Kristin Famle i Givhan Long Ol Olfala

“Naoia we mi mi kam olfala, yu no tanem baksaed blong yu long mi. Naoia mi mi no moa strong, yu no lego mi.”​—⁠OL SAM 71:⁠9.

 1. ?Long plante ples ol man oli gat wanem tingting long saed blong ol olfala?

MAGASIN ya The Wall Street Journal i talem se “ol stadi oli soemaot se kolosap sikis long seven (86%) olfala we ol famle blong olgeta nomo oli mekem i no stret long olgeta.” Magasin ya Modern Maturity i talem se: “Fasin blong mekem i no stret long ol olfala i wan [kruked fasin long famle] we i no moa haed be i kamaot long ol nyuspepa blong nesen ya.” Yes, long plante ples ol olfala oli harem nogud from narafala man i mekem i no stret long olgeta mo i no gat man i lukaot long olgeta. Tru ya, yumi stap long taem we plante man “oli save tingbaot olgeta nomo, . . . oli no man blong talem tangkyu, mo oli no save tingbaot God. Bambae oli no man blong sore, oli man blong mekem i strong tumas oltaem long ol narafala man.”​—⁠2 Timote 3:​1-3.

 2. ?Wanem lukluk blong Jeova long ol olfala, olsem Hibru haf blong Baebol i soemaot?

² Be, long Isrel bifo oli no mekem ol fasin ya long ol olfala. Loa i talem se: “Long fored blong wan man we i gat waet hea yu mas stanap, yu mas soem respek long wan olfala man, mo yu mas fraet gud long God blong yu. Mi mi Jeova.” Ol waes tok ya long buk blong proveb we oli kamaot long God oli givim ol advaes ya long yumi se: “Yu mas lesin long tok blong stret papa blong yu, mo yu no mas daonem mama blong yu from we hem i kam olfala.” Hem i givim oda se: “Pikinini blong mi, plis yu lesin long papa blong yu taem hem i stretem yu. Mo yu no mas lego loa blong mama blong yu.” Loa blong Moses i tijim se i stret blong gat respek mo ona ol olfala man mo woman. Tru ya, Jeova i wantem se yumi mas ona long ol olfala.​—⁠Levitikas 19:32; Proveb 1:8; 23:⁠22.

Lukaot Long Ol Olfala Long Taem Blong Baebol

 3. ?Olsem wanem Josef i soem fasin sore long olfala papa blong hem?

³ Yumi save soem respek tu long samting we yumi mekem be i no long toktok nomo. Josef i soemaot we hem i sore tumas long olfala papa blong hem. Hem i wantem se bambae Jekob i aot long Kenan i kam long Ijip, wan ples we longfala blong hem i bitim 300 kilomita. Ale Josef i sanem “ten dongki i go long papa blong hem we oli stap karem fulap ol nambawan samting blong ol man Ijip i go, mo ten narafala woman dongki we oli stap karem wit mo bred mo ol narafala kakae blong rod.” Taem Jekob i kasem Gosen, Josef i mitim hem mo “Josef i putum han blong hem i go raon long nek blong papa blong hem, i stap holem hem mo i stap krae longtaem.” Josef i mekem papa blong hem i harem gud long lav blong hem. !Hemia wan nambawan eksampel long Baebol we i soem fasin blong tingbaot ol olfala!​—⁠Jenesis 45:23; 46:​5, 29.

 4. ?From wanem eksampel blong Rut i nambawan blong folem?

⁴ Rut i soemaot wan narafala nambawan eksampel blong gat kaen fasin long ol olfala. Nating se hem i no wan woman Isrel, hem i joengud wetem olfala wido ya blong Isrel, Naomi, mama blong hasban blong hem. Rut i lego ol manples blong hem mo hem i no wantem faenem wan narafala hasban. Taem Naomi i fosem hem blong gobak long ol manples blong hem, Rut i ansa wetem sam nambawan tok ya long Baebol, se: “Yu no mas traem blong mekem mi mi lego yu, blong no moa joen wetem yu; from we long ples we yu yu go, bambae Mi mi go, mo long ples we yu slip, bambae Mi mi slip. Ol manples blong yu, bambae oli manples blong Mi, mo God blong yu, bambae i God blong Mi. Long ples we yu ded, bambae Mi mi ded long ples ya, mo long ples ya nao bambae oli berem Mi. I gud Jeova i mekem long mi olsem mo i mekem sam narafala samting be bambae ded nomo i seraotem yumitu.” (Rut 1:​16, 17) Rut i soemaot ol nambawan fasin tu taem hem i glad blong maredem olfala Boas folem fasin ya blong mared long famle blong hasban blong hem.​—⁠Rut, japta 2 kasem 4.

 5. ?Wanem ol gudfala fasin we Jisas i soemaot taem hem i stap wetem olgeta man?

⁵ Jisas i soemaot fasin ya tu taem hem i stap wetem olgeta man. Hem i gat longfala tingting, fasin sore, fasin kaen, mo i mekem tingting blong ol man oli harem gud. Hem i soemaot intres long wan pua man we i no save wokbaot 38 yia finis mo i mekem hem i kamgud bakegen. Hem i soemaot kaen fasin long ol wido tu. (Luk 7:​11-15; Jon 5:​1-9) Mo tu long taem ya we Jisas i harem nogud tumas long pos we hem i ded long hem, hem i mekem sua se oli mas lukaotgud long olfala mama blong hem we i gat bitim 50 yia finis. Ol man we Jisas i joen wetem olgeta oli haremgud, ol enemi blong hem nomo we oli gat fasin flas oli no haremgud. Taswe, hem i save talem se: “Yufala evriwan we yufala i stap hadwok tumas, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel.”​—⁠Matyu 9:36; 11:​28, 29; Jon 19:​25-27.

?Yumi Mas Soem Kaen Fasin Long Hu?

 6. (a) Hu i stret blong kasem spesel nid? (b) ?Maet yumi save askem wanem kwestin?

⁶ From we Jeova God mo Pikinini blong hem, Jisas Kraes, tufala i soem ol nambawan eksampel long fasin blong keagud, i stret nomo blong ol Kristin man oli folem eksampel blong tufala. Long medel blong yumi i gat samfala we long plante yia finis oli stap hadwok tumas mo oli stap karem ol hevi samting​—⁠ol olfala brata mo sista we oli laef kasem ol yia we oli no moa strong. Maet samfala oli papa mama no bubu blong yumi. Yumi no mas tingbaot olgeta olsem nating nomo. Yumi no mas daonem olgeta. Yumi mas gat fasin tangkyu long plante ekspiryens mo waes we oli gat long laef blong olgeta. Yes, maet samfala oli traem longfala tingting blong yumi from tingting blong olgeta i no moa wok gud mo fasin slak we plante taem ol olfala oli kasem. Be askem yu wan se, ‘?Bambae samting ya i no save hapen long mi long ol taem olsem?’

 7. ?Wanem store i soemaot se yumi mas gat lav long ol olfala?

⁷ I gat nambawan store long Medel Is we i tokbaot fasin sore we wan yangfala gel i gat long ol olfala. Wan olfala woman i stap givhan blong mekem sam wok long kijin mo i mestem wan plet glas i foldaon mo i brok. Hem i harem nogud from hem i no moa strong blong mekem ol samting; dota blong hem i kros long hem tu. Dota blong olfala woman ya i singaot smol gel blong hem mo i sanem hem i go long wan stoa long ples ya blong pem wan plet blong olfala woman ya we i no save brok from oli mekem wetem wud. Gel ya i kambak wetem tu plet we oli mekem wetem wud. Mama blong hem i askem se: “?From wanem yu pem tu plet?” Smol gel ya i ansa sloslou se: “Wan blong bubu woman mo narawan i blong yu taem yu yu kam olfala.” Yes, long wol ya bambae yumi evriwan yumi kam olfala. ?Bambae yumi gat fasin tangkyu long narafala we i soemaot longfala tingting mo kaen fasin long yumi?​—⁠Ol Sam 71:⁠9.

8, 9. (a) ?Wanem fasin yumi mas gat long ol olfala we oli stap long medel blong yumi? (b) ?Olgeta we oli jes kam Kristin oli mas tingbaot wanem?

⁸ Yumi no mas foget se plante olfala brata mo sista blong yumi oli bin joen plante yia long Kristin wok. I stret nomo blong yumi ona mo kaengud long olgeta, gat gudfala fasin blong givhan mo blong leftemap tingting. Waes man ya i talem stret se: “Waet hea i naes olsem hat blong King blong flasem hed blong man, sipos man ya i stap folem wei blong stret fasin.” Mo yumi mas gat respek long man no woman ya we i gat waet hea. Sam long ol olfala man no woman ya oli stap wok strong yet olsem ol paenia, mo plante olfala man oli stap gohed blong wok strong olsem ol elda long ol kongregesen; samfala oli mekem wok olsem ol elda we oli goraon.​—⁠Proveb 16:⁠31.

⁹ Pol i givim advaes long Timote se: “Bambae yu no go tok strong long man we i olfala. Yu mas tok gud long hem, olsem we hem i stret papa blong yu. Mo yu mas tok long yang man olsem we hem i stret brata blong yu. Yu mas tok gud long woman we i olfala, olsem we hem i stret mama blong yu. Mo yu mas tok long yang woman olsem we hem i stret sista blong yu, mo we fasin blong yu i klin gud.” (1 Timote 5:​1, 2) Olgeta we oli jes lego fasin blong wol we i no gat respek blong kam insaed long Kristin kongregesen oli mas tingbaot ol tok blong Pol, we oli stanap long lav. Ol yangfala, yufala i no mas folem ol rabis tingting we maet yufala i luk long skul. Yufala i no mas sakem advaes we ol olfala Wetnes oli givim wetem kaen fasin. (1 Korin 13:​4-8; Hibrus 12:​5, 6, 11) Be, taem ol olfala oli nidim help from oli kasem trabol long saed blong sik no mane, ?hu nao i gat faswan responsabiliti blong givhan long olgeta?

Wok Blong Famle Blong Lukaot Long Ol Olfala

10, 11. (a) ?Baebol i soemaot se hu nao i faswan blong lukaot long ol olfala? (b) ?From wanem i no isi oltaem blong lukaot long ol olfala?

¹⁰ Long faswan Kristin kongregesen, problem i kamaot long fasin blong lukaot long ol wido. ?Olsem wanem aposol Pol soemaot fasin blong givhan long ol wido? “Yu mas onagud long wido we i stap hem wan, i no gat famle blong lukaot long hem. Be sipos wan wido i gat pikinini blong hem no smol bubu blong hem, olgeta ya oli mas lan we wan nambawan wok blong ol Kristin man, oli mas lukaotgud long ol famle blong olgeta. Ol mas mekem olsem we oli pem kaon blong olgeta long ol papa mo mama blong olgeta, from we hemia samting we God i glad long hem. Be man we i no wantem lukaot long olgeta famle blong hem, mo antap long hem, we i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.”​—⁠1 Timote 5:​3, 4, 8.

¹¹ Taem ol olfala oli nidim help, ol stret famle blong olgeta nao oli mas givhan long olgeta fastaem.a Long fasin ya, ol pikinini we oli gruap finis oli save soem fasin tangkyu from fasin lav, wok, mo fasin blong keagud we papa mama blong olgeta oli soemaot. Maet samting ya i no isi. Taem ol man oli stap kam olfala, oli no moa hareap blong mekem ol samting, mo samfala oli no moa naf blong mekem sam samting. Maet sam narafala oli gat fasin blong tingbaot olgeta nomo mo oli askem tumas samting, be maet oli no luksave samting ya. Be taem yumi pikinini yet, yumi gat fasin blong tingbaot yumi nomo mo askem tumas samting tu. ?Mo ol papa mama blong yumi oli no traehad blong givhan long yumi? Yes oli mekem. Naoia ol samting oli jenis from oli olfala. Taswe, ?oli nidim wanem? Fasin sore mo longfala tingting.​—⁠Ridim 1 Tesalonaeka 2:​7, 8.

12. ?Yumi mas gat wanem fasin taem yumi stap lukaot long ol olfala​—⁠mo ol narafala insaed long Kristin kongregesen?

¹² Aposol Pol i givim advaes we i save wok taem hem i raetem se: “Oraet, yufala i tabu, yufala i man blong God. Hem i laekem yufala tumas, mo hem i jusumaot yufala finis, blong yufala i man blong hem. From samting ya, yufala i mas putum nyufala laef ya blong yufala olsem prapa klos blong yufala. Yufala i mas gat sore long ol man. Yufala i mas mekem i gud long ol man. Tingting blong tufala i mas stap daon. Yufala i mas kwaet man. Mo tingting blong yufala i mas longfala. Yufala i mas givgivhan long yufala, mo taem wan long yufala i gat sam poen agens long narawan long yufala, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yufala. Mo wetem ol fasin ya, yufala i mas laekem tumas ol man. From we fasin ya blong laekem tumas ol man, hem i save joenem plante samting, blong oli kam wan nomo stret.” !Sipos yumi mas soemaot fasin sore mo lav ya long kongregesen, yumi mas soemaot moa long famle blong yumi!​—⁠Kolosi 3:​12-14.

13. ?Taem yumi stap givhan long olfala papa mama no bubu blong yumi, maet yumi save givhan long hu tu?

¹³ Samtaem yumi mas givhan tu long ol narafala olfala famle blong yumi be i no long papa mama no bubu blong yumi nomo. Sam olfala we oli no gat pikinini, plante yia finis oli bin wok olsem misinari, elda we i goraon, mo ol narafala Kristin fultaem wok. Oli rili putum Kingdom long fasples long ful laef blong olgeta. (Matyu 6:33) From samting ya, ?yu ting se i stret blong no soemaot tingting blong keagud long olgeta? No gat. Yes yumi gat wan nambawan eksampel we i soemaot olsem wanem Watch Tower Society i lukaotgud long ol olfala memba blong Betel. Long ol hedkwota long Betel long Bruklin mo long ol branj blong Sosaeti, evri dei ol memba blong famle we oli kasem gudfala trening oli mekem wok ya blong lukaot long sam olfala brata mo sista. Oli glad nomo blong lukaotgud long ol olfala ya olsem oli ol stret papa mama no bubu blong olgeta. Long sem taem, oli lanem plante ekspiryens long ol olfala ya.​—⁠Proveb 22:⁠17.

Wok Blong Kongregesen Blong Keagud

14. ?Oli mekem wanem samting long ol olfala long faswan Kristin kongregesen?

¹⁴ Plante kantri tede oli gat ol rod blong givhan long ol olfala mo tu oli givim ol samting we oli nidim long helt blong olgeta. Ol Kristin oli save yusum olgeta saplae ya long ol kantri we oli stap mekem olsem. Be, long faswan handred yia, i no gat plante saplae olsem. From samting ya Kristin kongregesen i wok strong blong givhan long ol wido we oli pua. Pol i talem se: “Bambae yu no raetemdaon nem blong wido [blong kongregesen i givhan long hem], sipos hem i no kasem sikiste yia yet. Wido we yu raetem nem blong hem, hem i mas woman blong wan man nomo, mo i mas gat gud nem, se hem i wan woman blong mekem ol gudgudfala wok. Hem i mas wan woman we i lukaotgud long ol pikinini blong hem gogo oli kam bigfala, mo i mas wan woman we i glad blong tekem ol strenja oli kam long haos blong hem. Hem i mas wan woman blong wasem leg blong ol man blong God, mo we i givhan long olgeta we oli trabol, mo we i putum tingting blong hem finis blong mekem ol narafala gudfala wok.” Olsemia nao, Pol i soemaot se kongregesen tu i gat wok blong givhan long ol olfala. Ol olfala woman we oli strong long saed blong speret be pikinini blong olgeta i no stap long trutok, oli stret blong kasem help olsem.​—⁠1 Timote 5:​9, 10.

15. ?From wanem i nidim help blong kasem saplae we Gavman i givim?

¹⁵ Long ol ples we Gavman i givim saplae long ol olfala, plante taem oli givim fom long ol olfala ya we maet oli fraet blong fulumap. Long taem olsem, i stret blong ol elda long kongregesen oli mekem rod blong givhan long ol olfala ya blong askem, tekem no leftemap ol nid olsem. Samtaem ol jenis long ol samting olsem i save kamaot mekem se ol olfala oli save kasem moa saplae. Be i gat plante narafala gudfala rod we ol elda oli save tokbaot blong mekem se yumi save gohed blong lukaotgud long ol olfala ya. ?Wanem sam long ol rod ya?

16, 17. ?Wanem ol defren rod yumi save soem long ol olfala insaed long kongregesen mo fasin ya blong tekem man i kam long haos?

¹⁶ Fasin blong tekem man i kam long haos i wan kastom blong ol man stat long taem blong Baebol. Plante kantri long Medel Is long taem blong yumi, oli soem fasin ya long ol man we oli kam long narafala ples, we oli save givim nomo wan kap ti no kofe. From samting ya, yumi no sapraes we Pol i talem se: “Sipos sam brata blong yufala oli trabol, yufala i mas seraot ol ting blong yufala, blong givhan long olgeta. Mo oltaem, yufala i mas rere blong tekem ol narafala Kristin man oli kam insaed long ol haos blong yufala.” (Rom 12:13) Grik wod ya we oli tanem i kam fasin blong tekem man i kam long haos, phi·lo·xe·niʹa, i gat stret mining se “laekem (gat lav, no kaen fasin long) ol strenja.” Sipos wan Kristin i mas gat fasin blong tekem ol strenja, hem i mas mekem moa long olgeta we oli gat sem bilif wetem hem. Fasin blong askem olfala i kam kakae wetem yumi, plante taem i givim spel long fasin blong laef we olfala i stap folem oltaem. Sipos yu wantem harem ol waes tok mo ekspiryens long taem we yu askem ol narafala blong kam joen wetem yu, yu tekem ol olfala tu oli kam.​—⁠Ridim Luk 14:​12-14.

¹⁷ I gat plante fasin blong leftemap tingting blong ol olfala. Sipos yumi pas long wan trak blong go long Haos Kingdom no long wan asembli, ?i gat sam olfala we yumi save tekem olgeta tu? Yu no mas wet se bambae oli askem yu. Go tekem olgeta. Wan narafala gudfala rod blong givhan i blong go long stoa blong pem ol samting we oli nidim. No sipos oli save mekem, yumi save askem olgeta blong kam wetem yumi blong go pem sam samting blong yumi. Be yu mas luk se i gat ples we oli save spel long hem mo blong harem gud sipos oli nidim. I tru bambae samting ya i nidim longfala tingting mo fasin kaengud, be yumi save kasem frut from fasin tangkyu blong ol olfala ya.​—⁠2 Korin 1:11.

Wan Nambawan Samting We Kongregesen i Nidim

18. ?From wanem ol olfala oli wan blesing long kongregesen?

¹⁸ !I wan blesing blong luk olgeta we oli gat waet hea (mo tu ol olfala we oli bolhed) long wan kongregesen! I minim se long medel blong ol yangfala we oli gat paoa mo oli strong, yumi gat sam man we oli gat waes mo ekspiryens oli stap​—⁠wan samting we olgeta kongregesen oli nidim. Save blong olgeta i olsem kol wora we man i kasem long wan wel. I olsem Proveb 18:4 i talem, se: “Tok we i kamaot long maot blong wan man i olsem ol dip wora. Wel blong fasin waes i wan bigfala wora long wel we i stap spring i kam antap.” !Ol olfala oli harem gud tumas taem yumi soem se yumi laekem olgeta mo yumi gat fasin tangkyu long olgeta!​—⁠Ridim Ol sam 92:14.

19. ?Olsem wanem samfala oli bin givim paoa mo taem blong olgeta blong lukaot long olfala papa mama blong olgeta?

¹⁹ Samfala we oli joen long fultaem Kristin minista wok oli bin harem se bambae oli lego wok blong olgeta blong gobak long ples blong olgeta blong lukaot long olfala mo papa mama we oli sik. Ol brata no sista ya oli givim paoa mo taem blong olgeta blong lukaot long ol olfala ya we bifo oli bin givim paoa mo taem blong olgeta blong lukaot long ol brata no sista ya. Wan hasban mo waef, we oli misinari bifo mo tufala i stap yet long fultaem Kristin minista wok, tufala i gobak long ples blong tufala blong lukaot long olfala papa mama blong tufala. Oli bin mekem samting ya bitim 20 yia finis. Fo yia bifo, oli bin putum mama blong brata ya long haos we oli stap putum ol olfala long hem. Brata ya, we naoia hem i gat bitim 60 yia, evridei hem i go visitim mama blong hem we i gat 93 yia. Brata ya i eksplenem se: “?Olsem wanem mi save lego hem olsem? !Hem i mama blong mi!” Samtaem ol kongregesen mo ol wanwan man oli bin givhan long ol olfala ya blong mekem se ol pikinini blong olgeta oli save gohed long wok blong olgeta. I gud tu blong talem bigfala tangkyu long man we i soem lav olsem we hem i no tingbaot hem wan. Yumi mas tingtinggud blong givhan long olgeta wanwan taem olsem from yumi no save letem ol olfala ol stap olsem. Soemaot se yu laekem olfala papa mama blong yu.​—⁠Eksodas 20:12; Efesas 6:​2, 3.

20. ?Jeova i givim wanem eksampel long yumi long saed blong fasin blong lukaot long ol olfala?

²⁰ Yes, ol olfala brata mo sista blong yumi oli olsem hat blong flasem wan famle no wan kongregesen. Jeova i talem se: “Nating se yu yu olfala Mi mi sem Wan; mo long yu we yu gat waet hea Mi mi stap lukaot long yu. Bambae Mi mi mekem, bambae Mi wan mi karem mo bambae Mi mi lukaot mo mi mekem rod blong ronwe.” I gud yumi soemaot longfala tingting olsem mo lukaotgud ol olfala brata sista blong yumi long Kristin famle.​—⁠Aesea 46:4; Proveb 16:⁠31.

[Futnot]

?Yu Yu Tingbaot?

◻ ?Wanem eksampel blong Baebol we yumi gat long fasin blong lukaotgud long ol olfala?

◻ ?Yumi mas gat wanem fasin long ol olfala insaed long trutok?

◻ ?Olsem wanem ol memba blong famle oli save lukaotgud long ol olfala famle blong olgeta?

◻ ?Kongregesen i save mekem wanem blong givhan long ol olfala?

◻ ?From wanem ol olfala oli wan blesing long yumi evriwan?

[Tok Blong Pija Long Pej 23]

Rut i soem fasin kaen mo respek long olfala Naomi

[Tok Blong Pija Long Pej 24]

I gud tumas blong gat ol olfala long kongregesen