Japta 43

Bigfala Taon We i Saen We i Saen

Revelesen 21:9 kasem 22:5

Stampa tok: Hem i eksplenem Nyufala Jerusalem

Taem we i kamtru: Afta long taem blong bigfala trabol long wol mo afta we Setan i kalabus long bigfala hol

1, 2. (a) ?Wan enjel i tekem Jon i go weples blong lukluk Nyufala Jerusalem? ?Olsem wanem taon ya i defren olgeta long taon we Jon i luk fastaem? (b) ?From wanem yumi save talem se naoia Revelesen i kamtru olgeta?

BIFO finis, wan enjel i tekem Jon i go long drae ples, blong soemaot Bigfala Babilon long hem. Nao wan long olgeta enjel i tekem Jon i go long wan bigfala hil. !Samting we Jon i luk long ples ya i defren olgeta long samting we hem i luk long drae ples! Hem i no luk wan doti taon we i olsem rabis woman blong rod ya, Bigfala Babilon. No gat. Hem i luk Nyufala Jerusalem, we i tabu, i klin, hemia wan taon long saed blong speret, mo i stap kamdaon long heven.—Revelesen 17:1, 5.

² Jerusalem long wol neva hem i gat paoa mo i saen olsem Jerusalem ya we Jon i luk. Jon i talem se: “Nao wan enjel i kam long mi we hem i wan long ol seven enjel ya we bifo oli tekem ol seven besin ya oli kam, we oli fulap long ol seven bigbigfala trabol ya, we oli laswan blong ol trabol. Nao hem i talem long mi, i se ‘Yu kam. Bambae mi soemaot hemia long yu we i olsem woman blong Smol Sipsip blong God, we hem i jes mared long hem.’ Nao Tabu Speret i kam long mi, we paoa blong hem i holem mi, nao enjel ya i karem mi mi go antap long wan bigfala hil we i antap tumas. Nao hem i soemaot Jerusalem long mi, bigfala taon ya we i tabu, we i kamaot long God, i aot long heven i kam. Bigfala taon ya i gat bigfala laet ya we oltaem i stap saenaot long God, i stap saenaot long hem.” (Revelesen 21:9-11a) Jon i stap antap long bigfala hil ya, taswe hem i save luk ol smosmol samting long taon ya we oli mekem hem i naes tumas. Longtaem finis, i stat taem faswan man i mekem sin mo i kasem ded from, ol man blong bilif oli stap wet blong taon ya i kam. !Naoia hem i kamdaon! (Rom 8:19; 1 Korin 15:22, 23; Hibrus 11:39, 40) Hemia i wan nambawan taon long saed blong speret. Insaed long hem, i gat 144,000 man we oli stap holemtaet bilif blong olgeta. Taon ya i saen we i saen from we hem i tabu tumas mo paoa blong Jeova hem wan i stap saenaot long hem. !Naoia, Revelesen i kamtru olgeta!

 3. ?Jon i talem wanem tok blong eksplenem olsem wanem Nyufala Jerusalem i naes?

³ Jon i sek long Nyufala Jerusalem from we taon ya i naes tumas: “Nao i stap saen olsem wan gudfala ston, olsem gudfala ston ya jaspa we i klia gud, i olsem glas. I gat bigfala stonwol we i antap, we i goraon long taon ya, mo i gat twelef bigfala doa blong stonwol ya, mo i gat twelef enjel we oli stap gad long ol doa ya. Mo long ol bigfala doa ya i gat nem blong ol twelef laen blong ol man Isrel we oli raetem finis wanwan long olgeta. Long bigfala taon ya, i gat fo saed blong hem, mo evriwan oli gat tri doa blong hem. Long saed long is i gat tri doa mo long saed long saot i gat tri doa mo long saed long not i gat tri doa mo long saed long wes i gat tri doa. Mo stonwol blong bigfala taon ya i stanap long twelef bigfala ston, mo i gat nem blong ol twelef aposol blong Smol Sipsip blong God oli raetem finis wanwan long ol ston ya.” (Revelesen 21:11b-14) !I stret nomo we fastaem Jon i luk se taon ya i saen olsem bigfala laet! Olsem wan gel we hem i hapi tumas from we hem i jes mared, Nyufala Jerusalem i saen, taswe hem i stret blong kam waef blong Kraes. Mo tu, i stret we hem i saen we i saen, from we “God ya we i mekem olgeta laet blong skae” i wokem hem.—Jemes 1:17.

 4. ?Wanem i soemaot se Nyufala Jerusalem i no minim ol prapa man Isrel?

⁴ Long ol 12 doa wanwan oli raetem finis nem blong ol 12 laen blong ol man Isrel. From samting ya yumi save se ol 144,000 oli stap insaed long taon ya, “oli kamaot long olgeta laen blong ol man Isrel,” mo mak blong God i stap long olgeta. (Revelesen 7:4-8) Mo tu long ol 12 bigfala ston we taon ya i stanap long olgeta, i gat nem blong ol 12 aposol blong Smol Sipsip ya i stap. Yes, Nyufala Jerusalem i no minim ol man Isrel we oli kamaot long ol 12 pikinini boe blong Jekob, no gat. Hem i Isrel long saed blong speret, we ol faswan blong hem, “ol aposol mo ol profet.”—Efesas 2:20.

 5. ?“Bigfala stonwol ya we i antap” we i goraon long Nyufala Jerusalem, hem i pija blong wanem? ?Mo ol enjel we oli stap gad long ol doa blong hem oli pija long wanem?

⁵ Bigfala taon ya i gat wan bigfala stonwol i goraon long hem. Long taem bifo, oli bildim ol stonwol olsem blong protektem ol taon, blong ol enemi oli no save kam spolem. Long Nyufala Jerusalem, “bigfala stonwol we i antap” i min se ol man insaed long hem oli stap sefgud long saed blong speret. I no gat wan enemi blong stret fasin, no wan we i no klin no i gyaman we hem i save kam insaed long taon ya. (Revelesen 21:27) Be olgeta we oli gat raet blong go insaed long naesfala taon ya, i olsem we oli kam insaed long Paradaes. (Revelesen 2:7) Taem God i ronemaot Adam long faswan Paradaes, hem i putum tufala Jerubim i stanap long get blong blokem ol man we oli no stret mo oli no klin oli no save kam insaed. (Jenesis 3:24) Sem mak long tabu taon ya Nyufala Jerusalem, i gat ol enjel we oli stap gad long ol doa, blong taon ya i stap sefgud long saed blong speret. Tru ya, long ol lasdei ya, ol enjel oli stap gad long kongregesen blong ol tabu Kristin, we bambae hem i kam Nyufala Jerusalem, blong i no gat ol rabis fasin blong Babilon oli save kam insaed mo spolem hem.—Matyu 13:41.

Oli Makem Saes Blong Bigfala Taon Ya

 6. (a) ?Olsem wanem Jon i eksplenem wok blong makem saes blong taon ya? ?Taem enjel i makem taon ya, hemia i saen long wanem? (b) ?From wanem ‘kyubit we enjel i yusum blong makem taon ya, i sem mak long kyubit blong man’? (Lukluk futnot.)

⁶ Jon i gohed long storeyan ya i se: “Nao enjel ya we i tok long mi, hem i stap holem wan teplaen we oli wokem long gol, we i blong makem saes blong bigfala taon ya, mo blong ol doa blong hem mo blong stonwol blong hem. Bigfala taon ya i stret gud, i skwea, we bigfala blong hem mo longfala blong hem tufala i sem mak. Nao enjel ya i tekem teplaen ya, i makem longfala blong bigfala taon ya, mo longfala blong hem i twelef taosen [felong, “NW”]. Mo bigfala blong taon ya mo hae blong hem tufala i sem mak wetem longfala blong hem. Enjel ya i makem stonwol blong hem tu, nao hae blong stonwol ya i wan handred fotefo kyubit. Kyubit ya we enjel ya i yusum blong makem stonwol ya, i sem mak long kyubit ya we ol man oli stap yusum oltaem.” (Revelesen 21:15-17) Taem ol enjel oli makem saes blong haos blong God, hemia i olsem wan promes se ol plan blong Jeova long saed blong haos blong hem bambae oli kamtru. (Revelesen 11:1) Nao taem enjel i makem saes blong Nyufala Jerusalem, samting ya i soemaot se ol tingting blong Jeova long saed blong bigfala taon ya oli no save jenis, bambae oli kamtru.a

 7. ?From wanem yumi sapraes long saes blong taon ya?

⁷ !Taon ya hem i nambawan! Bigfala blong hem, mo longfala blong hem, tufala i sem mak. Blong raonem hem man i mas ron 12,000 felong (samwe long 2,220 kilomita). Mo stonwol we i goraon long hem, hem i hae olsem 144 kyubit, no 64 mita. I no save gat wan taon long wol we i bigfala olsemia. Sipos i gat wan taon olsem bambae i kavremap Isrel blong tede 14 taem bakegen. !Mo taon olsem bambae i go antap go kasem 560 kilomita long skae! Revelesen i fulap long ol saen mo pijatok. ?Oraet, saes blong taon ya i minim wanem long saed blong Nyufala Jerusalem long heven?

 8. ?Wanem mining blong (a) stonwol blong taon ya we hem i hae olsem 144 kyubit? (b) hem i 12,000 felong raon long hem? (c) bigfala mo longfala blong hem tufala i sem mak?

⁸ Stonwol ya we hem i hae olsem 144 kyubit i pulum yumi blong tingbaot we taon ya i gat 144,000 man long hem we God i tekemaot olgeta blong oli kam olsem ol pikinini blong hem long saed blong speret. 12,000 felong ya, hemia saes blong taon ya we longfala mo bigfala blong hem, tufala i sem mak. Namba ya 12, hem i wan saen we i kamaot long plante profet tok long Baebol long saed blong ol ogenaesesen. Taswe yumi save se Nyufala Jerusalem ya, hem i wan ogenaesesen we God i wokem long nambawan fasin blong mekem stampa tingting blong hem blong olwe i kamtru. Nyufala Jerusalem wetem King blong hem Jisas Kraes, hemia ogenaesesen blong Kingdom blong Jeova. Oraet, ?be wanem mining blong bigfala mo longfala blong hem tufala i sem mak? Long tempel we Solomon i bildim, Tabu Ples we i Tabu Tumas we i gat wan samting i stap long hem blong soemaot se Jeova i stap long ples ya, hem tu longfala mo bigfala blong hem tufala i sem mak. (1 King 6:19, 20) !Taswe i stret nomo we Nyufala Jerusalem we paoa blong Jeova hem wan i saenaot long hem, hem tu, longfala mo bigfala blong hem tufala i sem mak! Taon ya i stretgud, i skwea. Hem i no gat wan samting i no stret no wan poen long hem.—Revelesen 21:22.

Ol Sas Ston Long Taon Ya

 9. ?Jon i talem wanem long saed blong ol sas ston we oli yusum blong wokem taon ya?

⁹ Jon i storeyan moa i se: “Stonwol blong taon ya, oli wokem long gudfala ston ya jaspa, mo taon ya oli wokem long gol we i klin gud, i klia olsem glas. Ol faondesen ston blong stonwol blong taon ya, oli flasem long ol gudfala ston. Faswan oli flasem long ston ya jaspa. Sekenwan oli flasem long ston ya safaea. Namba tri oli flasem long ston ya agat. Namba fo oli flasem long ston ya emeral. Namba faef oli flasem long ston ya onikis. Namba sikis oli flasem long ston ya kanilyan. Namba seven oli flasem long ston ya yalakwoj. Namba eit oli flasem long ston ya malakaet. Namba naen oli flasem long ston ya topas. Namba ten oli flasem long ston ya kalsedoni. Namba leven oli flasem long ston ya takwoes. Mo namba twelef oli flasem long ston ya ametis. Ol twelef bigfala doa ya, oli wokem long twelef perel. Oli wokem wan doa long wan perel, wan doa long wan perel. Mo ol rod insaed long taon ya, oli wokem long gol we i klin gud, i klia olsem glas.”—Revelesen 21:18-21.

10. ?Wanem mining blong tok ya se oli bildim bigfala taon ya long jaspa, gol, mo “ol gudfala ston”?

¹⁰ Yes, taon ya i saen we i saen. Oli no yusum ol samting olsem graon mo ston blong bildim taon ya, oli yusum gol, gudfala ston ya jaspa mo “ol gudfala ston.” !Ol ston ya oli stret blong soemaot ol samting blong heven! I no gat narafala samting we i save saen olsem ol ston ya. Bokis blong kontrak bifo, oli kavremap hem long gol. Plante taem long Baebol gol i minim ol samting we oli gud mo oli sas. (Eksodas 25:11; Proveb 25:11; Aesea 60:6, 17) Olgeta haf blong Nyufala Jerusalem, mo ol rod insaed long taon ya tu, oli wokem long “gol we i klin gud, i klia olsem glas.” Hem i naes mo i sas bitim ol samting we ol man oli save tingbaot.

11. ?Wanem i soemaot se ol man we oli olsem Nyufala Jerusalem bambae oli saen from we oli klingud long saed blong speret?

¹¹ I no gat wan ples long wol we i save mekem gol i klingud olsemia. Be Jeova hem i Bigfala Man blong klinim evri samting. Hem i olsem “man we i jekem mo i klinimaot selva.” Hem i klinim olgeta gudfala man Isrel wanwan long saed blong speret, olsem we “man i klinimaot gol mo selva.” Hem i tekemaot ol doti long saed blong speret long olgeta. Ol man nomo we hem i klinim olgeta mo oli rili tabu, bambae oli stap insaed long Nyufala Jerusalem. Long fasin ya nao, Jeova i bildim taon ya long ol ston we oli laef, we oli saengud from we oli klingud long saed blong speret.—Malakae 3:3, 4.

12. ?Wanem mining blong (a) faondesen blong taon ya we oli flasem long 12 sas ston? (b) ol doa blong taon we oli wokem long 12 perel?

¹² Ol faondesen blong taon ya tu oli naes tumas. Oli flasem long ol 12 gudfala ston ya. Hemia i pulum yumi blong tingbaot hae pris blong ol man Isrel bifo. Long ol dei blong lafet hem i werem spesel klos we oli kolem efod. Oli flasem ol klos ya wetem 12 sas ston we oli kolosap sem mak long olgeta ya long Revelesen. (Eksodas 28:15-21) !Taswe yumi save se hemia i gat wan mining! Hemia i makem Nyufala Jerusalem se hem i mekem wok olsem ol pris, mo Jisas, hem i Hae Pris, we hem i “bigfala laet” blong hem. (Revelesen 20:6; 21:23; Hibrus 8:1) Mo tu, Nyufala Jerusalem hem i rod blong olgeta man oli kasem blesing from wok blong Hae Pris ya Jisas. (Revelesen 22:1, 2) Ol 12 doa long taon ya, we oli wokem long 12 perel we oli naes tumas, oli pulum yumi blong tingbaot pijatok ya blong Jisas se Kingdom i olsem wan sas perel. Olgeta we oli pastru long ol doa ya oli soemaot finis se oli rili tinghae long ol samting long saed blong speret.—Matyu 13:45, 46; ridim Job 28:12, 17, 18.

Taon Ya i Fulap Long Laet

13. ?Wanem nekis samting we Jon i talem long saed blong Nyufala Jerusalem? ?Mo from wanem taon ya i no nidim wan haos prea?

¹³ Long taem blong Solomon, bigfala samting long taon ya Jerusalem se haos blong God we oli bildim long wan bigfala hil long not, Hil ya Moraea. ?Be olsem wanem long Nyufala Jerusalem? Jon i talem se: “Mo mi mi no luk wan haos blong mekem prea long God long bigfala taon ya. Long ples ya, Hae God ya we i gat olgeta paoa, wetem Smol Sipsip blong hem, tufala i olsem haos blong prea blong olgeta. Long bigfala taon ya, olgeta oli no moa tingbaot san mo mun, blong tufala i saen long olgeta, from we bigfala laet ya we i stap saenaot long God, hem i stap saen bigfala long ples ya, mo Smol Sipsip ya, hem i laet blong olgeta.” (Revelesen 21:22, 23) Tru ya, i no gat nid blong bildim wan haos prea long taon ya. Haos prea blong ol man Isrel bifo hem i wan pija nomo. Prapa samting, bigfala haos prea long saed blong speret, hem i stanap taem Jeova i makemaot Jisas olsem Hae Pris long 29 K.T., mo haos prea ya i stap yet. (Matyu 3:16, 17; Hibrus 9:11, 12, 23, 24) Taem yumi tingbaot wan haos prea, yumi tingbaot tu ol pris we oli stap tekem ol sakrifaes we ol man oli karem i kam long olgeta, nao oli givim long Jeova. Be olgeta man long Nyufala Jerusalem evriwan oli pris. (Revelesen 20:6) Mo sakrifaes ya we i hae moa, stret laef blong Jisas, hem i givim wan taem nomo blong olwe. (Hibrus 9:27, 28) Mo tu, olgeta we oli stap long bigfala taon ya oli save go kolosap long Jeova hem wan.

14. (a) ?From wanem Nyufala Jerusalem i no moa nidim laet blong san mo mun? (b) ?Profet tok blong Aesea i talem wanem long saed blong bigfala ogenaesesen blong Jeova long heven mo long wol? ?Mo olsem wanem Nyufala Jerusalem i joen long bisnes ya?

¹⁴ Taem bigfala laet blong Jeova i pas kolosap long Moses long Hil ya Sinae, fes blong Moses i saen we i saen, nao taem hem i kam kolosap long ol man Isrel, hem i mas kavremap fes blong hem. (Eksodas 34:4-7, 29, 30, 33) Nao yu traem tingbaot olsem wanem bigfala taon ya i saen, we laet mo paoa blong Jeova i stap saenaot long hem oltaem nomo. Wan taon olsem i no gat naet long hem. Taon ya i no nidim san mo mun. Oltaem nomo i gat laet i saenaot long hem. (Ridim 1 Timote 6:16.) Nyufala Jerusalem i olsemia nao, i gat bigfala laet i stap saenaot long hem oltaem nomo. Yes, woman ya wetem Hasban blong hem we hem i King, bambae hem i kam bigfala taon blong ogenaesesen blong Jeova long heven mo long wol, we hem i olsem “woman” blong God, “Jerusalem antap.” Long saed blong woman ya, Aesea i raetemdaon profet tok ya se: “San bambae i no moa givim laet long yu long dei, mo mun bambae i no moa givim laet long yu long naet. Jeova bambae i kam olsem laet blong yu we i stap saenaot oltaem nomo, bambae hem i kam God blong yu we i flasem yu. San blong yu bambae i no moa godaon, mo mun blong yu bambae i no moa slip. From we Jeova hem wan bambae i kam olsem laet blong yu blong olwe, mo taem blong yu blong krae mo harem nogud bambae i finis.”—Aesea 60:1, 19, 20; Galesia 4:26.

Laet Blong Ol Nesen

15. ?Wanem tok blong Revelesen long saed blong Nyufala Jerusalem i kolosap sem mak long profet tok blong Aesea?

¹⁵ Profet tok ya i gohed moa i se: “Tru ya, ol nesen bambae oli go long laet blong yu, mo ol king bambae oli go long laet blong yu we i saen bigwan.” (Aesea 60:3) Revelesen i soemaot se profet tok ya i stret long Nyufala Jerusalem i se: “Ol man blong olgeta kantri long wol bambae oli wokbaot long laet we i stap saenaot long bigfala taon ya, mo bambae olgeta king long wol oli karem ol gudgudfala samting blong olgeta, oli kam putum long hem. Ol doa blong bigfala taon ya oli stap open oltaem nomo. Oli no save satem long dei, mo long ples ya, i no gat naet. Bambae ol man blong olgeta kantri long wol oli tekem ol gudgudfala samting blong olgeta wetem ol samting blong ona, oli kam putum long hem.”—Revelation 21:24-26.

16. ?Hu ya “ol man blong olgeta kantri long wol” we bambae oli wokbaot long laet blong Nyufala Jerusalem?

¹⁶ ?Hu ya “ol man blong olgeta kantri long wol” we oli stap wokbaot long laet blong Nyufala Jerusalem? Hemia ol man we oli kamaot long olgeta kantri long wol we fastaem oli joen wetem ol rabis man long wol. Be oli luk laet blong bigfala taon ya long heven, nao oli wokbaot long hem. Bighaf blong olgeta, bigfala kampani we “oli kamaot long olgeta kala mo long olgeta laen, mo long olgeta kantri, mo long olgeta lanwis.” Olgeta oli stap mekem wosip long God long dei mo long naet wetem grup ya we i olsem Jon bifo. (Revelesen 7:9, 15) Taem Nyufala Jerusalem i kamdaon long heven finis, nao Jisas i yusum ol ki blong ded mo Hades blong mekem ol dedman oli laef bakegen, plante milyan man bambae oli joen wetem olgeta ya. Ol man ya tu oli kamaot long “olgeta kantri long wol,” nao oli lanem blong laekem Jeova wetem Pikinini blong hem, we hem i Smol Sipsip mo Hasban blong Nyufala Jerusalem.—Revelesen 1:18.

17. ?Hu ya “olgeta king long wol” we oli karem “ol gudgudfala samting blong olgeta” oli kam long Nyufala Jerusalem?

¹⁷ ?Oraet, be hu ya “olgeta king long wol” we oli “karem ol gudgudfala samting blong olgeta, oli kam putum long hem”? Hemia i no minim olgeta man long wol we oli king, no gat, from we olgeta oli lus finis taem oli faet agens long Kingdom blong God long Amageden. (Revelesen 16:14, 16; 19:17, 18) ?Ol king ya, oli save minim ol haeman mo lida blong ol nesen we oli joen long bigfala kampani, no oli laef bakegen nao oli obei long Kingdom blong God long nyufala wol? (Matyu 12:42) No gat, from we ol king ya oli holem paoa mo haenem long wol ya nomo, mo samting ya i lus longtaem finis. Taswe “olgeta king long wol” we oli karem ol gudgudfala samting i kam long Nyufala Jerusalem, i mas minim ol 144,000 man we blad blong Jisas i “pemaot [olgeta] . . . oli kamaot long olgeta laen, mo long olgeta lanwis, mo long olgeta kantri, mo long olgeta kala.” Nao oli rul olsem ol king wetem Smol Sipsip ya, Jisas Kraes. (Revelesen 5:9, 10; 22:5) Oli karem ol gudgudfala samting we God i givim long olgeta oli kam long bigfala taon ya blong mekem hem i saen mo i naes moa.

18. (a) ?Hu oli no save go insaed long Nyufala Jerusalem? (b) ?Hu nomo oli save go insaed long taon ya?

¹⁸ Jon i gohed i se: “Be ol samting we oli doti long fes blong God, mo ol man we oli stap mekem ol samting blong sem, mo we oli stap gyaman, olgeta ya oli no save go insaed long bigfala taon ya. Ol man ya nomo we nem blong olgeta oli stap long buk ya blong Smol Sipsip blong God, we i gat nem blong ol man we oli gat laef i stap long hem, olgeta ya nomo oli save go insaed long bigfala taon ya.” (Revelesen 21:27) Ol samting we wol blong Setan i mekem i doti oli no save go insaed long Nyufala Jerusalem. Nating we ol doa blong hem oli stap open oltaem, be “ol man we oli stap mekem ol samting blong sem, mo we oli stap gyaman” oli no save go insaed long bigfala taon ya. Bambae i no gat sam man we oli tanem baksaed long trufala wosip long taon ya no sam memba blong Bigfala Babilon. Mo sipos samfala oli traem spolem taon ya, oli traem mekem sam memba blong hem we oli stap yet long wol oli kam doti long fes blong God, bambae oli traehad blong nating nomo, bambae oli no save mekem. (Matyu 13:41-43) “Ol man ya nomo we nem blong olgeta oli stap long buk ya blong Smol Sipsip blong God,” hemia 144,000 man, bambae oli go insaed long Nyufala Jerusalem.b—Revelesen 13:8; Daniel 12:3.

Reva Blong Wora Blong Laef

19. (a) ?Jon i talem wanem blong eksplenem olsem wanem Nyufala Jerusalem bambae i givim ol blesing long ol man? (b) ?‘Reva blong wora blong laef’ bambae hem i ron long wanem taem? ?Mo olsem wanem yumi save samting ya?

¹⁹ Nyufala Jerusalem ya we i saen we i saen bambae hem i givim fulap blesing long ol man long wol. Jon i luk samting ya naoia i se: “Nao enjel ya i soemaot wan bigfala reva long mi. Reva ya i stap ron, mo hem i wora blong laef. Hem i stap saen olsem glas, mo i stap kamaot long bigfala jea ya we God i stap sidaon long hem, wetem Smol Sipsip blong hem. Wora ya i ron, i pas long medel blong rod blong bigfala taon ya.” (Revelesen 22:1, 2a) ?“Reva” ya i stap ron long wanem taem? Hem i “stap kamaot long bigfala jea ya we God i stap sidaon long hem, wetem Smol Sipsip blong hem,” taswe hem i save ron afta we dei blong Masta i stat long 1914 nomo. Hemia nao taem we namba seven enjel i blou pupu blong hem, nao wan bigfala samting i hapen mo enjel ya i talemaot se: “Ol kingdom blong wol ya oli kam aninit long paoa blong Hae God blong yumi, wetem Mesaea blong hem.” (Revelesen 11:15; 12:10) Bifo long taem ya, “Smol Sipsip” i no sidaon long jea blong Mesaea King yet. Mo tu, reva ya i ron i pas long medel blong bigfala rod blong taon ya Nyufala Jerusalem. Taswe vison ya i mas kamtru afta we wol blong Setan i lus, taem ya we Nyufala Jerusalem ‘i aot long heven i kamdaon long God.’—Revelesen 21:2.

20. ?Wanem i soemaot se ol man oli save dring long sam wora blong laef naoia nomo?

²⁰ Hemia i no fastaem ol man long wol oli gat jans blong dring wora we i save givim laef long olgeta. Taem Jisas i stap long wol, hem i tokbaot wora we i save givim laef blong olwe long ol man. (Jon 4:10-14; 7:37, 38) Mo tu, i no longtaem bambae Jon i harem wan man i singaot long hem long kaen fasin i se: “Tabu Speret wetem hemia we i olsem Woman blong Kraes, tufala i talem se ‘Yu kam.’ Mo olgeta evriwan we oli harem tok ya, oli mas talem olsem tu, se ‘Yu kam.’ Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.” (Revelesen 22:17) Voes ya i stap singaot naoia, samting ya i soemaot se ol man oli save dring smol long wora blong laef naoia. Be long nyufala wol, ol wora ya bambae oli kamaot long bigfala jea ya we God i stap sidaon long hem mo bambae oli pastru long bigfala taon ya Nyufala Jerusalem, olsem wan reva we i ron.

21. ?‘Reva blong wora blong laef’ hem i pija long wanem? ?Olsem wanem vison blong Esikel long saed blong reva ya i givhan long yumi blong save mining blong hem?

²¹ ?Wanem ya ‘reva blong wora blong laef’? Ol man oli nidim wora blong stap laef. Sipos man i no moa kakae hem i save stap laef sam wik, be sipos man i no moa dring wora, bambae hem i ded afta wan wik nomo. Mo tu, wora i stap klinim bodi, mo yumi nidim wora blong mekem bodi i stap strong. Taswe wora blong laef i mas minim samting we ol man oli nidim blong stap laef mo blong stap strong long bodi. Profet Esikel tu i luk wan vison long saed blong “reva blong wora blong laef.” Mo long vison blong hem, reva ya i kamaot long haos prea long Jerusalem mo i ron i go kasem Ded Si. !Long ples ya wan merikel i hapen! !Wora blong Ded Si ya, we i doti mo i no gat laef nating long hem, i jenis i kam klin wora olsem springwora we i fulap long fis! (Esikel 47:1-12) Yes, reva ya long vison ya i mekem samting we fastaem i ded i laef bakegen. Samting ya i pruvum se reva ya blong wora blong laef i pija long ol samting we God i mekem from Jisas Kraes blong ol man we oli “ded,” oli save kasem laef we i stretgud. Reva ya i “stap saen olsem glas,” i soemaot se ol samting we God i givim oli klin mo tabu. Wora ya i no olsem “wora” blong Krisendom, we i gat blad i meks wetem mo i givim ded nomo long ol man.—Revelesen 8:10, 11.

22. (a) ?Reva ya i kamaot wea? ?From wanem hemia i stret nomo? (b) ?Wora blong laef i minim wanem? ?Mo reva ya i saen long wanem?

²² Reva ya i kamaot long “bigfala jea ya we God i stap sidaon long hem, wetem Smol Sipsip blong hem.” Hemia i stret nomo, from we ol samting we Jeova i mekem blong givim laef long ol man oli stanap long sakrifaes blong Jisas. Sakrifaes ya i kamaot from we ‘God i laekem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) Mo tu, wora blong laef i minim Tok blong God, Baebol i tokbaot samting ya olsem wora. (Efesas 5:26) Be reva blong wora blong laef i no minim trutok nomo. Hem i minim ol narafala samting tu we Jeova i mekem, we oli stanap long sakrifaes blong Jisas, blong mekem se ol man we oli obei oli save kam fri long sin mo ded mo kasem laef we i no save finis.—Jon 1:29; 1 Jon 2:1, 2.

23. (a) ?From wanem i stret we reva blong wora blong laef i ron i pas long medel blong bigfala rod blong Nyufala Jerusalem? (b) ?Taem wora blong laef ya i ron olsem wan reva, wanem promes blong God long Ebraham bambae i kamtru?

²³ Long Rul Blong Wan Taosen Yia, ol blesing blong sakrifaes blong Jisas bambae oli kasem ol man tru long Hae Pris Jisas mo ol 144,000 pris we oli wok aninit long hem. Taswe i stret we reva blong wora blong laef i ron i pas long medel blong rod blong Nyufala Jerusalem. Hemia Isrel long saed blong speret, mo hem wetem Jisas oli olsem trufala laen blong Ebraham. (Galesia 3:16, 29) From samting ya, taem wora blong laef i ron olsem wan reva i pas long medel blong rod blong bigfala taon ya, “ol man blong ol kantri long wol” bambae oli gat jans blong kasem blesing from laen blong Ebraham. Promes we Jeova i mekem long Ebraham bambae i kamtru fulwan.—Jenesis 22:17, 18, NW.

Ol Tri Blong Laef

24. ?Long tufala saed blong reva ya, Jon i luk wanem? ?Oli pija long wanem?

²⁴ Long vison blong Esikel, reva ya i ron bigwan. Mo tu profet ya i luk ol defren kaen tri we oli stap karem frut long tu saed blong reva ya. (Esikel 47:12) ?Be Jon i luk wanem? Hemia: “Mo long tufala saed blong hem, i gat ol tri blong laef, we oli stap karem frut blong olgeta twelef taem long wan yia, wan taem long wan manis. Mo lif blong ol tri ya oli blong tekemaot sik blong ol man blong ol kantri long wol.” (Revelesen 22:2b) ‘Ol tri ya blong laef’ oli olsem pija blong sam samting we Jeova i mekem blong givim laef blong olwe long ol man we oli obei long hem.

25. ?Wanem sam bigfala samting we Jeova bambae i mekem blong givhan long ol man we oli obei long hem long Paradaes long wol?

²⁵ !Jeova i mekem plante bigfala samting blong givhan long ol gudfala man! Oli save dring long ol klin wora ya, mo tu oli save kakae ol defren kaen frut blong ol tri ya we oli givim laef. !Sore tumas, faswan papa mama blong yumi tufala i no glad long ol frut we “oli gud tumas blong kakae” we God i givim long olgeta long Paradaes long Iden! (Jenesis 2:9) Be naoia fulwol i kam Paradaes, mo Jeova i mekem se samting olsem ol lif blong ol tri ya oli save “tekemaot sik blong ol man blong ol kantri long wol.”c Hemia i moa gud i bitim ol meresin mo ol lif we yumi save kakae tede. Ol samting olsem lif long nyufala wol bambae oli mekem ol man we oli gat bilif oli kam stretgud long bodi mo long speret.

26. ?Ol tri blong laef oli pija blong wanem narafala samting tu? ?From wanem?

²⁶ Ol tri ya, we reva i givim wora long olgeta, oli save minim tu ol 144,000 man we oli olsem waef blong Smol Sipsip. Taem oli stap yet long wol, i olsem we oli stap dring long ol samting we God i mekem mo givim long olgeta blong oli save kasem laef from Jisas Kraes. Mo Baebol i kolem olgeta “ol bigbigfala tri blong stret fasin.” (Aesea 61:1-3; Revelesen 21:6) Oli karem plante frut finis long saed blong speret mo samting ya i leftemap nem blong Jeova. (Matyu 21:43) Mo long Rul Blong Wan Taosen Yia, bambae oli givim ol blesing long ol man from sakrifaes blong Jisas we bambae oli “tekemaot sik blong ol man blong ol kantri long wol,” sik ya hemia sin mo ded.—Ridim 1 Jon 1:7.

I No Moa Gat Naet

27. ?Jon i stap tokbaot wanem narafala blesing we ol man blong Nyufala Jerusalem bambae oli kasem? ?Mo wanem mining blong tok ya se “i no gat wan samting i stap we God i talem se i nogud, bambae i mas lus”?

²⁷ !Blong go insaed long Nyufala Jerusalem—tru ya, i no gat wan blesing we i bigwan moa! !Traem tingbaot, bifo ol man ya oli sinman, oli man blong wol we oli daon nomo, be naoia bambae oli folem Jisas i go long heven blong joen wetem hem long bigfala ogenaesesen blong God! (Jon 14:2) Jon i givhan long yumi blong luksave olsem wanem ol blesing we olgeta oli kasem oli bigfala tumas, i se: “Insaed long bigfala taon ya, i no gat wan samting i stap we God i talem se i nogud, bambae i mas lus. Bigfala jea ya we God i stap sidaon long hem, wetem Smol Sipsip blong hem, hem i stap insaed long taon ya, mo long fran blong jea ya, ol man blong God oli stap mekem wosip long God. Olgeta oli stap luk fes blong hem, mo hem i raetem nem blong hem long fes blong olgeta.” (Revelesen 22:3, 4) Taem fasin blong ol pris long Isrel i kam nogud, Jeova i panisim olgeta. (Malakae 2:2) Jisas i talem se “ples” blong ol man Jerusalem bifo we oli no obei long God, God i gowe long hem finis. (Matyu 23:37-39) Be long Nyufala Jerusalem, “i no gat wan samting i stap we God i talem se i nogud, bambae i mas lus.” (Ridim Sekaraea 14:11.) Ol man blong hem, taem oli stap yet long wol, oli fesem plante trabol we oli traem olgeta fulwan. Be oli winim ol traem ya finis, nao ‘bodi blong olgeta we oli blong ded, oli mas jenis blong kam we bambae oli no moa save ded samtaem. Bodi ya blong olgeta we oli blong lus oli mas jenis blong kam we bambae oli no moa save lus samtaem.’ Long saed blong olgeta, Jeova i save se bambae oli no save lego hem, olsem hem i save long saed blong Jisas tu. (1 Korin 15:53, 57) Mo tu, “bigfala jea ya we God i stap sidaon long hem, wetem Smol Sipsip blong hem,” hem tu i stap long taon ya. Samting ya bambae i mekem se taon ya i stap sefgud blong olwe.

28. ?From wanem ol man long Nyufala Jerusalem oli gat nem blong God i stap long fes blong olgeta? ?Mo wanem gudfala samting i stap fored long olgeta?

²⁸ Olsem Jon, ol memba we bambae oli go insaed long taon ya long heven, oli “man blong wok” blong God. Taswe nem blong God i stap klia long fes blong olgeta. Samting ya i soemaot klia se oli blong Hem nomo. (Revelesen 1:1; 3:12) Bambae oli glad tumas blong mekem wok blong hem olsem haf long Nyufala Jerusalem. Taem Jisas i stap yet long wol, hem i mekem wan gudfala promes long ol man we bambae oli rul long heven, i se: “Olgeta we tingting blong olgeta i klin gud, oli save harem gud, from we bambae oli luk God.” (Matyu 5:8) !Yes, ol man ya blong wok blong God bambae oli haremgud blong luk Jeova hem wan mo mekem wosip long fes blong hem!

29. ?From wanem Jon i talem se long Nyufala Jerusalem long heven “i no moa gat naet”?

²⁹ Jon i gohed i se: “Long ples ya i no moa gat naet, mo oli no moa trabol long laet, mo blong luk laet blong san, from we Hae God i laet blong olgeta.” (Revelesen 22:5a) Jerusalem bifo, olsem ol narafala taon long wol, i dipen long san blong givim laet long dei mo long mun mo ol narafala laet blong givim laet long naet. Be Nyufala Jerusalem long heven i no nidim ol laet ya. Jeova hem wan i olsem laet blong taon ya. “Naet” i wan pijatok tu, we i save min se man i stap longwe long Jeova no i badfren wetem Hem. (Maeka 3:6; Jon 9:4; Rom 13:11, 12) I no save gat ‘naet’ olsemia long gudfala ples we Hae God i stap long hem mo we laet blong hem i stap saenaot oltaem.

30. ?Olsem wanem Jon i finisim gudfala vison ya? ?Mo Revelesen i talem wanem long yumi?

³⁰ Nao Jon i finisim gudfala vison ya, hem i talem long ol slef blong God i se: “Mo olgeta oli holem nem blong king, mo bambae oli rul gogo i no save finis.” (Revelesen 22:5b) Yes, long en blong wan taosen yia, ol blesing blong sakrifaes blong Jisas oli kamtru finis long ol man. I olsem we Jisas i save givim ol man we hem i mekem olgeta oli stretgud, oli gobak long Papa blong hem. (1 Korin 15:25-28) Yumi no save wanem plan blong Jeova afta long taem ya long saed blong Jisas mo ol 144,000. Be Revelesen i talem long yumi se tabu wok blong Jeova we oli stap haremgud long hem bambae i gohed gogo i no save finis.

Hapi En Blong Revelesen

31. (a) ?Vison blong Nyufala Jerusalem i makem wanem? (b) ?Nyufala Jerusalem bambae i mekem wanem long ol man we oli obei long God?

³¹ Taem vison ya blong Nyufala Jerusalem we hem i woman blong Smol Sipsip i kamtru fulwan, hemia nao hapi en blong Revelesen, mo i stret olsem. Ol Kristin brata blong Jon long faswan handred yia we hem i raetem buk blong Revelesen i go long olgeta, oli wantem go insaed long bigfala taon ya blong rul wetem Jisas Kraes, taem bambae oli kam speret man we oli no moa save ded samtaem. Ol tabu Kristin we oli laef yet long wol tede, oli stap wet long samting ya tu. Taswe Revelesen i kasem bigfala mak blong hem taem ful namba blong grup we i olsem woman blong Kraes oli joen wetem Smol Sipsip ya. Biaen, Nyufala Jerusalem i mekem ol blesing blong sakrifaes blong Jisas oli kamtru long olgeta man, nao olgeta we oli obei long God bambae oli save kasem laef blong olwe. Long fasin ya, Nyufala Jerusalem i givhangud long Hasban blong hem we hem i King, bambae hem i joen long wok ya blong mekem wan nyufala wol blong olwe. Olgeta samting ya i blong leftemap Hae God mo Masta blong yumi, Jeova.—Matyu 20:28; Jon 10:10, 16; Rom 16:27.

32, 33. ?Yumi lanem wanem long Revelesen? ?Samting ya i mas pulum yumi blong mekem wanem?

³² !Taswe yumi haremgud tumas taem yumi kam kolosap long en blong buk blong Revelesen! Yumi luk se laswan traem we Setan mo laen blong hem oli mekem long ol man i no karem frut nating. Mo yumi luk se ol stret jajmen blong Jeova oli kamtru olgeta. Bigfala Babilon i lus blong olwe. Mo biaen olgeta haf blong rabis wol blong Setan tu oli finis. Setan hem wan wetem ol rabis enjel blong hem oli kalabus long bigfala hol mo biaen oli lus blong olwe. Nyufala Jerusalem i rul wetem Kraes long heven. Long taem ya, ol dedman oli laef bakegen mo jajmen dei i stap gohed. Sloslou ol man oli stap kam stret olgeta, mo oli haremgud long laef long Paradaes wol blong olwe. !Ol vison long Revelesen oli soemaot ol samting ya i klia nomo! !Oli pulum yumi moa blong ‘talemaot gud nyus ya we i blong oltaem nomo long olgeta man long wol long evri kala mo laen mo lanwis mo kantri’! (Revelesen 14:6, 7) ?Olsem wanem, yu yu stap traehad blong joen fulwan long bigfala wok ya?

³³ Wetem hat we i fulap long tangkyu, naoia yumi lukluk ol lastok blong Revelesen.

[Ol Futnot]