“Long Man We i Tekem Takis, Yufala i Mas Pem Takis”

LONG ol yia 17 handred, wan haeman Amerika, Benjamin Franklin, i talem se, “Long wol ya i no gat samting we yu save sua long hem be ded mo ol takis nomo.” Ol tok ya blong hem, we ol man oli stap talem bakegen plante taem, oli soemaot se yumi no save ronwe long ol takis, be tu oli soem nogud tingting we ol man oli gat long saed blong pem takis. Plante man oli tingting nogud long fasin blong pem takis olsem we oli tingting nogud long ded.

Nating se ol man oli no wantem pem takis, hemia wan responsabiliti we ol trufala Kristin oli tingting strong long hem. Aposol Pol i raet i go long Kristin kongregesen long Rom se: “Yufala i mas stretem ol kaon blong yufala. Long man we i tekem takis, yufala i mas pem takis. Long man we i tekem kastom, yufala i mas pem kastom. Long man we i stret blong yufala i ona long hem, yufala i mas ona long hem. Long man we i stret blong yufala i obei long hem, yufala i mas obei long hem.” (Rom 13:​7, New International Version) Mo Jisas Kraes i stap tokbaot ol takis taem hem i talem se: “Samting we i blong Sisa, yufala i givimbak long Sisa. Mo samting we i blong God, yufala i givimbak long God.”​—⁠Mak 12:​14, 17.

Jeova i letem “ol haeman” blong gavman oli stap mo i askem se ol man blong Hem oli mas obei long olgeta long ol samting we oli no agensem loa blong God. ?Be, from wanem God i talem long ol man blong hem blong pem takis? Pol i tokbaot tri stampa risen: (1) “Kros” blong “ol haeman” taem oli panisim ol man blong brekem loa; (2) voes blong hat mo tingting blong Kristin, we bambae i jajem hem sipos hem i gyaman long takis blong hem; (3) nid blong pem “ol man blong wok” blong gavman we oli mekem wok blong givhan long yumi mo mekem loa mo oda i kamaot. (Rom 13:​1-7) Maet plante oli no wantem pem ol takis. Be, bambae oli no laekem blong laef long wan kantri we i no gat polis mo ol man blong kilim faea, no ol man blong wokemgud rod, ol pablik skul, mo postofis. Wan loea blong Amerika, Oliver Wendell Holmes i talem olsem ya se: “Yumi pem ol takis blong stap long wan sosaeti we ol plan blong hem oli rongud.”

Fasin ya blong pem ol takis i no wan nyufala samting long ol man blong God. Long Isrel bifo, ol man oli pem takis blong sapotem ol king blong olgeta, mo sam long ol rula ya oli mekem i hevi tumas long ol man from ol takis blong olgeta. Ol man Jyu tu oli givim presen mo oli pem takis long ol narafala gavman we oli rulum olgeta, olsem Ijip, Pesia, mo Rom. Taswe ol Kristin long taem blong Pol oli savegud wanem hem i stap talem taem hem i tokbaot fasin ya blong pem ol takis. Oli save se nating se mane blong ol takis ya oli antap no oli no stret, mo nating se gavman i spenem mane ya olsem wanem, oli mas pem enikaen takis we oli askem olgeta blong pem. I sem mak long ol Kristin tede. ?Be wanem ol advaes we i save lidim yumi taem yumi stap pem ol takis blong yumi long ol taem ya we i strong tumas?

Faef Advaes Blong Stap Lidim Yumi

Yu mas gat plan. Yumi mekem wok blong Jeova mo folem hem, God ya we “i no stampa blong fasin ya we olgeta samting oli paspas. Hem i stampa blong pis.” (1 Korin 14:33; Efesas 5:⁠1) I impoten we evri samting i stap long gudfala oda taem yumi pem ol takis. ?Ol ripot blong yu oli fulwan, oli stret, mo oli stap long oda? Plante taem, i no nidim ol fael we oli sas. Maet yu gat ol folda blong ol defren ripot we yu raetem nem blong ripot long wanwan folda ya (olsem ol pepa blong soem hamas mane yu spenem mo ol wanwan samting we yu pem). Maet i nidim blong putum ol samting ya long ol folda we i bigwan moa blong wan ful yia. Long plante kantri i impoten blong kipim ol fael ya blong plante yia, from we maet gavman i lukluk bakegen ol ripot blong ol yia we i pas. Taswe yu no mas sakem eni samting gogo yu sua se yu no moa nidim ol samting ya.

Yu no mas gyaman. Pol i raetem se: “Plis, yufala i mas stap prea from mifala. Mifala i no harem olsem we tingting blong mifala i stap jajem mifala, mifala i stap harem gud nomo. Mo mifala i wantem tumas we oltaem mifala i stap mekem i stret nomo.” (Hibrus 13:​18) Tingting ya blong wantem mekem i stret i mas lidim yumi long evri disisen we yumi mekem taem yumi pem ol takis blong yumi. Fastaem, yumi tingbaot ol takis we yumi mas pem i go long gavman from ol mane we yumi winim long wok blong yumi. Long plante kantri, ol narafala mane tu​—⁠from ol presen, ol wok we oli no mekem oltaem, ol samting we oli salem⁠—​ol man oli mas pem takis long hem taem i bitim stret mak we gavman i putum. Wan Kristin we ‘tingting blong hem i no stap jajem hem’ bambae i faenemaot wanem nao ol mane we hem i mas pem takis long hem long ples blong hem mo bambae hem i pem.

Sekenwan, i gat fasin ya blong karemaot sam mane we yumi no nid blong pem takis long hem. Gavman i letem ol man blong karemaot ol ekspenses blong olgeta long mane we oli mas pem takis long hem. Long wol ya we i no gat stret fasin long hem, plante oli luk se i oraet nomo blong “folem tingting blong olgeta” long saed blong ol mane we oli karemaot. !Wan ripot long Yunaeted Stet i talem se wan man i pem wan sas kot blong waef blong hem, ale hem i hangem blong wan dei nomo long ples blong wok, blong hem i save talem se kot ya i blong “flasem” ples blong wok, nao i save karemaot mane blong hem long takis we hem i pem! Narafala man i karemaot ol ekspenses blong gel blong hem we i mared olsem samting we hem i gat raet blong karemaot from bisnes blong hem. Narafala i traem blong karemaot mane we i yusum blong pem rod blong waef blong hem blong i go wetem hem long trep long Fa Is blong sam manis, nating se woman ya i go wetem hem blong spel mo wokbaot nomo. I no gat en blong ol store olsem. Blong talem stret, sipos wan man i karemaot mane we i talem se hem i yusum long bisnes, be hem i no rili yusum blong mekem bisnes, man ya i stap gyaman​—⁠hemia samting we God blong yumi, Jeova, i no laekem nating.​—⁠Proveb 6:​16-19.

Yu mas waes. Jisas i talem long ol man blong hem blong oli ‘mas waes long ol trik, olsem snek. Oli mas kwaet man, olsem sotleg.’ (Matyu 10:16) Advaes ya i stretgud long fasin ya blong yumi blong stap pem takis. I tru moa long ol rij kantri, se tede plante man oli pem man blong lukaotem mane no sam man we oli savegud samting ya, blong faenemaot hamas mane oli mas pem long takis blong olgeta. Biaen oli saenem ol fom mo sanem jek. Hemia nao wan gudfala taem blong folem fasin waes ya we i stap long Proveb 14:15: “Man we i no gat save i bilif long evri tok, be hemia we i waes i luklukgud long ol rod blong hem.”

Plante man we oli pem takis oli mekem trabol wetem gavman from we oli ‘bilif long evri toktok’ blong sam man blong lukaot long mane we oli no mekem i stret, no oli no gat ekspiryens blong mekemrere mane blong takis. !I moa gud blong kam waes! Blong luklukgud long ol rod blong yu, ridimgud eni pepa bifo we yu saenem. Sipos wan haf blong hem, no wan haf we i no stap, no mane we oli karemaot, yu luk se i defren, askem olgeta blong eksplenem​—⁠mo askem olgeta blong ripitem bakegen sipos yu nidim olsem​—⁠gogo kasem we yu savegud se samting ya i stret mo i folem loa. I tru se, long plante kantri ol loa blong takis oli kam had blong kasem save long olgeta, be i waes blong traehad blong kasem save fulwan long eni samting we yu saenem. Samtaem, yu save faenem se wan Kristin we i savegud loa blong takis i save eksplenem long yu. Wan Kristin elda we i lukaot long ol problem blong takis olsem wan loea, i talem stret se: “!Sipos man blong lukaot mane blong yu i talem wan plan we yu harem se i gud tumas, ating i no stret!”

Karem responsabiliti blong yu. Aposol Pol i raetem se, “evri man i gat basket blong hem blong karem.” (Galesia 6:⁠5) Long saed blong pem ol takis, evri Kristin wanwan oli mas karem responsabiliti ya blong mekem i stret mo folem loa. Hemia i no wan samting we ol elda blong kongregesen oli mas jekemap long ol sipsip we oli stap long kea blong olgeta. (Skelem wetem 2 Korin 1:24.) Oli no joen long ol problem blong takis, nomo sipos wan i mekem wan bigfala samting we i no stret, maet i joen wetem sam nogud tok we ol elda oli harem long komuniti, long saed blong man ya. Long evri ples, hemia wan samting we wanwan Kristin i mas luk long hem, blong yusumgud voes blong hat mo tingting blong hem we hem i trenemgud finis blong mekem ol advaes blong Baebol i wok. (Hibrus 5:14) Samting ya i joen wetem fasin ya blong savegud se taem yu saenem pepa blong takis​—⁠nomata hu i mekem i rere​—⁠i olsem we yu talem wan tok folem loa se yu ridim pepa ya finis mo yu bilif se wanem we i stap long hem i tru.a

No mas gat poen. Ol Kristin elda oli mas man we oli ‘no gat poen nating’ blong oli save naf blong holem wok blong olgeta. Sem mak, ful kongregesen i no mas gat poen long ae blong God. (1 Timote 3:2; skelem wetem 5:27.) Taswe oli traehad blong holem wan gudnem long komuniti, taem oli stap pem takis tu. Jisas Kraes hem wan i soem eksampel long saed ya. Wan man i askem long disaepol Pita sipos Jisas i pem takis blong haos prea, wan smol samting we i pem wetem tu selva mane nomo. Blong talem tru, Jisas i fri long takis ya, from we haos prea i haos blong Papa blong hem mo i no gat wan king we i fosem stret pikinini blong hem blong pem takis. Jisas i talem samting ya; be hem i pem takis. !Yes, hem i yusum merikel blong kasem mane we i nidim! ?From wanem hem i pem takis ya we hem i no nidim blong pem? Jisas hem wan i talem se, from we “yumi no wantem mekem ol man ya blong tekem mane blong takis oli trabol.”​—⁠Matyu 17:​24-27.b

Holem Wan Gudnem We i Ona Long God

Tede ol Wetnes blong Jeova tu oli no wantem mekem trabol long ol narafala. Taswe i no wan sapraes we, olsem wan grup, oli gat gudnem long ful wol from fasin ya blong mekem i stret, taem oli pem takis long ples we oli stap long hem. Eksampel, nyuspepa ya blong Spen, El Diario Vasco i talemaot se olbaot long Spen, ol man oli ronwe long ol takis we oli mas pem, be tingbaot se: “Ol Wetnes blong Jeova nomo oli no ronwe long takis. Taem oli pem no salem wan samting, oli talem trufala praes blong [samting ya].” Sem mak, nyuspepa blong Yunaeted Stet, San Francisco Examiner, sam yia bifo i talem se: “Yu save luk [ol Wetnes blong Jeova] olsem nambawan eksampel blong ol man ples. Oli kwik blong pem takis blong olgeta, lukaotgud long ol sikman, traehad blong halpem ol man we oli no save rid no raet.”

Wan trufala Kristin bambae i no wantem mekem eni samting blong spolem gud nem ya we i kamaot from hadwok blong ol Wetnes. Taem yu jusum wanem blong mekem, ?bambae yu wantem we ol man oli save yu olsem wan man blong stil from we yu no pem takis blong sevem sam mane? No gat. I tru se bambae yu glad moa blong lusum mane bitim blong spolem nem blong yu nao ol man oli tingting nogud long ol fasin blong yu mo long wosip blong yu long Jeova.

Blong talem tru, fasin blong stap gat gudnem olsem wan stret man we yu no gyaman, samtaem i save mekem we yu lusum mane. Long Gris, samwe long 2,400 yia bifo, Plato we i savegud ol waes blong wol, i talem se: “Taem i gat wan takis long ol mane we man i winim, stret man bambae i pem moa mo man we i no stret i pem smol nomo long sem mane we oli winim.” Maet hem i save ademap se man we i stret i neva sore blong pem praes we hem i mas pem blong stap olsem wan stret man. I nating nomo sipos i sas blong gat gudnem olsem. Yes, samting ya i tru long ol Kristin. Oli tinghae long gudnem blong olgeta from we i givim ona long Papa blong olgeta long heven mo i givhan blong pulum ol narafala blong folem fasin blong laef blong olgeta mo blong kam kolosap long God blong olgeta, Jeova.​—⁠Proveb 11:⁠30; 1 Pita 3:1.

Be antap moa long olgeta samting ya, ol trufala Kristin oli tinghae long fasin fren blong olgeta wetem Jeova. God i luk evri samting we oli mekem, mo oli wantem mekem hem i glad. (Hibrus 4:13) Taswe, oli agensem ol tingting we oli save pulum olgeta blong traem stilim gavman. Oli luksave se God i glad long fasin blong no gyaman, wok we i stret. (Ol Sam 15:​1-3) Mo from we oli wantem mekem hat blong Jeova i glad, oli pem olgeta takis we oli mas pem.​—⁠Proveb 27:11; Rom 13:⁠7.

[Ol futnot]