 2) I tru, tok ya, ol man oli raetemdaon plante handred yia finis. Be long taem blong yumi, ol tok long sing ya oli gat nyufala mining. Long 1914 Kingdom blong Mesaea i stanap. (Revelesen 12:10) Long 1919, ol man blong Jeova long wol oli stat talemaot “tok ya long saed blong kingdom” i strong moa. (Matyu 13:19, NW) Stampa vas we Sosaeti i makemaot long yia 1919 (Aesea 54:17) i givim paoa long olgeta. Mo oli gat strong tingting blong gohed from we oli stap bakegen long paradaes long saed blong speret. Ale long yia 1919 oli ‘singsing blong presem Jeova long tingting blong olgeta.’—Efesas 5:19, NW.

 8. ?From wanem ol 144,000 man nomo oli naf blong lanem nyufala sing ya blong Revelesen 14:3?

⁸ ?Oraet, be from wanem ol 144,000 man nomo oli naf blong lanem sing ya blong Revelesen 14:3? From we sing ya i long saed blong ol ekspiryens blong olgeta taem God i jusumaot olgeta blong rul long Kingdom blong hem. God i tekemaot olgeta nomo olsem ol pikinini blong hem, mo hem i makemaot olgeta wetem tabu speret. Olgeta nomo, hem i pemaot olgeta long wol, blong oli rul long Kingdom long heven. Mo olgeta nomo “bambae oli pris . . . mo bambae . . . oli rul wetem [Jisas]” gogo wan taosen yia i pas, blong mekem ol man oli kam stret olgeta. Olgeta nomo oli stanap long fes blong Jeova, oli “stap sing long [samting olsem, NW] wan nyufala sing.”c Ol ekspiryens ya oli kamaot long olgeta nomo. Taswe olgeta oli kasem spesel save long saed blong Kingdom, mo from samting ya oli save singsing long saed blong Kingdom long fasin we ol narafala man oli no save singsing long hem.—Revelesen 20:6; Kolosi 1:13; 1 Tesalonaeka 2:11, 12.

 9. ?Olsem wanem bigfala kampani i obei long singsing blong ol tabu man ya? ?Mo oli mekem wanem toktok i kamtru?

⁹ Be sam narafala oli lesin mo oli obei long sing blong ol man ya. I stat long 1935, wan bigfala kampani blong ol narafala sipsip oli harem nambawan sing ya, nao oli joen wetem ol man ya we oli stap singsing, oli talemaot Kingdom blong God. (Jon 10:16; Revelesen 7:9) I tru se ol nyufala man ya oli no save singsing sem mak olsem ol man blong rul long Kingdom blong God oli stap singsing. Be olgeta tu oli singsing blong presem Jeova mo blong leftemap hem from ol nyufala samting we hem i stap mekem. Olsem nao, oli mekem toktok blong man we i raetem Ol Sam i kamtru, i se: “!Olgeta man long wol, yumi sing long Hae God [Jeova, NW]! !Yumi wokem wan nyufala singsing, yumi sing blong presem hem! !Yumi sing long Hae God [Jeova, NW], yumi leftemap nem blong hem! Evri dei bambae yumi talemaot gud nyus ya we hem i sevem yumi. Bambae yumi talemaot paoa blong hem long ol man blong ol narafala kantri. Bambae yumi talemaot ol bigbigfala wok blong hem long fes blong olgeta man. !Olgeta man long wol, yumi presem Hae God [Jeova, NW]! Yumi presem hem from ol gudgudfala samting blong hem mo from paoa blong hem. Yumi mas talem long olgeta man blong ol narafala kantri, se ‘!Hae God [Jeova, NW], hem i king!’ ”—Ol Sam 96:1-3, 7, 10; 98:1-9.

10. ?Olsem wanem ol 144,000 man oli save singsing “long fes blong” ol 24 elda?

¹⁰ Ol 24 elda oli minim ol 144,000 taem oli kasem paoa finis long heven. ?Nao olsem wanem ol 144,000 oli save singsing long “fes blong” ol elda ya? Long stat blong dei blong Masta, olgeta we “oli joen long Kraes gogo oli ded,” (NW) oli laef bakegen oli kam speret man. Taswe ol trufala tabu Kristin we oli win finis oli stap finis long heven. Oli stap mekem wok we i kolosap sem mak long wok blong ol 24 laen blong ol elda we oli pris long Isrel bifo. Oli stap insaed long vison blong ogenaesesen blong Jeova long heven. (1 Tesalonaeka 4:15, 16; 1 Kronikel 24:1-18; Revelesen 4:4; 6:11) From samting ya, las haf blong ol 144,000 man we oli stap yet long wol oli stap singsing long nyufala sing long fes blong ol brata blong olgeta we oli laef bakegen, oli go long heven finis. Ol brata blong olgeta oli save lukluk olgeta.

11. ?From wanem vison ya i yusum tu fasin blong tokbaot ol tabu man we oli winim faet blong olgeta finis, fastaem ol 24 elda mo biaen 144,000?

¹¹ Maet yumi askem kwestin ya se: ?Ol tabu man ya we oli win finis long faet blong olgeta, from wanem Revelesen i tokbaot olgeta olsem 24 elda, mo tu, olsem 144,000? From we Revelesen i tokbaot grup ya long tu defren fasin. Taem hem i tokbaot ol 24 elda, oltaem hem i talem se oli stap raon long jea blong Jeova long heven wetem paoa blong olgeta, mo oli mekem wok blong ol king mo pris. Oli pija blong ful grup blong ol 144,000 man olsem we oli kasem paoa long heven finis, nating we smol haf blong olgeta i stap yet long wol. (Revelesen 4:4, 10; 5:5-14; 7:11-13; 11:16-18) Be Revelesen japta 7 i tokbaot ol 144,000 man olsem se oli kamaot long wol. Mo japta ya i tokbaot moa bigfala stampa tingting blong Jeova, hemia blong putum mak blong hem long fes blong fulnamba blong ol Isrel blong speret wanwan, mo blong sevem wan bigfala kampani we i no gat stret namba blong hem. Vison long Revelesen japta 14 i soem wan pija blong pruvum se ful grup blong ol 144,000 man blong Kingdom we olgeta wanwan oli winim faet blong olgeta finis, bambae oli joen wetem Smol Sipsip long Hil ya Saeon. Mo tu, hem i tokbaot ol mak we ol man ya oli mas kasem blong oli naf blong stap long grup blong 144,000 man. Bambae yumi tokbaot ol mak ya.d

Olgeta We Oli Biaen Long Smol Sipsip

12. (a) ?Olsem wanem Jon i gohed blong tokbaot ol 144,000 man? (b) ?Olsem wanem ol 144,000 man oli no slip wetem woman?

¹² Jon i gohed blong tokbaot ol 144,000 man we “God i pemaot olgeta oli fri long wol,” i se: “Hemia ol man ya we oli holem laef blong olgeta i stap klin, from we oli no go long woman. Olgeta ya oli no slip wetem woman samtaem. Oli biaen long Smol Sipsip ya long evri ples we hem i pas long hem. God i pemaot olgeta finis, i tekemaot olgeta long ol narafala man, nao oli fri, oli olsem ol fas kakae blong garen, oli blong givim i go long God mo long Smol Sipsip ya. Neva gyaman tok i kamaot long maot blong olgeta, mo oli no gat wan samting nating i stap long olgeta blong mekem olgeta oli doti long fes blong God.” (Revelesen 14:4, 5) Ol 144,000 man ya “oli no slip wetem woman samtaem.” Be hemia i no min se ol memba blong grup ya oli no mared taem oli stap long wol. Aposol Pol i raetem leta i go long ol Kristin we God i makemaot olgeta blong go long heven. Hem i talem long olgeta se long sam rod i moa gud we Kristin man i no mared. Be tu hem i talem se sam man i moa gud blong oli mared. (1 Korin 7:1, 2, 36, 37) Taswe samting we i makem grup ya se oli stap klin long saed blong speret. Oli no mekem fasin nogud long saed blong speret, olsem we oli meksap wetem politik blong wol mo wetem ol gyaman skul. (Jemes 4:4; Revelesen 17:5) Oli promes finis blong mared long Kraes, taswe oli stap klin. Nating we ‘oli stap long medel blong ol man we oli gat ol krangke fasin, be i no gat man we i gat poen long olgeta.’—Filipae 2:15.

13. ?From wanem ol 144,000 oli stret blong kam waef blong Jisas Kraes? ?Olsem wanem oli “biaen long Smol Sipsip ya long evri ples we hem i pas long hem”?

¹³ Mo tu, “neva gyaman tok i kamaot long maot blong olgeta.” Long saed ya, oli sem mak long King blong olgeta, Jisas Kraes. Taem hem i stap long wol olsem wan stret man, “hem i no mekem wan samting nogud. Mo i no gat man we i harem wan gyaman tok i kamaot long maot blong hem.” (1 Pita 2:21, 22) Ol 144,000 oli no gat wan samting i stap long olgeta blong mekem olgeta oli doti long fes blong God, mo oli tok tru oltaem. Tufala samting ya i mekem olgeta oli rili olsem wan klin woman blong mared wetem bigfala Hae Pris blong Jeova. Taem Jisas i stap long wol, hem i singaot ol man we hat blong olgeta i stret, blong oli biaen long hem. (Mak 8:34; 10:21; Jon 1:43) Olgeta we oli harem tok blong hem, oli folem fasin blong laef blong hem mo oli obei long ol tijing blong hem. Taswe taem oli stap yet long wol, “oli biaen long Smol Sipsip ya long evri ples we hem i pas long hem.” Hem i lidim olgeta blong oli pastru long wol blong Setan.

14. (a) ?Olsem wanem ol 144,000 man oli olsem ‘fas kakae blong garen we i go long God mo long Smol Sipsip ya’? (b) ?Olsem wanem bigfala kampani tu i olsem fas kakae blong garen?

¹⁴ Ol 144,000 man ya, “God i pemaot olgeta oli fri long wol,” no “i tekemaot olgeta long ol narafala man.” Hem i tekemaot olgeta olsem ol speret pikinini blong hem. Taem oli laef bakegen long ded, oli no moa laef long bodi blong man nomo. Olsem vas 4 i talem, “oli olsem ol fas kakae blong garen, oli blong givim i go long God mo long Smol Sipsip ya.” I tru se long faswan handred yia, Jisas i “faswan blong laef bakegen long ded. Hem i olsem fas kakae ya we i rere long garen.” (1 Korin 15:20, 23) Be ol 144,000 man oli olsem “fas kakae blong garen” blong ol man we oli no stret, we Jisas i pemaot olgeta wetem laef blong hem. (Jemes 1:18) Be wok blong karem kakae long garen we i minim ol man, i no finis wetem olgeta. Buk blong Revelesen i tokbaot finis wan wok blong hivimap wan bigfala kampani we man i no save kaontem olgeta. Ol man ya oli singaot bigfala se: “God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala.” Bigfala kampani ya bambae oli stap laef tru long taem blong bigfala trabol long wol. Bambae oli gohed blong dring long “ol springwora ya we i save givim laef.” Samting ya bambae i mekem olgeta oli kam stret man. Biaen long taem blong bigfala trabol long wol, plante milyan milyan narafala man bambae oli laef bakegen long ded, nao olgeta tu oli gat jans blong dring long ol springwora ya we i save givim laef. Olsem nao, Hades bambae i emti, i no moa gat dedman i stap long hem. Taswe i stret nomo blong talem se bigfala kampani i olsem fas kakae blong garen blong ol narafala sipsip. Long ol man we oli hop blong laef foreva long wol, olgeta ya oli ol faswan we oli ‘wasem klos blong olgeta blong mekem oli waet long blad blong Smol Sipsip ya.’—Revelesen 7:9, 10, 14, 17; 20:12, 13.

15. ?Olsem wanem ol lafet blong ol man Isrel mo tri fas kakae blong garen i sem mak long sam fasin?

¹⁵ Blong obei long Loa blong Moses, ol man Isrel bifo oli mas mekem sam lafet. Sam samting we oli mekem long ol lafet ya oli pija blong tri fas kakae ya long garen (Jisas Kraes, 144,000, mo bigfala kampani). Long Naesan 16, taem oli stap mekem Lafet Blong Kakae Bred we i no gat is long hem, oli givim fas kakae blong sid ya bale i go long Jeova. (Levitikas 23:6-14) Long Naesan 16 Jisas i laef bakegen long ded. 50 dei biaen Naesan 16, hemia namba tri manis long kalenda blong olgeta, ol man Isrel oli mekem lafet blong fas kakae blong sid ya wit. (Eksodas 23:16; Levitikas 23:15, 16) Biaen oli putum nem ya Pentekos long lafet ya (i kamaot long Grik tok we i minim “namba fefte”), mo long Pentekos long 33 K.T., ol faswan memba blong ol 144,000 oli kasem tabu speret. Long namba seven manis, taem oli karem olgeta kakae long garen finis, oli mekem Lafet We Oli Wokem Ol Wansaed Haos. Ol man Isrel oli stap wan wik long ol wansaed haos ya we oli wokem long lif kokonas wetem sam narafala samting bakegen, mo oli talem tangkyu long God wetem glad. (Levitikas 23:33-43) Sem mak long bigfala kampani, we oli haf long ol ‘kakae’ long garen. Olgeta oli stanap long fes blong God we i sidaon long bigfala jea blong hem, oli stap “holem lif kokonas long han blong olgeta,” mo oli talem tangkyu long God.—Revelesen 7:9.

Talemaot Gud Nyus We i Blong Oltaem Nomo

16, 17. (a) ?Jon i luk wan enjel i stap flae wea? ?Enjel ya i stap talemaot wanem? (b) ?Hu i stap joen long wok blong talemaot Kingdom? ?Mo wanem samting i pruvum poen ya?

¹⁶ Nao Jon i raetemdaon se: “Nao mi luk i gat wan narafala enjel i stap flae antap long skae [long medel blong heven, “NW”], i stap talemaot gud nyus ya we i blong oltaem nomo, i no save finis. Enjel ya i stap talemaot gud nyus ya long olgeta man long wol, long olgeta blong evri kala mo laen mo lanwis mo kantri. Hem i stap singaot bigfala, i talem se ‘Yufala i mas onagud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwora mo springwora, mo yufala i mas foldaon long fes blong hem blong presem hem.’ ” (Revelesen 14:6, 7) Enjel ya i stap flae “long medel blong heven,” (NW) hemia ples we ol pijin oli stap flae long hem. (Ridim Revelesen 19:17.) Taswe olgeta man long wol oli save harem voes blong hem. !Yes, mesej blong enjel ya i save kasem moa man i bitim ol mesej long televisin mo radyo!

¹⁷ Hem i no talem long ol man blong onagud long wael anamol mo pija blong hem. No gat. Hem i talem se oli mas ona long Jeova nomo. I no gat wan anamol we Setan i bos long hem we paoa blong hem i save winim paoa blong Jeova. !Tingbaot, Jeova i mekem heven mo wol, mo naoia hem i rere blong jajem wol! (Skelem wetem Jenesis 1:1; Revelesen 11:18.) Taem Jisas i stap long wol, hem i talem wan profet tok long saed blong taem blong yumi, i se: “Mo gud nyus ya blong kingdom, bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.” (Matyu 24:14, NW) Kampani blong ol tabu Kristin man i stap mekem wok ya. (1 Korin 9:16; Efesas 6:15) Revelesen i soemaot se ol enjel we yumi no save luk olgeta, oli joen long wok ya blong prij tu. !I klia nomo se ol enjel oli lidim wok ya! !Plante taem oli pulum wan Wetnes blong Jeova i kam long haos blong wan man we i harem nogud, hem i bin prea long God from i wantem tumas blong wan man i givhan long hem long saed blong speret!

18. ?Olsem enjel we i stap flae long medel blong heven i talem, stret taem i kam blong God i mekem wanem? ?Mo hu i stap rere blong talemaot sam moa mesej?

¹⁸ Olsem enjel we i stap flae long medel blong heven i talem, taem i kam finis blong God i jajem olgeta man. ?Wanem jajmen blong God? Namba tu, namba tri, namba fo, mo namba faef enjel oli rere blong talemaot. Taem ol man oli harem ol mesej ya, bambae oli sek from.—Jeremaea 19:3.

[Ol Futnot]

[Tok Blong Pija Long Pej 202, 203]

144,000

24 elda

Olgeta we bambae oli rul wetem Smol Sipsip ya, Jisas Kraes, long tu defren fasin