Japta 28

Oli Mas Agensem Tufala Wael Anamol

Revelesen 13:1-18

Stampa tok: Wael anamol we i gat seven hed blong hem, wael anamol we i gat tu hon blong hem, mo pija blong wael anamol

Taem we i kamtru: I stat long taem blong Nimrod i kam kasem taem we bigfala trabol bambae i kamtru long wol ya

1, 2. (a) ?Jon i talem wanem long saed blong algita ya? (b) ?Jon i yusum wanem saen blong tokbaot ogenaesesen we algita ya i yusum long wol?

!OLI sakemaot bigfala algita long heven finis i kamdaon long wol! Long stadi blong yumi long Revelesen, i klia nomo se neva Snek ya blong bifo mo ol rabis enjel blong hem oli gat raet blong gobak bakegen long heven. Be i gat moa yet long saed blong hemia “we nem blong hem ‘Setan’ no ‘Man we i agensem man.’ Hem i gyaman long olgeta man long wol finis, i lidim olgeta oli go krangke.” Profet tok ya i gohed blong talemaot plante samting long saed blong rod we Setan i stap yusum blong faet agens long ‘woman mo ol pikinini blong hem.’ (Revelesen 12:9, 17) Jon i tokbaot algita ya, i se: “Nao bigfala algita ya i go stanap long sanbij, kolosap long solwora.” (Revelesen 12:18, “NTB;” 13:1a, “NW”) Ale yumi tekem smoltaem naoia blong luklukgud long rod we algita ya i yusum.

² Setan mo ol rabis enjel blong hem oli no moa stap long tabu heven. Oli sakemaot ol rabis speret man ya long heven, mo naoia oli save wok kolosap long wol nomo. I klia se samting ya nao i mekem wok blong ol kleva i kam antap bigwan long ol laswan handred yia. Snek ya we i waes blong trikim ol man, hem i gat wan ogenaesesen blong ol rabis speret man yet. ?Be olsem wanem, hem i stap yusum wan ogenaesesen long wol ya tu blong lidim ol man oli go krangke? Jon i talem se: “Nao mi luk i gat wan anamol i kamaot long solwora. Hem i gat ten hon blong hem mo seven hed blong hem. Long ol hon blong hem i gat flas hat blong hem i stap, olsem hat blong king, mo long ol hed blong hem i gat nem oli raetem i stap, we nem ya i tok nogud long God. Anamol ya, mi luk hem i samting olsem bigfala puskat ya taega. Leg blong hem i samting olsem leg blong bigfala anamol ya bea. Mo maot blong hem i olsem maot blong laeon. Nao bigfala algita ya i givim paoa blong hem long anamol ya, i mekem hem i sidaon long bigfala jea blong hem, mo i givim paoa long hem blong i wokem plante samting.”—Revelesen 13:1, 2, “NTB”; 13:1b, 2, “NW.”

 3. (a) ?Wanem sam wael anamol we profet Daniel i luk long vison? (b) ?Ol bigbigfala anamol long Daniel japta 7 oli pija blong wanem?

³ ?Anamol ya we i narakaen i minim wanem? Baebol hem wan i talem ansa long kwestin ya. Bifo we Babilon i foldaon long 539 B.K.T., man Jyu mo profet Daniel i lukluk sam wael anamol long vison. Long Daniel 7:2-8 hem i tokbaot fo wael anamol we oli kamaot long solwora. Faswan i olsem wan laeon, namba tu i olsem wan bea, namba tri i olsem lepad, “!nao luk! namba fo anamol. Hem i blong fraet nomo, i nogud we i nogud, mo i strong bitim mak . . . mo hem i gat ten hon long hed blong hem.” Anamol ya i kolosap sem mak long wael anamol we Jon i luk long vison blong hem samwe long yia 96 K.T. Anamol ya we Jon i luk, hem tu i olsem laeon, bea, lepad, mo hem i gat ten hon blong hem. ?Wanem mining blong ol bigfala anamol we Daniel i luk? Hem i talem se: “Ol bigfala anamol ya . . . hemia nao fo king we bambae oli girap, oli stanap long wol.” (Daniel 7:17) Yes, ol anamol ya oli pija blong sam “king,” no sam nesen blong wol we oli gat bigfala paoa long saed blong politik.

 4. (a) ?Long Daniel japta 8, wanem mining blong man sipsip mo man nani? (b) ?Taem bigfala hon blong man nani i brok mo fo hon i tekem ples blong hem, hemia i pija blong wanem?

⁴ Long wan narafala vison, Daniel i luk wan man sipsip we i gat tu hon blong hem. Wan nani we i gat wan bigfala hon i kilimdaon sipsip ya. Enjel Gabriel i talem long Daniel mining blong vison ya, hem i se: “Man sipsip ya . . . i pija blong ol king blong Media mo Pesia. Mo man nani we i gat fulap hea hem i pija blong king blong Gris.” Gabriel i gohed blong talem wan profet tok se bigfala hon blong man nani ya bambae i brok, mo bambae fo hon i tekem ples blong hem. Samting ya i hapen 200 yia biaen. Long taem ya Bigfala Aleksanda i ded, mo kingdom blong hem i seraot long fo haf. Mo fo kapten blong ami blong hem oli rul long ol fo kingdom ya wanwan.—Daniel 8:3-8, 20-25.a

 5. (a) ?Wanem ol mining blong Grik tok ya we oli tanem i kam anamol? (b) ?Wael anamol long Revelesen 13:1, 2, mo ol seven hed blong hem oli pija blong wanem?

⁵ From samting ya, i klia se Man we i stampa blong ol toktok long Baebol i tingbaot ol politik nesen long wol olsem ol anamol. ?Ol anamol ya oli gat wanem fasin? Wan man we i stadi long mining blong Baebol i talem se anamol long Revelesen 13:1, 2 i “wael.” Mo hem i talem moa i se: “Mifala i agri wetem ol mining blong Grik tok ya θηρίον [the·riʹon, we i minim “anamol”] long vas ya. Tok ya i min se anamol ya i raf, i gat fasin blong spolem, i mekem man i fraet, i wantem kakae, mo hem i bigwan we i nogud olgeta.”b !Mining ya i eksplenem gud ol bigfala politik nesen we Setan i yusum blong bos long ol man, mo we oli mekem blad blong fulap man i ron! Ol seven hed blong wael anamol ya oli pija blong seven bigfala nesen blong wol. Baebol i soemaot se sikis blong olgeta oli stanap bifo long taem blong Jon: Ijip, Asiria, Babilon, Mido-Pesia, Gris, mo Rom. Mo namba seven, profet tok i talem se bambae i kamaot biaen.—Ridim Revelesen 17:9, 10.

 6. (a) ?Ol seven hed blong wael anamol ya oli lidim ol man blong mekem wanem? (b) ?Olsem wanem Jeova i yusum Rom blong mekem jajmen blong hem i kamtru long ol man Jyu? ?Be olsem wanem long ol Kristin long Jerusalem?

⁶ I tru se i gat sam narafala bigfala nesen blong politik bifo tu, i no seven nomo. Olsem wael anamol we Jon i luk i gat seven hed mo ten hon, be i no hemia nomo, hem i gat bodi tu. Be seven hed ya oli pija blong seven bigfala paoa blong politik, we wanwan oli lidim ol man blong spolem ol man blong God. Long 33 K.T., Rom hem i bigfala nesen blong wol. Hem i olsem wan long ol hed ya blong wael anamol ya, mo Setan i yusum hem blong kilim i ded Pikinini blong God. Long taem ya, God i lego nesen blong ol man Isrel we oli no obei long hem. Mo biaen, long 70 K.T., hem i letem Rom i mekem jajmen blong Hem i kamtru long nesen ya. I gud we trufala Isrel blong God, hemia kampani blong ol tabu Kristin man, oli harem woning we God i givim fastaem. Ol Kristin man ya long Jerusalem mo Judia oli ronwe, oli krosem Jodan Reva blong stap sef.—Matyu 24:15, 16; Galesia 6:16.

 7. (a) ?Long ol las dei blong wol ya mo long dei blong Masta, wanem i mas kamaot? (b) ?Namba seven hed blong wael anamol blong Revelesen 13:1, 2 hem i pija blong wanem?

⁷ Be long en blong faswan handred yia K.T., plante long kampani blong ol Kristin oli lego trutok. “Ol man blong Setan,” we oli olsem ol rabis gras, oli kam plante tumas, nao oli kilimaot bighaf blong wit, hemia ol tru Kristin we oli “ol pikinini blong kingdom.” (NW) Be taem ol las dei blong wol ya i stat, ol tabu Kristin oli kam antap bakegen, oli joen olsem wan grup. Long dei blong Masta, ol stret man bambae oli “saen olsem san.” Olsem nao, kampani blong ol Kristin man oli mekemrere blong wok. (Matyu 13:24-30, 36-43) Long taem ya, bigfala nesen ya Rom i no moa gat paoa. Bigfala nesen ya Engglan wetem Amerika we hem tu i gat bigfala paoa, tufala i kam antap. Tufala nesen ya tugeta i olsem namba seven hed blong wael anamol.

 8. ?From wanem i no rong blong talem se wan anamol i olsem pija blong bigfala politik paoa blong wol ya, Engglan mo Amerika tugeta?

⁸ ?Olsem wanem, i rong blong talem se ol bigfala politik nesen blong wol oli olsem ol wael anamol? Ol man we oli agensem ol Wetnes blong Jeova long Namba Tu Bigfala Faet Blong Wol, oli ting se i rong. Long taem ya, plante Wetnes blong Jeova long plante ples long wol oli stap pas long kot, blong pruvum se kampani blong olgeta mo olgeta wanwan oli gat raet blong gohed long wosip blong olgeta. !Be wet! !Traem tingbaot! ?I tru we fulap nesen oli talem se wan anamol i saen blong kantri blong olgeta? Yes, eksampel: laeon i saen blong Engglan, igel i saen blong Amerika, algita i saen blong Jaena, mo bea i saen blong Rasia. ?Oraet, weswe wan man i save tok agens long God we i raetemdaon Tabu Baebol, from we hem i yusum ol anamol olsem pija blong ol bigfala nesen blong wol?

 9. (a) ?From wanem man i no save agensem tok blong Baebol se Setan i givim paoa long wael anamol ya? (b) ?Baebol i talem se Setan i olsem wanem? ?Mo olsem wanem hem i pulum ol gavman?

⁹ ?Mo tu, weswe man i save agensem tok blong Baebol se Setan nao i givim paoa long wael anamol ya? God hem i Stampa blong tok ya. Mo hem i ‘luk olgeta nesen olsem we oli wan drop wora long baket nomo, mo olsem smok blong rod.’ I moa gud we ol nesen ya oli traehad blong mekem God i glad, i bitim we oli kros from samting we profet tok blong Baebol i talem long saed blong olgeta. (Aesea 40:15, 17; Ol Sam 2:10-12) Setan i no wan gyaman man long wan kastom store nomo, we hem i stap mekem sol blong ol dedman i harem nogud long faea long hel. No gat. I no gat wan ples olsemia. Defren olgeta, Baebol i talem se Setan i “wan enjel blong laet.” Hem i papa blong fasin gyaman, mo hem i gat bigfala paoa long politik.—2 Korin 11:3, 14, 15; Efesas 6:11-18.

10. (a) Ol ten hon oli gat flas hat blong king long olgeta wanwan. ?Samting ya i soemaot wanem? (b) ?Ol ten hon ya mo ol ten flas hat olsem hat blong king oli pija blong wanem?

¹⁰ Wael anamol ya i gat ten hon long ol seven hed blong hem. Ating fo hed i gat wan hon nomo long olgeta wanwan. Mo tri hed i gat tu hon long olgeta wanwan. Mo tu, i gat flas hat olsem hat blong king long ol ten hon wanwan. Buk blong Daniel i tokbaot sam wael anamol, mo namba blong ol hon blong olgeta hem i prapa namba nomo. Eksampel: tu hon blong man sipsip i minim tu nesen we i joen blong mekem wan bigfala paoa we i rul long wol, hemia Media mo Pesia. Mo fo hon long wan nani i pija blong fo nesen we ol fofala oli rul wantaem. Oli kamaot long bigfala nesen ya Gris, we Bigfala Aleksanda i lida blong hem. (Daniel 8:3, 8, 20-22) Be long anamol ya we Jon i luk, namba blong ol hon, hemia ten, i pija nomo. (Ridim Daniel 7:24; Revelesen 17:12.) Hem i minim ful politik ogenaesesen blong Setan we olgeta nesen we oli rul oli insaed long hem. Olgeta hon ya evriwan oli raf mo oli wantem win. Be wael anamol ya i gat seven hed, samting ya i soemaot se paoa blong rul i save stap long wan long ol bigfala nesen ya nomo long wan taem. Sem mak long ol ten hat we oli olsem hat blong king. Oli soemaot se olgeta nesen ya bambae oli rul long wanwan kantri blong olgeta long semtaem wetem bigfala politik paoa we i rul long wol long taem ya.

11. ?Wanem mining blong nem long ol hed blong wael anamol ya, “we nem ya i tok nogud long God”?

¹¹ Ol hed blong wael anamol ya “i gat nem oli raetem i stap, we nem ya i tok nogud long God.” Hemia i min se hem i stap talem mo mekem plante samting blong leftemap hem wan, mo ol samting ya oli soemaot se hem i no gat respek nating long Jeova God mo Jisas Kraes. Hem i yusum nem blong God mo Kraes blong gyaman long ol man, blong kasem samting we hem i wantem long saed blong politik. Mo hem i wok tugeta wetem ol gyaman skul, mo hem i letem ol lida blong ol skul ya oli joen long politik tu. Eksampel: Insaed long Haos blong Lod long Engglan i gat ol bisop. Long Franis mo Itali, sam kadinol blong Katolik skul oli kasem haenem mo bigfala paoa long politik. Mo i no longtaem long Latin Amerika, sam pris oli kasem haenem long politik. Sam gavman oli prentem ol tok blong skul long mane blong olgeta, olsem “YUMI TRASTEM GOD.” Mo sam gavman oli raetem sam tok long selva mane blong olgeta blong talem se God i stap sapotem ol lida blong olgeta. Samfala oli talem se ol lida ya oli stanap from we “God i glad long olgeta.” Ol tok ya i olsem tok nogud long God, from we oli traem putum nem blong God insaed long rabis bisnes blong politik.

12. (a) Wael anamol ya i kamaot long “solwora.” ?Wanem mining blong samting ya? ?Mo hem i stat kamaot wetaem? (b) Algita i givim paoa long wael anamol ya. ?Hemia i soemaot wanem?

¹² Wael anamol ya i kamaot long “solwora.” Solwora i stret pija blong bigfala hif blong ol man long wol we oli no save stap kwaet, oli olbaot, we ol gavman blong wol oli kamaot long olgeta. (Aesea 17:12, 13) Wael anamol ya i stat kamaot long samting olsem ‘solwora’ long taem blong Nimrod bifo (samwe long 2100 B.K.T.). Long taem ya biaen we Bigfala Wora i ron, ol fasin blong wol oli stat blong agensem Jeova. (Jenesis 10:8-12; 11:1-9) Be long dei blong Masta nomo, laswan blong ol seven hed ya i soemaot hem fulwan. Makem tu se algita i “givim paoa blong hem long anamol ya, i mekem hem i sidaon long bigfala jea blong hem.” (Skelem wetem Luk 4:6.) Wael anamol ya hem i politik we Setan nomo i stanemap long medel blong olgeta man long wol. Tru ya, Setan i rili “masta blong wol ya.”—Jon 12:31.

Samting i Kilim Hem, We i Naf Blong Kilim Hem i Ded

13. (a) ?Long fas haf blong dei blong Masta, wanem bigfala samting i hapen long wael anamol ya? (b) ?Taem wan hed blong wael anamol nomo i kasem kil, olsem wanem samting ya i mekem olgeta haf blong hem i harem nogud?

¹³ Long fas haf long dei blong Masta, wan bigfala samting i hapen long wael anamol ya. Jon i talem se: “Nao mi luk we anamol ya i gat mak long wan hed blong hem we samting i kilim hem, we i naf blong kilim hem i ded. Be soa blong hem i kamgud bakegen finis. Olgeta man long wol oli sapraes tumas long samting ya, nao oli stap biaen long anamol ya from.” (Revelesen 13:3) Vas ya i talem se wan hed nomo blong wael anamol ya i kasem kil. Be taem yumi ridim vas 12, yumi save ting se olgeta haf blong anamol i kasem. ?From wanem i olsem? I no olgeta hed blong wael anamol ya evriwan we oli rul wantaem. Olgeta wanwan i bos long ol man long taem blong hem, mo oli mekem i strong moa long ol man blong God. (Revelesen 17:10) Taswe, long stat blong dei blong Masta, i gat wan hed nomo, hemia namba seven hed, we hem i bigfala politik paoa blong wol. Taem samting i kilim namba seven hed ya, we i naf blong kilim hem i ded, samting ya i mekem olgeta haf blong wael anamol ya i harem nogud.

14. ?Wetaem samting ya i kilim wael anamol, we i naf blong kilim hem i ded? ?Olsem wanem wan haeman blong ami i tokbaot paoa blong samting ya long wael anamol blong Setan?

¹⁴ ?Wanem samting ya we i kilim wael anamol, we i naf blong kilim hem i ded? Biaen, Revelesen i talem se naef blong faet i stikim hem. Naef blong faet i pija blong ol faet. Naef blong faet we i stikim hem long fas haf long dei blong Masta i mas minim Faswan Bigfala Faet Blong Wol. Faet ya i spolem mo i slakem wael anamol blong politik we Setan i givim paoa long hem. (Revelesen 6:4, 8; 13:14) Wan haeman long ami long faet ya, nem blong hem Maurice Genevoix, hem i tokbaot faet ya, i se: “Olgeta man oli agri se long ful histri blong man, i no gat plante dei we i impoten olsem Ogis 2, 1914. Fastaem ol man Yurop oli sek from olgeta oli stap finis insaed long wan rabis samting we i kamaot long wol. Mo biaen i no longtaem, olgeta man long wol oli insaed long bisnes ya. Olgeta fandesen blong laef blong ol man oli seksek: ol promes, ol kontrak, ol loa long saed blong fasin blong laef. Evri dei, i gat wan long ol samting ya i brokdaon. Faet ya i winim olgeta rabis samting we man i save tingbaot, hem i bitim tingting blong man. Hem i bigfala tumas, i nogud olgeta, i mekem tingting blong ol man long wol i fasfas, mo hem i stap gat paoa long laef blong yumi yet.”—Maurice Genevoix, we hem i memba blong Académie Française, mo toktok blong hem i stap long buk ya Promise of Greatness (1968).

15. ?Olsem wanem namba seven hed blong wael anamol ya i kasem kil we i naf blong kilim hem i ded?

¹⁵ Namba seven hed blong wael anamol ya, we hem i rul long taem ya, i kasem bigfala kil long faet ya. Engglan wetem sam narafala nesen blong Yurop oli lusum fulap yangfala man long faet ya. Long wan faet nomo, hemia Faet blong Reva Som long 1916, 420,000 man blong Engglan, wetem samwe 194,000 blong Franis mo 440,000 blong Jemani, oli ded. !Namba blong olgeta evriwan we oli ded long faet ya i bitim wan milyan! Mo tu, faet ya i spolem ekonomi blong Engglan wetem ol narafala kantri blong Yurop. Bigfala nesen ya Engglan i harem i soa tumas from kil ya, mo hem i neva kamgud bakegen fulwan. Twante eit bigfala nesen oli joen long faet ya. Mo tru, faet ya i givim kil long ful wol, olsem we hem i naf blong kilim hem i ded. 65 yia biaen long stat blong Faswan Bigfala Faet Blong Wol, long Ogis 4, 1979, wan nyuspepa blong London, Engglan, (The Economist) i talem se: “Samting we i hapen long 1914 i mekem se wol i no moa save joengud. Mo kam kasem naoia, hem i stap seraot yet.”

16. ?Long faswan faet blong wol, olsem wanem Amerika i soemaot se hem i joen wetem Engglan blong mekem wan bigfala politik paoa long wol?

¹⁶ Long taem ya, oli putum nem long faet ya se Bigfala Faet. Faet ya i openem rod blong Amerika i save stanap olsem wan bigfala politik paoa we i joen wetem Engglan blong rulum wol. Long ol faswan yia blong faet ya, plante man Amerika oli no wantem faet, ale tingting ya i blokem Amerika i no joen long faet ya. Be Esmé Wingfield-Stratford we hem i stadi long histri, i talem se: “Long taem ya blong bigfala trabol, kwestin i stanap se: ?Engglan mo Amerika, tufala kantri ya i rere blong trastem tufala mo wokgud tugeta, blong oli save fogetem se ol tingting blong tufala i defren, no no gat?” Ol samting we i kamaot biaen oli soemaot se tufala i mekem olsem. Long 1917, Amerika i sanem fulap man mo mane blong sapotem ol nesen we oli stap long saed blong hem, we oli stap lusum paoa blong olgeta long faet. From samting ya, namba seven hed, we i minim Engglan mo Amerika tugeta, i win.

17. ?Afta long faet ya, wanem i hapen long ogenaesesen blong Setan?

¹⁷ Afta long faet ya, wol i defren. Nating we politik ogenaesesen blong Setan i kasem kil we i naf blong kilim hem i ded, be hem i kamgud bakegen. Mo hem i kam strong moa i bitim bifo. From we hem i naf blong girap mo kasem paoa bakegen, ol man oli sapraes tumas, nao oli biaen long hem.

18. ?Olsem wanem i kamaot olsem Baebol i talem se ol man oli “stap biaen long anamol ya”?

¹⁸ Man blong raetem histri, Charles L. Mee, Jr., hem i talem se: “Olfala fasin blong laef i foldaon [from faswan bigfala faet blong wol]. Be samting ya i mas hapen blong mekem se fasin blong man blong rul long hem wan i kasem olgeta ples long wol, mo blong mekem sam moa nyufala nesen mo grup, mo blong stanemap wan nyu kaen fasin fri wetem fasin independen.” Afta long faet, namba seven hed blong wael anamol ya, we soa blong hem i kamgud finis, hem i lidim wol ya blong mekem olsem. Mo Amerika i kam strong moa i bitim Engglan. Tufala nesen ya we tugeta tufala i rul long wol i strong blong sapotem Ligofnesen wetem Yunaeted Nesen. Taem wol i kasem yia 1980, bigfala paoa blong politik, Amerika, i mekem laef blong plante rij nesen i moa gud, hem i faenem meresin blong plante sik, mo i wokem plante nyufala teknik. Hem i sanem 12 man i go long mun tu. Ol samting ya i soemaot from wanem ol man oli “stap biaen long anamol ya.”

19. (a) ?Olsem wanem ol man oli go moa, oli no stap biaen long wael anamol ya nomo? (b) ?Hu i gat paoa long olgeta kingdom blong wol? ?Olsem wanem yumi save samting ya? (c) ?Olsem wanem Setan i givim paoa long wael anamol ya? ?From samting ya, bighaf blong ol man oli mekem wanem?

¹⁹ Be ol man oli go moa, oli no biaenem wael anamol ya nomo. Jon i talem se: “Olgeta man oli foldaon long bigfala algita ya, oli stap presem hem, from we hem i givim paoa blong hem long anamol ya. Mo oli foldaon long anamol ya tu, oli stap presem hem, se ‘I no gat man we i olsem anamol ya. I no gat man nating we i save go faet long hem.’ ” (Revelesen 13:4) Taem Jisas i stap long wol, Setan i talem se hem i gat paoa long olgeta kingdom blong wol ya. Jisas i no rao wetem hem long poen ya. Hem tu i talem se Setan i masta blong wol ya. Mo hem i no joen nating long politik long taem blong hem. Biaen, Jon i raetem leta i go long ol tru Kristin i se: “Yumi save we yumi ya, yumi man blong God, be olgeta man blong wol oli stap long paoa blong Setan.” (1 Jon 5:19; Luk 4:5-8; Jon 6:15; 14:30) Setan i givim paoa long wael anamol ya. Hem i givim long ol nesen wanwan. Taswe ol man oli no save joengud long lav we i kamaot long God. Oli seraot from we oli flas tumas from laen, no kala, no nesen blong olgeta. Bighaf blong ol man, i olsem we oli mekem wosip long haf blong wael anamol ya we i stap long kantri we oli laef long hem. Taswe i olsem we ol man oli wosipim mo oli stap biaen long olgeta haf blong anamol ya.

20. (a) ?Olsem wanem ol man oli wosip long wael anamol ya? (b) ?From wanem ol Kristin we oli wosip long Jeova God oli no joen long wosip blong wael anamol? ?Oli folem eksampel blong hu?

²⁰ ?Olsem wanem oli wosipim hem? I olsem we oli mekem wosip long hem from we oli laekem kantri blong olgeta moa i bitim we oli laekem God. I stret we ol man oli laekem kantri we oli bon long hem. Ol tru Kristin oli gudfala sitisen, taswe oli respektem ol haeman mo ol samting we oli saen blong kantri we oli stap long hem. Oli obei long ol loa, mo oli traehad blong mekem i gud long olgeta man raonabaot long olgeta mo long komuniti blong olgeta. (Rom 13:1-7; 1 Pita 2:13-17) Be oli no save givim ona long wan kantri moa i bitim ol narafala. Tingting ya se “kantri blong mi i moa gud, nating we i mekem i stret no i mekem i no stret,” hem i no wan Kristin tijing. Taswe ol Kristin we oli wosip long Jeova God oli no save wosip long wan haf blong wael anamol tu, olsem we oli leftemap kantri blong olgeta. Sipos oli mekem olsem, oli rili stap wosip long algita, we hem i stap givim paoa long anamol ya. Oli no save presem hem olsem: “I no gat man we i olsem anamol ya.” Long defren fasin, oli folem eksampel blong Maekel, we nem blong hem i minim “?Hu i Olsem God?” Olgeta oli leftemap hae rul blong Jeova nomo. Long stret taem we God i makemaot finis, Maekel ya hemia Jisas Kraes, bambae i faetem wael anamol ya. Mo bambae hem i winim hem, olsem i winim Setan long heven finis mo i sakemaot hem.—Revelesen 12:7-9; 19:11, 19-21.

Faet Agens Long Ol Tabu Man Ya

21. ?Jon i talem wanem blong eksplenem olsem wanem Setan i lidim wael anamol ya?

²¹ Setan i mekem plan blong lidim wael anamol ya blong mekem ol samting we hem i wantem. Jon i eksplenem se: “Nao God i letem anamol ya i tok flas, i tok nogud tumas long hem. Mo God i letem hem i wokem wok blong hem long fotetu manis. Nao anamol ya i stap swea, i stap tok nogud long God, mo long nem blong God, mo long ples we God i stap long hem, wetem olgeta we oli stap wetem God long ples ya. Nao God i letem anamol ya i go faet long ol man blong hem, i winim olgeta, mo God i letem hem i bos long olgeta man blong olgeta laen mo kantri mo lanwis mo kala. Olgeta man we i stap long wol bambae oli foldaon long anamol ya blong presem hem. Smol sipsip ya we oli kilim hem finis, hem i gat wan buk we nem blong ol man we oli gat laef i stap long hem. Hem i raetem ol nem ya long buk ya bifo olgeta, taem wol ya i no stap yet. Nao ol man ya nomo bambae oli no save foldaon long anamol ya blong presem hem.”—Revelesen 13:5-8.

22. (a) ?Fotetu manis ya i stret long wanem taem? (b) ?Long ol fotetu manis ya, olsem wanem oli “winim” ol tabu Kristin man?

²² Vas ya i tokbaot fotetu manis. Profet tok blong Daniel i talem se i gat wan hon we i kamaot long anamol, nao i agensem ol tabu man gogo tri yia haf i pas. I luk olsem se tufala taem ya i sem mak. (Daniel 7:23-25; mo lukluk tu long Revelesen 11:1-4.) I stat long las haf blong yia 1914 go kasem 1918, ol nesen we oli joen long faet ya oli stap faetem olgeta olsem ol wael anamol nomo. Ol nesen wanwan oli traem fosem ol man blong olgeta blong mekem olsem we oli wosip long wael anamol, blong tingbaot moa nesen blong olgeta, mo blong rere blong ded from kantri blong olgeta. Oli mekem ol tabu man blong God oli harem nogud tumas, from we ol tabu man ya oli strong blong oli mas obei fastaem long Jeova God mo Pikinini blong hem Jisas Kraes. (Ol Wok 5:29) Ol traem oli kam bigwan moa gogo long Mei 1918, oli “winim” ol tabu man ya. Long Amerika, oli sakem sam lida mo sam narafala man blong Watch Tower Sosaeti we oli no mekem i rong, oli go long kalabus. Mo oli traem stopem wok blong prij blong ol Kristin brata blong olgeta. From we wael anamol i bos long “olgeta laen mo kantri mo lanwis mo kala,” hem i traem blong blokem wok blong God long olgeta ples long wol.

23. (a) ?Wanem ‘buk blong laef blong Smol Sipsip ya’? ?I stat long 1918, wanem wok i stap gohed gogo i finis? (b) ?Taem i luk olsem we ogenaesesen blong Setan long wol i winim “ol man blong hem,” from wanem hemia i blong smoltaem nomo?

²³ Long taem ya, i luk olsem se Setan mo ogenaesesen blong hem i win. Be oli no save haremgud longtaem, from we i no gat wan man long ogenaesesen blong Setan long wol we nem blong hem i stap long ‘buk blong laef blong Smol Sipsip ya.’ Buk ya, i gat nem blong olgeta we bambae oli rul wetem Jisas long Kingdom blong hem long heven, i stap long hem. Hem i raetem ol faswan nem long buk ya long Pentekos long 33 K.T. Mo long ol yia biaen long taem ya, hem i raetem plante moa nem long buk ya. I stat long 1918, wok blong putum mak blong God long fes blong las haf blong ol 144,000 man blong rul long Kingdom ya, i gohed gogo i finis. I no longtaem Smol Sipsip ya bambae i mekem se ol nem we hem i raetem long buk ya blong laef oli stap blong olwe, i no gat samting i save ravemaot olgeta samtaem. Yes, oli no save lus samtaem. Be ol man we oli agensem ol tabu man ya mo we oli wosip long wael anamol, i no gat wan nem blong olgeta i stap long buk ya. Taswe nating se i luk olsem oli winim “ol man blong hem,” be hem i blong smoltaem, i olsem nating nomo.

24. ?Jon i singaot olgeta we oli gat fasin luksave blong harem wanem? ?Ol tok we hem i harem oli minim wanem long ol man blong God?

²⁴ Nao Jon i singaot olgeta we oli gat fasin luksave blong oli lesingud: “Yufala we i gat sora blong yufala, yufala i mas lesin gud.” Nao hem i gohed olsem: “Olgeta we oli man blong kalabus, bambae oli go long kalabus. Olgeta we oli man blong ded long naef blong faet, bambae oli ded long naef blong faet. Yufala ol man blong God, from tok ya yufala i mas stanap strong, yufala i mas bilif strong long God.” (Revelesen 13:9, 10) Bifo 607 B.K.T., Jeremaea i raetemdaon tok we i kolosap sem mak. Hemia i blong soemaot se Jeova i no save jenisim ol jajmen blong hem long ol man we oli no obei long hem long taon ya Jerusalem. (Jeremaea 15:2; mo lukluk tu long Jeremaea 43:11; Sekaraea 11:9.) Taem Jisas i kasem bigfala traem, hem i talem klia nomo se ol man we oli biaen long hem oli no mas lego bilif blong olgeta. Hem i se: “Man we i stap tekem naef blong faet, hem bambae i ded long naef blong faet.” (Matyu 26:52) Naoia tu, long dei blong Masta, ol man blong God oli mas holemstrong long ol rul blong Baebol. Olgeta we oli wosip long wael anamol ya mo oli no tanem tingting blong olgeta from sin, bambae oli no save ronwe long jajmen blong olgeta. Blong winim ol bigfala traem mo trabol we oli stap fored long yumi, yumi evriwan i mas stanap strong longtaem wetem bilif we i no save seksek.—Hibrus 10:36-39; 11:6.

Wael Anamol We i Gat Tu Hon

25. (a) ?Olsem wanem Jon i eksplenem wan narafala wael anamol we i kamtru? (b) ?Wanem mining blong tufala hon blong wael anamol ya? ?From we hem i kamaot long graon, samting ya i minim wanem?

²⁵ Naoia wan narafala wael anamol i kamtru. Jon i talem se: “Nao mi luk i gat wan narafala anamol i kamaot long graon. Hem i gat tu hon blong hem olsem hon blong smol sipsip, mo i tok olsem bigfala algita. Hem i kasem ful paoa blong fas anamol ya, nao i stap yusum paoa ya long fes blong hem. Hem i fosem wol wetem olgeta man we oli stap long hem oli foldaon long fes blong fas anamol ya, oli presem hemia we samting i kilim hem we i naf blong kilim hem i ded, be soa blong hem i kamgud bakegen finis. Seken anamol ya, hem i stap wokem ol bigbigfala saen, blong soemaot paoa blong hem. Hem i mekem faea i aot long heven i kamdaon long wol, stret long fes blong ol man.” (Revelesen 13:11-13) Wael anamol ya i gat tu hon blong hem. Samting ya i soemaot se tu nesen i joen blong rul long wol. Mo anamol ya i kamaot long graon, hem i no kamaot long solwora, hemia i min se hem i kamaot long fasin blong wol ya, we Setan i mekem i stanap gud finis. Anamol ya i mas minim wan bigfala politik paoa long wol we i stanap finis, mo i stap mekem wan bigfala wok long dei blong Masta.

26. (a) ?Wael anamol ya we i gat tu hon blong hem, hem i minim wanem? ?Olsem wanem hem i joen wetem faswan wael anamol? (b) ?Olsem wanem tu hon blong anamol ya i olsem hon blong wan smol sipsip? ?Mo olsem wanem hem i tok “olsem bigfala algita”? (c) ?Ol man we oli tinghae tumas long kantri blong olgeta wanwan, oli rili stap wosip long wanem? ?Fasin blong leftemap kantri blong olgeta i sem mak long wanem? (Lukluk futnot.)

²⁶ ?Oraet, wael anamol ya i minim wanem? Hem i minim Engglan mo Amerika we tufala i joen tugeta olsem wan bigfala politik paoa long wol. !Hem i olsem namba seven hed blong faswan wael anamol, be naoia i gat wan spesel wok! I gud we Jon i luk wael anamol ya hem wan long vison, from we samting ya i halpem yumi blong lukluk klia wanem wok we anamol ya hem wan i mekem long wol. Wael anamol ya we i gat tu hon blong hem, i minim tu defren politik paoa blong wol we tufala i stanap long semtaem, mo tufala i wok tugeta. Tu hon blong hem we i “olsem hon blong smol sipsip,” i min se hem i mekem olsem we hem i gat kwaet fasin, i no save faetem narafala, mo we hem i wan waes gavman we olgeta man long wol oli save trastem. Be hem i tok “olsem bigfala algita.” Hem i yusum ol tok nogud mo raf fasin blong traem fosem ol man we oli no wantem rul blong hem. Hem i no pulum ol man blong obei long Kingdom blong God long han blong Smol Sipsip blong God. Long defren fasin olgeta, hem i pulum ol man blong folem bigfala algita ya, Setan. Mo hem i pulum olgeta blong seraot long ol nesen wanwan, mo blong no laekem nating ol man long narafala nesen. I olsem we hem i pulum olgeta blong wosip long faswan wael anamol.c

27. (a) Wael anamol ya we i gat tu hon blong hem i mekem faea i aot long heven i kamdaon. ?Samting ya i soemaot wanem tingting blong hem? (b) ?Fulap man oli tingting olsem wanem long samting we i olsem wael anamol wetem tu hon tede?

²⁷ Wael anamol ya we i gat tu hon long hem, hem i wokem ol bigbigfala saen. Hem i mekem faea i aot long heven i kamdaon long wol tu. (Ridim Matyu 7:21-23.) Samting ya i pulum yumi blong tingbaot olfala profet blong God, Elaeja, taem hem i traem ol profet blong god ya Bal. Hem i singaot Jeova blong mekem faea i aot long heven i kamdaon, mo Jeova i mekem olsem. Merikel ya i pruvum se hem i wan trufala profet mo ol profet blong Bal oli gyaman. (1 King 18:21-40) Wael anamol ya we i gat tu hon blong hem, hem i tingting olsem ol profet ya blong Bal, hem i ting se hem i naf gud blong mekem wok blong wan profet. (Ridim Revelesen 13:14, 15; 19:20.) !Yes, hem i stap talem se hem nao i winim ol rabis nesen blong tu bigfala faet blong wol, mo hem nao i stap stanap strong agens long ol komunis, we oli stap talem se God i no stap! Tru ya, plante man oli bilif se bigfala nesen blong wol we i olsem wael anamol wetem tufala hon blong hem, hem i lukaotgud long fasin fri blong ol man mo hem i stap givim fulap samting long ol man.

Pija Blong Faswan Wael Anamol

28. ?Wanem toktok blong Jon i soemaot se wael anamol wetem tu hon i no kwaet olsem hon blong sipsip i minim?

²⁸ ?I tru se wael anamol we i gat tu hon blong hem i kwaet olsem hon blong sipsip i minim, no no gat? Jon i gohed i talem se: “Seken anamol ya i gyaman long olgeta man long wol, i trikim olgeta long ol bigbigfala saen ya we God i letem hem i wokem long fes blong fas anamol. Nao hem i talem long olgeta man ya, se oli mas katem wan wud we i pija blong fas anamol ya we naef blong faet i stikim hem finis be i stap laef gud yet, blong olgeta oli ona long hem. Nao God i letem seken anamol i bloem win blong hem i go insaed long wud ya we i pija blong fas anamol. Nao from samting ya, wud ya i gat paoa blong tok mo blong kilim olgeta man we oli no foldaon long hem blong presem hem, oli ded.”—Revelesen 13:14, 15.

29. (a) ?Wanem wok blong pija blong wael anamol? ?Oli wokem pija ya wetaem? (b) ?From wanem yumi talem se pija ya blong wael anamol i no wan wud nomo we i no gat laef?

²⁹ ?Wanem ya “pija blong fas anamol ya”? ?Mo wanem wok blong hem? Hem i pija blong fas anamol we i gat seven hed blong hem. Wok blong hem i blong pulum ol man oli wosip long faswan anamol. Olsem nao, hem i save mekem faswan wael anamol i stap laef longtaem. Faswan wael anamol we i gat seven hed blong hem i kasem kil from naef blong faet. Nao afta faswan bigfala faet blong wol, taem soa blong hem i kamgud bakegen, oli mekem wan pija blong hem. Pija ya i no olsem wan pija we i no gat laef, we oli katem long wud nomo. Hem i no olsem aedol we Nebukadnesa i mekem long flat ples blong Dura. No gat. (Daniel 3:1) Wael anamol we i gat tu hon blong hem, hem i bloem win i go long pija ya. From samting ya, pija ya i save laef mo i save mekem wan wok long wol.

30, 31. (a) ?Ol samting we oli kamaot long histri oli pruvum se pija ya i minim wanem? (b) ?I gat sam man we oli ded from we oli no wantem wosip long pija ya? Eksplenem.

³⁰ Ol samting we i kamaot long histri i pruvum se pija ya i wan ogenaesesen we Engglan mo Amerika i stanemap mo tufala i sapotem. Fastaem oli putum nem Ligofnesen long ogenaesesen ya. Long Revelesen japta 17, bambae yumi luk we wan narafala anamol bakegen i olsem saen blong hem. Hemia wan laef wael anamol we i red we i red, mo i no dipen long narafala blong stap laef. Ogenaesesen ya blong olgeta nesen blong wol i “gat paoa blong tok.” Hem i stap tok flas se hem nomo i save givim pis mo seftaem long ol man. Be rili hem i olsem wan miting nomo, blong ol nesen oli mekem plante toktok tugeta mo blong oli sakem plante nogud toktok long olgeta tu. Hem i talem se ol nesen no ol man we oli no ona long hem, bambae hem i no givhan nating long olgeta, hem i mekem olsem oli ded nomo. Hem i givim woning long sam nesen se bambae hem i sakemaot olgeta, oli no moa stap insaed long ogenaesesen ya, sipos oli no obei long ol tingting blong hem. Taem bambae bigfala trabol i kamtru long wol, ol “hon” blong pija ya blong faswan wael anamol, bambae oli faet, mo bambae oli spolem plante samting.—Revelesen 7:14; 17:8, 16.

³¹ I stat long Namba Tu Bigfala Faet Blong Wol, pija blong faswan wael anamol—we naoia i minim Yunaeted Nesen—hem i kilim plante man i ded. Eksampel, long 1950 wan ami blong Yunaeted Nesen i joen long faet we i kamaot bitwin Not Koria mo Saot Koria. Ami blong Yunaeted Nesen wetem ami blong Saot Koria, oli kilim i ded samwe long 1,420,000 man blong Not Koria mo Jaena. Sem mak long 1960 kasem 1964, ol ami blong Yunaeted Nesen oli faet long Kongo (naoia Sair). Mo tu, fulap lida blong wol wetem pop Pol 6 mo pop Jon Pol 2, oli gohed blong talem se pija ya i laswan jans mo i beswan hop blong givim pis long ol man. Oli talem strong se sipos ol man oli no ona long pija ya, bambae ol man nomo oli stap kilkilim olgeta gogo i no moa gat man long wol. Long fasin ya i olsem we oli kilim i ded ol man we oli no wantem agri wetem pija ya mo mekem wosip long hem.—Ridim Dutronome 5:8, 9.

Mak Blong Wael Anamol

32. ?Olsem wanem Jon i eksplenem fasin blong Setan blong pulum politik ogenaesesen blong hem long wol blong mekem ol laswan blong laen blong woman blong God oli harem nogud tumas?

³² Nao Jon i luk olsem wanem Setan i lidim ol politik nesen long ogenaesesen blong hem long wol, blong mekem las haf blong laen blong woman blong God long wol i harem nogud bitim mak. (Jenesis 3:15) Hem i tokbaot “fas anamol” bakegen, i se: “Nao olgeta man, ol haeman mo ol man we oli no gat nem, wetem ol rijman mo ol puaman, wetem ol slef mo ol friman, be [fas anamol, “NW”] i fosem olgeta, se oli mas gat mak long raet han blong olgeta mo long fes blong olgeta. Mak ya, hem i nem blong anamol ya, i namba we i stanap blong talem nem ya blong hem. Man we i no gat mak ya long hem, hem i no save pem wan samting, i no save salem wan samting. Bisnes ya, man i mas gat waes blong i save. Man we i gat save, hem i save faenemaot mining blong namba blong anamol ya, from we namba ya [i namba blong man, “NW”]. Hemia namba ya, namba sikis handred sikistesikis.”—Revelesen 13:16-18.

33. (a) ?Wanem nem blong faswan wael anamol? (b) ?Namba ya sikis i minim wanem? Eksplenem.

³³ Wael anamol ya i gat wan nem blong hem, mo nem ya i namba 666. Namba sikis i olsem wan saen long saed blong ol enemi blong Jeova. Wan man Filistia we i kamaot long laen blong Refaem, i wan “bigbigfala man,” we hem i gat “sikis fingga long ol han mo leg” blong hem. (1 Kronikel 20:6) King Nebukadnesa i bildim wan aedol long gol blong pulum ol haeman blong politik long nesen blong hem oli wosip wanples. Aedol ya i 60 kubit (samwe long 2670 sentimita) hae, mo big blong hem i 6 kubit (samwe long 267 sentimita). Taem ol man blong God oli no obei long oda blong wosip long pija ya we oli wokem long gol, king i sakem olgeta oli go long bigfala faea. (Daniel 3:1-23) Namba ya seven i min se wan samting i fulwan long lukluk blong God. Be namba ya sikis i sot, i no kasem seven. Taswe 666, olsem sikis we oli talem bakegen tri taem, i minim wan samting i mestem mak bigwan.

34. (a) ?Wanem mining blong tok ya se namba blong wael anamol ya i “namba blong man”? (b) ?From wanem nem ya 666 i stret long politik ogenaesesen blong Setan long wol?

³⁴ Wan nem i makem wan man se hem i hu. ?Oraet, olsem wanem namba ya i makem wael anamol? Jon i talem se hem i olsem “namba blong man,” i no namba blong wan speret man. Taswe nem ya i pruvum se wael anamol ya i blong wol ya, mo i minim fasin blong rul blong ol man. Namba ya sikis i sot long seven. Olsem nao 666, no sikis we oli talem bakegen tri taem, i stret long bigfala ogenaesesen blong politik long wol we hem i stap mestem bigwan ol stret mak blong God. Wael anamol ya we i minim politik blong wol i yusum nem ya 666 blong rul antap long ol man. Mo ol politik, skul, mo big bisnes blong wol oli sapotem wael anamol ya blong hem i save gohed blong spolem ol man mo blong ronem ol man blong God.

35. ?I minim wanem blong gat nem blong wael anamol olsem mak long fes mo raethan?

³⁵ ?Blong gat nem blong wael anamol ya i stap long fes mo long raethan, hemia i minim wanem? Taem Jeova i givim Loa long ol man Isrel, hem i talem long olgeta se: “Yufala i mas makem ol tok blong mi long hat mo long sol blong yufala, mo yufala i mas fasem olgeta olsem wan saen long han blong yufala. Mo olgeta oli mas stap olsem wan saen bitwin tufala ae blong yufala.” (Dutronome 11:18) Tok ya i min se Loa i mas stap long tingting blong ol man Isrel oltaem. Olsem nao, hem i save gat paoa long ol samting we oli mekem mo ol tingting blong olgeta. Baebol i talem se 144,000 tabu man oli gat nem blong Papa blong olgeta mo nem blong Jisas i stap long fes blong olgeta. Samting ya i makem olgeta se oli blong Jeova God mo Jisas Kraes nomo. (Revelesen 14:1) Setan i traem mekem i sem mak, ale hem i yusum mak blong wael anamol we ol rabis speret oli stampa blong hem. Wael anamol i traem ol man long ol samting we oli mekem evri dei nomo, olsem taem oli pem no salem sam samting. Hem i traem fosem olgeta blong folem ol fasin blong hem long ol samting we oli mekem, olsem we hem i traem fosem olgeta blong holem ol holede blong wol. Hem i wantem se oli wosip long wael anamol, oli letem hem i bos long laef blong olgeta. Olsem nao, ol man ya oli save kasem mak blong wael anamol.

36. ?Olgeta we oli no wantem mak blong wael anamol i stap long olgeta oli kasem wanem trabol?

³⁶ Ol man we oli no wantem mak blong wael anamol i stap long olgeta oli fesem fulap trabol. Eksampel, i stat biaen long 1930, ol man oli mekem olgeta oli pas long kot plante taem, mo oli mas stanap strong taem ol grup oli kilim olgeta mo ol man oli ronem olgeta. Long ol ples we wan man nomo i rul long kantri long strong fasin, oli sakem plante man oli go long ol rabis kalabus, mo plante oli ded from. I stat long Namba Tu Bigfala Faet Long Wol, fulap yangfala man oli harem nogud longtaem long kalabus. Oli kilim nogud samfala mo oli kilim samfala i ded, from we oli no lego Kristin fasin, oli stap kwaet nomo long ol bisnes blong politik. Long sam narafala kantri, ol Kristin man oli no save pem no salem sam samting. Samfala oli no save pem graon, long sam ples oli fosem sam sista, oli kilim samfala i ded, mo oli ronem ol man ples oli aot long ples blong olgeta. ?From wanem? From we ol Kristin oli folem voes blong hat blong olgeta mo oli no pem wan kad blong ol pati blong politik.d—Jon 17:16.

37, 38. (a) ?From wanem wol ya i wan had ples long olgeta we oli no gat mak blong wael anamol? (b) ?Hu ol man we oli stap holemtaet bilif blong olgeta? ?Mo oli gat strong tingting blong mekem wanem?

³⁷ Long sam ples long wol, ol skul oli gat bigfala paoa long ol man long ol velej. Taswe olgeta we oli stanap strong long trutok blong Baebol long ol ples ya, famle mo ol fren blong olgeta oli sakemaot olgeta oli no moa wantem joen wetem olgeta. Oli mas gat bigfala bilif blong gohed blong stanap strong. (Matyu 10:36-38; 17:22) Long wol ya, bighaf blong ol man oli wosip long mane, mo kruked fasin i fulap. From samting ya, ol trufala Kristin man oli mas trastem Jeova fulwan se hem bambae i sapotem olgeta blong oli save gohed long stret rod. (Ol Sam 11:7; Hibrus 13:18) Mo tu, wol ya i fulap long rabis fasin long saed blong seks. Taswe man we i wantem stap klin mo tabu i mas gat strong tingting blong mekem olsem. Samtaem, taem wan Kristin man i kasem wan sik, ol dokta mo dresa oli traem fosem hem blong brekem loa blong God long saed blong blad. Samtaem, kot i givim oda blong traem fosem samfala blong tekem blad, be no gat, oli stap holemstrong long bilif blong olgeta. (Ol Wok 15:28, 29; 1 Pita 4:3, 4) Mo naoia fulap man oli no moa gat wok blong kasem mane from. Taswe i hadwok moa long ol trufala Kristin blong oli no tekem wan wok we i pulum olgeta blong lego bilif blong olgeta long fes blong God.—Maeka 4:3, 5.

³⁸ I tru, wol ya i wan had ples long olgeta we oli no gat mak blong wael anamol. Be las haf blong laen blong woman long wol wetem bitim fo milyan man blong bigfala kampani, oli stap holemtaet bilif blong olgeta, nating we oli kasem fulap traem blong pulum olgeta blong brekem ol loa blong God. Samting ya i soemaot klia se paoa mo blesing blong Jeova i stap wetem olgeta. (Revelesen 7:9) Long olgeta ples long wol, yumi evriwan i mas gohed blong joen long wan tingting blong leftemap nem blong Jeova mo ol stret rod blong hem, mo blong blokem mak blong wael anamol, i no kasem yumi.—Ol Sam 34:1-3.

[Ol Futnot]

[Tok Blong Pija Long Pej 195]

God i letem hem i bloem win blong hem i go insaed long pija blong wael anamol