Japta 44

Revelesen Mo Yu

 1. (a) ?Enjel i talem wanem promes long Jon long saed blong ol gudfala promes blong Revelesen? (b) ?Hu i talem se, “Bambae mi mi kamtru i no longtaem”? ?Bambae hem i “kamtru” wetaem?

TAEM yu ridim gudfala store long saed blong Nyufala Jerusalem, maet samting ya i pusum yu blong askem se: ‘?Samting we i gud tumas olsemia hem i save kamtru?’ Jon i givim ansa long kwestin ya taem hem i talemaot nekis tok blong enjel i se: “Nao enjel i talem long mi, i se ‘Ol tok ya i tru, mo yu yu save bilif long hem. Mo Hae God ya we i givim Tabu Speret blong hem i go long ol profet, hem i sanem mi, mi enjel blong hem, blong mi soemaot long ol man blong hem ol samting we bambae oli kamtru i no longtaem.’ Nao Jisas i talem se ‘Yu lesin. Bambae mi mi kamtru i no longtaem. Olgeta we oli harem ol tok ya we God i givim, we i stap long buk ya, oli save harem gud.’ ” (Revelesen 22:6, 7) !Yes, ol gudfala promes long Revelesen bambae oli kamtru! Enjel i talemaot tok blong Jisas, nao hem i se bambae Jisas i kamtru “i no longtaem.” Hem i stap tokbaot taem we bambae Jisas i kam olsem “we man blong stil i kam,” blong kilimdaon ol enemi blong Jeova mo blong mekem hapi en blong Revelesen i kamtru. (Revelesen 16:15, 16) Taswe yumi mas mekem ol tok ya long “buk ya,” Revelesen, i wok long laef blong yumi, nao yumi save hapi long fyuja.

 2. (a) ?Jon i mekem wanem taem hem i luk ol dip samting long Revelesen? ?Enjel i talem wanem long hem? (b) ?Yumi lanem wanem long tok blong enjel ya se, “No, yu no mekem olsem” mo “Yu mas presem God nomo”?

² Taem yumi tingbaot ol dip samting we Jon i bin luk long Revelesen, yumi kasem save from wanem hem i mekem samting ya we hem i mekem naoia. Hem i talem se: “Mi Jon, mi harem ol samting ya, mo mi mi luk ol samting ya. Mo taem mi harem ol samting ya finis, mo mi luk ol samting ya finis, mi mi foldaon long fes blong enjel ya we i soemaot ol samting ya long mi, blong presem hem. Be hem i blokem mi, i se ‘No, yu no mekem olsem. Yumitufala i man blong wok nomo, wetem ol brata blong yu we oli stap talemaot tok we God i givim, wetem olgeta we oli obei long ol tok we i stap long buk ya. Yu mas presem God nomo.’ ” (Revelesen 22:8, 9; ridim Revelesen 19:10.) Revelesen i talemaot woning ya tu taem, se Jon i no mas wosip long ol enjel. Woning ya i stret long taem blong Jon, from we sam man oli mekem wosip olsem, no oli stap talem se ol enjel oli givim sam spesel mesej long olgeta. (1 Korin 13:1; Galesia 1:8; Kolosi 2:18) Tede, woning ya i makem long tingting blong yumi se yumi mas wosip long God nomo. (Matyu 4:10) Yumi no mas mekem klin wosip i kam doti from yumi wosip long wan man no wan samting.—Aesea 42:5, 8.

3, 4. ?Enjel i talem wanem moa long Jon? ?Olsem wanem ol tabu man long wol oli stap obei long ol tok ya?

³ Jon i gohed olsem: “Mo i talem long mi, i se ‘Yu no haedem ol tok ya we God i givim long yu, we i stap long buk ya, from we bambae i no longtaem ol samting ya oli save kamtru. Olgeta we fasin blong olgeta i nogud, bambae oli stap mekem i nogud, mo olgeta we fasin blong olgeta i doti, bambae oli stap mekem i doti. Olgeta we fasin blong olgeta i stret, bambae oli stap mekem i stret, mo olgeta we fasin blong olgeta i klin gud, bambae oli stap mekem i klin gud.’ ”—Revelesen 22:10, 11.

⁴ Tede ol tabu man we oli stap yet long wol oli obei long tok ya blong enjel ya. Oli no stap haedem ol profet tok ya. Faswan namba blong magasin ya Zion’s Watch Tower and Herald of Christ’s Presence (Julae 1879), i givim mining long plante vas long Revelesen. Long fas japta long buk ya, yumi lanem se Watch Tower Sosaeti i prentem sam narafala buk long saed blong Revelesen long ol yia we oli pas finis. Mo naoia mifala i pulum ol man we oli laekem trutok blong lukluk bakegen long ol profet tok blong Revelesen mo mining blong olgeta.

 5. (a) ?Olsem wanem long samfala we oli no wantem harem ol woning mo advaes blong Revelesen? (b) ?Ol man we oli laekem stret fasin mo fasin daon, oli mas mekem wanem?

⁵ !Sipos sam man oli no wantem harem ol woning mo advaes blong Revelesen, hemia i bisnes blong olgeta! “Olgeta we fasin blong olgeta i nogud, bambae oli stap mekem i nogud.” Oli save jus, sipos olgeta we oli stap mekem ol rabis fasin oli wantem gohed long ol rabis fasin ya, oli save ded wetem ol rabis fasin blong olgeta tu. Bambae i no longtaem, olgeta jajmen blong Jeova oli kamtru fulwan, i stat taem oli spolem Bigfala Babilon. Ol man we oli gat fasin daon oli mas kwik blong harem profet tok ya: “Yufala i mas lukaot Jeova, . . . Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova.” (Sefanaea 2:3) Long saed blong olgeta we oli givim laef blong olgeta i go long Jeova finis, “olgeta we fasin blong olgeta i stret, bambae oli stap mekem i stret, mo olgeta we fasin blong olgeta i klin gud, bambae oli stap mekem i klin gud.” Ol man we oli waes oli save se blong haremgud long sin blong smoltaem i nating nomo taem oli tingbaot ol blesing we oli save haremgud long olgeta blong olwe sipos oli lukaot stret fasin mo klin fasin. Baebol i talem se: “I gud yufala nomo i traem luklukgud long laef blong yufala, yufala nomo i jajem yufala. Yufala i mas traem faenemaot we yufala i stap holem yet fasin blong bilif, no yufala i no moa holem.” (2 Korin 13:5) Bambae yu yu kasem pei we i stret long rod we yu yu jusum mo yu stap folem.—Ol Sam 19:9-11; 58:10, 11.

 6. ?Jeova i talem wanem lastok long ol man blong ridim Revelesen?

⁶ Nao Jeova, King blong olwe, hem wan i toktok laswan long ol man we bambae oli ridim profet tok ya long Revelesen, i se: “Yu lesin. Bambae mi mi kamtru i no longtaem. Mo bambae mi karem pei blong ol man, blong givim long olgeta wanwan, stret long mak blong fasin we oli mekem. Mi mi faswan, bifo olgeta, mo bambae mi mi laswan, biaen olgeta. Yes, mi mi faswan, mo bambae mi mi laswan [Alfa mo Omega, “NW”]. Mi mi statem olgeta samting, mo bambae mi mi finisim olgeta samting. Olgeta ya we oli wasem klos blong olgeta oli klin, oli save harem gud. Oli gat raet blong kakae frut blong tri blong laef, mo blong pas insaed long doa blong bigfala taon ya. Be i gat ol narafala man we oli no save kam insaed [ol dog bambae oli stap afsaed, “NW”]. Hemia olgeta ya we oli mekem ol samting blong sem, mo we oli wokem ol bisnes blong posen mo kleva, mo we oli mekem nogud wetem woman. Hemia olgeta ya we oli man blong kilim man, mo we oli mekem wosip long ol narafala god mo we oli gyaman long tok blong olgeta mo long laef blong olgeta.”—Revelesen 22:12-15.

 7. (a) ?Jeova bambae i kam “i no longtaem” blong mekem wanem? (b) ?From wanem ol lida blong Krisendom oli no save kam insaed long Nyufala Jerusalem?

⁷ Bakegen, Jeova God i makem hae rul blong hem we i blong olwe, mo hem i makem se ol tingting we hem i talemaot fastaem bambae hem i mekem olgeta oli kamtru. Bambae hem i “kamtru i no longtaem” blong jajem ol man nogud mo blong givim pei long olgeta we oli stap traehad blong faenem hem. (Hibrus 11:6) Ol rul blong God oli jajem ol man se hu bambae i kasem pei mo hu bambae i kasem panis. Ol lida blong Krisendom oli bin mekem ol fasin olsem “ol dog we oli no save toktok.” Oli no agensem ol rabis fasin ya we Jeova i talemaot long ol vas ya. (Aesea 56:10-12; lukluk tu long Dutronome 23:18, New World Translation Reference Bible, futnot.) Yes, olgeta “oli gyaman long tok blong olgeta mo long laef blong olgeta,” long ol gyaman tijing mo kastom blong olgeta. Mo oli no harem nating ol advaes we Jisas i givim long ol seven kongregesen. Taswe oli no save kam insaed long Nyufala Jerusalem.

 8. (a) ?Hu nomo oli gat raet blong “kakae frut blong tri blong laef”? ?Wanem mining blong samting ya? (b) ?Olsem wanem bigfala kampani i “wasem klos blong olgeta” finis? ?Mo olsem wanem oli save stap klin long fes blong God?

⁸ Ol tabu Kristin we oli rili “wasem klos blong olgeta” blong oli klin long fes blong Jeova, olgeta nomo oli gat raet blong “kakae frut blong tri blong laef.” Hemia i min se oli gat raet blong kasem laef we i no save finis, mo haenem long heven. (Ridim Jenesis 3:22-24; Revelesen 2:7; 3:4, 5.) Taem oli ded olsem ol man long wol, oli save laef bakegen mo go insaed long Nyufala Jerusalem. Ol 12 enjel oli letem olgeta oli go insaed, be oli blokem olgeta we oli stap gyaman mo mekem ol rabis fasin, nating we oli stap talem se bambae oli go long heven. Bigfala kampani long wol tu oli “wasem klos blong olgeta finis blong mekem oli waet long blad blong Smol Sipsip ya,” mo oli mas gohed long klin fasin ya. Oli save mekem olsem sipos oli blokem ol rabis fasin we Jeova i givim woning from long ol vas ya, mo sipos oli harem ol advaes we Jisas i givim long ol seven kongregesen.—Revelesen 7:14; japta 2 mo 3.

 9. ?Jisas i talem wanem? ?Mesej blong hem mo ful Revelesen i go long hu fastaem?

⁹ Jeova i finisim toktok blong hem, nao Jisas i toktok. Hem i talem ol gudfala toktok blong leftemap tingting blong ol man we hat blong olgeta i stret we oli stap ridim Revelesen. Hem i se: “Mi Jisas, mi sanem ol enjel blong mi blong oli talemaot ol samting ya long yufala long ol [kongregesen, “NW”]. Mi mi [olsem rus, “NW”] blong olfala ya bifo, Deved, mi mi wan laen blong hem. Mi mi moningsta ya we i stap saengud.” (Revelesen 22:16) Yes, ol tok ya oli go fastaem long “ol kongregesen.” Mesej ya i go fastaem long kampani blong ol tabu Kristin man long wol. Olgeta toktok long Revelesen i go fastaem long ol Kristin man ya we tabu speret i makemaot olgeta, we bambae oli stap long Nyufala Jerusalem. Bigfala kampani tu i gat jans blong kasem save long ol profet tok ya, tru long kampani blong ol tabu man ya.—Jon 17:18-21.

10. ?From wanem Jisas i talem se hem i (a) ‘olsem rus blong Deved mo laen blong Deved’? (b) “moningsta ya we i stap saengud”?

¹⁰ Wok blong givim Revelesen long Jon i stap long han blong Jisas Kraes, mo Jon i mas givim long kongregesen. Jisas hem i ‘olsem rus blong Deved mo laen blong Deved’ tu. Hem i kamaot long laen blong Deved, taswe hem i stret blong kam King blong Kingdom blong Jeova. Mo bambae hem i kam ‘Papa Blong Deved Blong Olwe,’ taswe hem i olsem “rus” blong Deved. (Aesea 9:6; 11:1, 10) Hem i King long laen blong Deved blong olwe, we i no save ded samtaem. Hem bambae i mekem kontrak blong Jeova wetem Deved i kamtru, mo hem i “moningsta we i saengud” long profet tok long taem blong Moses. (Namba 24:17; Ol Sam 89:34-37) Hem i olsem ‘laet we i stap saen, gogo i brok delaet’ nao dei i kamtru. (2 Pita 1:19) Ol trik blong bigfala enemi Bigfala Babilon oli no save blokem laet ya blong i no kamtru.

Talem Se: “Yu Kam”

11. ?Jon i singaot ol man blong mekem wanem? ?Hu i save harem mesej ya?

¹¹ Naoia i taem blong Jon hem wan i toktok. Hat blong hem i fulap long tangkyu long ol samting we hem i luk mo i harem, taswe hem i talem se: “Tabu Speret wetem hemia we i olsem Woman blong Kraes, tufala i talem se ‘Yu kam.’ Mo olgeta evriwan we oli harem tok ya, oli mas talem olsem tu, se ‘Yu kam.’ Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.” (Revelesen 22:17) Tok ya i singaot olgeta man, taswe sakrifaes blong Jisas bambae i givim blesing, i no long 144,000 man nomo. Tabu speret blong Jeova i wok tru long grup we i olsem woman blong Kraes. Taswe mesej ya oli stap talemaot klia nomo se: “Yufala i kam tekem wora ya blong laef, we i olsem presen blong yufala.” (Lukluk tu long Aesea 55:1; 59:21.) Ol man we oli tosta long stret fasin, oli save “kam” mo kasem ol blesing blong Jeova. (Matyu 5:3, 6) !Olgeta we oli harem mesej ya blong ol tabu man olsem Jon, oli save haremgud long laef long wol long fyuja!

12. ?Bigfala kampani oli mekem wanem taem oli harem tok ya long Revelesen 22:17?

¹² I stat afta 1930, bigfala kampani i stap gru from we ol man oli stap “harem” tok ya. Olsem ol tabu brata blong olgeta, oli kam klin long fes blong Jeova. Oli stap wet long taem ya we bambae Nyufala Jerusalem i aot long heven i kamdaon blong givim ol blesing long ol man long wol. Bigfala kampani i harem finis gudfala mesej long Revelesen, nao oli talemaot long ol narafala se “Yu kam.” Be oli no talemaot nomo, oli pulum ol man oli kam insaed long ogenaesesen blong Jeova, mo oli trenem olgeta blong oli save go talem long ol narafala bakegen se: “Yufala we i tosta, yufala i kam.” Olsemia nao, namba long bigfala kampani i stap kam antap oltaem, naoia i gat bitim 3,000,000 man long bitim 200 kantri long wol we oli stap joen wetem kolosap 9,000 long ol tabu man ya we oli olsem woman blong Kraes. Olgeta evriwan oli talemaot long ol man se “yufala i kam tekem wora ya blong laef we i olsem presen blong yufala.”

13. ?Jisas i givim wanem woning?

¹³ Nao Jisas hem wan i tok bakegen, i se: “Mi tok strong blong wekemap olgeta man we oli harem tok we God i givim, we i stap long buk ya. Sipos man i joenem sam tok long ol tok blong buk ya, God bambae i tekem ol bigbigfala trabol we buk ya i stap tokbaot, i joenem olgeta wetem panis blong man ya. Mo sipos man i tekemaot sam tok long ol tok we God i givim, we i stap long buk ya, God bambae i tekemaot ol samting ya we buk ya i stap tokbaot, we i blong man ya. God bambae i tekemaot frut blong tri blong laef long hem, mo i tekemaot ples blong hem long bigfala taon ya we i tabu, we tufala samting ya i blong man ya fastaem.”—Revelesen 22:18, 19.

14. ?Grup olsem Jon oli mas mekem wanem long “ol tok we God i givim” long Revelesen?

¹⁴ Grup we i olsem Jon i mas talemaot “tok we God i givim” long Revelesen. Oli no mas haedem no joenem sam tok long hem. Oli mas talemaot mesej ya long open ples, oli mas “singaot bigfala blong talemaot long fes blong ol man.” (Matyu 10:27) God nomo i givim Revelesen long Jon. Wan man i no gat raet blong jenisim tok blong God hem wan, we hem i sanem i go tru long Man we i stap rul olsem King naoia, Jisas Kraes. Man we i traem jenisim tok blong hem, i stret we hem i lusum laef blong hem mo hem i kasem ol panis we bambae oli kam long Bigfala Babilon mo long ful wol ya.

15. ?Wanem mining blong tok blong Jisas se hem i “stap wetnes long ol tok ya se i tru,” mo “bambae i no longtaem, mi mi kamtru”?

¹⁵ Nao Jisas i talem lastok blong leftemap tingting blong ol man i se: “Nao hemia we i stap wetnes long ol tok ya se i tru, hem i talem se ‘I tru. Bambae i no longtaem, mi mi kamtru.’ ” (Revelesen 22:20a) Jisas hem i ‘wetnes blong God we i tru, we i no save tanem tok blong God.’ (Revelesen 3:14) Sipos hem i wetnes long ol vison long Revelesen se oli tru, hemia i stret, oli tru. Plante taem finis, hem wetem Jeova God tufala i talem se tufala bambae i kamtru “i no longtaem,” no kwik. Nao bakegen, namba faef taem, Jisas i talem samting ya. (Revelesen 2:16; 3:11; 22:7, 12, 20) Bambae tufala i “kamtru” blong jajem rabis woman blong rod ya, ol “king” blong wol no ol lida blong politik wetem ol narafala we oli agensem kingdom “blong Hae God blong yumi [Jeova], wetem Mesaea blong hem.”—Revelesen 11:15; 16:14, 16; 17:1, 12-14.

16. ?From yumi save se i no longtaem Jeova God mo Jisas tufala bambae i kamtru, yumi mas mekem wanem naoia?

¹⁶ Taem yu ridim tok ya se Jeova God mo Jisas bambae i no longtaem tufala i kamtru, samting ya i mas pulum yu blong “stap wet long Dei blong God bambae i kamtru, we yufala i stap wok blong mekem i kamtru kwik.” (2 Pita 3:12) Sipos i luk olsem se wol ya blong Setan i stap gohedgud i stanap gud, hemia i wan gyaman nomo. Sipos i luk olsem se ‘heven’ no ol lida blong wol aninit long Setan oli stap win, hemia i blong smoltaem nomo. Ol samting ya oli stap lus. (Revelesen 21:1) !Ol samting we bambae oli stap blong olwe, se Jeova, Kingdom blong hem long han blong Jisas Kraes, mo nyufala wol we hem i promes long hem! !Yumi no mas fogetem samting ya!—1 Jon 2:15-17.

17. ?Fasin tangkyu blong yu from tabu fasin blong Jeova i mas pusum yu blong mekem wanem?

¹⁷ Yu mas letem ol samting we yu lanem finis long stadi ya blong Revelesen i jenisim laef blong yu bigwan. ?Taem yu yu luk insaed long ples blong Jeova long heven, samting ya i makem long yu bigfala paoa mo tabu fasin blong Bigfala Man ya we i wokem yumi? (Revelesen 4:1 kasem 5:14) !I wan nambawan blesing blong mekem wok blong God ya! Fasin tangkyu blong yu from tabu fasin blong Jeova i mas pusum yu blong tinghevi long ol advaes blong Jisas long ol seven kongregesen. Nao yu mas blokem ol fasin olsem fasin blong wantem plante tumas samting, wosip long ol aedol, rabis fasin long saed blong seks, bilif we i hafhaf, fasin blong seraot long ol smosmol grup we oli agensem trutok, no enikaen narafala samting we i save mekem se Jeova i no moa laekem wosip blong yu. (Revelesen 2:1 kasem 3:22) Tok blong aposol Pita long grup olsem Jon i stret tu long bigfala kampani. Hem i se: “God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala tu i mas klin gud.”—1 Pita 1:15, 16.

18. ?Yu mas joen fulwan long wanem samting? ?From wanem yumi mas wok kwik tede?

¹⁸ Mo tu, samting ya i save pusum yu blong wok strong moa blong talemaot “yia ya we Jeova i makem blong soemaot gladhat blong hem long ol man, mo dei ya we God blong yumi i makem blong givimbak.” (Aesea 35:4; 61:2) Nating se yu yu blong smol kampani no bigfala kampani, yu save joen fulwan blong talemaot ol mesej long ol seven besin blong kros blong Jeova, long saed blong ol jajmen blong God long wol ya blong Setan. Long semtaem, yu save joenem voes blong yu long ol hapi man ya we oli stap talemaot gud nyus blong olwe long saed blong Kingdom blong Jeova mo Kraes blong hem. (Revelesen 11:15; 14:6, 7) Yu mas wok strong. Plante man we oli no wosip long Jeova yet, taem oli luksave se yumi stap long dei blong Masta finis, samting ya i save pusum olgeta blong joen long wok ya blong talemaot gud nyus. Olgeta tu oli mas gohed gogo oli givim laef blong olgeta i go long God mo tekem baptaes. !Yu no mas fogetem se, “taem blong ol samting ya i kam kolosap”!—Revelesen 1:3.

19. ?Wanem lastok blong olfala aposol Jon? ?Taem yu harem tok ya, yu wantem mekem wanem?

¹⁹ Yumi save joen wetem Jon blong prea strong se: “Amen. Jisas, Masta, plis yu kam.” Mo Jon, olfala aposol ya, hem i go moa i se: “Hemia prea blong mi, we Jisas Kraes Masta blong yumi, hem bambae i stap givhan long olgeta man evriwan, long gladhat blong hem.” (Revelesen 22:20b, 21) Mifala i wantem se i olsem long yu we yu ridim buk ya. Yu save bilif se hapi en blong Revelesen i kolosap, nao yu save joen wetem mifala blong talemaot wetem ful hat se “Amen.”

[Tok Blong Pija Long Pej 314]

“Ol dog bambae oli stap afsaed . . .”

[Tok Blong Pija Long Pej 315]

‘Olgeta ya we oli pas insaed long doa blong bigfala taon ya oli save harem gud’